ក្រុមបាល់ទះកម្ពុជា តាំងចិត្តយកក្រុមយក្សឥណ្ឌា សម្រាប់ការប្រកួតកីឡាអាស៊ីនៅចិនល្ងាចនេះ
ភ្នំពេញ៖ ក្រុមជម្រើសជាតិបាល់ទះកម្ពុជា នឹងត្រូវធ្វើការប្រកួតជម្រុះប្រចាំពូល C ជាមួយក្រុមជម្រើសជាតិឥណ្ឌា ក្នុងព្រឹត្តិការណ៍កីឡាអាស៊ី លើកទី១៩ ឆ្នាំ ២០២២ (The 19th Asian Games 2022) ដែលបានលើកមកធ្វើ នៅឆ្នាំ២០២៣ នៅសាល China Textile City Sports Center Gymnasium នាទីក្រុង Hangzhou ប្រទេសចិន ល្ងាចម៉ោង ៦ ថ្ងៃអង្គានេះ មុនពេលពួកគេ បន្តទៅជួបក្រុមជម្រើសជាតិកូរ៉េខាងត្បូង នៅថ្ងៃទី ២១ ខែកញ្ញា។
ក្រុមជម្រើសជាតិបាល់ទះកម្ពុជា ដែលបាននឹងកំពុងធ្វើការហ្វឹកហាត់ នៅប្រទេសចិនស្រាប់នោះ បានចាត់ទុកក្រុមជម្រើសជាតិឥណ្ឌា ជាក្រុមយក្សមួយនៅអាស៊ី ប៉ុន្តែសម្រាប់ការបង្ហាញខ្លួន ជាលើកដំបូង ក្នុងព្រឹត្តិការណ៍កីឡាអាស៊ីនេះ ថ្នាក់ដឹកនាំសហព័ន្ធកីឡាបាល់ទះកម្ពុជា និងក្រុមជម្រើសជាតិកម្ពុជា បានតាំងចិត្តខ្ពស់ ក្នុងការយកឈ្នះ ឥណ្ឌា ដើម្បីទទួលបានកៅអី ឡើងទៅវគ្គពាក់កណ្តាលផ្តាច់ព្រ័ត្រ។
លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជាបានថ្លែងថា៖ «យើងត្រៀមខ្លួនបានល្អ ១០០ ភាគរយហើយ សម្រាប់ការហ្វឹកហាត់នៅប្រទេសចិនចូល ១ ខែមកនេះ ហើយសង្ឃឹមថា ការប្រកួតជាមួយក្រុមជម្រើសជាតិឥណ្ឌា នៅល្ងាចថ្ងៃអង្គារនេះ យើងនឹងធ្វើបានល្អ ដើម្បីដណ្តើមយកជ័យជម្នះជូនជាតិ»។
ការលើកឡើងបែបនេះ របស់លោក អាំង សិរីពិសិដ្ឋ ត្រូវបានធ្វើឡើង តាមរយៈការឡាយផ្ទាល់ នាព្រឹកថ្ងៃអង្គារនេះ។ ជាមួយគ្នានេះ ដោយសារការប្រកួតនេះ មាន ១៩ ក្រុម ចែកជា ៦ ពូល ហើយគេកំណត់យកក្រុមលេខ១ និងលេខ២ តាមពូលនីមួយៗ ឡើងទៅវគ្គ ១៦ ក្រុមនោះ លោក សិរីពិសិដ្ឋ បានអះអាងទៀតថា ការដណ្តើមយកជ័យជម្នះលើក្រុមឥណ្ឌា សម្រាប់ការប្រកួត នៅថ្ងៃបើកឆាកនេះ ពិតជាសំខាន់ខ្លាំងណាស់ ដើម្បីកម្ពុជា អាចបានឡើងទៅវគ្គបន្ត។
ប្រធានប្រតិភូកីឡាបាល់ទះកម្ពុជា លោក អាំង សិរីពិសិដ្ឋ បានបញ្ជាក់ថា៖ «យើងបានខកខានចូលរួមការប្រកួតកីឡាអាស៊ីនេះ ៥៣ ឆ្នាំហើយ អ៊ីចឹងការបង្ហាញខ្លួនលើកនេះ គឺក្នុងនាមជាថ្នាក់ដឹកនាំ និងក្រុមកីឡាករទាំងអស់ បានប្តេជ្ញាចិត្តដណ្តើមយកជ័យជម្នះ ដើម្បីកិត្តិយសជាតិ ហើយការជួបក្រុមឥណ្ឌានេះ វាជាការប្រកួតដ៏សំខាន់ គឺមានន័យថា បើសិនជាយើងទទួលបានជ័យជម្នះ យើងនឹងបានឡើងទៅវគ្គបន្ត ហេតុនេះហើយទើបយើងបានតាំងចិត្តទាំងអស់គ្នាថា ត្រូវដណ្តើមយកជ័យជម្នះឱ្យបាន»។
សម្រាប់ការទៅចូលរួមការប្រកួតកីឡាអាស៊ី ឆ្នាំ ២០២៣ នៅចិននេះ សហព័ន្ធកីឡាបាល់ទះកម្ពុជា បានសម្រិតសម្រាំងយកកីឡាករឆ្នើមៗ ១២ នាក់ ឱ្យទៅចូលរួម ក្នុងនោះមានកីឡាករ សួន ចាន់ណារ៉ូ, វឿន វាសនា, ផុល រតនៈ, សឿន ហេង, គួច ម៉ុម, ប៊ន ណារិទ្ធ, ពិន សារ៉ុន, មឿន ម៉េងឡាយ, ខឹម សុវណ្ណដារ៉ា, ធី ម៉េងហួង, មួន និមល និង ឌិន ស៊ីដែន ក្រោមការដឹកនាំរបស់លោក អាំង សិរីពិសិដ ជាប្រធានប្រតិភូ ព្រមទាំងគ្រូបង្គោលជនជាតិចិន លោក លី ជូន និងគ្រូជំនួយគុយបា លោក ហ្វ្រីអូល បារីយូស បិតតុ៕
