សកម្មភាពហ្វឹកហាត់របស់ក្រុមព្រះខ័នរាជស្វាយរៀង នៅលើទឹកដីប្រទេសម៉ុងហ្គោលី ដែលកំពុងមានអាកាសធាតុត្រជាក់ខ្លាំង។ រូបថត ស្វាយរៀង
ក្រុមលីគកំពូលកម្ពុជា ព្រះខ័នរាជស្វាយរៀង នឹងត្រូវធ្វើការប្រកួតជាមួយក្រុមម្ចាស់ផ្ទះ SP Falcons FC របស់ម៉ុងហ្គោលី ក្នុងវគ្គជម្រុះតាមពូលពានរង្វាន់ AFC Challenge League 2024/2025 ប្រចាំតំបន់អាស៊ីខាងកើត នៅ MFF Stadium Ulaanbaatar នារសៀលម៉ោង២ថ្ងៃពុធនេះ។
ដោយឈរនៅពូលE ក្រុម SP Falcons បាននឹងកំពុងឈរនៅកំពូលតារាងជាបណ្តោះអាសន្ន បន្ទាប់ពីពួកគេបានប្រកួតស្មើ ០-០ ជាមួយក្រុមភ្ញៀវ Madura United របស់ឥណ្ឌូនេស៊ី ចំណែកកម្រិតលេងរបស់ក្រុមទាំង២នេះ ត្រូវបានលោក Jose Munoz មើលឃើញថា សុទ្ធតែមានគុណភាពល្អ ដែលនឹងផ្តល់ការលំបាកដល់ក្រុមព្រះខ័នរាជស្វាយររៀង ក្នុងការប្រជែងយកឱកាសឡើងទៅជុំបន្ទាប់។
ទន្ទឹមនឹងនេះ លោក Jose Munoz បានចាត់ទុកពានរង្វាន់ AFC Challenge Leagueនេះ ជាការប្រកួតអន្តរជាតិថ្មីមួយទៀត ដែលបានជំរុញទឹកចិត្តកាន់តែខ្លាំងក្លាទៅដល់ក្រុមស្វាយរៀង ក្នុងការប្រជែង ប៉ុន្តែពួកគេត្រូវផ្តោតអារម្មណ៍ឱ្យបានខ្លាំង និងធ្វើឱ្យបានល្អបំផុត ជាពិសេសការជួបក្រុមម្ចាស់ផ្ទះ SP Falcons ដែលជាការប្រកួតបើកឆាករបស់ខ្លួន នៅរសៀលថ្ងៃពុធនេះ។
គ្រូបង្គោលក្រុមស្វាយរៀង លោក Jose Munoz បានថ្លែងក្នុងសន្និសីទកាសែត នៅប្រទេសម៉ុងហ្គោលី កាលពីថ្ងៃអងា្គរថា៖ «យើងត្រូវចាប់ផ្តើមឱ្យបានខ្លាំង សម្រាប់ការប្រកួតនេះ ព្រោះវាជាការប្រកួតមួយដ៏តឹងតែងសម្រាប់យើង។ យើងត្រូវលេងក្រៅដី ជាពិសេសត្រូវលេងជាមួយក្រុមម្ចាស់ផ្ទះ ដែលជាក្រុមលេងខ្លាំង តែយើងក៏រំភើបក្នុងលេងដូចគ្នា»។
លោក Jose Munoz ពេលថ្លែងក្នុងសន្និសីទកាសែតនៅប្រទេសម៉ុងហ្គោលី កាលពីថ្ងៃអង្គារ។ រូបថត ស្វាយរៀង
លោកបន្ថែមថា៖ «SP Falcons ជាក្រុមខ្លាំង គឺគាត់ប្រជែង និងរត់គ្រប់ពេល ជាពិសេសគាត់ប្រជែងគ្រប់បាល់ទាំងអស់ ហើយក្រុមនេះ ក៏មានគុណភាពក្នុងការលេងបាល់ពីក្រោមទៅ ដើម្បីស្វែងរកទីតាំងដែលទូលាយ និងជាក្រុមធ្វើបានល្អ សម្រាប់បាល់រៀបចំ។ ម្យ៉ាងទៀត ដោយសារនេះជាការប្រកួតក្នុងទឹកដី អ៊ីចឹងវាបានជំរុញទឹកចិត្តពួកគាត់បន្ថែមទៀត ក្នុងការប្រកួតជាមួយក្រុមយើង»។
