លោក ថោង រដ្ឋសក្តិ និងលោក គួច ចំរើន បានថតរួមរួមគ្នាជាមួយម្ចាស់ជយលាភី ក្នុងការប្រកួតថ្នាក់ជាតិ កាលពីថ្ងៃទ២៩ ខែមករា។ រូបថត សហព័ន្ធ
ភ្នំពេញ៖ អនុប្រធានអចិន្ត្រៃយ៍សហព័ន្ធកីឡាទូកក្តោងកម្ពុជា លោក ថោង រដ្ឋសក្តិ បានធ្វើការវាយតម្លៃខ្ពស់ ទៅដល់គ្រប់ភាគីពាក់ព័ន្ធ ដែលបានខិតខំប្រឹងប្រែងរួមគ្នា ធ្វើឱ្យការប្រកួតកីឡាទូកក្តោងជ្រើសរើសជើងឯកថ្នាក់ជាតិ អាចដំណើរការទៅបានរលូន និងបញ្ចប់ដោយជោគជ័យចំណែកលោក គួច ចំរើន អភិបាលខេត្តព្រះសីហនុ បានអះអាងថា ក្រុមអត្តពលិកដែលបានចូលរួមការប្រកួតនេះ មានស្មារតីទទួលខុសត្រូវខ្ពស់ ក្នុងការទទួលយកលទ្ធផលចាញ់ និងឈ្នះរបស់ខ្លួន។
បើទោះបីជាការប្រកួតកីឡាទូកក្តោងជើងឯកថ្នាក់ជាតិ ឆ្នាំ ២០២៣ មានកីឡាករ កីឡាការិនីចូលរួមសរុបត្រឹម ៣០ នាក់ ហើយក្នុងនោះវិញ្ញាសា Byte Boat Open មានកីឡាករតែ ២ នាក់ក្ដី ប៉ុន្តែតាមរយៈការប្រកួតប្រជែងនៅមជ្ឈមណ្ឌលជាតិហ្វឹកហ្វឺនកីឡាទូកក្តោងកម្ពុជា ក្នុងខេត្តព្រះសីហនុ កាលពីថ្ងៃទី ២៧ ដល់ទី ២៩ ខែមករា ឆ្នាំ ២០២៤ នេះ គឺពិតជាមានភាពស្វិតស្វាញខ្លាំង ហើយនេះជាអ្វីដែល លោក ថោង រដ្ឋសក្តិ បានប្រាប់ទៅក្រុមអត្តពលិកជាម្ចាស់ជើងឯកត្រូវចងចាំ និងខំរក្សាពីគុណផលរបស់ខ្លួន។
នៅក្នុងពិធីបិទការប្រកួត កាលពីថ្ងៃទី ២៩ ខែមករានោះ លោក ថោង រដ្ឋសក្តិ បានថ្លែងថា៖ «ខ្ញុំសូមអបអរសាទរដល់កីឡាករ កីឡាការិនី ដែលបានទទួលជយលាភីពីការប្រកួតជើងឯកថ្នាក់ជាតិនេះ ហើយអ្នកទទួលបានជយលាភីទាំងនេះ ត្រូវចងចាំថា ជើងឯកដ៏អស្ចារ្យម្នាក់ ត្រូវរក្សាគុណផលកីឡារបស់ខ្លួន ប្រកបដោយវិន័យ និងការស្មោះត្រង់ ចំពោះជំនាញ និងទេពកោសល្យ»។
លោកបានបន្ថែមថា៖ «ក្រុមអត្តពលិកទាំងអស់ ត្រូវប្រកាន់ខ្ជាប់នូវប្រពៃណីរបស់កីឡាទូកក្តោង គឺទី១ ត្រូវជឿជាក់លើខ្លួនឯង ដែលមានសមត្ថភាពពិតប្រាកដទី២ ត្រូវថែរក្សាបរិស្ថាននៅលើទីលានប្រកួត ទាំងនៅលើគោក និងលើផ្ទៃទឹក រីឯទី៣ ត្រូវគោរពវិន័យ និងខិតខំតស៊ូក្នុងការហ្វឹកហាត់ និងទី៤ ភាពជោគជ័យ គឺមិនអាចកើតចេញពីម្នាក់ឯងទេ»។
តាមរបាយការណ៍របស់គណៈកម្មការរៀបចំ បានឱ្យដឹងថា ការប្រកួតជើងឯកថ្នាក់ជាតិនេះ មានការប្រកួតចំនួន៥វិញ្ញាសា ហើយជាលទ្ធផលការប្រកួតវិញ្ញាសា Windsurfing Open ដែលមានកីឡាករចូលរួម ១៣ នាក់ គឺចំណាត់ថ្នាក់លេខ ១ បានទៅលើកីឡាករ ម៉ែន ចាន់ណារ៉ុង លេខ ២ ម៉ុញ ផាន់ណៈ និងលេខ ៣ គង់ សំរេច រីឯ វិញ្ញាសា Wind FoilIQ:Foil Open ដែលមានកីឡាករ ៤ នាក់ គឺលេខ ១ បានទៅ កែវ ភានុន លេខ ២ កែវ ភារុណ និងលេខ ៣ កីឡាករ សែម ប្រុសពៅ។
