សកម្មភាពការប្រកួតកីឡាប្រដាល់សកលជើងឯកថ្នាក់ជាតិ ឆ្នាំ២០២៤ ដែលបានបញ្ចប់ដោយជោគជ័យ កាលពីថ្ងៃទី២៦ ខែធ្នូ។ រូបថត សហការី
ការប្រកួតកីឡាប្រដាល់ជ្រើសរើសជើងឯកថ្នាក់ជាតិ ឆ្នាំ២០២៤ ដែលបានបញ្ចប់ កាលពីល្ងាចថ្ងៃទី២៦ ខែធ្នូ ត្រូវបានមន្រ្តីជំនាញរបស់សហព័ន្ធកីឡាប្រដាល់កម្ពុជា អះអាងថា ទទួលបានជោគជ័យធំ ព្រោះមានការកើនឡើងទាំងកម្រិតសមត្ថភាព និងបរិមាណអ្នកចូលរួម ប៉ុន្តែការស្វែងទីផ្សារប្រកួតនៅតាមសង្វៀនឯកជនក្នុងស្រុក នៅតែជាបញ្ហាប្រឈមចំពោះក្រុមអត្តពលិកប្រដាល់កសលកម្ពុជា។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានឱ្យដឹងថា ការប្រកួតកីឡាប្រដាល់សកលជើងឯកថ្នាក់ជាតិ ឆ្នាំ២០២៤ ដែលធ្វើនៅសាលដំបូលទូកនៃសាកលវិទ្យាល័យភូមិន្ទភ្នំពេញ ពីថ្ងៃទី២៣ ដល់ទី២៦ ខែធ្នូនេះ មានកីឡាករកីឡាការិនីចូលរួមសរុប១៤៥នាក់ មកពី៣០សមាគម/ក្លិបរាជធានី-ខេត្ត និង៣ក្រសួងចូលរួម គឺមានការកើនឡើងជាងឆ្នាំមុន៥០ភាគរយ។
ទន្ទឹមនឹងនេះ សហព័ន្ធកីឡាប្រដាល់សកលកម្ពុជា ក៏បានបង្កើតយុវជនសាស្រ្តថ្មី ដោយបង្កើនប្រាក់រង្វាន់ សម្រាប់លើកទឹកចិត្តដល់កីឡាករកីឡាការិនីចូលរួមការប្រកួតថ្នាក់ជាតិលើកនេះ ហើយនេះក៏ជាឆ្នាំដំបូង ដែលសហព័ន្ធ បានបញ្ចូលឱ្យមានវិញ្ញាសាប្រកួតផ្នែកយុវជនផងដែរដើម្បីផ្តោតទៅលើការបង្កើតធនធានយុវជន សម្រាប់ឆ្ពោះទៅកាន់ការប្រកួតកីឡាយុវជនអាស៊ី ឆ្នាំ២០២៩។
លោក ប៊ុយ សុភ័ណ្ឌ បានបញ្ជាក់ថា៖ «ការប្រកួតថ្នាក់ជាតិឆ្នាំនេះ យើងទទួលជោគជ័យធំ ចំណែកការដាក់ឱ្យមានវិញ្ញាសាយុវជន ជាលើកដំបូងនេះ យើងឃើញថា យុវជនមួយចំនួន គាត់បានបង្ហាញសិទ្ធផល និងគុណភាពប្រកួតល្អ អ៊ីចឹងបើសិនជាមានការប្រមូលផ្តុំក្រុមយុវជនឡើងវិញ យើងនឹងបញ្ចូលពួកគាត់ជាយុវជនជម្រើសជាតិ ដើម្បីត្រៀមទាំងការប្រកួតស៊ីហ្គេម ឆ្នាំ២០២៥ ឆ្នាំ២០២៧ និងការប្រកួតកីឡាយុវជនអាស៊ី ឆ្នាំ២០២៩»។
