កីឡាករអ៊ីរ៉ង់ Yousef Hematis បានម៉ាត់ទៅលើអតីតអ្នកប្រដាល់ធ្លាប់ខ្លាំង ជា ស្រួច បណ្តាលឱ្យសន្លប់ ត្រឹមទឹកទី១។ រូប សហការី
ភ្នំពេញ៖ ការវិលត្រឡប់មកកាន់សង្វៀនជាថ្មីរបស់អតីតកីឡាករ ធ្លាប់សាងបានភាពល្បីខ្លាំង កាលពីជាង២០ឆ្នាំមុន ជា ស្រួច មិនទទួលបានលទ្ធផលល្អទេ ដោយកីឡាករវ័យ ៥៣ ឆ្នាំរូបនេះ ត្រូវបានអ្នកប្រដាល់ពេញដោយកម្លាំងរបស់អ៊ីរ៉ង់ Yousef Hematis ម៉ាត់ឱ្យសន្លប់យ៉ាងងាយ ហើយហេតុការណ៍សន្លប់នេះ បានធ្វើឱ្យលោក អេ ភូថង ជាមិត្តភក្តិ និងជាគ្រូបង្វឹក មានការបារម្ភខ្លាំង និងបានសម្រេចថា ឈប់ឱ្យ ជា ស្រួច ឡើងប្រកួតទៀតហើយ។
លោក អេ ភូថង បាននិយាយ ក្រោយការប្រកួតថា៖ «ខ្ញុំភ័យចំពោះគាត់ (ជា ស្រួច) ព្រោះខ្លាចមានគ្រោះថ្នាក់ធំ! គាត់បានហ្វឹកហាត់ត្រៀមខ្លួនហើយ ប៉ុន្តែពេលឡើងប្រកួតវាជារឿងផ្សេង ព្រោះយើងចាស់ ប្រព័ន្ធការពារមិនសូវល្អ និងវាយចេញយឺតទៀត។ បើមើលតាមទឹកដៃ គឺយើងមិនទាន់គេទេ ព្រោះកីឡាករក្មេងៗឥឡូវគេល្អ មិនដូចពីមុនឡើយ អ៊ីចឹងខ្ញុំនឹងឈប់ឱ្យគាត់ឡើងប្រកួតទៀតហើយ»។
តាមរយៈការបង្ហាញវត្តមានជាថ្មី នៅលើសង្វៀន CNC កាលពីថ្ងៃសៅរ៍ កន្លងមកនេះ ជា ស្រួច ត្រូវបានស្វាគមន៍ជាមួយការច្រៀងអមដោយបទចម្រៀង «បេះដូងអ្នកប្រដាល់» របស់ពិធីករ ព្រោះបទចម្រៀងដើមរបស់លោក ខេមរៈ សិរីមន្ត នេះវាបង្ហាញពីខ្សែជីវិតពិតរបស់លោក ជា ស្រួច តែម្តង ប៉ុន្តែសម្រាប់ការឡើងប្រកួតនេះ ជា ស្រួច មិនអាចបង្ហាញសមត្ថភាពបានល្អ ដូចកាលពីអតីតកាលទេ។
តាមរយៈការប្រកួតជាក់ស្តែង ជា ស្រួច បានព្យាយាមប្រើកណ្តាប់ដៃ និងក្បាច់កែង វាយទៅលើអ្នកប្រដាល់អ៊ីរ៉ង់ Yousef Hematis ប៉ុន្តែការវាយចេញរបស់គាត់ មិនសូវមានទម្ងន់ឡើយ ហើយល្បឿនវាយចេញក៏ឆ្គាំឆ្គងមិនដូចពីមុនដែរ។ ផ្ទុយទៅវិញ ការវាយសម្រុកដោយកណ្តាប់ដៃចូលមុខផ្ទួនៗចំនួន៦ដៃរបស់ Yousef បានធ្វើឱ្យ ជា ស្រួច ដួលក្រោយលែងរួច នៅត្រឹមរយៈពេល៤០នាទី នៅក្នុងទឹកទី១។
