ការប្រកួតកីឡាចំបាប់ជើងឯកអាស៊ីអាគ្នេយ៍លើប្រភេទក្រុមអាយុក្រោម ១៧ ឆ្នាំ នាព្រឹកថ្ងៃទី៦ ខែធ្នូ។ ហុង មិនា
ប្រតិភូកីឡាចំបាប់ចំនួន ២៧៥ នាក់ តំណាងឱ្យប្រទេសចំនួន ៧ រួមមានថៃ វៀតណាម ឡាវ សិង្ហបុរី ហ្វីលីពីន ឥណ្ឌូនេស៊ី និងម្ចាស់ផ្ទះកម្ពុជា បានយកសាលដំបូលទូកនៃពហុកីឡដ្ឋានជាតិអូឡាំពិក ជាកន្លែងដែលត្រូវធ្វើការប្រកួតប្រជែងគ្នា ដណ្តើមយកមេដាយ ពីការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ឆ្នាំ២០២៣ ដោយព្រឹត្តិការណ៍ Southeast Asia Wrestling Championship 2023 នេះ បានចាប់ផ្តើមប្រកួតពីថ្ងៃទី៦ នេះ និងត្រូវបញ្ចប់នៅថ្ងៃទី៩ ខែធ្នូ។
នៅក្នុងកិច្ចប្រជុំបច្ចេកទេស កាលពីល្ងាចថ្ងៃទី៥ ខែធ្នូ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជាប្រធានសហព័ន្ធកីឡាចំបាប់អាស៊ីអាគ្នេយ៍ បានឱ្យដឹងថា នេះជាឆ្នាំទី២ ហើយ ដែលកម្ពុជាបានទទួលការគាំទ្រ ឱ្យរៀបចំការកីឡាចំបាប់ជើងឯកអាស៊ីអាគ្នេយ៍ បន្ទាប់កម្ពុជា រៀបចំបានល្អ សម្រាប់ការប្រកួត កាលពីឆ្នាំ២០២២ គឺមុនពេលឈានទៅដល់ព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ប្រកបដោយភាពជោគជ័យ កាលពីខែឧសភា កន្លងមកនេះ។
លោកបានបន្ថែមថា៖ «បណ្ដាប្រទេសនៅអាស៊ីអាគ្នេយ៍ បានស្នើសុំកម្ពុជាឱ្យធ្វើម្ចាស់ផ្ទះការប្រកួតកីឡាចំបាប់ជើងឯកអាស៊ីអាគ្នេយ៍នេះ បន្ទាប់ពីគេមើលឃើញថា កម្ពុជាធ្វើបានល្អ ទាំងទៅលើការរៀបចំ ការកាត់សេចក្តី និងការទទួលបដិសណ្ឋារកិច្ច នាពេលកន្លងមក អ៊ីចឹងទើបបណ្ដាប្រទេសក្នុងតំបន់ បានស្នើសុំរៀបចំជើងឯកនៅកម្ពុជាម្តងទៀត និងបានបោះឆ្នោតគាំទ្រខ្ញុំ ធ្វើជាប្រធានសហព័ន្ធកីឡាចំបាប់អាស៊ីអាគ្នេយ៍ ដូច្នេះក្នុងនាមប្រធាន ខ្ញុំទទួលខុសត្រូវចូលរួម និងគាំទ្រការរៀបចំការប្រកួតនេះ»។
ជាមួយគ្នានេះ លោក ខេស៊ី បាណេត បានអះអាងថា នៅពេលបច្ចុប្បុន្ននេះ សហព័ន្ធកីឡាចំបាប់កម្ពុជា មានអាជ្ញាកណ្តាលអន្តរជាតិចំនួន៦នាក់ និងមន្រ្តីបច្ចេកទេស ដែលមានសមត្ថភាពជាច្រើននាក់ទៀត ដែលធ្វើឱ្យសហព័ន្ធកីឡាចំបាប់អន្តរជាតិ បានផ្តល់ទំនុកចិត្តដល់កម្ពុជា ជាអ្នកអនុវត្តដោយផ្ទាល់លើការងារបច្ចេកទេស ក្នុងការរៀបចំការប្រកួតជើងឯកអាស៊ាន ឆ្នាំ២០២៣នេះ។
