ការទាត់សងគ្នារវាង រិន ដាវីត (ឆ្វេង) និង ធន់ អៀងឡៃ សម្រាប់ការប្រកួតផ្តាច់ព្រ័ត្រ ដណ្តើមខ្សែក្រវាត់ កាលពីថ្ងៃទី៨ ខែកុម្ភៈ ឆ្នាំ២០២៤។ រូប ថោន
ភ្នំពេញ៖ ការប្តឹងតវ៉ារបស់ភាគីកីឡាករ រិន ដាវីត ជំទាស់ទៅនឹងការកាត់សេចក្តីរបស់ចៅក្រម ដែលសម្រេចឱ្យ ធន់ អៀងឡៃ ឈ្នះម្ចាស់ខ្សែក្រវាត់ប្រភេទទម្ងន់៦០គីឡូក្រាម នៅលើសង្វៀនថោន កាលពីថ្ងៃទី៨ ខែកុម្ភៈ គឺសហព័ន្ធកីឡាប្រដាល់គុនខ្មែរ នឹងចាប់ផ្តើមបើកកិច្ចប្រជុំត្រួតពិនិត្យ និងធ្វើការដោះស្រាយនៅថ្ងៃចន្ទនេះ ដើម្បីរកឱ្យឃើញភាពយុត្តិធម៌ដ៏ត្រឹមត្រូវជូនភាគីទាំង២។
ជាមួយគ្នានេះ អ្នកគាំទ្រដ៏ច្រើនលើសលប់ បាននិងកំពុងទន្ទឹងរង់ចាំមើលចំណាត់ការរបស់សហព័ន្ធកីឡាប្រដាល់គុនខ្មែរផងដែរថា នឹងអាចឈរលើភាពយុត្តិធម៌បានកម្រិតណា ព្រោះភាពចម្រូងចម្រាសបែបនេះ ធ្លាប់បានកើតមានឡើងច្រើនលើក និងច្រើនឆ្នាំមកហើយ ប៉ុន្តែរាល់លទ្ធផលដោះស្រាយកន្លងមក វាហាក់ធ្វើឱ្យតែបានៗយករួចខ្លួន ព្រោះទម្ងន់ទោស ដែលបានដាក់ទៅលើចៅក្រម ដែលប្រព្រឹត្តខុស ហាក់ស្រាលពេក ធ្វើឱ្យមន្រ្តីបច្ចេកទេសទាំងនោះ នៅតែបន្តបង្កើតជាកំហុសដដែលៗ។
តែទោះបីជាយ៉ាងណា ភាពចម្រូងចម្រាសជុំវិញការកាត់សេចក្តីរវាង ធន់ អៀងឡៃ និង រិន ដាវីត លើកនេះ មានការផ្ទុះការតវ៉ាខ្លាំង ដោយភាគីកីឡាករ រិន ដាវីត បានឡើងស្រែកតវ៉ាពេញលើសង្វៀននិងបានដាក់ពាក្យបណ្តឹងផងដែរ បន្ទាប់ពីចៅក្រមទាំង៥នាក់ បានកាត់សេចក្តីឱ្យ ធន់ អៀងឡៃ ឈ្នះដោយពិន្ទុមិនឯកច្ឆន្ទ ៣-២ ខណៈការប្រកួតត្រឹម៣ទឹកនោះ អ្នកទស្សនាស្ទើរមួយប្រទេស បានមើលឃើញថា រិន ដាវីត មានប្រៀបនៅទឹកទី១ ទឹកទី២ និងរាងចាញ់ប្រៀប អៀងឡៃបន្តិចវិញនៅទឹកទី៣ ហេតុនេះលទ្ធផលសរុប វាសមតែ រិន ដាវីត ជាអ្នកឈ្នះ និងក្លាយជាម្ចាស់ខ្សែក្រវាត់។
