សកម្មភាពហ្វឹកហាត់របស់លោក Felix G.Dalmas ដល់ក្រុមជម្រើសជាតិកម្ពុជា កាលពីថ្ងៃទី៨ ខែកុម្ភៈ ឆ្នាំ២០១៩ ដើម្បីត្រៀមការប្រកួតស៊ីហ្គេម ឆ្នាំ២០១៩ នៅហ្វីលីពីន។ រូបថត FFC
អតីតគ្រូបង្គោលក្រុមជម្រើសជាតិបាល់ទាត់កម្ពុជា លោក Felix G.Dalmas បានបង្ហោះសារយ៉ាងវែងអន្លាយ បង្ហាញពីទំហំចិត្តដែលលោកមានចំពោះបាល់ទាត់កម្ពុជា ក្នុងអំឡុងពេលលោកបានដឹកនាំក្រុមជម្រើសជាតិកម្ពុជា។
លោកចាត់ទុកថា ជាមោទនភាពមួយ ដែលលោកបានក្លាយជាផ្នែកមួយនៃប្រវត្តិសាស្រ្តរបស់បាល់ទាត់នៅកម្ពុជា ហើយលោកបានជំរុញ និងស្នើឱ្យអ្នកពាក់ព័ន្ធទាំងអស់ ត្រូវការពារកេរ្តិ៍ឈ្មោះ និងទង់ជាតិកម្ពុជា តាមរយៈបាល់ទាត់នេះ ដោយស្មារតីអង់អាចក្លាហានបន្តទៅទៀត។
ជាមួយការបង្ហោះសំណេរយ៉ាងវែងអន្លាយ នៅលើផេចហ្វេសប៊ុកផ្ទាល់ខ្លួន នាព្រឹកថ្ងៃពុធនេះ លោក Felix បានរំឭកទៅដល់សមិទ្ធផល ដែលលោកបានដឹកនាំក្រុមជម្រើសជាតិកម្ពុជា កាលពីឆ្នាំ២០១៩ គឺពេលដែលក្រុមកម្ពុជា បានបង្កើតប្រវត្តិសាស្រ្ត ឡើងទៅដល់វគ្គពាក់កណ្តាលផ្តាច់ព្រ័ត្រ នៃការប្រកួតស៊ីហ្គេម ឆ្នាំ២០១៩ នៅហ្វីលីពីន ជាលើកដំបូង ហើយសម្រាប់ការប្រកួតកម្រិត AFF នាពេលនោះ ក៏ក្រុមកម្ពុជាធ្វើបានល្អ ដោយនាំមកនូវដោយភាពរុងរឿង និងភាពរីករាយដល់អ្នកគាំទ្រកម្ពុជាជាខ្លាំង។
លោក Felix ថា នៅពេលនោះ កម្ពុជាពិតជាលើកកម្ពស់បាល់ទាត់បានល្អប្រសើរខ្លាំង ដោយក្រុមកម្ពុជា មិនស្គាល់ភាពចាញ់ទាល់តែសោះ ក្នុងការប្រកួតក្នុងផ្ទះអស់រយៈពេល១ឆ្នាំ ហើយបានរក្សាភាពខ្លាំងក្នុងទឹកដីរបស់ខ្លួនឯង ពេលប្រកួតប្រជែងជាមួយក្រុមខ្លាំងៗជាច្រើន រួមទាំងការប្រកួតក្រៅដីផងដែរ។ ជាមួយគ្នានោះ កម្ពុជាបានបើកទ្វារទទួលយកកីឡាករបរទេសចូលសញ្ជាតិ ហើយបានផ្តល់ឱកាស និងអភិវឌ្ឍគ្រូបង្វឹកក្នុងស្រុកជាច្រើន។
