សន្និសីទសារព័ត៌មានស្តីពីព្រឹត្តិការណ៍ប្រណាំងរថយន្ត Off-Road អន្តរជាតិ ដែលនឹងរៀបចំនៅតំបន់ឆ្នេរស្អាត ក្នុងក្រុងព្រះសីហនុ ខេត្តសីហនុ ពីថ្ងៃទី២៨ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៤។ រូបថត ឈន ណន
ដោយទទួលបានការអនុញ្ញាតិពីសហព័ន្ធកីឡាយានយន្តកម្ពុជា ក្លិបកីឡាមហាគ្រួសារ Off-Road កម្ពុជា នឹងរៀបចំព្រឹត្តិការណ៍ប្រណាំងរថយន្តឆ្លងកាត់ឧបសគ្គ Off-Road អន្តរជាតិ ជាលើកដំបូង នៅតំបន់ឆ្នេរសមុទ្រ ក្នុងក្រុងព្រះសីហនុ ខេត្តព្រះសីហនុ ពីថ្ងៃទី២៨ ខែវិច្ឆិកា ដល់ថ្ងៃទី១ ខែធ្នូ ដើម្បីជួយជំរុញទាំងវិស័យកីឡាយានយន្ត និងវិស័យទេសចរណ៍ នៅកម្ពុជា។
នៅក្នុងសន្និសីទសារព័ត៌មាន នៅទីស្នាក់ការ NOCC កាលពីព្រឹកថ្ងៃទី១៨ ខែវិច្ឆិកានេះ លោក ទៀ ស្យាម អនុប្រធានសហព័ន្ធកីឡាយានយន្តកម្ពុជា និងជាប្រធានក្លិបកីឡាមហាគ្រួសារ Off-Road កម្ពុជា បានទទួលស្គាល់ថា ការប្រណាំងរថយន្តឆ្លងកាត់ឧបសគ្គបែបនេះ គឺសហព័ន្ធ ធ្លាប់បានរៀបចំច្រើនលើកមកហើយ នៅតាមតំបន់ព្រៃ ក្នុងខេត្តមួយចំនួន ប៉ុន្តែវាជាលើកដំបូង ដែលព្រឹត្តិការណ៍នេះ ត្រូវធ្វើនៅតាមតំបន់ឆ្នេរ ដើម្បីធ្វើឱ្យមានភាពទាក់ទាញកាន់តែខ្លាំង ហើយវាក៏ជាការរួមចំណែកក្នុងការកៀរគរភ្ញៀវទេសចរឱ្យទៅលេង នៅតំបន់ឆ្នេរដ៏ស្រស់ស្អាត ក្នុងខេត្តព្រះសីហនុ កាន់តែច្រើនផងដែរ។
លោក ទៀ ស្យាម បានបញ្ជាក់ថា៖ «គោលដៅចម្បងរបស់យើង គឺជំរុញវិស័យកីឡាប្រណាំងរថយន្ត Off-Road នេះឱ្យរីកចម្រើន ដើម្បីធ្វើយ៉ាងណាឈានទៅរកការរៀបចំជារៀងរាល់ឆ្នាំ ហើយគោលដៅរៀបចំជារៀងរាល់ឆ្នាំនេះ គឺមិនមែនតែនៅខេត្តព្រះសីហនុទេ ប៉ុន្តែយើងនឹងបន្តធ្វើនៅតាមបណ្តាខេត្តនានាទូទាំងប្រទេសកម្ពុជា»។
ប្រធានក្លិបកីឡាមហាគ្រួសារ Off-Road កម្ពុជារូបនេះ បានបន្ថែមថា៖ «ខេត្តព្រះសីហនុ គឺជាទិសដៅទេសចរណ៍ដ៏មានសក្តានុពល ដូច្នេះហើយបានជាយើងរៀបចំនៅទីនោះ ដើម្បីជំរុញវិស័យកីឡាផង និងទេសចរណ៍ផង។ ខ្ញុំជឿថា កីឡាករបរទេស នឹងមកមុនថ្ងៃប្រកួត ហើយពួកគាត់នឹងមានអ្នកថត អ្នកសរសេរដើម្បីផ្សព្វផ្សាយពីព្រឹត្តិការណ៍នេះ ឱ្យកាន់តែមានភាពទូលំទូលាយថែមទៀត»។
ចំណែកលោក លន់ បូរ៉ា មកពីយានដ្ឋាន BM បានឱ្យដឹងថា ខាងយាន្តដ្ឋានរបស់លោក បានត្រៀមឡានចំនួន៣គ្រឿង សម្រាប់ចូលរួមព្រឹត្តិការណ៍នេះ ហើយលោកគិតថា ការប្រណាំងរថយន្ត នៅតាមតំបន់ឆ្នេរ នឹងទទួលបានការគាំទ្រច្រើនជាងការប្រកួតនៅតាមព្រៃភ្នំ។
