ក្រុមបញ្ជាការដ្ឋានអង្គរក្ស បានក្លាយជាម្ចាស់ជើងឯក ការប្រកួតកីឡាបាល់ទះតេជោលីគ ក្រោយយកឈ្នះក្រុមវិសាខា ៣-១។ រូប សហការី
ភ្នំពេញ៖ ការដណ្តើមបានតំណែងជើងឯកពីការប្រកួតកីឡាបាល់ទះតេជោលីគ (TECHO Volleyball Cambodia League) របស់ក្រុមបញ្ជាការដ្ឋានអង្គរក្ស វាបានក្លាយជាកំណត់ត្រាដ៏ជោគជ័យបំផុត និងជាលទ្ធផលដែលគ្មានអ្នកណាគិតដល់ថា ក្រុមមួយនេះ អាចយកឈ្នះក្រុមមិនធ្លាប់ចាញ់ វិសាខា នៅវគ្គផ្តាច់ព្រ័ត្រនោះទេ ចំណែកក្រុមក្រសួងមហាផ្ទៃ ក៏បានបង្ហាញភាពថមថយ ក្នុងការប្រកួតដណ្តើមយកចំណាត់ថ្នាក់លេខ៣ ជាមួយក្រុមស្នងការដ្ឋាននគរបាលរាជធានីភ្នំពេញដូចគ្នា។
នៅមុនការប្រកួតផ្តាច់ព្រ័ត្រ ដែលបានធ្វើនៅវិមានពហុកីឡដ្ឋានជាតិអូឡាំពិក កាលពីយប់ថ្ងៃទី ១៨ ខែកុម្ភៈ កន្លងមក ក្រុមវិសាខា បានក្លាយជាក្រុមតែ១គត់ ដែលបានឈ្នះទាំង១២ប្រកួតជាប់ៗគ្នា តាំងពីវគ្គវិលជុំសន្សំពិន្ទុទាំង២ជុំ រហូតដល់វគ្គពាក់កណ្តាលផ្តាច់ព្រ័ត្រ ហើយនៅក្នុងលទ្ធផលនេះ វិសាខា បានយកឈ្នះក្រុមបញ្ជាការដ្ឋានអង្គរក្ស ដោយលទ្ធផល ៣-០ នៅជុំទី១ និងបានបន្តឈ្នះ ៣-២ សម្រាប់ការជួបគ្នាម្តងទៀត នៅជុំទី២។
ជាមួយលទ្ធផលនេះ ត្រូវបានគេដាក់ក្តីសង្ឃឹមថា វិសាខា នឹងក្លាយជាម្ចាស់ជើងឯក ពីការប្រកួតតេជោលីគ រដូវកាលទី១ ឆ្នាំ២០២៤នេះយ៉ាងពិតប្រាកដ នៅពេលពួកគេ បានឡើងទៅជួបក្រុមបញ្ជាការដ្ឋានអង្គរក្ស ជាថ្មីម្តងទៀត នៅវគ្គផ្តាច់ព្រ័ត្រ បន្ទាប់ពីក្រុមទាំង២នេះ បានទទួលជ័យជម្នះរៀងៗខ្លួន នៅវគ្គពាក់កណ្តាលផ្តាច់ព្រ័ត្រ ដោយក្នុងនោះ វិសាខា បានបន្តឈ្នះក្រុម ស្នងការដ្ឋាននគរបាលរាជធានីភ្នំពេញ ៣-០ ជាមួយគ្រាប់បាល់ ២៥-២២, ២៥-១៨ និង ២៥-២១ រីឯអង្គរក្ស បានឈ្នះក្រុមក្រសួងមហាផ្ទៃ ៣-១ ជាមួយគ្រាប់បាល់ ២១-២៥, ២៥-១៧, ២៨-២៦ និង ២៥-២០។
យ៉ាងណាក៏ដោយ តាមរយៈការប្រកួតផ្តាច់ព្រ័ត្រ កាលពីព្រលប់ថ្ងៃអាទិត្យ កន្លងមកនេះ ក្រុមបញ្ជាការដ្ឋានអង្គរក្ស បែរជាអាចកែប្រែស្ថានភាពប្រកួតបានយ៉ាងល្អ ហើយអាចយកឈ្នះលើក្រុមវិសាខា ចំនួន ២ សិតជាប់ៗគ្នា ជាមួយគ្រាប់បាល់ ២៥-១៩ និង ២៥-២០ មុនពេលវិសាខា ដណ្តើមបានជ័យជម្នះ នៅសិតទី៣វិញ ជាមួយគ្រាប់បាល់ ២៥-២១ ប៉ុន្តែនៅសិតទី៤ ក្រុមអង្គរក្ស បានយកឈ្នះជាមួយគ្រាប់បាល់ ២៥-១៩ ដើម្បីទទួលបានជ័យជម្នះ និងក្លាយជាម្ចាស់ជើងឯកយ៉ាងរំភើបបំផុត។
