ក្រុមយុវជនវិសាខា បានអបអរការឈ្នះពានការប្រកួតលីគយុវជនអាយុក្រោម១៦ឆ្នាំ ប្រចាំឆ្នាំ២០២៤ ដែលធ្វើនៅពហុកីឡដ្ឋានជាតិ កាលពីថ្ងៃអង្គារ។ រូបថត CPL
ក្រុមបាល់ទាត់អាយុក្រោម១៦ឆ្នាំរបស់ក្លិបវិសាខា និងក្រុមអាយុក្រោម១៩ឆ្នាំរបស់ក្លិប ISI ដង្កោសែនជ័យ បានគ្រងតំណែងជើងឯករៀងៗខ្លួននៅក្នុងការប្រកួតជម្រើសជើងឯកខេមបូឌានលីគយុវជន (Cambodian Youth League) ដែលទើបបានបញ្ចប់ កាលពីថ្ងៃអង្គារ។
សម្រាប់ការប្រកួត Cambodian Youth League ប្រចាំឆ្នាំ២០២៤នេះ ក្រុមយុវជនរបស់ក្លិបវិសាខា ដណ្តើមបានចំណាត់ថ្នាក់លេខ១ ទាំងការប្រកួតកម្រិតអាយុក្រោម១៦ឆ្នាំ (U16) និងអាយុក្រោម១៩ឆ្នាំ ប៉ុន្តែក្រុមយុវជនរបស់វិសាខាទាំង ២កម្រិតនេះ ទទួលបានលទ្ធផលខ្វែងគ្នា សម្រាប់ការឈរចាំប្រកួតនៅវគ្គផ្តាច់ព្រ័ត្រ ដែលបានធ្វើឡើង នៅពហុកីឡដ្ឋានជាតិអូឡាំពិក កាលពីថ្ងៃអង្គារ។
តាមរយៈការប្រកួតប្រជែងរវាងក្រុមចំនួន១០ ដែលត្រូវលេង២ជើងនោះ ក្រុមU16វិសាខា បានបញ្ចប់ការប្រកួតរបស់ខ្លួន ដោយឈ្នះ១៧ ចាញ់១ មាន៥១ពិន្ទុ តាមពីក្រោយដោយក្រុមសៀមរាបយូណាយធីត ដែលឈ្នះ១៤ ចាញ់៤ដង មាន៤២ពិន្ទុ រីឯក្រុមU16កងយោធពលខេមរភូមិន្ទ ឈរនៅលេខ៣ មាន៣៣ពិន្ទុ ហើយក្រុមU16ព្រះខ័នរាជស្វាយរៀង ឈរនៅលេខ៤ មាន៣១ពិន្ទុ។
យោងតាមលទ្ធផលនេះ និងរូបបន្តនៃការប្រកួត គឺក្រុម U16 យោធពលខេមរភូមិន្ទ ត្រូវប្រកួតខ្វែងជាមួយក្រុមU16ស្វាយរៀង ដើម្បីយកអ្នកឈ្នះឡើងទៅជួបក្រុមសៀមរាបយូណាយធីត ដែលឈរចាំនៅវគ្គពាក់កណ្តាលផ្តាច់ព្រ័ត្រ ហើយជាលទ្ធផលក្រុមយុវជនកងយោធពលខេមរភូមិន្ទ បានយកឈ្នះក្រុមយុវជនព្រះខ័នរាជស្វាយរៀង ៥-០ ប៉ុន្តែពួកគេបានចាញ់ក្រុមសៀមរាប ៦-៥ ក្នុងការទាត់បាល់ប៉េណាល់ទីកាត់សេចក្តី បន្ទាប់ពីក្រុមទាំង២ បានស្មើគ្នា ២-២។
តាមរយៈជ័យជម្នះនេះ បានជួយឱ្យក្រុមសៀមរាបយូណាយធីត ឡើងទៅជួបក្រុមU16វិសាខា ជាថ្មីម្តងទៀត នៅវគ្គផ្តាច់ព្រ័ត្រ កាលពីថ្ងៃអង្គារ ប៉ុន្តែពួកគេបានបន្តចាញ់ដោយលទ្ធផល ១-០ បើទោះបីជា ក្រុមវិសាខា នៅសល់សមាជិកត្រឹម១០នាក់ ក្រោយពេលកីឡាករ គារ វិសាល បានទទួលកាតក្រហម នៅនាទីទី៥៦ ហើយគ្រាប់បាល់ជ័យជម្នះ១គ្រាប់នេះ ជាការស៊ុតបាល់បញ្ចូលទីរបស់ខ្សែប្រយុទ្ធ ពៅ ពីមករា តាំងពីនាទីទី៤៥+៣។