ចំណែកការប្រកួតវិញ្ញាសា ILCA Open ដែលមានកីឡាករកីឡាការិនី ៦ នាក់ចូលរួមនោះ លេខ ១ បានទៅលើកីឡាករ ញ៉ូវ ចាន់ លេខ ២ កីឡាករ ឡុច ដារ៉ុង និងលេខ៣ កីឡាការិនី ចាន់ សុខវាសនា រីឯវិញ្ញាសា Byte BoatOpen ដែលមានតែកីឡាករ២នាក់ចូលរួមនោះ គឺលេខ ១ បានទៅកីឡាករ ញិប ផាន់ណា និងលេខ ២ កីឡាករ ថា ប៊ុនថេង។ ចំពោះវិញ្ញាសា Optimist Open ដែលមានអត្តពលិកចូលរួម៥នាក់ គឺកីឡាករ បូ សំអ៊ី បានលេខ ១ រីឯលេខ ២ បានទៅកីឡាករ ទិត សុវណ្ណា និងលេខ៣ កីឡាករ ធឿន ដាវីត។
លោក ថោង រដ្ឋសក្តិ បានបន្ថែមថា៖ «នេះជាការប្រកួតដ៏មានសារៈសំខាន់មួយសម្រាប់បន្តកសាងសមត្ថភាព គុណភាព ទេពកោសល្យ និងវិជ្ជាជីវៈរបស់អត្តពលិក ជាពិសេសជាការវាស់ស្ទង់សមត្ថភាពរបស់មន្រ្តីបច្ចេកទេស និងចៅក្រមរបស់សហព័ន្ធ ក្រោមការជួយគាំទ្ររបស់ក្រសួងអប់រំ យុវជន និងកីឡា ដើម្បីជំរុញ និងអភិវឌ្ឍវិស័យកីឡាទូកក្តោង នៅកម្ពុជា ក្នុងការត្រៀមខ្លួនសម្រាប់ការប្រកួតកីឡាទូកក្តោងជាលក្ខណៈអន្តរជាតិ ជាពិសេសឆ្ពោះទៅកាន់ការប្រកួតកីឡាយុវជនអាស៊ី លើកទី៤ ឆ្នាំ ២០២៩ ដែលកម្ពុជាត្រូវធ្វើជាម្ចាស់ផ្ទះ»។
ចំណែកលោក គួច ចំរើន អភិបាលខេត្តព្រះសីហនុ បានស្វាគមន៍ការប្រកួតកីឡាទូកក្តោងជើងឯកថ្នាក់ជាតិ ឆ្នាំ ២០២៣ ស្របពេលក្រុងព្រះសីហនុ ទើបតែទទួលបានចំណាត់ថ្នាក់លេខ ១ ជាទីក្រុងមានពិធីបុណ្យឆ្លងឆ្នាំសកលល្អជាងគេ ប្រចាំឆ្នាំ ២០២៣ ហើយតាមរយៈការប្រកួតនេះ លោកបានមើលឃើញថា កីឡាករ កីឡាការិនី បានចូលរួមប្រកួតប្រកបដោយស្មារតីទទួលខុសត្រូវ និងស្ម័គ្រចិត្តទទួលយកលទ្ធផលចាញ់ឈ្នះ ដែលជាធាតុដ៏សំខាន់នៃសេចក្តីថ្លៃថ្នូរ ស្របតាមគោលការណ៍យុត្តិធម៌និងមិត្តភាព។
លោកបានបញ្ជាក់ នៅក្នុងពិធីបិទការប្រកួតថ្នាក់ជាតិនោះថា៖ «ភាពជោគជ័យរបស់យើងកើតចេញពីការផ្តល់កិច្ចសហការគ្នាបានយ៉ាងល្អប្រសើរ ហើយលទ្ធផល ដែលយើងទទួលបាននាពេលនេះ ពិតជាស័ក្តិសមសម្រាប់កីឡាករ កីឡាការិនី ដែលត្រូវបានធ្វើការវិនិច្ឆ័យអំពីលក្ខណៈបច្ចេកទេសភាពប៉ិនប្រសប់ និងលក្ខខណ្ឌដទៃទៀតដោយគណៈកម្មការរៀបចំការប្រកួត»៕
