កីឡាករ ធន់ អៀនឡេង បាន​ក្លាយជា​បេក្ខភាព​ទី​២ បន្ទាប់ពី ពុទ្ធ សំបូរ ដែល​បាន​ក្លាយជាម្ចាស់​ជើងឯក ក្នុងការ​ប្រកួត​ ​«ជើងឯក​គុនខ្មែរប៉ុស្តិ៍​លេខ​៥» បន្ទាប់ពី​រូប​គេបាន​យក​ឈ្នះ​លើ​មិត្ត​រួមជាតិ បាន លីម យ៉ាង​លំបាក​នោះ តែ​ការសន្លប់​របស់​កីឡាករ​ថៃ Fa Vanmey ក្រោម​ទម្ងន់ជើង ឃន សុម៉ាលី ត្រូវបានគេ​មើលឃើញ​ថា វាហាក់មិនសូវទំនង ទៅនឹង​ទម្ងន់​ទាត់​ត្រូវ​​នោះ​ទេ។


​តាម​រយៈ​ការ​ប្រកួត នៅលើ​សង្វៀន​ប៉ុស្តិ៍​លេខ៥ កាលពី​យប់ថ្ងៃទី​១៩ ខែវិច្ឆិកា កន្លង​មក​នេះ ធន់ អៀនឡេង និង បាន លីម ដែល​ធ្លាប់​បានជួបគ្នាជា​ច្រើនលើក​មក​ហើយ​នោះ ​បានប្រើ​ពេល​ចូល​៣នាទី នៅ​ក្នុង​ទឹកទី​១ ដើម្បី​ទាត់​សង​គ្នា ប៉ុន្តែ​ស្នៀត​នេះ ហាក់មិនសូវ​ទទួលបានផល​ប៉ុន្មាន​ឡើយ។


យ៉ាង​ណាក៏​ដោយ ចាប់ពីទឹក​ទី​២ ដល់​ទឹក​ទី​៥ អ្នកទាំង​២នេះ បាន​ព្យាយាម​ប្រើ​កណ្តាប់​ដៃ ជង្គង់ និង​វាយ​កែង​សង​គ្នា​យ៉ាង​រន្ថើន ​បង្កើត​​ឱ្យមានការ​ភ្ញាក់ផ្អើល សម្រាប់​​អ្នក​ទស្សនា ហើយ​តាម​​រយៈការ​វាយ​សងគ្នា​ដោយ​ស្នៀតចម្រុះនោះ ត្រូវបាន​គេ​មើលឃើញ​ថា បាន លីម ចេញ​កណ្តាប់​ដៃ​​បានលឿនជាង ប៉ុន្តែ​ ធន់ អៀនឡេង  បានវាយ​ចេញ​ច្រើន​ជាង និងមាន​ផ្លែ​កែង​ធ្ងន់ៗ​​ជាង។


​តាម​រយៈការ​ប្រកួត​យ៉ាងស្វិត​ស្វាញ​នេះ ​បាន​ធ្វើ​ឱ្យ​ចៅក្រម​ដាក់​ពិន្ទុ មានការ​ពិបាក ក្នុង​ការ​សម្រេច​ផងដែរ ព្រោះ​ចំនួន​វាយ​ចំ​គោលដៅ​របស់​អ្នកទាំង​២ មិន​លើសខ្វះ​គ្នា​នោះ​ទេ ហើយសម្បីតែ​ពិធីករជា​កីឡាករ​ប្រដាល់ ឡុង សុវណ្ណឌឿន ក៏បាន​និយាយ​បែប​នេះដែរថា «ពិត​ជា​​មាន​ការពិបាក ក្នុង​ការ​ផ្តល់​ពិន្ទុ»។ តែទោះបីជា​យ៉ាង​ណា បន្ទាប់ពីការពិនិត្យ​មើល​ទៅលើការ​ផ្តល់​ពិន្ទុ​របស់​ចៅ​ក្រម​ទាំង​៥​នាក់យ៉ាងល្អិតល្អន់ គឺ​គណៈកម្មការ​រៀបចំ បានប្រកាស​ឱ្យ ធន់ អៀន​ឡេង ឈ្នះពិន្ទុ។