ក្រុមISIដង្កោសែនជ័យ បានក្លាយជាម្ចាស់ជើងឯកលីគយុវជនអាយុក្រោម១៩ឆ្នាំ បន្ទាប់ពីពួកគេ បានយកឈ្នះក្រុមU19វិសាខា នៅវគ្គផ្តាច់ព្រ័ត្រ។រូបថត CPL
ដោយដែលសម្រាប់ការប្រកួតលីគយុវជនអាយុក្រោម១៩ឆ្នាំវិញ គឺក្រុមU19វិសាខា បានឈរនៅលេខ១ ក្រោយបញ្ចប់ការប្រកួតសន្សំពិន្ទុទាំង២ជុំ ដោយឈ្នះ១៦ ចាញ់២ដង មាន៤៨ពិន្ទុ រីឯក្រុម ISIដង្កោសែនជ័យ ឈរនៅលេខ២ មាន៤០ពិន្ទុ ហើយក្រុមU19កងយោធពលខេមរភូមិន្ទ ឈរនៅលេខ ៣ មាន៣៦ពិន្ទុ និងក្រុមយុវជនរបស់បឹងកេត ឈរនៅលេខ៤ មាន៣៣ពិន្ទុ។
នៅក្នុងការប្រកួតខ្វែងរវាងក្រុមលេខ៣ និងក្រុមលេខ ៤ គឺU19 របស់បឹងកេត បានទម្លាក់ក្រុមU19របស់កងយោធពលខេមរភូមិន្ទ តាមរយៈការយកឈ្នះ ៣-១ ប៉ុន្តែសម្រាប់ការឡើងទៅជួបក្រុមU19 របស់ ISI ដង្កោសែនជ័យ នៅវគ្គពាក់កណ្តាលផ្តាច់ព្រ័ត្រ គឺបឹងកេត បានចាញ់ដោយលទ្ធផល ៣-១ វិញ។
តាមរយៈលទ្ធផលនេះ បានជួយឱ្យក្រុមU19របស់ISIដង្កោសែនជ័យ ឡើងទៅជួបក្រុមU19វិសាខា នៅវគ្គផ្តាច់ព្រ័ត្រ ហើយជំនួបរវាងក្រុមទាំង២នេះ បានក្លាយជាការប្រកួតដ៏ជក់ចិត្តព្រោះក្រុមទាំង២នេះ រកបានគ្រាប់បាល់ប្រដេញគ្នាយ៉ាងស្វិតស្វាញ ហើយបានស្មើគ្នា ៤-៤ ក្នុងការប្រកួតពេញម៉ោង។ ប៉ុន្តែនៅក្នុងការទាត់បាល់ប៉េណាល់ទីកាត់សេចក្តី គឺ ISI បានយកឈ្នះដោយលទ្ធផល ៤-៣ ដើម្បីលើកពានយ៉ាងរំភើបបំផុត។
ការប្រកួតផ្តាច់ព្រ័ត្ររវាងក្រុមU16វិសាខា (ខៀវ) និងក្រុមសៀមរាបយូណាយធីត ដោយវិសាខា បានយកឈ្នះ ១-០។ រូបថត CPL
តាមរយៈការប្រកួតលីគយុវជនទាំងកម្រិត U16 និងU19 ប្រចាំឆ្នាំ២០២៤នេះ បានបង្ហាញឱ្យឃើញថា ក្លិបវិសាខា កំពុងឈានមុខគេសម្រាប់ការបណ្តុះកីឡាករជាថ្នាលបន្តវេន ហើយក្លិប ISI ដង្កោសែនជ័យ និងសមាគមកីឡាកងយោធពលខេមរភូមិន្ទុ ក៏មានសម្ទុះខ្លាំងផងដែរ ហើយអ្វីដែលអ្នកគាំទ្រនឹកស្មានមិនដល់នោះ គឺក្លិបសៀមរាបយូណាយធីត បែរជាអាចបណ្តុះបណ្តាលបានធនធានកីឡាករជាយុវជនដ៏មានគុណភាព សម្រាប់ចូលរួមការប្រកួតលីគយុវជនអាយុក្រោម១៩ឆ្នាំ នៅឆ្នាំនេះ។
ផ្ទុយទៅវិញក្រុមដែលកំពុងឈរនៅកំពូលតារាងនៃលីគកំពូលកម្ពុជា ភ្នំពេញក្រោន ដោយឈ្នះ១០ និងស្មើ១ដងនោះ បែរជាបង្ហាញភាពថមថយមួយកម្រិត លើការបណ្តុះថ្នាលបន្តវេនទៅវិញ ព្រោះការប្រកួតលីគយុវជននេះ ក្រុមU16 ភ្នំពេញក្រោន បានឈរនៅលេខ៧ ដោយឈ្នះ៤ ស្មើ៤ ចាញ់១០ដង មាន១៦ពិន្ទុ រីឯក្រុមU19វិញ បានឈរនៅលេខ៥ ដោយឈ្នះ៧ ស្មើ៤ ចាញ់៧ដង មាន២៥ពិន្ទុ៕
