កីឡាករ គង់ ហូវ បានទាត់ទៅលើ រិទ្ធី សូសែន ក្នុងការប្រកួតម៉ារ៉ាតុងដណ្តើមខ្សែក្រវាត់ នៅលើទឹកដីខេត្តត្បូងឃ្មុំ កាលពីយប់ថ្ងៃព្រហស្បតិ៍។ រូបថត Ganzberg
កីឡាករ គង់ ហូវ បានស្រែកយំដូចកូនក្មេង បន្ទាប់ពីរូបគេ ត្រូវបានប្រកាសឱ្យចាញ់ពិន្ទុអ្នកប្រដាល់ជើងថ្មី រិទ្ធី សូសែន សម្រាប់ការប្រកួតម៉ារ៉ាតុនដណ្តើមខ្សែក្រវាត់ឃីកបុកស៊ីង (4MAN Kickboxing) នៅលើទឹកដីខេត្តត្បូងឃ្មុំ កាលពីយប់ថ្ងៃព្រហស្បតិ៍ ចំណែកអ្នកប្រយុទ្ធរបស់អេស្ប៉ាញ Mario Ramos និង Nico Sanabria បានសរសើរពីសមត្ថភាពប្រកួតរបស់ អេ អាំម៉ារីនភូថង និង ចាន់ រតនា ថាពិតជាល្អ និងពិបាកទប់ទល់។
សម្រាប់ការប្រកួតតាមខេត្ត ដែលរៀបចំដោយសង្វៀនថោននេះ គង់ ហូវ និង រិទ្ធី សូសែន បានចាប់ឆ្នោតប៉ះគ្នា នៅវគ្គជម្រុះដំបូង។
អ្នកទាំង២នេះ បានប្រកួតគ្នាយ៉ាងស្វិតស្វាញបំផុត ហើយជាលទ្ធផល រិទ្ធី សូសែន ត្រូវបានប្រកាសឱ្យឈ្នះ គង់ ហូវ ដោយពិន្ទុ រួចហើយ សូសែនបានបន្តយកឈ្នះ ចំរើន គុនខ្មែរ ដោយពិន្ទុទៀត នៅវគ្គផ្តាច់ព្រ័ត្រ ដើម្បីក្លាយជាម្ចាស់ខ្សែក្រវាត់យ៉ាងរំភើបបំផុត។
ប៉ុន្តែងាកមកចាប់អារម្មណ៍ពីកីឡាករ គង់ ហូវ វិញ គឺបានលត់ជង្គង់បង្ហាញការមិនពេញចិត្តនឹងការសម្រេចឱ្យចាញ់ពិន្ទុ រិទ្ធី សូសែន នោះទេ ហើយរូបគេបានស្រែកយំដោយគ្មានការអៀនខ្មាសអ្វីទាំងអស់។
ការយំស្តាយស្រណោះរបស់ គង់ ហូវ បានធ្វើឱ្យអ្នកទស្សនាផ្ទាល់មានការអាណិតអាសូរខ្លាំងដល់រូបគេ។ ចំណែក គង់ ហូវ វិញ បាននិយាយដោយទឹកភ្នែករហាម ចំពោះមូលហេតុដែលខ្លួនស្រែកយំបែបនេះថា៖ «មិនដែលបានវ៉ៃកម្មវិធីធំទេ ចុះម៉េចបានចាញ់អ៊ីចឹង»។
ការប្រកួតរវាងកីឡាករ អេ អាំម៉ារីនភូថង (ក្រហម) និងអ្នកប្រដាល់អេស្ប៉ាញ Nico Sanabria។ រូបថត Ganzberg
ដោយឡែកសម្រាប់ការប្រកួតមិត្តភាពអន្តរជាតិចំនួន៥គូ នៅរាត្រីថ្ងៃព្រហស្បតិ៍នោះដែរ កីឡាករជាបងប្អូនបង្កើត ម៉ឺន មេឃា និង អេ អាំម៉ារីនភូថង សុទ្ធតែទទួលបានជ័យជម្នះ ដោយក្នុងនោះ មេឃា បានឈ្នះម្ចាស់ខ្សែក្រវាត់ WBC មកពីប្រទេសអ៊ុយរ៉ាហ្គាយ Ivan Bodeant ដោយពិន្ទុ ហើយ អាំម៉ារីន បានឈ្នះជើងខ្លាំងរបស់អេស្ប៉ាញ Nico Sanabria ដោយពិន្ទុដូចគ្នា។
បន្ទាប់ពីការបរាជ័យ ដោយមានស្នាមបែកនៅលើក្បាលផងនោះ កីឡាករ Nico Sanabria បាននិយាយសរសើរទៅដល់ អេ អាំម៉ារីនភូថង ថា ជាកីឡាករមានកម្ពស់ខ្ពស់ និងមានសមត្ថភាពល្អ។
