ម្ចាស់មេដាយមាសស៊ីហ្គេម ឃីម ឌីម៉ា បានវាយកែងទៅលើកីឡាករថៃ Slatan Chibmerngnun សម្រាប់ការប្រកួត កាលពីយប់ថ្ងៃសៅរ៍។ រូបថត TVK
ម្ចាស់មេដាយមាសស៊ីហ្គេមមានរហស្សនាម «នាគខ្មៅ» ឃីម ឌីម៉ា និងនាគរាជខ្មៅ ឈឿង ល្វៃ សុទ្ធតែបានប្រើពេលខ្លី ក្នុងការផ្តួលកីឡាករបរទេសឱ្យសន្លប់ប៉ុន្តែជើងខ្លាំងមកពីជាយដែន សុខ ធី ប៊ិះតែនឹងចាញ់ដោយសន្លប់ ក្រោមទម្ងន់ជើងរបស់អ្នកប្រដាល់ថៃ Kittidet Khamchumphon ទៅហើយ ចំណែក គង់ សំបូរ ហាក់នៅតែមិនទាន់អស់ចិត្ត ចំពោះការចាញ់អ្នកប្រយុទ្ធអ៊ីរ៉ង់។
សម្រាប់ការប្រកួត នៅលើសង្វៀន និងព្រឹត្តិការណ៍ផ្សេងគ្នា កាលពីយប់ថ្ងៃសៅរ៍ កន្លងមកនេះ ម្ចាស់មេដាយមាសស៊ីហ្គេមផ្នែកប្រដាល់គុនខ្មែរដំបូងគេ ឃីម ឌីម៉ា ត្រូវបានគេគិតថា នឹងអាចប្រឈមការលំបាកច្រើន ខណៈរូបគេត្រូវបានដាក់ឱ្យប្រកួតជាមួយជើងខ្លាំងមកពីប្រទេសថៃ Slatan Chibmerngnun ក្នុងប្រភេទទម្ងន់ ៦០ គីឡូក្រាម ព្រោះថៃម្នាក់នេះមានសមត្ថភាពខ្លាំង ដែលទើបបានស្មើពិន្ទុជាមួយអ្នកលេងកាំភ្លើងភ្លោះ វ៉ាន់ វឿន។
ជាមួយគ្នានេះ ឃីម ឌីម៉ា ក៏នៅមិនទាន់មានភាពរឹងមាំពេញលេញ សម្រាប់ការវិលមកកាន់សង្វៀនប្រដាល់ជាថ្មីនេះផងដែរ។ តែទោះបីជាយ៉ាងណា តាមរយៈការប្រកួតជាក់ស្តែង ក្នុងព្រឹត្តិការណ៍ Krud Kun Khmer ដែលត្រូវធ្វើឡើងជាលើកដំបូង នៅលើទឹកដីខេត្តក្រចេះ កាលពីថ្ងៃទី ២០ ខែមករានេះ ឃីម ឌីម៉ា បានវាយកែងស្តាំចូលសៀតផ្កាឆ្វេងពេញទំហឹង បណ្តាលឱ្យSlatan ដួលសន្លប់ត្រឹមរយៈពេលជាង២នាទីប៉ុណ្ណោះ។
កីឡាករ គង់ សំបូរ បានទទួលរងការម៉ាត់ពីប្រដាល់អ៊ីរ៉ង់ Mohammad ក្នុងការប្រកួតអំបោះឆៅ។ រូបថត Krud
ឃីម ឌីម៉ា បានបង្ហាញភាពរីករាយខ្លាំង ចំពោះការវាយកែងផ្តួលកីឡាករថៃ Slatan ឱ្យសន្លប់បានលឿនបែបនេះ ខណៈការវាយកែងនេះ វាជាក្បាច់សម្លាប់ដ៏គ្រោះថ្នាក់របស់ ឌីម៉ា ដែលរូបគេតែងតែប្រើ និងទទួលបានផលល្អ តែលើកនេះ ពិតជាលឿនពេកហើយ។ ជាមួយជ័យជម្នះនេះ ឃីម ឌីម៉ា បានបង្ហោះសារបែបនេះថា៖ «ឈ្នះហើយបាទសូមអរគុណពុកម៉ែបងប្អូនអ្នកខេត្តក្រចេះយប់មិញ ហើយក៏អរគុណដល់អ្នកគាំទ្រទាំងអស់គ្នា»។