ការដួលសន្លប់មួយភាំងរបស់ ជា ស្រួច បានធ្វើឱ្យលោក អេ ភូថង ដែលជាអ្នករុំអំបោះដៃឱ្យ ជា ស្រួច ដោយផ្ទាល់នោះ កើតក្តីបារម្ភខ្លាំង ហើយបានមើលឃើញថា ជា ស្រួច មិនអាចបន្តអាជីព ជាកីឡាករបានទៀតទេ គឺគួរតែជាគ្រូបង្វឹកដល់កីឡាករក្មេងៗជំនាន់ក្រោយ វាប្រសើរជាង។
អតីតកីឡាករជើងខ្លាំង គ្មានគូប្រៀបនៅកម្ពុជា លោក អេ ភូថង បានបញ្ជាក់ថា៖ «បើជួបអ្នកចាស់ៗដូចគ្នា អាចវាយបាន ព្រោះយើងអាយុ៥៣ឆ្នាំទៅហើយ តែគេម្នាក់នេះ នៅក្មេង អាយុទើប២៥ឆ្នាំ ប៉ុន្តែមិនជាបញ្ហាទេ ធ្វើម៉េចយើងចង់សាកខ្លួនឯង ហើយនេះជាបទពិសោធន៍។ ខ្ញុំនឹងនិយាយជាមួយគាត់ ឱ្យគាត់ឈប់ឡើងប្រកួតទៀតហើយ ព្រោះនៅពេលឃើញពួកម៉ាកបែបនេះ ខ្ញុំមានអារម្មណ៍ភ័យ និងចង់ស្រឺតដង្ហើមតែម្តង»។
ចំណែក លោក ជា ស្រួច ក៏មិនបានជំទាស់ទៅនឹងសំណើរបស់លោក អេ ភូថង ក្នុងការឈប់ឱ្យគាត់ឡើងប្រកួតនេះទៀតដែរ បើទោះបីជាខ្លួនលោកផ្ទាល់ នៅតែមិនទាន់អស់ចិត្ត ក្នុងការបង្ហាញពីបច្ចេកទេស ព្រោះការបង្ហាញខ្លួនឡើងវិញ បន្ទាប់ពីខកខានជាង២០ឆ្នាំនេះ លោកបែរជាត្រូវដាក់ឱ្យប្រកួតជាមួយកីឡាករវ័យក្មេង មានកម្លាំងរឹងមាំ និងមានកណ្តាប់ដៃល្អទៀត គឺខុសពីកម្រិតសមត្ថភាព និងអាយុរបស់លោកនៅពេលនេះ។
លោក ជា ស្រួច បាននិយាយថា៖ «ខ្ញុំនឹងធ្វើតាមគាត់ ព្រោះយើងចាស់ហើយ ប៉ុន្តែការឡើងសង្វៀនជាថ្មីនេះ ដោយសារខ្ញុំចង់សាកខ្លួនខ្ញុំទេ ថាតើខ្ញុំអាចវ៉ៃបានឬអត់? តែយើងទៅអត់រួច ព្រោះយើងប៉ះគេក្មេង។ ពីដំបូង គេថាយកស៊េរីចាស់ៗ មានសមត្ថភាពល្មមៗមក ប៉ុន្តែកីឡាករអ៊ីរ៉ង់ម្នាក់នេះ នៅក្មេងអាយុត្រឹមជាង២០ឆ្នាំ ចំណែកខ្ញុំជាង ៥០ ឆ្នាំទៅហើយ ហើយចំអ្នកគេល្អដៃទៀត ចំណែកទម្ងន់ដៃរបស់គេធ្ងន់ណាស់»។
ជាមួយគ្នានេះ លោក ជា ស្រួច បានសុំចិត្តអ្នកគាំទ្រកុំដៀល ជេរគាត់ សម្រាប់ការចាញ់ដោយសន្លប់ ចំពោះការប្រកួតឡើងវិញនេះ។ លោកបានបញ្ជាក់ថា៖ «សូមផ្តាំផ្ញើទៅបងប្អូនទស្សនិកជន ដែលគាំទ្រខ្ញុំតាំងពីដើមមក សូមកុំដៀល កុំជេរខ្ញុំអី ព្រោះខ្ញុំឡើងប្រកួតវិញនេះ គ្រាន់តែចង់សាកមើលបច្ចេកទេសខ្លួនឯងទេ ប៉ុន្តែធ្វើម៉េច បើជួបគេក្មេង ហើយល្អដៃទៀតនោះ»៕
