ធឿន ធារ៉ា ទទួលបានពាន ក្រោយផ្តួលកីឡាករម៉ុងហ្គោលី Namuung Erel ឱ្យសន្លប់ នៅក្នុងទឹកទី២ សម្រាប់ការប្រកួតលក្ខណៈប្រទេសរវាងកម្ពុជា និងម៉ុងហ្គោលី កាលពីថ្ងៃអាទិត្យ។ រូបថត Wurkz
ជើងខ្លាំងមានរហស្សនាម «អ្នកលេងពូថៅដៃ» ធឿន ធារ៉ា បានប្រើពេលមិនដល់២ទឹកផង ដើម្បីផ្តួលអ្នកប្រយុទ្ធមកពីម៉ុងហ្គោលី Namuung Erel ឱ្យសន្លប់ ក្រោមកណ្តាប់ដៃឆ្វេងរបស់ខ្លួន ដែលធ្វើឱ្យជំនួបរវាងកម្ពុជា និងម៉ុងហ្គោលី មានភាពកក្រើក និងភ្ញាក់ផ្អើលខ្លាំង ប៉ុន្តែចំពោះការប្រកួតដណ្តើមខ្សែក្រវាត់ IPCC Kun Khmer គឺម្ចាស់ខ្សែក្រវាត់បានទៅលើអ្នកប្រដាល់ Bat Erdene ក្រោយរូបគេបានយកឈ្នះ សាន់ គុនខ្មែរ។
សម្រាប់ការប្រកួតក្នុងព្រឹត្តិការណ៍ WURKZ សេនាគុនខ្មែរយ័ន្ត៨ទិស (Kun Khmer Warriors) ដែលធ្វើនៅក្បែរផ្សារទំនើបជីបម៉ុង 271 មេហ្គាម៉ល កាលពីយប់ថ្ងៃអាទិត្យ ទី១៥ ខែធ្នូនេះ មានការប្រកួតរវាងកីឡាករកម្ពុជា និងម៉ុងហ្គោលី ចំនួន៥គូ ហើយជាលទ្ធផល កីឡាករកម្ពុជា បានឈ្នះ៣ ស្មើ១ និងចាញ់១។
លោក គឹម ស្រ៊ុនកុសល ទីប្រឹក្សាស្ថានីយទូរទស្សន៍ថោន និងជាប្រធាន ស្ថាប័ន International Professional Combat Council (IPCC) ប្រចាំនៅកម្ពុជា បានចាត់ទុកការប្រកួតលក្ខណៈប្រទេស និងប្រទេស រវាងកីឡាករកម្ពុជា និងម៉ុងហ្គោលី លើកនេះថា ជាប្រព្រឹត្តិការណ៍ប្រវត្តិសាស្ត្រ និងជាការប្រកួតដ៏ធំប្រចាំឆ្នាំ២០២៤ របស់សង្វៀនថោន ដែលបានវិវឌ្ឍការប្រកួត ពីការនាំយកកីឡាករបរទេសមកប្រកួតជាលក្ខណៈបុគ្គលិក ទៅជាលក្ខណៈប្រទេស និងប្រទេស។
លោក ស្រ៊ុនកុសល ដែលមានឈ្មោះក្រៅ Tommy Kim បានបញ្ជាក់ក្នុងសន្និសីទកាសែត មុនការប្រកួតថា៖ «នេះជាការប្រកួតប្រវត្តិសាស្រ្ត ដើម្បីបន្តរឹតចំណងមិត្តភាពរវាងកម្ពុជា និងម៉ុងហ្គោលី ១ពានឆ្នាំទៅមុខទៀត ហើយយើងក៏នឹងបន្តរៀបចំឱ្យមានការប្រកួតជាលក្ខណៈប្រទេស និងប្រទេស ដើម្បីផ្សព្វផ្សាយគុនខ្មែររបស់យើង ឱ្យកាន់តែមានភាពល្បីថែមទៀត»។