លោក បូរ៉ា ជឿជាក់ថា ក្រុមរបស់លោក នឹងធ្វើបានល្អ ដើម្បីរក្សាតំណែងជើងឯក សម្រាប់ការប្រកួតប្រណាំងរថយន្ត Off-Road អន្តរជាតិ កាលពីឆ្នាំមុន។
លោកនិយាយថា៖ «សម្រាប់ការប្រកួតនៅគីរីរម្យ កាលពីឆ្នាំមុន ពួកខ្ញុំបានលេខ១ ហើយឆ្នាំនេះ ខ្ញុំគិតថា ក្រុមមកពីតាមបណ្តាប្រទេសផ្សេងៗ នឹងមានការត្រៀមខ្លួនកាន់តែបានល្អ ជាពិសេសខាងក្រុមមកពីប្រទេសថៃ ដើម្បីមកដណ្តើមពានពីយើងវិញ ប៉ុន្តែយើងនៅតែមានសង្ឃឹមក្នុងការរក្សាតំណែងនេះ ព្រោះយើងមានការហ្វឹកហាត់ជាប្រចាំ និងត្រៀមខ្លួនបានល្អ»។
លោកបន្ថែមថា៖ «ពួកខ្ញុំជាជាងឡាន ហេតុនេះយើងដឹងច្បាស់ពីរបៀបនៃការកែច្នៃបច្ចេកទេសឡាន ឱ្យត្រូវនឹងមនុស្ស ព្រោះឡាន និងអ្នកបើក តែងនៅជាមួយគ្នា និងបានដឹងច្បាស់ពីគ្នា ហើយគិតមកដល់ពេលនេះ យើងបានរៀបចំប្រព័ន្ធឡានរួចរាល់អស់ហើយ ចំណែកកីឡាកររបស់យើង ក៏បានបើកសាកល្បងរួចរាល់ដូចគ្នា។ យើងនឹងព្យាយាមឱ្យអស់លទ្ធភាព ដើម្បីការពារពានផង និងដណ្តើមយកពានថ្មីៗបន្ថែមទៀត»។
នៅក្នុងព្រឹត្តិការណ៍ប្រណាំងរថយន្ត Off-Road អន្តរជាតិជាលើកដំបូង នៅតំបន់ឆ្នេរ ក្នុងទឹកដីខេត្តព្រះសីហនុនេះ ក៏មានកម្មវិធីបោះតង់កម្សាន្តលក្ខណៈទ្រង់ទ្រាយធំចំនួន ៤ ថ្ងៃផងដែរ គឺនៅឆ្នេរថ្ម៣ដុំ ជាតំបន់ដើមឈើចាំស្នេហ៍ ដោយអាចបោះតង់បានប្រមាណ ១០០០តង់ ហើយមានទាំងស្តង់ចំណីអាហារ ដែលមានប្រព័ន្ធទឹកស្អាត និងភ្លើងគ្រប់គ្រាន់ គឺអ្នកចូលរួមបោះតង់ អាចជួបជុំកម្សាន្តសប្បាយនៅមាត់សមុទ្រផង និងបានទស្សនាព្រឹត្តិការណ៍ប្រណាំងរថយន្ត Off-Road ដោយផ្ទាល់ទៀត។
លោក សេក ច័ន្ទដារ៉ា អ្នកទទួលបន្ទុករៀបចំកម្មវិធីបោះតង់ បាននិយាយថា៖ «ការចូលរួមបោះតង់នេះ គឺគ្មានការបង់ប្រាក់អ្វីឡើយ។ យើងខ្ញុំគ្រាន់តែឱ្យអ្នកចូលរួមចុះឈ្មោះ ដើម្បីក្រុមការងារយើងខ្ញុំងាយស្រួលរៀបចំជូន។ រហូតដល់ពេលនេះមានបងប្អូនចុះឈ្មោះចូលរួមបានច្រើនដែរហើយ ហើយអ្វីដែលយើងខ្ញុំសំណូមពរដល់ពួកគាត់ គឺសូមចូលរួមថែរក្សាបរិស្ថាន និងអនាម័យទាំងអស់គ្នា»។
តាមលោក ទៀ ស្យាម បានឱ្យដឹងថា គិតមកដល់ពេលនេះ មានកីឡាករប្រមាណ៦០នាក់ហើយ ក្នុងនោះមានកីឡាករកម្ពុជា ៤០នាក់ និងកីឡាករបរទេស ២០នាក់ មកពីប្រទេសថៃ ឡាវ វៀតណាម និងចិន បានចុះឈ្មោះរួចរាល់ សម្រាប់ចូលរួមព្រឹត្តិការណ៍ប្រណាំងរថយន្ត Off-Roadចាប់ពីថ្ងៃទី ២៨ ខែវិច្ឆិកា ដល់ថ្ងៃទី១ ខែធ្នូ ឆ្នាំ ២០២៤ នៅទីលានស្តង់ដាអន្តរជាតិ ក្នុងទីក្រុងព្រះសីហនុ ខេត្តព្រះសីហនុ៕
