គ្រូបង្វឹកក្រុមភ្នំពេញក្រោន លោក Oleg (ស្តាំ) បានចាប់ដៃស្វាគមន៍គ្រូបង្វឹកក្រុម Shan United ក្នុងសន្និសីទកាសែត កាលពីថ្ងៃពុធ។ រូប ថត CPL
ក្រុមភ្នំពេញក្រោនរបស់កម្ពុជា នឹងត្រូវធ្វើការប្រកួតកាត់សេចក្តីលើកចុងក្រោយ ក្នុងវគ្គជម្រុះតាមពូលនៃពានរង្វាន់ AFC Cup នៅថ្ងៃព្រហស្បតិ៍នេះ ដោយពួកគេ ត្រូវជួបក្រុមម្ចាស់ផ្ទះ Shan United របស់មីយ៉ាន់ម៉ា នាយប់ម៉ោង ៧ ចំណែកក្រុមម្ចាស់ផ្ទះ DH Cebu របស់ហ្វីលីពីន ក៏ត្រូវស្វាគមន៍ក្រុមកំពុងឈរនៅលេខ១ប្រចាំពូល Macarthur FC របស់អូស្រ្តាលីផងដែរ។
នៅមុនការជួបគ្នា ក្នុងពហុកីឡដ្ឋាន Thuwunna Stadium នៅទីក្រុង Yangon ប្រទេសមីយ៉ាន់ម៉ា នាព្រលប់ថ្ងៃទី១៤ ខែធ្នូនេះ ក្រុមភ្នំពេញក្រោន ធ្លាប់បានយកឈ្នះក្រុម Shan United រហូតដល់ ៤-០ សម្រាប់ការប្រកួតជុំទី១ នៅពហុកីឡដ្ឋានជាតិអូឡាំពិក កាលពីថ្ងៃទី៥ ខែតុលា ខណៈការប្រកួត៤លើកទៀត ក្រុមភ្នំពេញក្រោន បានឈ្នះ ៣-០ និងចាញ់ ៥-០ ជាមួយក្រុម Macarthur FC និងបានឈ្នះក្រុម DH Cebu ទាំង២លើក ជាមួយលទ្ធផល ៤-០ និង ៣-០។
ជាមួយលទ្ធផលនេះ ក្រុមភ្នំពេញក្រោន កំពុងឈរនៅលេខ២ ប្រចាំពូល F នេះ ដោយមាន១២ពិន្ទុ ស្មើជាមួយក្រុមលេខ១ Macarthur FC របស់អូស្រ្តាលី ហើយការមានគ្រាប់បាល់ចំណេញចំនួន ៩ គ្រាប់ បានជួយឱ្យភ្នំពេញក្រោន មានឱកាសអាចឡើងទៅប្រកួតនៅវគ្គ Zonal semi-finals ក្នុងនាមជាក្រុមល្អជាងគេប្រចាំនៅតំបន់អាស៊ាន (A SEAN Zone) ស្ទើរ ១០០ ភាគរយទៅហើយ។
ការមានភាគរយខ្ពស់បានឡើងទៅវគ្គបន្តនេះ ដោយសារតែក្រុម Teranganu របស់ម៉ាឡេស៊ី ដែលឈរនៅលេខ២ប្រចាំ A SEAN Zone បានបញ្ចប់ការប្រកួតជម្រុះក្នុងពូល G ទាំង ៦ លើករបស់ពួកគេ ដោយឈ្នះ៣ ស្មើ៣ មាន១២ពិន្ទុ គឺមានន័យថា លុះត្រាតែក្រុមភ្នំពេញក្រោន ភ្លាត់ចាញ់ក្រុម Shan United លើសពី ៥ គ្រាប់ ទើប Teranganu អាចដណ្តើមបានឱកាសពី ភ្នំពេញក្រោន ឡើងទៅវគ្គបន្ត ព្រោះ Teranganu មានគ្រាប់បាល់ចំណេញត្រឹម ៤ គ្រាប់ គឺតិចជាង ភ្នំពេញក្រោន ៥គ្រាប់។
តែទោះបីជាយ៉ាងណា គេមិនគិតថា ក្រុមភ្នំពេញក្រោន បណ្តោយឱ្យការមានលទ្ធផលដ៏អាក្រក់បែបនេះកើតឡើងនោះទេ។ បើទោះបីជាពួកគេ មានភាគរយតិច ក្នុងការប្រជែងយកលេខ១ ពីក្រុម Macarthur FC ប៉ុន្តែ ភ្នំពេញក្រោន បានដាក់គោលដៅបន្តយកឈ្នះក្រុម Shan United នៅយប់នេះ បើទោះបីជាដឹងថា ការប្រកួតនេះ មានការលំបាក ដោយសារ Shan United កំពុងមានទឹកចិត្តប្រកួតខ្លាំង ក្រោយពួកគេ ឈ្នះជើងឯក នៅលីគកំពូលមីយ៉ាន់ (Myanmar National League) ឆ្នាំ២០២៣នេះក៏ដោយ។
លោក Oleg Starynskyi គ្រូបង្គោលក្រុមភ្នំពេញក្រោន បាននិយាយក្នុងសន្និសីទកាសែត នៅប្រទេសមីយ៉ាន់ម៉ា កាលពីថ្ងៃពុធ ម្សិលមិញថា៖ «ការប្រកួតចុងក្រោយប្រចាំពូលF ក្នុងពានរង្វាន់ AFC Cup នេះ ពិតជាសំខាន់ ហើយក៏ជារឿងរំភើបផងដែរ សម្រាប់យើងក្នុងការត្រៀមខ្លួនទៅជុំបន្ទាប់»។
គ្រូបង្វឹកសញ្ជាតិអ៊ុយក្រែនរូបនេះ បានបន្ថែមថា៖ «Shan United ទើបក្លាយជាម្ចាស់ជើងឯកលីគកំពូលមីយ៉ាន់ម៉ា ហើយពួកគេក៏មិនអាចឡើងទៅជុំបន្ទាប់បានដូចគ្នា ដូច្នេះក្រុមនេះ នឹងមិនមានសម្ពាធអ្វីទេ ក្នុងការលេងជាមួយយើង ហើយក្រុមនេះ ក៏មានគុណភាពលេងល្អ ជាមួយកីឡាករល្អៗរបស់គេ ដែលអាចនឹងធ្វើឱ្យពួកយើង មានការពិបាកផងដែរ។ តែទោះបីជាយ៉ាងណា គោលដៅរបស់យើង គឺមិនត្រឹមតែការឡើងទៅវគ្គបន្តនោះទេ ប៉ុន្តែយើងចង់បានពិន្ទុបន្ថែមទៀត សម្រាប់ជួយក្រុមនៅកម្ពុជា ក្នុងពានរង្វាន់ AFC Cup នាឆ្នាំក្រោយៗទៀត»៕
សកម្ម ភាពប្រកួតរវាងក្រុមភ្នំពេញក្រោន (ពណ៌ ក្រហម) និង ក្រុម Shan United កាលពីថ្ងៃទី ៥ ខែតុលា ឆ្នាំ ២០២៣។ រូប ថត AFC