តាមរយៈការប្រកួតទាំង៥គូរវាងកីឡាករកម្ពុជា និងម៉ុងហ្គោលីនេះ ជើងខ្លាំង ធឿន ធារ៉ា ធ្វើបានល្អជាងគេ ដោយរូបគេបានប្រើកណ្តាប់ដៃ ផ្តួលអ្នកប្រយុទ្ធរបស់ម៉ុងហ្គោលី Namuung Erel ឱ្យសន្លប់នៅដើមទឹកទី២ តាមរយៈការប្រើកណ្តាប់ដៃឆ្វេងដ៏មានទម្ងន់របស់គេ ដោយក្នុងនោះ ធារ៉ា បានចូលផ្ទៃមុខពេញៗ ធ្វើឱ្យ Namuung Erel ស្រុតជំហរចំនួន២លើកនៅក្នុងទឹកទី១ និងស្រុតជំហរម្តងទៀត នៅដើមទឹកទី២។
ទោះបីជាលោកអាជ្ញាកណ្តាល មិនបានរាប់ទៅលើកីឡាករ Namuung Erel ចំពោះការបាត់បង់ជំហរទាំងនេះ ជាពិសេសនៅដើមទឹកទី២ ប៉ុន្តែ ធឿន ធារ៉ា មិនបានទុកពេលឱ្យម៉ុងហ្គោលីម្នាក់នេះដកខ្យល់ទាន់ពេលនោះឡើយ គឺរូបគេបានស្ទុះចូលវាយសម្រុកដោកណ្តាប់ដៃ និងកែង ហើយចុងក្រោយបានម៉ាត់ឆ្វេងចូលថ្គាមពេញ បណ្តាលឱ្យ Namuung Erel ដួលសន្លប់ នៅនាទីទី២ ក្នុងទឹកទី២។
ជើងខ្លាំង ធឿន ធារ៉ា បានម៉ាត់ឆ្វេងទៅលើផ្ទៃមុខរបស់អ្នកប្រដាល់ម៉ុងហ្គោលី Namuung Erel។ រូបថត Wurkz
ការប្រើពេលសរុបជាង៤នាទី ដើម្បីផ្តួលម៉ុងហ្គោលី Namuung Erel ឱ្យសន្លប់នេះ បានធ្វើឱ្យអ្នកទស្សនាផ្ទាល់ មានការភ្ញាក់ផ្អើលខ្លាំងពីបច្ចេកទេសប្រើកណ្តាប់ដៃដ៏អស្ចារ្យរបស់ ធឿន ធារ៉ា គឺសូម្បីតែ លោក ហ៊ុន សែន អតីតនាយករដ្ឋមន្រ្តីកម្ពុជា ដែលបានទស្សនាការប្រកួតនេះ តាមការផ្សាយផ្ទាល់ ក៏មានការភ្ញាក់ផ្អើល ហើយលោកបានឧបត្ថម្ភដល់ ធឿន ធារ៉ា ១០លានរៀល ធ្វើឱ្យទឹកប្រាក់ឧបត្ថម្ភសរុបរបស់ ធារ៉ា បានកើនដល់២៨លានរៀល ចំណែកក្រុមអ្នករៀបចំការប្រកួតរបស់សង្វៀនថោន ក៏បាន១០លានរៀល ពីលោក ហ៊ុន សែន ផងដែរ។
ចំណែកការប្រកួតមិត្តភាពអន្តរជាតិរវាងគុនខ្មែរ និងម៉ុងហ្គោលី ចំនួន៤គូទៀត គឺកីឡាករកម្ពុជា ផានិត គុនខ្មែរ បានឈ្នះអ្នកប្រដាល់ ERDENEBAYR TUMINBILEG របស់ម៉ុងហ្គោលី ដោយពិន្ទុ រីឯ ឡុង អាឆើត បានឈ្នះកីឡាករ B.AMGALANBAYAR ដោយពិន្ទុដូចគ្នា ហើយ ភក្តី គុនខ្មែរ បានប្រកួតស្មើជាមួយ GANTOGTOKH BAATARCHULUUS។
