លោកអាជ្ញាកណ្តាលរាប់ទៅលើ ពេជ្រ សម្បត្តិ មុនពេលបញ្ឈប់នៅចុងទឹកទី៣ បន្ទាប់ពីអស់លទ្ធភាពទប់ទល់ជាមួយជើងខ្លាំងរបស់ជប៉ុន Taimu Hisai។ រូបថត សហការី
អ្នកប្រដាល់ជើងខ្លាំងរបស់កម្ពុជា ពេជ្រ សម្បត្តិ ត្រូវបានអ្នកប្រយុទ្ធរបស់ជប៉ុន Taimu Hisai វាយសន្ធាប់រហូតតដៃលេងបាន ហើយត្រូវបានលោកអាជ្ញាកណ្តាប់បញ្ឈប់ក្នុងទឹកទី៣ សម្រាប់ការទទួលបានឱកាសប្រកួតម៉ារ៉ាតុងដណ្តើមខ្សែក្រវាត់ ជាប្រវត្តិសាស្រ្ត លើកដំបូង របស់គេ នៅលើសង្វៀន Knockout របស់ជប៉ុន ក្នុងព្រឹត្តិការណ៍ KO CLIMAX 2024 ប៉ុន្តែ ចំរើន គុនខ្មែរ បានបង្កើតឱ្យមានការភ្ញាក់ផ្អើល តាមរយៈការផ្តួលកីឡាករម្ចាស់ខ្សែក្រវាត់របស់ជប៉ុនឱ្យសន្លប់ នៅទឹកទី១វិញ។
បើទោះបីជា ពេជ្រ សម្បត្តិ ធ្លាប់បានធ្វើឱ្យម្ចាស់ខ្សែក្រវាត់ Taimu Hisai ស្រក់ទឹកភ្នែក សម្រាប់ការជួបគ្នា នៅលើទឹកដីកម្ពុជា កាលពីថ្ងៃទី២៥ ខែមេសា ឆ្នាំ២០២៤ តាមរយៈការយកឈ្នះដោយពិន្ទុ ប៉ុន្តែការជួបគ្នាជាថ្មី នៅលើទឹកដីជប៉ុន នារសៀលថ្ងៃចន្ទនេះ Taimu Hisai បានផ្លាស់ប្តូរយុទ្ធសាស្រ្តប្រកួតបានយ៉ាងល្អ ដើម្បីផ្តួល ពេជ្រ សម្បត្តិ ឱ្យសន្លប់វិញ។
តាមរយៈការប្រកួត ដែលមានត្រឹម៣ទឹកនេះ ជើងខ្លាំងរបស់ជប៉ុន Taimu Hisai មិនបានប្រកាន់ជំហរវាយប្តូរកណ្តាប់ដៃដោយប្រឈមជាមួយ ពេជ្រ សម្បត្តិ ដូចការជួបគ្នានៅលើទឹកដីកម្ពុជាទៀតនោះទេ គឺរូបគេ បានប្តូរមកប្រើជង្គង់ភាគច្រើន ដែលធ្វើឱ្យ ពេជ្រ សម្បត្តិ ដែលមានកម្ពស់ទាបជាងនោះ មានការពិបាក ទាំងការចូលម៉ាត់កៀក និងការចូលចាប់បុកជង្គង់ ព្រោះផ្លែវាយចេញរបស់ Taimu វែងជាង។
កីឡាករម្ចាស់ផ្ទះ Taimu Hisai បានបង្ហាញការមានប្រៀបលើ ពេជ្រ សម្បត្តិ តាំងពីទឹកទី១ ដោយរូបគេបានបុកជង្គង់ និងម៉ាត់ចូលពេញៗល្អជាង ហើយនៅទឹកទី២ រូបគេបានព្យាយាមចូលចាប់កាច់បន្ថយកម្លាំងរបស់ ពេជ្រ សម្បត្តិ មុនពេលប្រើជង្គង់ឆ្វេងស្តាំ ដើម្បីយកប្រៀបលើ សម្បត្តិ ១ទឹកទៀត។