ជាមួយភាពមិនប្រក្រតីនេះ លោក ស្រី ចាន់ថន អនុប្រធានកិត្តិយសសហព័ន្ធកីឡាប្រដាល់គុនខ្មែរ បានទាក់ទងទៅលោក ខូវ ឆាយ អនុប្រធានទី១សហព័ន្ធកីឡាប្រដាល់គុនខ្មែរ ទាំងយប់ កាលពីថ្ងៃទី៨ ខែកុម្ភៈនោះ ដោយស្នើសុំឱ្យរៀបចំការប្រជុំជាបន្ទាន់មួយរវាងភាគីតំណាងសហព័ន្ធភាគីចៅក្រមកាត់សេចក្តីទាំង៥នាក់ រួមមានលោក ជឿន វិបុលលោក ប៉ាន ស៊ីថៃលោក កែវ ពៅលោក ណុប វ៉ានថេត និងលោក បឺត សំខាន់ ព្រមទាំងភាគីកីឡាករគុនខ្មែរទាំងសងខាង និងបុគ្គលពាក់ព័ន្ធផ្សេងទៀតផងដែរ។
ទន្ទឹមនឹងនេះ លោក ខូវ ឆាយ ដែលទើបទទួលបានតួនាទីជាអនុប្រធានទី១សហព័ន្ធកីឡាប្រដាល់គុនខ្មែរ បានបង្ហោះសារជាសាធារណៈក្នុងភាពទទួលខុសត្រូវខ្ពស់បែបនេះថា៖ «ហ៊ានធ្វើ ហ៊ានទទួលខុសត្រូវ។ បើខ្ញុំធ្វើមិនកើត ខ្ញុំសុំទោស ហើយសុំចុះចេញ មិនបាច់ឱ្យអ្នកណាដេញទេ»។
យ៉ាងណាក៏ដោយ បើតាមលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានប្រាប់ថា អ្នកដឹកនាំកិច្ចប្រជុំ ដើម្បីដោះស្រាយបណ្តឹងរបស់ភាគីកីឡាករ រិន ដាវីត មិនមែនលោក ខូវ ឆាយ ទេ ប៉ុន្តែជាលោក ម៉ិល កាដូ ដែលជាមន្រ្តីចាស់វស្សារបស់សហព័ន្ធ ហើយកិច្ចប្រជុំ នឹងត្រូវធ្វើនៅថ្ងៃចន្ទនេះ។
លោក តែម ម៉ឺន បានប្រាប់ភ្នំពេញប៉ុស្តិ៍តាមតេឡេក្រាម កាលពីល្ងាចថ្ងៃអាទិត្យ ម្សិលមិញថា៖ «ក្នុងនាមខ្ញុំជាប្រធានសហព័ន្ធ គឺបានចារឱ្យឯកឧត្តម ម៉ិល កាដូ ទទួលបន្ទុកបច្ចេកទេស និងជាប្រធានក្រុមប្រឹក្សាបច្ចេកទេស ជាអ្នកដឹកនាំការប្រជុំ ដើម្បីពិនិត្យលើការងារហ្នឹង (បណ្តឹងរបស់ភាគី រិន ដាវីត) ទៅតាមនិតិវិធីឱ្យបានហ្មត់ចត់ត្រឹមត្រូវបំផុត»។
លោកបានបន្ថែមថា៖ «ការដឹកនាំការប្រជុំរបស់ឯកឧត្តម ម៉ិល កាដូ ដែលខ្ញុំបានចារឱ្យនេះ គឺស្របទៅនឹងរបៀបរបបនៃការធ្វើការងារជាក្រុម ដោយក្នុងនោះក្រុមការងារអគ្គលេខាធិការដ្ឋាន ក្រុមប្រឹក្សាបច្ចេកទេស គណៈកម្មការបច្ចេកទេស និងអនុគណៈកម្មការវិន័យ នឹងចាត់តាំងមន្រ្តីរបស់ខ្លួនពី២ ទៅ៣នាក់ចូលរួមប្រជុំ ដើម្បីសិក្សា និងវាយតម្លៃឱ្យបានលម្អិត១ទឹកម្តងៗ ហើយតាមកម្មវិធីការងាររបស់ឯកឧត្តម ម៉ិល កាដូ ដាក់ចេញ គឺនឹងធ្វើនៅថ្ងៃចន្ទ ដើម្បីដោះស្រាយការងារនេះឱ្យបានហ្មត់ចត់ត្រឹមត្រូវឡើងវិញ ទៅតាមនិតិវិធី និងការងាររបស់សហព័ន្ធ»៕
