ស្រួង ភាវី បានបង្ហាញការរីករាយខ្លាំង បន្ទាប់ពីបានឈ្នះពាន ពីការប្រកួតស្នូកឃ័រ LPBA Championship ជាលើកទី៧។ រូបថត ភាវី
ភ្នំពេញ៖ កីឡាការិនីជើងខ្លាំងផ្នែកកីឡាស្នូកឃ័រ និងប៊ីយ៉ារបស់កម្ពុជា ស្រួង ភាវី បានលះបង់ទាំងកម្លាំងចិត្ត និងស្មារតី ក្នុងការជម្នះនូវរាល់ឧបសគ្គចំពោះមុខ រហូតអាចដណ្តើមបានជ័យជម្នះដ៏ធំមួយទៀតជូនដល់ប្រទេសជាតិ និងប្រជាជនកម្ពុជា គឺការឈ្នះពានរង្វាន់ការប្រកួតប៊ីយ៉ាការ៉ុម៣បាំង (3 Cushion) ក្នុងព្រឹត្តិការណ៍កម្រិតពិភពលោក LPBA Championship នៅប្រទេសកូរ៉េខាងត្បូង។
សម្រាប់ការប្រកួតពានរង្វាន់ LPBA Championship 2024 ដែលប្រមូលផ្តុំដោយកីឡាការិនីអន្តរជាតិឆ្នើមៗចំនួន៣២នាក់នេះ ស្រួង ភាវី ដែលលេងតំណាងឱ្យកម្ពុជា បានទទួលជ័យជម្នះចំនួន៦ប្រកួតជាប់ៗគ្នា តាមរយៈការប្រកួតយ៉ាងស្វិតស្វាញបំផុត ដើម្បីឡើងកាន់វគ្គផ្តាច់ព្រ័ត្រ ជាលើកទី៧ យ៉ាងរំភើបបំផុត។
យ៉ាងណាមិញ សម្រាប់ការប្រកួតផ្តាច់ព្រ័ត្រជាមួយកីឡាការិនីជើងខ្លាំងរបស់ម្ចាស់ផ្ទះកូរ៉េខាងត្បូង Jung-suk LIM ដែលត្រូវបានធ្វើឡើង កាលពីថ្ងៃទី១១ ខែកុម្ភៈ កន្លងមកនេះ ស្រួង ភាវី បានចាញ់បង់គូប្រកួតម្នាក់នេះជាមួយពិន្ទុ ៥-០ សម្រាប់ការចាប់ផ្តើម ប៉ុន្តែ ភាវី បានព្យាយាមតាំងស្មារតីបុកស្នូកឃ័រដោយអំណត់ និងអាចរកបានពិន្ទុតាមពីក្រោយរហូតនាំមុខ ៩-៥ វិញ ហើយនៅពេល Jung-suk LIM រកបានបន្ថែម១ពិន្ទុទៀត ស្រួង ភាវី អាចរកបាន២ពិន្ទុចុងក្រោយ ដើម្បីយកឈ្នះដោយពិន្ទុ ១១-៦។
កីឡាការិនីជម្រើសជាតិកម្ពុជា និងជាម្ចាស់មេដាយមាសស៊ីហ្គេម ឆ្នាំ២០២៣ ស្រួង ភាវី បានបង្ហាញការរីករាយ និងរំភើបខ្លាំងបំផុត ចំពោះការឈ្នះបានពានដ៏មានន័យនេះ ព្រោះវាជាពានទី៧ហើយ ដែលនាងដណ្តើមបានជាបន្តបន្ទាប់ពីការប្រកួតព្រឹត្តិការណ៍ស្នូកឃ័រ LPBA Championship ដ៏ធំប្រចាំនៅប្រទេសកូរ៉េនេះ។
យ៉ាងណាក៏ដោយទម្រាំដណ្តើមពានលើកទី៧នេះ ស្រួង ភាវី បានប្រឹងប្រែងឡើងឈឺទៅហើយ ដោយអ្នកស្រីបាននិយាយតាមរយៈវីដេអូខ្លីរបស់ខ្លួន កាលពីព្រឹកថ្ងៃទី១២ ខែកុម្ភៈថា៖«ពេលក្រោកពីគេងមកនិយាយពីភាពទ្រុឌទ្រោមឈឺចុកចាប់ដូចគេដាក់ប៉ុន្មានដំបងអ៊ីចឹង បើក្បាលវិញ ប្រើការគិតខ្លាំងពេកឡើងឈឺម៉កៗ។ និយាយទៅការប្រកួតលើកនេះ ខ្ញុំប្រើកម្លាំងថាមពលអស់ពីខ្លួនតែម្តង ចំណែកការគិតវាលះខ្លាំងមែនទែន អ៊ីចឹងពេលនេះ ខ្ញុំទប់លែងឈ្នះហើយ ប៉ុន្តែខ្ញុំសម្រាកពី២ទៅ៣ថ្ងៃអីទៀត ខ្ញុំនឹងជាវិញហើយ»។
តែទោះបីជាយ៉ាងណា ស្រួង ភាវី បានបង្ហាញមោទនភាពខ្លាំង ហើយបានទទួលស្គាល់ថា ការតស៊ូលះបង់របស់នាង នៅលើវិស័យកីឡាស្នូកឃ័រ និងប៊ីយ៉ា នៅលើទឹកដីប្រទេសកូរ៉េខាងត្បូងរហូតមកដល់ពេលនេះ ពិតជាមានតម្លៃមិនអាចកាត់ថ្លៃបាន ព្រោះអ្នកស្រីបានប្រើជំនាញនេះ ដើម្បីលើកមុខមាត់ប្រទេសជាតិ តាមរយៈការដណ្តើមបានពាន និងឈ្នះមេដាយ នៅលើឆាកអន្តរជាតិ ជាបន្តបន្ទាប់។
ស្រួង ភាវី បានបញ្ជាក់ថា៖ «សម្រាប់រូបខ្ញុំផ្ទាល់ដើម្បីបានលើកកិត្យានុភាព មោទនភាព និងភាពក្លាហានខ្លាំងក្លារបស់ជនជាតិខ្មែរ ខ្ញុំស៊ូខ្សោះអស់ពីក្នុងខ្លួន បូជាទាំងកម្លាំងកាយ ចិត្ត គឺធ្វើយ៉ាងណាពុះពារតស៊ូរហូតបានទទួលនូវអ្វីដែលពុកម៉ែបងប្អូន ចង់ឃើញចង់បានពីកូនស្រីកម្ពុជាម្នាក់នេះ។ព្រោះតែជំពាក់គុណបុព្វបុរសខ្មែរគ្រប់ជំនាន់ ទើបរូបខ្ញុំខំប្រឹង ដើម្បីតបស្នងនូវគុណូបការៈមហាបុព្វបុរសខ្មែរគ្រប់ជំនាន់»៕
