លោក ហែម គីរី ពេលថ្លែងនៅក្នុងពិធីបិទវគ្គសាមគ្គីអូឡាំពិក ស្តីពីគ្រូបង្វឹកកីឡាហែលទឹក កម្រិត១ នៅទីស្នាក់ការ NOCC កាលពីថ្ងៃអាទិត្យ។ រូបថត សហព័ន្ធ
អគ្គលេខាធិការសហព័ន្ធខ្មែរកីឡាហែលទឹក បានស្នើដល់សិក្ខាកាមទាំង២៥នាក់ ដែលទើបបញ្ចប់វគ្គសាមគ្គីអូឡាំពិក ស្តីពីគ្រូបង្វឹកកីឡាហែលទឹក កម្រិត១ (Olympic Solidarity Coaching Course of Swimming in Level 1) ជាមួយគ្រូឧទ្ទេសអន្តរជាតិ ឱ្យនាំយកចំណេះជំនាញនេះ ទៅជួយបណ្តុះបណ្តាលកីឡាករកីឡាការិនីជំនាន់ក្រោយ ដើម្បីឱ្យវិស័យហែលទឹកកម្ពុជា អាចមានឱកាសឈានទៅបង្កើតប្រវត្តិសាស្រ្ត ក្នុងការដណ្តើមបានមេដាយណាមួយ នៅលើឆាកអន្តរជាតិ។
ជាមួយបទពិសោធន៍ដ៏វែងឆ្ងាយ ក្នុងនាមជាអ្នកបន្តវេនពីព្រឹទ្ធាចារ្យ ហែម ថុន ដែលជាឪពុក លោក ហែម គីរី បានទម្លាយថា វិស័យកីឡាហែលទឹកកម្ពុជា នៅមិនទាន់ដណ្តើមបានមេដាយណាមួយ ពីការប្រកួតជាអន្តរជាតិនោះទេ ចាប់តាំងពីរូបលោក នៅជាកីឡាករ ហើយបានឈ្នះមេដាយសំរឹទ្ធ ក្នុងការប្រកួតសិស្សនិស្សិតលើប្រភេទកីឡាហែលទឹក កាលពីឆ្នាំ១៩៩៩មក។
លោក ហែម គីរី បានថ្លែងនៅក្នុងពិធីបិទវគ្គសិក្សាគ្រូបង្វឹកកីឡាហែលទឹក កម្រិត១ កាលពីថ្ងៃអាទិត្យថា៖ «តាំងពីដើមទីរហូតដល់ចុងបញ្ចប់ ក្នុងនាមជាកីឡករហែលទឹក ខ្ញុំធ្លាប់បង្កើតបានស្នាដៃមួយជាមួយការខិតខំប្រឹងប្រែងរបស់ខ្ញុំ និងឪពុកខ្ញុំ គឺការដណ្តើមបានមេដាយសំរឹទ្ធ ពេលប្រកួតសិស្សនិស្សិត នៅប្រទេសថៃ ឆ្នាំ១៩៩៩ ហើយចាប់តាំងពីពេលនោះមក ប្រភេទកីឡាហែលទឹករបស់យើង នៅមិនទាន់ធ្លាប់បានដណ្តើមបានមេដាយ ជាអន្តរជាតិ នៅឡើយទេ»។
លោកបន្ថែមថា៖ «យើងធ្លាប់បានត្រឹមចំណាត់ថ្នាក់លេខ៤ ក្នុងការប្រកួតយុវជន ហើយខ្ញុំត្រូវតែលើកឡើងពីចំណុចនេះ ព្រោះចង់ឱ្យសិក្ខាកាមទាំងអស់ក្នុងវគ្គនេះ ចាំថា យើងចង់ឃើញកីឡាករកម្ពុជា ឈានជើងទៅជាន់ឈ្នាន់មេដាយ សម្រាប់ការប្រកួតអន្តរជាតិណាមួយ ហើយដូចគ្រូឧទ្ទេសអន្តរជាតិ បានលើកឡើងអ៊ីចឹងថា កម្ពុជា ត្រូវការការចូលរួមឱ្យបានច្រើនពីគ្រូបង្វឹក ដើម្បីយើងមានធនធានកីឡាករឈានទៅដណ្តើមមេដាយបាន»។
សិក្ខាកាមជាគ្រូបង្វឹកកីឡាហែលទឹក ពេលថតជាមួយគ្រូឧទ្ទេស និងថ្នាក់ដឹកនាំ និងក្នុងពិធី បិទវគ្គសាមគ្គីអូឡាំពិក ស្តីពីគ្រូបង្វឹកកីឡាហែលទឹក កម្រិត១។ រូបថត សហព័ន្ធ