ជាមួយការចាញ់ប្រៀប២ទឹកនេះ ពេជ្រ សម្បត្តិ បានព្យាយាមវាយសម្រុកកាន់តែខ្លាំង នៅទឹកទី៣ ក្នុងបំណងស្តាដើមមកវិញ ប៉ុន្តែការម៉ាត់ឆ្វេងចូលផ្ទៃមុខពេញរបស់ Taimu Hisai បានធ្វើឱ្យ សម្បត្តិ ដួលទាំងជំហរ ហើយត្រូវបានជ្ញាកណ្តាលរាប់ជាលើកទី១ និងឈានដល់បញ្ឈប់ការប្រកួតតែម្តង នៅពេលឃើញថា ពេជ្រ សម្បត្តិ អស់លទ្ធភាពក្នុងការទប់ការវាយសម្រុកដោយកណ្តាប់ដៃ និងជង្គង់របស់ Taimu Hisai នោះ។
ចំណែកអ្នកប្រដាល់របស់ថៃ Lom Leesan Tiger Reon បានចាញ់ធ្ងន់កជាង ពេជ្រ សម្បត្តិ ទៅទៀត សម្រាប់ការប្រកួតម៉ារ៉ាតុង ដណ្តើមខ្សែក្រវាត់ ទម្ងន់៦០គីឡូក្រាម ក្នុងព្រឹត្តិការណ៍ KO CLIMAX 2024នេះ ដោយរូបគេ ត្រូវបានកីឡាករជប៉ុន Kanato Shomoji ទាត់ស្តាំចូលកញ្ចឹងក បណ្តាលឱ្យសន្លប់ធំ នៅចុងទឹកទី១ បន្ទាប់ពីលោកអាជ្ញាកណ្តាលរាប់ចំនួន១លើករួចមក ដែលធ្វើឱ្យការប្រកួតផ្តាច់ព្រ័ត្រដណ្តើមខ្សែក្រវាត់នេះ ជាការឡើងទៅជួបគ្នារវាងកីឡាករជប៉ុនដូចគ្នា គឺ Taimu Hisai និង Kanato Shomoji។
កីឡាករកម្ពុជា ចំរើន គុនខ្មែរ រួមទាំងប្រតិភូ និងគ្រូបង្វឹក បានបង្ហាញភាពសប្បាយរីករាយ ចំពោះការផ្តួលម្ចាស់ខ្សែក្រវាត់របស់ជប៉ុន Ogasawara Eisaku ឱ្យសន្លប់នៅទឹកទី១។ រូបថត សហការី
ដោយឡែក សម្រាប់ការបង្ហាញវត្តមានជាលើកដំបូង នៅលើសង្វៀន Knockout របស់ជប៉ុន ក្នុងព្រឹត្តិការណ៍ KO CLIMAX 2024 នេះដែរ អ្នកប្រដាល់មុខសេដ ចំរើន គុនខ្មែរ បានទាត់ និងម៉ាត់ឱ្យអ្នកប្រដាល់ជាម្ចាស់ខ្សែក្រវាត់របស់ជប៉ុន Ogasawara Eisaku ដួលទាំងវង្វេង ហើយត្រូវបានអាជ្ញាកណ្តាលរាប់ចំនួន២លើក និងឈានដល់ការបញ្ឈប់ការប្រកួតនៅទឹកទី១នេះតែម្តង ខណៈជប៉ុន លែងមានលទ្ធភាពតដៃជាមួយ ចំរើន នោះ។
ការផ្តួលកីឡាករជប៉ុន Ogasawara Eisaku ឱ្យសន្លប់របស់ ចំរើន គុនខ្មែរ សម្រាប់ការប្រកួតមិត្តភាពនេះ បានក្លាយជាជ័យជម្នះយ៉ាងសំខាន់ ដែលបានស្តាមុខមាត់គុនខ្មែរបានមួយកម្រិតវិញ ចំពោះការបរាជ័យដោយសន្លប់របស់ជនរួមជាតិ ពេជ្រ សម្បត្តិ នៅលើសង្វៀន Knockout ក្នុងព្រឹត្តិការណ៍ KO CLIMAX 2024 នៅប្រទេសជប៉ុននេះ៕