លោកបានបញ្ជាក់ថា៖ «សម្រាប់ការប្រកួតលើកនេះ យើងមានតំណាងមកពីសហព័ន្ធកីឡាចំបាប់អន្តរជាតិ និងមានអាជ្ញាកណ្តាលអូឡាំពិកអន្តរជាតិ ជាអ្នកគ្រប់គ្រងពីលើការប្រកួត ប៉ុន្តែការងារក្រៅពីនោះដូចជាការរៀបចំប្រព័ន្ធបច្ចេកទេស និងការរៀបចំប្រព័ន្ធដាក់ពិន្ទុជាដើម គេទុកចិត្តលើកម្ពុជាយើង ដោយសារយើងមានអ្នកជំនាញបច្ចេកទេសគ្រប់គ្រាន់ ហើយយើងនឹងរក្សាឱ្យបាននូវគុណភាពនៃការរៀបចំដ៏ល្អ ប្រកបដោយយុត្តិភាព និងតម្លាភាពទៅដល់គ្រប់ប្រតិភូកីឡា ដែលបានចូលរួមប្រកួតលើកនេះ»។
គួររំឭកថា សម្រាប់ការប្រកួតកីឡាចំបាប់ជើងឯកអាស៊ីអាគ្នេយ៍ កាលពីខែធ្នូ ឆ្នាំ២០២២ ម្ចាស់ផ្ទះកម្ពុជា ដណ្ដើមបានមេដាយមាស ៣ ប្រាក់ ៣ និងសំរឹទ្ធ ១៣ មុនពេលក្រុមជម្រើសជាតិកីឡាចំបាប់កម្ពុជា បានបង្កើតកំណត់ត្រាថ្មីជាប្រវត្តិសាស្រ្ត ចំពោះការដណ្តើមបានមេដាយមាស៥ ប្រាក់៤ និងសំរឹទ្ធ១១ ក្នុងការប្រកួតស៊ីហ្គេម លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។
យ៉ាងណាមិញ សម្រាប់ការប្រកួតការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ឆ្នាំ២០២៣នេះ លោក ខេស៊ី បានដាក់ក្តីសង្ឃឹមថា ក្រុមចំបាប់កម្ពុជា នឹងដណ្តើមបានមេដាយកាន់តែច្រើន ព្រោះក្រុមអត្តពលិកចំបាប់កម្ពុជា ដែលបានចេញទៅហ្វឹកហាត់នៅប្រទេសចិននោះ ក៏បានវិលត្រឡប់មកវិញ ដើម្បីចូលរួមការប្រកួតនេះដែរ។
បន្ថែមលើនេះ ក្រៅពីការប្រកួតចំបាប់ សម្រាប់ក្រុមជំនាញ គឺការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ លើកនេះ បានបន្ថែមវិញ្ញាសាប្រកួតយុវជនអាយុក្រោម១៧ឆ្នាំ និងអាយុក្រោម២០ឆ្នាំ ដែលជាឱកាសដ៏ល្អ សម្រាប់សហព័ន្ធកីឡាចំបាប់កម្ពុជា ជំរុញការអភិវឌ្ឍគុណផលកីឡាករកីឡាការិនីវ័យក្មេងរបស់ខ្លួន ឆ្ពោះទៅកាន់ការប្រកួតអន្ដរជាតិនានា ជាពិសេសការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជា ត្រូវធ្វើម្ចាស់ផ្ទះ ជាលើកដំបូង។
លោក ខេស៊ី បាណេត បានបញ្ជាក់ថា៖ «បន្ទាប់ពីការខំប្រឹងហ្វឹកហាត់ច្រើនឆ្នាំ សម្រាប់ប្រកួតប្រជែងក្នុងស៊ីហ្គេម យើងចង់បន្ដអភិវឌ្ឍន៍ជំនាញ និងរក្សានូវគុណភាពកីឡាករកីឡាការិនីកម្ពុជាយើង ឱ្យមានការកើនឡើងរៀងរាល់ឆ្នាំ ហើយតាមគោលនយោបាយរបស់រាជរដ្ឋាភិបាល និងក្រសួងអប់រំ យុវជន និងកីឡា ក៏ផ្តោតទៅលើការបណ្តុះធនធានយុវជនផងដែរ អ៊ីចឹងការប្រកួតនេះ យើងមានគោលដៅសំខាន់២ គឺទី១ ត្រៀមការប្រកួតកីឡាស៊ីហ្គេម ឆ្នាំ២០២៥ នៅថៃ ដោយយើងចង់ឈ្នះមេដាយកាន់តែច្រើន និងទី២ ត្រៀមឆ្ពោះទៅរកការប្រកួតកីឡាយុវជនអាស៊ី ឆ្នាំ២០២៩»៕
ការប្រកួតកីឡាចំបាប់ជើងឯកអាស៊ីអាគ្នេយ៍លើប្រភេទក្រុមអាយុក្រោម ១៧ ឆ្នាំ នាព្រឹកថ្ងៃទី៦ ខែធ្នូ។ហុង មិនា
.jpg)
ហុង មិនា
ហុង មិនា