ផ្ទុយទៅវិញកីឡាករ គង់ សំបូរ ហាក់មិនទាន់អស់ចិត្តនោះទេ ចំពោះការចាញ់ពិន្ទុអ្នកប្រដាល់អ៊ីរ៉ង់ Mohammad សម្រាប់ការប្រកួតអំបោះឆៅជាលើកដំបូង ក្នុងព្រឹត្តិការណ៍ Krud Kun Khmer នេះដែរ ចំណែកអ្នកលេងស្នៀតជើង មឿន សុខហ៊ុច ក៏បានចាញ់ពិន្ទុជើងខ្លាំង ជាម្ចាស់ខ្សែក្រវាត់មកពីប្រទេសថៃ Jaruadsuk កាលពីយប់ថ្ងៃសៅរ៍នោះដូចគ្នា។
គង់ សំបូរ បាននិយាយក្រោយការប្រកួតថា៖ «កីឡាករអ៊ីរ៉ង់ម្នាក់នេះ ធំជាងខ្ញុំ តែស្នៀតប្រកួតរបស់គាត់មិនជាអ្វីនោះទេ គ្រាន់តែខ្ញុំអស់ជើងខ្លួនឯងតាំងពីទឹកទី១។ បើសិនជាខ្ញុំមិនអស់ជើង ខ្ញុំធានាថា គាត់នឹងសន្លប់ហើយ មិនដល់ទឹកទី៣ទេ។ខ្ញុំទាន់អស់ចិត្តចំពោះការចាញ់នេះទេហេតុនេះខ្ញុំចង់ប្រកួតសងសឹកជាមួយគាត់ម្តងទៀត»។
ដោយឡែក សម្រាប់ការប្រកួតក្នុងព្រឹត្តិការណ៍ Cambodia Kun Khmer KKIFដែលបានធ្វើនៅលើទឹកដីខេត្តសៀមរាប កាលពីយប់ថ្ងៃទី២០ ខែមករានោះដែរ ម្ចាស់មេដាយមាស ស៊ីហ្គេម ឈឿង ល្វៃ បានប្រើកណ្តាប់ដៃឆ្វេងម៉ាត់ចូលពោះពេញទំហឹង បណ្តាលឱ្យអ្នកប្រដាល់អ៊ីរ៉ង់ Hamidreza Mehrabloo សន្លប់ធំ មិនដល់១នាទីផង នៅក្នុងទឹកទី១។
ផ្ទុយពីនេះជើងខ្លាំងជាឈ្នះខ្សែក្រវាត់ពិភពលោករបស់ KKIF ថ្មីថ្មោង សុខ ធី ដែលបានបង្ហាញការប្រកួតយ៉ាងល្អ នៅក្នុងទឹក ១នោះ ត្រូវបានអ្នកប្រដាល់របស់ថៃ Kittidet Khamchumphon ទាត់ឆ្វេងចូលកញ្ចឹងក បណ្តាលឱ្យដួលទាំងវង្វេង នាំឱ្យលោកអាជ្ញាកណ្តាលរាប់ភ្លាមៗ ប៉ុន្តែសំឡេងស្នូរជួងបញ្ចប់ការប្រកួតទឹកទី ២ បានជួយសង្រ្គោះឱ្យ សុខ ធី អាចមានភាពរឹងមាំទាន់ពេលវិញ ដើម្បីប្រកួតទឹកទី៣ចុងក្រោយ។
តែទោះបីជាយ៉ាងណា សុខ ធី នៅតែគេចមិនផុតពីការចាញ់កីឡាករ Kittidet Khamchumphon ដោយពិន្ទុ ព្រោះរូបគេមិនអាចប្រើពេល៣នាទីចុងក្រោយ ដើម្បីវ៉ៃកីឡាករថៃម្នាក់នេះ ឱ្យអាជ្ញាកណ្តាលរាប់វិញនោះទេ ព្រោះ Kittidet ពិតជាមានភាពរឹងមាំខ្លាំង ហើយមានអាវុធវាយសងយ៉ាងមានប្រសិទ្ធភាព៕