ជាមួយជ័យជម្នះ​នេះ បានជួយ​ឱ្យ ធន់ អៀនឡេង ទទួល​បានប្រាក់រង្វាន់​ចំនួន​១,២លាន​រៀល ហើយ​រូបគេ ក៏បាន​ក្លាយជា​បេក្ខភាព​ម្នាក់ ដែល​ត្រូវ​ដាក់​ឱ្យ​ប្រកួត​អន្តរជាតិ នៅលើ​សង្វៀន​បុស្តិ៍​លេខ​៥ ជាមួយ​ការ​​ទទួលបាន​តម្លៃ​ខ្លួន​ខ្ពស់ជាង​មុន​ផងដែរ ចំណែក បាន លីម ក៏​ទទួលបាន​ប្រាក់​​រង្វាន់​ចំនួន១​លាន​រៀលផងដែរ ខណៈ​​​ការ​ប្រកួត​ «ជើងឯក​គុនខ្មែរប៉ុស្តិ៍​លេខ​៥» ត្រូវ​បាន​អ្នក​​គ្រប់​គ្រង​កម្មវិធី​ប្រដាល់ប្រចាំ​​សង្វៀន​ប៉ុស្តិ៍​លេខ៥ លោក សេង  កដិកា ​អះអាង​ថា ជាការ​ជំរុញ​​​​ឱ្យ​​កីឡាករ​កម្ពុជា ខំ​ប្រឹង​ប្រកួត​គ្នា​អស់​ពីសមត្ថភាព ដើម្បី​បណ្តុះ​បាន​ធនធានកីឡាករ​មាន​សមត្ថ​ភាព​​ល្អៗ សម្រាប់វ៉ៃ​តំណាង​ឱ្យកម្ពុជា។


ដោយឡែក សម្រាប់ការ​ប្រកួត​មិត្ត​ភាព​អន្តរជាតិវិញ កីឡាករកម្ពុជា ឃន សុម៉ាលី ​បាន​ទាត់​ឱ្យអ្នកប្រដាល់​ថៃ ​ Fa Vanmey សុំ​ចុះចាញ់ នៅ​ចុងទឹក​ទី​២។ តែទោះបីជា​យ៉ាង​ណា ការ​សម្រេច​ចុះចាញ់​របស់ Fa Vanmey ត្រូវបានគេ​មើលឃើញ​ថា វា​មិនសូវទំនង ព្រោះ​ទម្ងន់ទាត់​ឆ្វេង​​របស់ សុម៉ាលី គឺ​ត្រូវ​ខ្សែរេញមុន រួច​ទើប​ទៅ​ត្រូវពោះ​របស់​កីឡាករ​ថៃ​ម្នាក់នេះ ប៉ុន្តែ​ Fa Vanmey បែរជា​បង្ហាញ​ការ​ចុក​ឆ្អល់ មិន​អាច​ក្រោកឈរ ដើម្បី​ប្រកួត​ទៀត​បាន។

កីឡាករ ធន់ អៀនឡេង ត្រូវបានអាជ្ញាកណ្តាលលើកដៃឱ្យឈ្នះ បាន លីម ក្នុងការប្រកួត «ជើងឯកគុនខ្មែរប៉ុស្តិ៍លេខ៥» កាលពីថ្ងៃអាទិត្យ។ រូបថត សហការី

ទង្វើ​របស់​កីឡាករ Fa Vanmey នេះ ​វា​បាន​បង្ហាញ​ពី​ការ​​​ខ្លាច ចំពោះ​ក្បាច់វាយ​ចេញ​របស់ ឃន សុម៉ាលី ព្រោះ​នៅមុន​ដួល​នេះ Fa Vanmey បាន​ទទួលរង​ការ​វាយ​កែង និង​ការ​ម៉ាត់​ពី សុម៉ាលី រាង​​ធ្ងន់ដែរ​ហើយ ហេតុ​នេះទើបគេ ​មិនព្រម​ក្រោក​ឡើង ដើម្បី​ប្រកួត​បន្ត ដោយសារ​ខ្លាច​រងគ្រោះ​ធ្ងន់ជាង​នេះ។ តែទោះបីជា​យ៉ាង​ណា គណៈកម្មការ មិន​បាន​ចាប់​កំហុស​កីឡាករ​ថៃ​​ម្នាក់​នេះទេ ​​ដោយសម្រេច​ប្រគល់​ជ័យជម្នះ​ទៅឱ្យ ឃន សុម៉ាលី តែម្តង ដើម្បីបញ្ចប់បញ្ហា។

ចំណែក​អ្នកប្រដាល់ រិន សារដ្ឋ ​របស់​ក្លិបនាគនាំសំណាង បានយកឈ្នះអ្នកប្រដាល់ថៃ Vithiya Vin Uobun ដោយពិន្ទុ សម្រាប់​ការ​ប្រកួត​ក្នុងប្រភេទ​ទម្ងន់ ៦៣,៥​ គីឡូក្រាម ប៉ុន្តែ សូត្រ ខេវិន របស់ក្លិបបក្សីស្លាបដែក បាន​ចាញ់អ្នកប្រដាល់ថៃ Chhuok Mongkhun ដោយ​ពិន្ទុ ក្នុងប្រភេទទម្ងន់ ៦៥ គីឡូក្រាម ខណៈការ​ប្រកួតនេះ ត្រូវបានគេ​មើលឃើញ​ថា ខេវិន ​មាន​សមត្ថ​ភាព​ធ្លាក់​ចុះ​ជាង​មុនឆ្ងាយ៕