ក្លិបព្រះខ័នរាជស្វាយរៀង។ រូបថត Svay Rieng FC
ភ្នំពេញៈ ក្រុមកំពុងឈរនៅលើកំពូលតារាងលីគកម្ពុជាកម្ពុជា ព្រះខ័នរាជស្វាយរៀង បានប្រកាសពីភាពជាដៃគូអន្តរជាតិជាមួយក្លិបម្ចាស់ជើងឯកនៃលីគកំពូលរបស់ឡាវ Young Elephantes FC ដែលត្រូវបានធ្វើឡើង កាលពីថ្ងៃទី៥ ខែមករា ឆ្នាំ២០២៤ ដើម្បីកសាងអនាគត និងភាពជ័យជម្នះរួមគ្នា នៅក្នុងវិស័យបាល់ទាត់នេះ។
ក្លិបមានមូលដ្ឋាននៅកីឡដ្ឋានខេត្តស្វាយរៀង ព្រះខ័នរាជស្វាយរៀង បានបង្ហាញក្តីរំភើបខ្លាំង ហើយបានចាត់ទុកការចាប់ដៃជាមួយក្លិប Young Elephantes FC នេះ ថា ជាភាពដៃគូក្លិបអន្តរជាតិជាប្រវត្តិសាស្ត្ររបស់ខ្លួន និងជាកិច្ចសហការជាយុទ្ធសាស្ត្រ ដោយមានធាតុសំខាន់ៗ ដែលបង្ហាញពីការយកចិត្តទុកដាក់រវាងម្ចាស់ក្លិបទាំង២ ដើម្បីស្វែងរកឧត្តមភាព និងភាពរីកចម្រើនជាមួយគ្នា។
ចំពោះឧត្តមភាពនៃភាពជាដៃគូនេះ ក្លិបព្រះខ័នរាជស្វាយរៀង និងក្លិប Young Elephantes FC បានផ្តោតសំខាន់ទៅលើចំណុចគោលសំខាន់ៗចំនួន៥។ នេះបើតាមការប្រកាស នៅលើផេចហ្វេសប៊ុកផ្លូវការរបស់ក្លិបព្រះខ័នរាជស្វាយរៀង កាលពីថ្ងៃទី៥ ខែមករា កន្លងមកនេះ។
ចំណុចទី១ គឺការដោះដូរកីឡាករ ដោយក្លិបទាំង២ យល់ថា ជាសិល្បៈនៃការរៀបចំការផ្លាស់ប្តូរទេពកោសល្យបែបទំនើបកម្ម និងការសម្របខ្លួន នៅលើមាត្រដ្ឋានកម្រិតពិភពលោក។
ចំណុចទី២ ការចែករំលែកព័ត៌មាន គឺការតម្រឹមចក្ខុវិស័យជាយុទ្ធសាស្ត្ររបស់ក្លិបទាំង២ ដើម្បីសម្រេចបាននូវភាពជោគជ័យរួមគ្នា តាមរយៈការសហការចែករំលែកព័ត៌មាន ហើយទី៣ កិច្ចសហការប្រព័ន្ធផ្សព្វផ្សាយ តាមរយៈបណ្តាញសង្គម រួមបញ្ចូលការចាប់ផ្ដើមកិច្ចសហប្រតិបត្តិការ ដើម្បីទាក់ទាញអ្នកទស្សនា និងពង្រឹងទំនាក់ទំនងអ្នកគាំទ្រ។
ចំពោះចំណុចទី៤ គឺក្លិបទាំង២ ផ្តោតសំខាន់ទៅលើការប្រកួតមិត្តភាព និងការជំរំហ្វឹកហាត់ទៅវិញទៅមក ហើយចំណុចនេះ ក្លិបព្រះខ័នរាជស្វាយរៀង បានបញ្ជាក់តាមរយៈសេចក្តីប្រកាសរបស់ខ្លួនថា ជាការកែលម្អ អភិវឌ្ឍជំនាញ និងការបង្កើតមិត្តភាព តាមរយៈការខិតខំប្រឹងប្រែងសហការរៀបចំឱ្យបានល្អ។
ចំណែកចំណុចទី៥ គឺការទំនាក់ទំនងធុរកិច្ចអន្តរជាតិ ដោយក្លិបព្រះខ័នរាជស្វាយរៀង បានគូសបញ្ជាក់ថា៖ «ជាការបង្កើតយុទ្ធសាស្ត្រពាណិជ្ជកម្មរួមគ្នា ដែលវាលើសពីសកម្មភាពនៅលើទីលានបាល់ទាត់។ យើងត្រួសត្រាយផ្លូវឆ្ពោះទៅកាន់អនាគតមួយ ដែលកើតចេញពីការសហការ និងជ័យជម្នះរួមគ្នា»។
សម្រាប់ការប្រកាស ភាពជាដៃគូអន្តរជាតិរវាងក្លិបព្រះខ័នរាជស្វាយរៀងរបស់កម្ពុជា និងក្លិប Young Elephantes FC នេះបានធ្វើឱ្យអ្នកគាំទ្ររបស់ក្លិបទាំង២ បង្ហាញការគាំទ្រខ្លាំង ដោយពួកគេគិតថា កិច្ចសហប្រតិបត្តិការនេះ នឹងជួយឱ្យក្លិបទាំង២នេះ ទទួលបានផលចំណេញទាំងសងខាង ព្រោះព្រះខ័នរាជស្វាយរៀង ក៏ជាក្រុមខ្លាំង និងមានមូលដ្ឋានច្បាស់លាស់ ដែលកំពុងឈរនៅលើកំពូលតារាងនៃលីគកំពូលកម្ពុជា ឆ្នាំ២០២៣-២០២៤ ជាបណ្តោះអាសន្ន ចំណែក Young Elephantes ក៏ទើបក្លាយជាម្ចាស់ជើងឯកនៃលីគកំពូលរបស់ឡាវ (Lao League 1) កាលពីឆ្នាំ២០២៣។
ជាមួយគ្នានេះ ក្លិប Young Elephantes FC ក៏មានបទពិសោធន៍ច្រើន ក្នុងការប្រកួតអន្តរជាតិផងដែរ ជាពិសេសការបង្ហាញខ្លួន ក្នុងប្រកួតពានរង្វាន់ AFC Cup ប៉ុន្តែការប្រកួត ក្នុងវគ្គជម្រុះបឋម (Preliminary Stage) ពាន AFC Cup កាលពីថ្ងៃទី១៦ ខែសីហា ឆ្នាំ២០២៣ ក្រុម Young Elephantes បានធ្លាក់ ក្រោយចាញ់ក្រុមម្ចាស់ផ្ទះភ្នំពេញក្រោនរបស់កម្ពុជា ៣-០ នៅកីឡដ្ឋានស្មាតអអេសអិន។
យ៉ាងណាក៏ដោយ សម្រាប់ការចាប់ដៃគូជាអន្តរជាតិជាមួយក្លិបព្រះខ័នរាជស្វាយរៀង ជាលើកដំបូងនេះ ក្លិប Young Elephantes បានសម្តែងការរីករាយខ្លាំង ដោយក្លិបមួយនេះ បានបង្ហោះសារ នៅលើផេចហ្វេសប៊ុកផ្លូវការរបស់ខ្លួនថា៖ «យើងថ្លែងអំណរគុណ និងមានកិត្តិយស សម្រាប់កិច្ចសហការជាមួយក្រុមកំពូលមកពីប្រទេសកម្ពុជា (ព្រះខ័នរាជស្វាយរៀង។ សូមអរគុណចេញពីបេះដូង»៕