ជាលទ្ធផលនៃការប្រកួតកីឡាប្រដាល់សកលជើងឯកថ្នាក់ជាតិ ឆ្នាំ២០២៤នេះ ក្រុមអត្តពលិករបស់ក្រសួងមហាផ្ទៃ ដណ្តើមបានមេដាយមាស៥ នៅក្នុងការប្រកួតទាំង១២ប្រភេទទម្ងន់ ដើម្បីឈរនៅលេខ១ រីឯលេខ២បានទៅក្រសួងការពារជាតិ ដែលឈ្នះបានមាស៣ និងប្រាក់៤ តាមពីក្រោយដោយក្លិបបញ្ជាការដ្ឋានកាំភ្លើងធំ ដែលឈ្នះមាស២ ប្រាក់១ សំរឹទ្ធ៤ ក្លិបខេត្តកំពង់ឆ្នាំង ឈ្នះមាស១ សំរឹទ្ធ១ និងក្លិបអន្លង់កូមមានជ័យ ឈ្នះមាស១ ហើយក្លិបចំនួន១១ផ្សេងទៀត ក៏ទទួលបានមេដាយប្រាក់ និងសំរឹទ្ធផងដែរ។
យ៉ាងណាក៏ដោយ ចំពោះការសម្រិតសម្រាំងយកអត្តពលិកចូលហ្វឹកហាត់ក្នុងក្រុមជម្រើសជាតិ ប្រចាំឆ្នាំ២០២៥ខាងមុខនេះ លោក ប៊ុយ សុភ័ណ្ឌ បានបង្ហើបថា ផ្តោតខ្លាំងទៅលើកីឡាករ កីឡាករិនី ដែលហ្វឹកហាត់ប្រដាល់សកលចំ ដោយមិនផ្តោតលើកីឡាករ កីឡាការិនីដែលប្រកួតគុនខ្មែរ ឬ Kickbooxing នោះទេ បើទោះបីជាអ្នកទាំងនោះ ដណ្តើមបានមេដាយ ក្នុងការប្រកួតថ្នាក់ជាតិ ឆ្នាំ២០២៤នេះក៏ដោយ។
លោក ប៊ុយ សុភ័ណ្ឌ ពេលថតជាមួយក្រុមត្រកូលអ្នកប្រដាល់ត្រកូល «វី» ដែលដណ្តើមបានមេដាយមាស២ ពីការប្រកួតកីឡាប្រដាល់សកលជើងឯកថ្នាក់ជាតិ ឆ្នាំ២០២៤នេះ។ រូបថត សហការី
លោក សុភ័ណ្ឌ បញ្ជាក់ថា៖«ការប្រមូលផ្តុំឆ្នាំនេះ គឺភាគច្រើនជាកីឡាករប្រដាល់សកលចំ ហើយជាយុទ្ធសាស្រ្ត សហព័ន្ធ ក៏បានបង្កើតធនធានយុវជនដោយផ្ទាល់ផងដែរ ដោយផ្តោតការហាត់តែប្រដាល់សកលទេ»។
«ចំណែកការប្រកួតថ្នាក់ជាតិនេះ ឃើញមានទាំងកីឡាករជម្រើសជាតិ និងកីឡាករមកពីតាមបណ្តាក្លិប បានឡើងមកដល់វគ្គផ្តាច់ព្រ័ត្រ ដែលនេះជាសញ្ញាល្អ ក្នុងការជ្រើសរើសពួកគាត់ទៅប្រកួតស៊ីហ្គេមនៅថៃ ហើយជឿថា យើងនឹងនៅតែអាចរក្សាកំណត់ត្រានៃការដណ្តើមបានមេដាយ ដូចសមិទ្ធផលជោគជ័យ សម្រាប់ការធ្វើម្ចាស់ផ្ទះស៊ីហ្គេម កាលពីឆ្នាំ២០២៣»។ លោក ប៊ុយ សុភ័ណ្ឌ បានបន្ថែម។
សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះកន្លងមកនេះ ក្រុមប្រដាល់សកលកម្ពុជា ដណ្តើមបានមេដាយមាស១ ប្រាក់៣ និងសំរឹទ្ធ៥ ដោយឈរនៅលេខ៤ ក្នុងចំណោម១០ប្រទេស ចំណែកការប្រកួតស៊ីហ្គេម លើកទី៣៣ ឆ្នាំ២០២៥ នៅថៃ លោក ប៊ុយ សុភ័ណ្ឌ បានបញ្ជាក់ថា សហព័ន្ធ នៅតែត្រូវការកីឡាករចូលសញ្ជាតិ ដើម្បីប្រកួតតំណាងឱ្យកម្ពុជា ហើយសហព័ន្ធ ក៏គ្រោងនឹងបញ្ជូនក្រុមអត្តពលិកទៅហ្វឹកហាត់ និងប្រកួតនៅក្រៅប្រទេស ត្រៀមស៊ីហ្គេម ចុងឆ្នាំ២០២៥ផងដែរ។
ក្រុមអត្តពលិក ដែលដណ្តើមបានមេដាយពីការប្រកួតកីឡាប្រដាល់សកលថ្នាក់ជាតិ ឆ្នាំ២០២៤ បានថតជាមួយថ្នាក់ដឹកនាំ គ្រូបង្វឹក និងម្ចាស់ឧបត្ថម្ភ នៅក្នុងពិធីបិទ កាលពីល្ងាចថ្ងៃព្រហស្បតិ៍។ រូបថត សហការី
តែទោះបីជាយ៉ាងណា ចំពោះការស្វែងរកទីផ្សារឱ្យកីឡាករ កីឡាការិនីប្រដាល់សកល បានឡើងប្រកួតនៅតាមសង្វៀនឯកជនក្នុងស្រុក វានៅតែជាបញ្ហាប្រឈម សម្រាប់ថ្នាក់ដឹកនាំសហព័ន្ធកីឡាប្រដាល់សកលកម្ពុជា ខណៈម្ចាស់សង្វៀននៅតាមស្ថានីយ៍នីមួយៗ មិនសូវចាប់អារម្មណ៍រៀបចំឱ្យមានការប្រកួតប្រដាល់ គឺផ្តោតសំខាន់តែលើការប្រកួតប្រដាល់គុនខ្មែរ និង Kickboxing នោះ។
ចំពោះបញ្ហានេះ លោក ប៊ុយ សុភ័ណ្ឌ បានបញ្ជាក់ថា៖ «សហព័ន្ធ តែងតែបានស្នើសុំឱ្យមានរៀបចំការប្រកួតប្រដាល់សកល នៅតាមសង្វៀនរបស់ស្ថានីយ៍ទូរទស្សន៍ក្នុងស្រុក ប៉ុន្តែនៅតែមិនសូវមានឱកាស ហេតុនេះយើងបានកៀរគររកការឧបត្ថម្ភ ដើម្បីរៀបចំឱ្យមានការប្រកួតប្រដាល់សកលអាជីពដោយខ្លួនឯង ហើយឆ្នាំ២០២៤នេះ យើងរៀបចំបាន៣លើក ចំណែកនៅឆ្នាំ២០២៥ យើងនឹងព្យាយាមរៀបចំការប្រកួតឱ្យបានកាន់តែច្រើន»។
លោកបន្ថែមថា៖ «ប៉ុន្តែយើងនៅតែអំពាវនាវសុំឱ្យម្ចាស់សង្វៀនប្រដាល់នៅតាមស្ថានីយ៍ក្នុងស្រុក រៀបចំឱ្យមានការប្រកួតប្រដាល់សកល ជារៀងរាល់ចុងសប្តាហ៍ផង ដើម្បីឱ្យក្រុមអត្តពលិកអាចពង្រឹងសមត្ថភាពកាន់តែល្អ ព្រោះទាំងប្រដាល់គុនខ្មែរ ដែលជាកីឡាអត្តសញ្ញាណជាតិ និងប្រដាល់សកល ក៏ដូចជាប្រភេទកីឡាផ្សេងៗទៀត គឺពេលប្រកួតស៊ីហ្គេម សុទ្ធតែប្រឹងប្រែងដណ្តើមយកមេដាយជូនជាតិ និងលើកទង់ជាតិខ្មែរ បង្ហាញនៅលើឆាកអន្តរជាតិដូចគ្នា»៕
