ទិដ្ឋភាពក្នុងសន្និសីទកាសែតស្តីពីការប្រកួតកីឡាគុនខ្មែរជើងឯកពិភពលោក លើកទី៥ ឆ្នាំ២០២៤ នៅទីស្នាក់ការ NOCC កាលពីថ្ងៃទ១៩ ខែវិច្ឆិកា។ រូបថត NOCC
កម្ពុជា តាមរយៈសហព័ន្ធគុនខ្មែរអន្តរជាតិ គណៈកម្មាធិការជាតិអូឡាំពិកកម្ពុជា (NOCC) សហព័ន្ធកីឡាប្រដាល់គុនខ្មែរ និងដៃគូសហការមួយចំនួនទៀត បានរៀបចំការប្រកួតកីឡាគុនខ្មែរជើងឯកពិភពលោក លើកទី៥ ឆ្នាំ២០២៤ (The 5th Kun Khmer Championship 2024) នៅលើទឹកដីអង្គរ ខេត្តសៀមរាប កាន់តែធំ ដើម្បីសម្រួចទិសដៅធំ ក្នុងការដាក់កីឡាអត្តសញ្ញាណជាតិមួយនេះ ចូលទៅក្នុងការប្រកួតកីឡាអូឡាំពិកហ្គេម នាពេលអនាគត។
លោក មៀម រ៉ា ប្រធានសហព័ន្ធគុនខ្មែរអន្តរជាតិ បានប្រាប់នៅក្នុងសន្និសីទកាសែត កាលពីថ្ងៃអង្គារថា ការប្រកួតកីឡាគុនខ្មែរជើងឯកពិភពលោក ឆ្នាំ២០២៤ ដែលនឹងធ្វើនៅអង្គរ ខេត្តសៀមរាប ពីថ្ងៃទី៦ ដល់ទី៨ ខែធ្នូ ខាងមុខនេះ មានកីឡាករ កីឡាការិនីចូលរួមចំនួន១១៨នាក់ មកពី២៤ប្រទេស គឺមានការកើនឡើងច្រើន បើប្រៀបធៀបទៅនឹងការប្រកួតចំនួន៤លើកកន្លងមក។
នៅក្នុងចំណោមប្រទេសទាំង២៤នេះ ម្ចាស់ផ្ទះកម្ពុជា បានត្រៀមកីឡាករ២០នាក់ និងកីឡាការិនី៥នាក់ សរុប២៥នាក់ ដើម្បីចូលរួមការប្រកួតកីឡាគុនខ្មែរជើងឯកពីភពលោក ឆ្នាំ២០២៤នេះ ចំណែកប្រទេសបារាំង បញ្ជូនប្រតិភូកីឡាមកច្រើនជាងគេ គឺចំនួន១៧នាក់ រីឯប្រទេសកៀរហ្ស៊ីស៊ីស្ថាន អ៊ីរ៉ង់ និងរុស្ស៊ី ក៏នឹងបញ្ជូនប្រតិភូកីឡារបស់ខ្លួនច្រើនជាង១០នាក់ មកចូលរួមផងដែរ។
លោក មៀម រ៉ា បានថ្លែងថា ៖ «ឆ្នាំនេះជាជួបទី៥នៃព្រឹត្តិការណ៍របស់យើង អីចឹងយើងរៀបចំការប្រកួតធំជាងរាល់ដង ចំណែកកីឡាករ កីឡាការិនី និងប្រទេសចូលរួមក៏មានច្រើន ហើយការប្រកួតយើងយកលំនាំតាមស៊ីហ្គេម។ យើងក៏មានការប្រកួតកម្រិតអាជីព ដែលយើងនឹងដាក់កីឡាករល្បីៗ និងអ្នកដែលធ្លាប់ដណ្តើមបានខ្សែក្រវាត់ កាលពីឆ្នាំមុន ឱ្យចូលប្រកួត»។
ក្រៅពីការប្រកួតកម្រិតពាក់កណ្តាលអាជីព និងអាជីព ព្រឹត្តិការណ៍ដ៏ធំនេះ ក៏មានការប្រកួតយុវជនអាយុចាប់ពីអាយុ ១០ ដល់ ១៣ឆ្នាំ និងអាយុ ១៤ ដល់ ១៧ឆ្នាំផងដែរ ហើយការដាក់ឱ្យមានការប្រកួតកម្រិតថ្នាលនេះ គឺដើម្បីផ្តល់ឱកាសឱ្យកីឡាករក្មេងៗ បានប្រកួតគ្នាពង្រឹងសមត្ថភាពកាន់តែល្អ សម្រាប់ត្រៀមការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជា ធ្វើជាម្ចាស់ផ្ទះ ព្រមទាំងសម្លឹងទៅរកការទទួលបានឱកាសប្រកួតអូឡាំពិកហ្គេម នាពេលអនាគតផងដែរ។