គ្រូបង្វឹកអាហ្សង់ទីនរូបនេះ បានបញ្ជាក់តាមសំណេររបស់ខ្លួនបែបនេះថា៖ «យើងបាននាំបាល់ទាត់កម្ពុជា ខិតទៅជិតសក្តានុពលពិតរបស់វា ជាមួយនឹងមនោគមវិជ្ជាលេងយ៉ាងច្បាស់លាល់។ យើងបានលើកកម្ពស់ស្តង់ដា និងកម្រិតរបស់ក្រុមជម្រើសជាតិ ពង្រឹងការប្រកួត ដើម្បីឱ្យអ្នកដែលបន្តអភិវឌ្ឍកីឡាទៅថ្ងៃអនាគត មានមូលដ្ឋានគ្រឹះរឹងមាំ ដើម្បីជំរុញប្រទេសកម្ពុជាឆ្ពោះទៅមុខជានិច្ច»។
គួរបញ្ជាក់ថា លោក Felix ត្រូវបានសហព័ន្ធកីឡាបាល់ទាត់កម្ពុជា (FFC) សម្រេចបញ្ចប់កិច្ចសន្យាជាគ្រូបង្គោលពីក្រុមជម្រើសជាតិកម្ពុជា កាលពីថ្ងៃទី១៣ ខែកញ្ញា ឆ្នាំ២០២៤ បន្ទាប់ពីអ្នកគាំទ្របានរិះគន់ខ្លាំងទៅលើគ្រូបង្វឹករូបនេះ ដែលដឹកនាំក្រុមកម្ពុជា ទទួលលទ្ធផលមិនបានល្អ ចាប់តាំងពីលោក Felix វិលត្រឡប់មកដឹកនាំក្រុមកម្ពុជាជាថ្មី តាំងពីខែមេសា ឆ្នាំ២០២៣មក។
ជាមួយគ្នានោះ FFC បានតែងតាំងគ្រូបង្វឹកជនជាតិជប៉ុនលោក Koji Kyotoku ធ្វើជាគ្រូបង្គោលថ្មីជំនួសវិញ ខណៈពេលនេះ លោក Koji បាននឹងកំពុងប្រមូលផ្តុំក្រុមជម្រើសជាតិកម្ពុជា ដើម្បីធ្វើការប្រកួតមិត្តភាពអន្តរជាតិជាមួយក្រុមឆាយនីសតៃប៉ិ (Chinese Taipei) នៅពហុកីឡដ្ឋានជាតិអូឡាំពិក នាថ្ងៃទី១១ ខែតុលា ខាងមុខនេះ។
សកម្មភាពហ្វឹកហាត់របស់ក្រុមជម្រើសជាតិកម្ពុជា ដើម្បីត្រៀមការប្រកួតមិត្តភាពអន្តរជាតិជាមួយក្រុម Chinese Taipei នៅពហុកីឡដ្ឋានជាតិអូឡាំពិក នាថ្ងៃទី១១ ខែតុលានេះ។ រូបថត FFC
យ៉ាងណាក៏ដោយ តាមបទពិសោធន៍ដឹកនាំក្រុមជម្រើសជាតិកម្ពុជា ជាច្រើនឆ្នាំមកនេះ លោក Felix G.Dalmas បានអះអាងថា ក្រុមបាល់ទាត់កម្ពុជា នាពេលបច្ចុប្បន្ន បានស្ថិតនៅលើរបត់ល្អមួយ ហើយនឹងបន្តរីកចម្រើនជាមួយនឹងទេពកោសល្យរបស់កីឡាករកម្ពុជា ដែលកំពុងបន្តកើនឡើងដើម្បីភាពរីកចម្រើនទៅមុខ។
បន្ថែមលើនេះ លោកបានមើលឃើញថា វិស័យបាល់ទាត់នៅកម្ពុជា មានមនុស្សល្អៗជាច្រើនកំពុងធ្វើការក្នុងវិស័យមួយនេះ ហើយលោកថ្លែងអំណរគុណចំពោះបុគ្គលិក ដែលបានទទួលខុសត្រូវលើការជំរុញការអភិវឌ្ឍ និងកំពុងហ្វឹកហ្វឺនដល់ក្រុមបាល់ទាត់កម្ពុជាយ៉ាងខ្លាំងក្លា នៅតាមជំរុំហ្វឹកហាត់ជាច្រើន ដោយលោក Felix យល់ថា អ្នកទាំងអស់នោះ នឹងមានអនាគតល្អ ហេតុនេះគ្រប់គ្នាត្រូវបន្តការពារនូវកេរ្តិ៍ឈ្មោះ ឬទង់ជាតិកម្ពុជា តាមរយៈបាល់ទាត់នេះ ដោយភាពអង់អាច។