គេបានបញ្ជាក់ថា៖ «គាត់ជាកីឡាករល្អ ដែលមានសមត្ថភាពខ្លាំង គឺខ្ញុំបានប្រឹងប្រែងអស់ពីសមត្ថភាពហើយ។ ខ្ញុំពេញចិត្តចំពោះការប្រកួតបែបនេះ ហើយខ្ញុំសង្ឃឹមថា អ្នកគាំទ្រទាំងអស់ នឹងពេញចិត្តការប្រកួតមួយនេះដូចគ្នា»។
ចំណែកម្ចាស់មេដាយមាសស៊ីហ្គេម ឆ្នាំ២០២៣ ឈុត សេរីវ៉ាន់ថង បានយកឈ្នះកីឡាករអេស្ប៉ាញ Richi Alvarez ដោយពិន្ទុទាំងលំបាកបំផុត ព្រោះរូបគេត្រូវបានដៃគូម្នាក់នេះវាយកែងបណ្តាលឱ្យបែកចិញ្ចើមខាងស្តាំហូរឈាមមិនដាច់ រីឯ សែន ចាន់រិទ្ធីសែន ក៏បានយកឈ្នះកីឡាករអេស្ប៉ាញ Cristian Canas ដោយពិន្ទុផងដែរ។
ការប្រកួតរបស់កីឡាករ ចាន់ រតនា (ក្រហម) និងអ្នកប្រដាល់អេស្ប៉ាញ Mario Ramos កាលពីថ្ងៃទី២៤ ខែតុលា ឆ្នាំ២០២៤។ រូបថត Ganzberg
ផ្ទុយពីនេះកីឡាកររបស់កម្ពុជា ចាន់ រតនា ស្ទើរតែត្រូវបានអ្នកប្រដាល់អេស្ប៉ាញ Mario Ramos វាយឱ្យសន្លប់ទៅហើយ ព្រោះនៅទឹកទី១ Mario Ramos បានម៉ាត់ចូលពោះបណ្តាលឱ្យ រតនា ចុកឆ្អល់ ហើយត្រូវបានអាជ្ញាកណ្តាលរាប់ចំនួន២លើក ប៉ុន្តែនៅពាក់កណ្តាលទឹកទី២ ជាពិសេសនៅទឹកទី៣ ចាន់ រតនា បានព្យាយាមទាត់ និងចូលម៉ាត់យ៉ាងអំណត់បំផុត ធ្វើឱ្យ Mario Ramos ចង់គាំងម្តងៗវិញ តែលទ្ធផលចុងក្រោយរូបគេ នៅតែចាញ់ Mario Ramos ដោយពិន្ទុដដែល។
ចំពោះលទ្ធផលនេះ បានធ្វើឱ្យ Mario Ramos មានការរំភើបខ្លាំងបំផុត ព្រោះវាជាជ័យជម្នះតែមួយគត់របស់កីឡាករមកពីប្រទេសអេស្ប៉ាញ ខណៈមិត្តរួមជាតិរបស់គេ៣នាក់ទៀត សុទ្ធតែចាញ់កីឡាករកម្ពុជានោះ។ តែទោះបីជាយ៉ាងណា Mario បានពោលពាក្យសរសើរពីភាពអំណត់ និងសមត្ថភាពរបស់ ចាន់ រតនា ថា ពិតជាខ្លាំង និងពិបាកទប់ទល់ បើទោះបីជារូបគេបានវាយឱ្យ រតនា រាប់ចំនួន២ដង តាំងពីទឹកទី១។
កីឡាករ Mario Ramos បាននិយាយនៅលើសង្វៀន ក្រោយប្រកាសឱ្យឈ្នះពិន្ទុ ចាន់ រតនា បែបនេះថា៖ «ដៃគូរបស់ខ្ញុំ គាត់ខ្លាំង គឺប្រៀបដូចជាខ្សែប្រយុទ្ធដែលពិបាកនឹងទប់ទល់។ គាត់បានទាត់ផ្នែកខាងឆ្វេង ដែលធ្វើឱ្យខ្ញុំឈឺមែនទែន រីឯកណ្តាប់ដៃស្តាំរបស់គាត់ ពិតជាមានទម្ងន់ធ្ងន់ ហើយខ្ញុំពិតជាសប្បាយចិត្តដែលបានប្រកួតជាមួយគាត់ និងបានឃើញពីការគាំទ្រយ៉ាងច្រើនរបស់ប្រជាជនកម្ពុជា។ ខ្ញុំរំពឹងថា នឹងបានមកប្រកួតនៅទីនេះម្តងទៀត»៕
