កីឡាករប្រេស៊ីល Alexsandro អំឡុងពេលប្រកួតជាមួយកីឡាករ ពេជ្រ សម្បត្តិ នាពេលកន្លងទៅ។ រូបថត Town Sports
កីឡាករប្រេស៊ីល Alexsandro ដែលអ្នកគាំទ្រប្រដាល់ហៅកាត់ថា អេឡិច បានទទួលសិទ្ធិពេញលេញ ដើម្បីរស់នៅ និងប្រកបអាជីពប្រដាល់ នៅក្នុងប្រទេសកម្ពុជា ដោយស្របច្បាប់ហើយ បន្ទាប់ពីរូបគេបានទទួលសញ្ជាតិខ្មែរជាផ្លូវការ តាមការត្រាស់បង្គាប់របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី។
តាមព្រះរាជក្រឹត្យ ធ្វើនៅព្រះបរមរាជវាំង ថ្ងៃទី ១៣ ខែមករា ឆ្នាំ ២០២៤ ដែលមានឡាយព្រះហស្តលេខារបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី នោះ បានត្រាស់បង្គាប់ «ផ្តល់សញ្ជាតិខ្មែរ ដោយសញ្ជាតូបនីយកម្មដល់លោក អេឡិចសាន់ត្រូ បាទី ស្តាឌឺមែនដុនកា (Alexsandro Batista De Mendonca) ជនជាតិប្រេស៊ីល សញ្ជាតិប្រេស៊ីល កើតថ្ងៃទី ២៨ ខែតុលា ឆ្នាំ ១៩៩៥ នៅទីក្រុង Quebrangulo សាធារណរដ្ឋសហព័ន្ធប្រេស៊ីល ដោយប្តូរឈ្មោះជា សែន ច័ន្ទរិទ្ធីស័ក្ត (Sen Chanrithysak)»។
ជាមួយការត្រាស់បង្គាប់នេះ លោកនាយករដ្ឋមន្រ្តី ហ៊ុន ម៉ាណែត ត្រូវទទួលបន្ទុកអនុវត្តព្រះរាជក្រឹត្យនេះ ដោយផ្តល់សញ្ជាតិខ្មែរទៅឱ្យកីឡាករ Alexsandro ចាប់ពីថ្ងៃឡាយព្រះហស្តលេខាតទៅ។
ចំពោះការទទួលបានសញ្ជាតិខ្មែររបស់ Alexsandro នេះ លោក ស៊ុន រីគី ដែលជាគ្រូបង្វឹករបស់កីឡាករប្រេស៊ីលរូបនេះ បានបង្ហាញក្តីរំភើបឡើងស្រក់ទឹកភ្នែក ហើយបានចាត់ទុកការផ្តល់សញ្ជាតិនេះថា ជារឿងដ៏មានតម្លៃលើសពីជីវិតលោកទៅទៀត។
លោក រីគី បាននិយាយថា៖ «នៅពេលដែលបានឃើញព្រះរាជក្រឹត្យភ្លាម ខ្ញុំមានអារម្មណ៍កក់ក្តៅខ្លាំងបំផុត ដែលខ្ញុំពិបាកនឹងនិយាយឱ្យត្រូវជាមួយតម្លៃនៃរឿងមួយនេះ។ ខ្ញុំមិនដឹងថា ជីវិតរបស់ខ្ញុំ ស្មើនឹងរឿងមួយនេះដែរអត់? ព្រោះនេះជារឿង ដែលខ្ញុំសប្បាយចិត្តបំផុត នៅក្នុងឆាកជីវិត ហើយវាមានតម្លៃហួសពីការគិតរបស់ខ្ញុំ។ តាំងតែពីកើតមក ខ្ញុំមិនធ្លាប់គិតថា ខ្ញុំមានលទ្ធភាព ធ្វើដល់រឿងបែបនេះទេ»។
គ្រូបង្វឹកដដែលនេះ បានបន្ថែមទាំងទឹកភ្នែកថា៖ «ការទទួលបានសញ្ជាតិនេះ មិនប្រាកដថា មានលុយអាចទិញបាននោះទេ ប៉ុន្តែ អេឡិច ពិតជាមានភ័ព្វសំណាងណាស់ ដែលថ្នាក់ដឹកនាំកំពូលរបស់យើង ផ្តល់សញ្ជាតិជូនគាត់ឱ្យបានរស់នៅក្នុងប្រទេសកម្ពុជា។ ខ្ញុំមានតែលើកម្រាមដៃ ១០ សំពះអរគុណដល់សម្តេចពុក និងសម្តេចមហាបវរធិបតី ជានាយករដ្ឋមន្រ្តី ដែលលោកបានយកចិត្តទុកដាក់លើរឿងនេះ ហើយខ្ញុំក៏អរគុណដល់លោកឧកញ៉ា ស្រី ចាន់ថន ដែលបានជួយខ្នះខ្នែងលើការងារនេះផងដែរ»៕
កីឡាករប្រេស៊ីល Alexsandro អំឡុងពេលប្រកួតជាមួយកីឡាករ ពេជ្រ សម្បត្តិ នាពេលកន្លងទៅ។ រូបថត Town Sports