នៅក្នុងលក្ខខណ្ឌនេះ លោក ហែម គីរី បានលើកទឹកចិត្ត និងជំរុញឱ្យសិក្ខាកាមជាគ្រូបង្វឹកទាំង២៥នាក់ ឱ្យយកចំណេះជំនាញ ដែលខ្លួនទើបទទួលបានពីគ្រូឧទ្ទេសមកពីសហព័ន្ធកីឡាហែលទឹកអន្តរជាតិ លោក Lopez Akvarado Miguel Angel ទៅជួយបង្ហាត់បង្រៀនដល់កីឡាករ កីឡាការិនីហែលទឹកកម្ពុជា ដើម្បីឱ្យពួកគេកាន់តែមានសមត្ថភាព អាចឈានទៅដណ្តើមបានមេដាយកម្រិតអន្តរជាតិណាមួយ គឺចៀសវាងមកសិក្សាយកត្រឹមវិញ្ញាបនបត្រទៅព្យួរចោល។
លោក គីរី បានបញ្ជាក់ថា៖ «វិញ្ញាបនបត្រ វាមិនមែនជាតម្លៃមួយនៃការរីកចម្រើនរបស់យើងទេ! ការរីកចម្រើនពិតប្រាកដ គឺស្ថិតនៅលើឆន្ទៈ ការតាំងចិត្តរបស់យើង។ យើងអាចយកវិញ្ញាបនបត្រទៅដាក់តាំងនៅផ្ទះ ឬបង្ហាញគេបាន ប៉ុន្តែចំណេះដឹង និងភាពឈ្លាសវៃក្នុងការបង្ហាត់សិស្ស យើងមិនអាចទៅដាក់តាំងប្រាប់នរណាបានឡើយ គឺចេញពីខ្លួនយើង ដែលត្រូវធ្វើវាឱ្យបាន អ៊ីចឹងខ្ញុំសង្ឃឹមថា សិក្ខាកាមទាំងអស់ នឹងមានទឹកចិត្តស្រឡាញ់កីឡាហែលទឹក ហើយនាំគ្នាជួយរុញកីឡានេះ ឱ្យទទួលបានជោគជ័យ នៅលើឆាកអន្តរជាតិ»។
លោក ណយ ផាណា ពេលប្រគល់វត្ថុអនុស្សាវរីយ៍ជូនដល់គ្រូឧទ្ទេសអន្តរជាតិ លោក Lopez Akvarado Miguel Angel នៅក្នុងពិធីបិទវគ្គ។ រូបថត NOCC
ចំណែកគ្រូឧទ្ទេសអន្តរជាតិ លោក Lopez Akvarado Miguel Angel បានវាយតម្លៃខ្ពស់ ចំពោះសិក្ខាកាមជាគ្រូបង្វឹកកីឡាហែលទឹកកម្ពុជាទាំង២៥នាក់ ដែលបានយកចិត្តទុកដាក់សិក្សារៀនសូត្រ ហើយតាមរយៈការសិក្សាទាំងលើផ្នែកទ្រឹស្តី និងការចុះទៅបង្ហាត់ជាក់ស្តែងដល់កីឡាករ កីឡាការិនី ចាប់ពីថ្ងៃទី៩ ដល់ទី១៥ ខែធ្នូនេះ លោកបានបញ្ជាក់ថា សិក្ខាកាមជាគ្រូបង្វឹកកម្ពុជា គឺមានទេពកោសល្យ និងបច្ចេកទេសខ្ពស់ ក្នុងការបង្វឹកសិស្ស ដែលជាក្តីសង្ឃឹមសម្រាប់កម្ពុជា ក្នុងការបណ្តុះធនធានអត្តពលិកកីឡាហែលទឹកជំនាន់ក្រោយបានច្រើន។
ជាមួយគ្នានេះ លោក ណយ ផាណា ទីប្រឹក្សាគណៈកម្មាធិការជាតិអូឡាំពិកកម្ពុជា (NOCC) ក៏បានលើកទឹកចិត្តដល់សិក្ខាកាមជាគ្រូបង្វឹកកម្រិត១ទាំង២៥នាក់ ឱ្យនាំយកចំណេះដឹងទាំងអស់ទៅបង្ហាត់បង្រៀនដល់កីឡាករ កីឡាការិនីនៅតាមអង្គភាព និងក្លិបនានាឱ្យមានការរីកចម្រើនទាំងបរិមាណ និងគុណភាព នាថ្ងៃអនាគត។
លោក ផាណា បញ្ជាក់ថា៖ «សូមសិក្ខាកាមជាគ្រូបង្វឹកទាំងអស់យកបទពិសោធន៍ ចំណេះជំនាញពិត និងគុណតម្លៃនៃវគ្គនេះ ទៅអនុវត្តតាមក្រមវិជ្ជាជីវៈច្បាស់លាស់ គឺការបង្ហាត់បង្រៀនដល់កីឡាករកីឡាការិនីឱ្យមានសក្តានុពល ព្រមទាំងពង្រឹងសាមគ្គីភាពផ្ទៃក្នុងឱ្យបានកាន់តែល្អ ក្នុងការចែករំលែកចំណេះដឹង ដើម្បីអភិវឌ្ឍសមត្ថភាពខ្លួនឯងផង និងបណ្តុះធនធានថ្នាលយុវជនហែលទឹកឱ្យកាន់តែសម្បូរបែប និងប្រកបដោយគុណភាព នាថ្ងៃអនាគតផងដែរ៕