ផ្ទុយពីនេះ ចំពោះការប្រកួតដណ្តើមខ្សែក្រវាត់ IPCC Kun Khmer ទម្ងន់៦០គីឡូក្រាមវិញ អ្នកប្រដាល់វាយមិនដកថយរបស់កម្ពុជា សាន់ គុនខ្មែរ បានចាញ់កីឡាករម៉ុងហ្គោលី Bat Erdene ដោយពិន្ទុមិនឯកច្ឆន្ទ បន្ទាប់ពីអ្នកទាំង២នេះ បានប្រកួតគ្នាយ៉ាងស្វិតស្វាញបំផុត ចំនួន៣ទឹកពេញ។
ចំពោះលទ្ធផលឈ្នះ៣ ស្មើ១ និងចាញ់ការប្រកួតខ្សែក្រវាត់របស់ សាន់ គុនខ្មែរ នេះ លោក Tommy Kim បានប្រាប់ភ្នំពេញប៉ុស្តិ៍ថា៖ « បើគិតក្នុងរូបភាពមួយទៀត គឺការចាញ់ខ្សែក្រវាត់នេះ យើងបានផលចំណេញដែរ ព្រោះខ្សែក្រវាត់យើង បានចេញទៅប្រទេសគេ ចូលរួមផ្សព្វផ្សាយគុនខ្មែរ ចំណែក ធឿន ធារ៉ា នៅតែអាចលើកទង់ជាតិខ្មែរបាន ដែលគាត់ជាអ្នកសម្រេចលទ្ធផលគូចុងក្រោយ ដោយផ្តួលដៃគូដោយកណ្តាប់ដៃ»។
ការប្រកួតដណ្តើមខ្សែក្រវាត់រវាងកីឡាករកម្ពុជា សាន់ គុនខ្មែរ និងអ្នកប្រដាល់ម៉ុងហ្គោលី Bat Erdene។ រូបថត Wurkz
ទន្ទឹមនឹងនេះ លោក Tommy បានមើលឃើញថា កីឡាកររបស់ម៉ុងហ្គោលី ដែលមកប្រកួតនៅកម្ពុជាលើកនេះ សុទ្ធតែមានសមត្ថភាពខ្លាំង ដោយគេបានជម្រើសយកអ្នកល្អៗមកប្រកួត ដើម្បីដណ្តើមយកជ័យជម្នះដូចគ្នា ធ្វើឱ្យព្រឹត្តិការណ៍នេះមានភាពកក្រើក និងភ្ញាក់ផ្អើលខ្លាំង គឺសូម្បីអតីតនាយករដ្ឋមន្រ្តី ហ៊ុន សែន ក៏បានចូលរួមឧបត្ថម្ភដល់កីឡាករ ធឿន ធារ៉ា និងក្រុមការងារអ្នករៀបចំកម្មវិធីរបស់ស្ថានីយទូរទស្សន៍ថោន។
លោកបញ្ជាក់ថា៖ «ជាការភ្ញាក់ផ្អើល និងនឹកស្មានមិនដល់ ដែលសម្តេចតេជោ បានគាំទ្រ និងចូលរួមឧបត្ថម្ភ។ នេះជាទឹកចិត្តរបស់លោក ដែលបានបង្ហាញពីការយកចិត្តទុកដាក់គាំទ្រដល់ក្បាច់គុនបុរាណខ្មែរដ៏ចាស់វស្សានៅអាស៊ី ហើយខ្ញុំតំណាងឱ្យក្រុមការងារទាំងអស់ សូមគោរពអរគុណដល់សម្តេចតេជោ ចំពោះការតស៊ូរបស់លោក ក្នុងការរំដោះប្រទេសជាតិចេញពីរបបប៉ុលពត និងបង្កើតឱ្យមានស្ថិរភាព សុខសន្តិភាពក្នុងប្រទេស ទើបក្លិប និងកីឡាករគុនខ្មែរ អាចមានលទ្ធភាពងើបឈរ និងបញ្ចេញនូវសមត្ថភាពលើឆាកអន្តរជាតិបាន»៕