លោកបានបញ្ជាក់ថា៖ «អ្នកពិតជាមានអនាគតដ៏អស្ចារ្យ នៅខាងមុខរបស់អ្នក។ សូមអរគុណដល់កីឡាករទាំងអស់ ដែលបានលះបង់គ្រប់បែបយ៉ាង និងតស៊ូ ហើយជឿជាក់លើវិស័យបាល់ទាត់របស់កម្ពុជាយើង។ សូមបន្តការពារពណ៌ (ទង់ជាតិ) បាល់ទាត់កម្ពុជាដោយទឹកចិត្ត ជាមួយទេពកោសល្យ និងស្មារតីអង់អាចក្លាហានរបស់អ្នក»។
លោកបន្ថែមថា៖ «សូមអរគុណដល់អ្នកគាំទ្រទាំងអស់ ដែលជឿជាក់លើពួកយើង និងគាំទ្រពួកយើងរហូតដល់ទីបញ្ចប់។ ខ្ញុំពិតមានមោទនភាពខ្លាំងណាស់ ដែលបានក្លាយជាផ្នែកមួយនៃប្រវត្តិសាស្រ្តរបស់បាល់ទាត់ប្រទេសកម្ពុជា ហើយខ្ញុំទន្ទឹងរង់ចាំមើលថា តើកម្ពុជានឹងធ្វើអ្វីបន្ទាប់ទៀត? ខ្ញុំនឹងបន្តគាំទ្រមនុស្សល្អៗ ដែលធ្វើការ ដើម្បីធ្វើឱ្យក្រុមបាល់ទាត់កម្ពុជាកាន់តែប្រសើរឡើង។ សូមសំណាងល្អ និងជោគជ័យទាំងអស់គ្នា រហូតដល់វិស័យបាល់ទាត់មួយនេះ នាំយើងមកជួបគ្នាម្តងទៀត»។
គួរបញ្ជាក់ថា នេះជាលើកទី១ហើយ ដែលលោក Felix បានបង្ហោះសារបរិយាពីទំហំចិត្តរបស់លោកមានចំពោះបាល់ទាត់កម្ពុជា ចាប់តាំងពីលោកបានបញ្ចប់កិច្ចសន្យាជាគ្រូបង្គោលរបស់ក្រុមជម្រើសជាតិកម្ពុជា កាលពីថ្ងៃទី១៣ ខែកញ្ញា ឆ្នាំ២០២៤ ហើយទង្វើនេះ បានធ្វើឱ្យអ្នកគាំទ្រមួយចំនួនបានចូលបញ្ចេញមតិអរគុណដល់លោក Felix ដែលនៅតែគិត និងខ្វល់ដល់ក្រុមបាល់ទាត់កម្ពុជា។ ជាមួយគ្នានេះ មានអ្នកគាំទ្រខ្លះ ក៏ចង់ឃើញគ្រូបង្វឹករូបនេះ វិលត្រឡប់មកប្រកបអាជីពបាល់ទាត់នៅកម្ពុជាម្តងទៀតផងដែរ។
អ្នកគាំទ្រ ដែលមានគណនីឈ្មោះ Sao Vathana បានបញ្ចេញមតិយោបល់បែបនេះថា៖ «ខ្ញុំចាប់ចិត្តនឹងការដឹកនាំរបស់លោកគ្រូ (Felix) តាំងពី Sea Game 2019 ហើយខ្ញុំចង់ឃើញមានវត្តមានលោកគ្រូ នៅវិស័យកីឡាបាល់ទាត់នៅកម្ពុជាដដែល គឺអាចដឹកនាំ ឬធ្វើជាផ្នែកណាមួយ តាមបណ្ដាក្លិបនៃលីគកំពូលកម្ពុជា»៕