ចំណែកកីឡាករជប៉ុន Ryo Fujii បាននិយាយក្នុងសន្និសីទកាសែត កាលពីថ្ងៃអង្គារនោះដែរថា៖ «សម្រាប់ការប្រកួតនេះ យើងត្រូវប្រើប្រាស់ថាមពលរបស់យើងទាំងអស់ ជាពិសេសយើងត្រូវធ្វើម៉េចឱ្យបានល្អជាងគូប្រកួត ទើបយើងអាចគ្រប់គ្រងការប្រកួតហ្នឹងបាន»។
ជាមួយគ្នានេះ លោក Jose Munoz ក៏បានរំពៃមើលទៅដល់ទម្រង់លេងក្រុម Madura United របស់ឥណ្ឌូនេស៊ី ដោយលោកកត់សម្គាល់ឃើញថា ជាក្រុមលេងនៅលីគកម្រិតខ្ពស់មួយ ដែលមានកីឡាករល្អៗទាំងកីឡាករបរទេស និងកីឡាករក្នុងស្រុក ហើយនេះជាកត្តាប្រឈមរបស់ក្រុមស្វាយរៀង ក្នុងការប្រជែងជាមួយក្រុម Madura United ក៏ដូចជាក្រុម SP Falcons។
កីឡាករជាជម្រើស ១១នាក់ដំបូងរបស់ក្រុមម្ចាស់ផ្ទះ SP Falcons ពេលប្រកួតស្មើ ០-០ ជាមួយក្រុម Madura United កាលពីថ្ងៃទី២៧ ខែតុលា។ រូបថត SP Falcons
លោក Jose Munoz បានបញ្ជាក់ថា៖ «យើងដឹងហើយថា យើងមានការពិបាកទាំង២ប្រកួត ប៉ុន្តែយើងក៏ត្រូវការរក្សាកម្រិតលេងរបស់យើងនៅក្រៅដី ព្រោះយើងចង់បង្ហាញពីកម្រិតសមត្ថភាពរបស់ក្រុមមកពីលីគកំពូលកម្ពុជា ជាពិសេសគុណភាពកីឡាករ និងក្លិបរបស់យើងដូចគ្នា»។
តែទោះបីជាយ៉ាងណា គ្រូបង្វឹកសញ្ជាតិអេស្ប៉ាញ លោក Jose Munoz ក៏មានការបារម្ភទៅលើការសម្របខ្លួនរបស់កូនក្រុម នៅលើទឹកដីប្រទេសម៉ុងហ្គោលី ដែលកំពុងមានអាកាសធាតុត្រជាក់ខ្លាំង ហើយការលេងនៅលើស្មៅសិប្បនិម្មិត ក៏ជាផលលំបាកមួយផងដែរ សម្រាប់ក្រុមស្វាយរៀង បើទោះបីជាពូលE ដែលមានត្រឹម៣ក្រុមនេះ គេកំណត់យកក្រុមលេខ១ និងលេង២ ឡើងទៅលេងជុំបន្ទាប់។
លោកបានសង្កត់ធ្ងន់ថា៖ «យើងត្រូវសម្របខ្លួនទៅនឹងអាកាសធាតុ ទីលាន និងបរិយាកាសនៅទីនេះឱ្យបានលឿនតាមដែលអាចធ្វើទៅបាន ហើយខំប្រឹងធ្វើឱ្យអស់ពីសមត្ថភាពរៀងៗខ្លួន និងលេងសហការគ្នាជាក្រុម។ គោលដៅចម្បងរបស់យើង គឺដើម្បីឈានទៅលេងនៅវគ្គបន្ទាប់ទៀត ហើយវាជាមូលហេតុដែលយើងមកទីនេះ»៕