លោក មៀម រ៉ា បានបញ្ជាក់ថា៖ «ទិសដៅរបស់សហព័ន្ធគុនខ្មែរអន្តរជាតិ គឺឆ្ពោះទៅកាន់ការប្រកួតកីឡាយុវជនអាស៊ី ឆ្នាំ២០២៩ នៅកម្ពុជា ហើយយើងក៏សម្លឹងទៅការប្រកួតអូឡាំពិកហ្គេម ឆ្នាំ២០៣២ នៅប្រទេសអូស្រ្តាលីផងដែរ គឺបើយើងអាចដាក់គុនខ្មែរចូលទៅក្នុងការប្រកួតនោះបាន គឺជារឿងល្អបំផុត»។
យ៉ាងណាក៏ដោយ ដើម្បីអាចដាក់បញ្ចូល «គុនខ្មែរ» ទៅក្នុងការប្រកួតអូឡាំពិកបាន លុះត្រាតែ សហព័ន្ធគុនខ្មែរអន្តរជាតិ មានសមាជិកគាំទ្រ១០០ប្រទេស ខណៈពេលនេះមានប្រទេសជាសមាជិកចំនួន៦០ហើយ ហើយកម្ពុជា ចង់ឱ្យប្រទេសជាសមាជិកទាំងនេះ ជួយពង្រីកសក្តានុពលគុនខ្មែរបន្ថែមទៀត ដើម្បីអាចដាក់កីឡាអត្តសញ្ញាណជាតិនេះ ទៅក្នុងអូឡាំពិកហ្គេម បន្ទាប់ពីកម្ពុជា បានទទួលជោគជ័យ ក្នុងការដាក់គុនខ្មែរ ទៅក្នុងការប្រកួតស៊ីហ្គេម លើកទី៣២ ឆ្នាំ២០២៣ ក្នុងនាមជាម្ចាស់ផ្ទះ។
លោកបញ្ជាក់ថា៖ «ដើម្បីសម្រេចគោលដៅឱ្យបានសមាជិក១០០ប្រទេស យើងត្រូវបញ្ចុះបញ្ចូលប្រទេសជាសមាជិក ឱ្យរៀបចំការប្រកួតគុនខ្មែរនៅតាមទ្វីប គឺនៅតាមទ្វីបនីមួយៗ នឹងរៀបចំឱ្យមានការប្រកួតជើងឯកប្រចាំទ្វីប ដោយឆ្នាំក្រោយនេះ យើងគ្រោងទៅបារាំង អាហ្វិ្រក អូស្ត្រាលី កូរ៉េខាងត្បូង ហើយបកមកអាស៊ីវិញ រួចបន្តទៅកាណាដា ដែលគេនឹងរៀបចំការប្រកួតជើងឯកទ្វីបអាមេរិក នៅទីនោះ ដោយមានអាមេរិក កាណាដា ម៉ិចស៊ិច និងប្រេស៊ីលចូលរួម គឺចាប់ពីខែមេសា ឆ្នាំ២០២៥ទៅ យើងនឹងមានការរៀបចំ២ខែម្ដង ទៅតាមទ្វីបនីមួយៗ»។
ចំណែកលោក តែម ម៉ឺន ប្រធានកិត្តិយសសហព័ន្ធកីឡាប្រដាល់គុនខ្មែរ និងជាអគ្គលេខាធិការរងនៃគណៈកម្មាធិការជាតិអូឡាំពិកកម្ពុជា បានកោតសរសើរចំពោះសហព័ន្ធគុនខ្មែរអន្តរជាតិ និងដៃគូសហការទាំងអស់ ដែលខិតខំប្រឹងប្រែងរៀបចំឱ្យមានការប្រកួតកីឡាគុនខ្មែរជើងឯកពិភពលោក ចំនួន៤លើកកន្លងមក និងបន្តរៀបចំព្រឹត្តិការណ៍នេះ កាន់តែធំ ដើម្បីផ្សព្វផ្សាយ និងពង្រីកពីកិត្យានុភាពកីឡាគុនខ្មែរ ទៅកាន់ពិភពលោក។
លោកបញ្ជាក់ថា៖ «ព្រឹត្តិការណ៍នេះ ត្រូវបានរៀបចំឡើងចំនួន៤ដងមកហើយ ចំណែកឆ្នាំនេះយើងបន្តរៀបចំកាន់តែធំ ហើយនេះជាកិត្តិយស និងកិត្យានុភាពនៃប្រទេសកម្ពុជាយើង ដែលយើងបានផ្សារភ្ជាប់សកម្មភាពកីឡាជាមួយអន្តរជាតិ ហើយការងារនេះ ក៏បានរួមចំណែកផ្សព្វផ្សាយពីវិស័យកីឡាប្រដាល់គុនខ្មែររបស់យើង ដើម្បីឱ្យពិភពលោកបានស្គាល់ និងបានដឹងកាន់តែច្បាស់ផងដែរ»៕