ជាមួយការកែប្រែស្ថានភាពប្រកួតពីការចាញ់ក្រុមវិសាខា ចំនួន ២ លើក ជាប់ៗគ្នា មកជាទទួលបានជ័យជម្នះដោយលទ្ធផល ៣-១ នៅក្នុងវគ្គផ្តាច់ព្រ័ត្រនេះ ត្រូវបានគេមើលឃើញថា ក្រុមបញ្ជាការដ្ឋានអង្គរក្ស បានបង្ហាញទម្រង់លេងកាន់តែខ្លាំង ហើយកីឡាករដែលលោតគប់បាល់ផ្តាច់បានយ៉ាងល្អបំផុតនោះ គឺកីឡាករពាក់ស្លាកលេខ២១ លូវី និងម្ចាស់អាវលេខ៧ ដូនី របស់ឥណ្ឌូនេស៊ី ដោយមានការលើកបាល់យ៉ាងល្អៗជាប្រធានក្រុម ឌីអូ មកពីឥណ្ឌូនេស៊ីដូចគ្នា គឺអ្នកទាំង៣នេះ បានក្លាយជាក្បាលម៉ាស៊ីននាំលេង និងរកគ្រាប់បាល់យ៉ាងច្រើនបំផុត សម្រាប់ការប្រកួតនេះ។
លោក អ៊ិន ដ្រាក គ្រូបង្វឹកក្រុមបញ្ជាការដ្ឋានអង្គរក្ស បាននិយាយថា៖ «យើងបានហ្វឹកហាត់ខ្លាំង ហើយវាពិតជារឿងដ៏រំភើប ដែលការប្រកួតផ្តាច់ព្រ័ត្រនេះ កូនក្រុមរបស់យើង ធ្វើបានយ៉ាងល្អជាងការប្រកួតកន្លងមក ដោយសារយើងបានតាមមើលពីរបៀបលេងរបស់ក្រុមវិសាខា យ៉ាងដិតដល់ ពិសេសយើងបានឱ្យកីឡាករសំខាន់ៗរបស់យើងសម្រាក ពេលប្រកួតជុំទី២ជាមួយវិសាខា សម្រាប់ត្រៀមវគ្គផ្តាច់ព្រ័ត្រនេះ ហើយនេះជាយុទ្ធសាស្រ្តសំខាន់ ដែលបានជួយឱ្យទទួលបានជ័យជម្នះនៅពេលនេះ»។
ផ្ទុយពីនេះ ក្រុមវិសាខា ដែលធ្លាប់បានបង្ហាញទម្រង់លេងយ៉ាងល្អ តាំងពីការប្រកួតវិលជុំសន្សំពិន្ទុ រហូតដល់វគ្គផ្តាច់ព្រ័ត្រនោះ បែរជាបង្ហាញភាពថមថយផ្នែកគុណភាពលេង ហើយចង្វាក់លោតគប់បាល់ ក៏មិនសូវដាច់បានល្អដូចមុន ខណៈកីឡាករនាំលេងយ៉ាងសំខាន់ក្នុងក្រុមគឺ គួន មុំ ក៏ថមថយកម្លាំង ធ្វើឱ្យគុណភាពលោតគប់បាល់របស់គេ មិនសូវជាមានទម្ងន់ធ្ងន់ដូចមុនប៉ុន្មានឡើយ ជាហេតុនាំឱ្យគ្រូបង្វឹកលោក គាំ ស៊ាងហ៊ិន ដកឱ្យរូបគេសម្រាក នៅសិតទី៣ មុនពេលដាក់ឱ្យចូលលេងវិញនៅសិតទី៤។
ចំពោះការទទួលបានចំណាត់ថ្នាក់លេខ២ ជាមួយអារម្មណ៍ដ៏ឈឺចាប់នេះ ប្រធានក្រុមវិសាខា និងជាអ្នកលើកបាល់លេខ១ប្រចាំនៅកម្ពុជា សួន ចាន់ណារ៉ូ បាននិយាយក្រោយការប្រកួតថា៖ «សម្រាប់ខ្ញុំផ្ទាល់មានអារម្មណ៍សោកស្តាយ តែធ្វើម៉េចកូនក្រុម ធ្វើមិនបានល្អ ហើយក៏អត់មានការស្តីបន្ទោសឱ្យគ្នាដែរ ព្រោះយើងដឹងស្រាប់ហើយថា បាល់ទះជាកីឡាលេងជាក្រុម អ៊ីចឹងបើចាញ់ គឺចាញ់ទាំងអស់គ្នា បើឈ្នះ ត្រូវឈ្នះទាំងអស់គ្នា»។
សួន ចាន់ណារ៉ូ បានបន្ថែមថា៖ «ផែនការដែលខ្ញុំបានដាក់ សម្រាប់លេងជាមួយក្រុមបញ្ជាការដ្ឋានអង្គរក្ស គឺត្រូវតាមចាប់ លូវី និង ដូនី ប៉ុន្តែថ្ងៃនេះពួកគាត់ល្អពេក ដល់អ៊ីចឹងយើងចាប់គាត់អត់បាន ដែលធ្វើឱ្យខាងក្រុមយើង មានការពិបាក ក្នុងការធ្វើរនាំង ចំណែកការលេងជាក្រុម វាមិនជាមានបញ្ហាអ្វីទេ គ្រាន់តែថ្ងៃនេះកីឡាករយើងរាងបែកទម្រង់លេងបន្តិច តែមិនអាចបន្ទោសគាត់ទេ ព្រោះយើងលេង៣ថ្ងៃជាប់ៗគ្នា។ យើងលេងបានល្អដែរហើយ គ្រាន់តែខាងក្រុមគេល្អជាងយើង»។
ចំណែកក្រុមក្រសួងមហាផ្ទៃ ក៏បានបង្ហាញភាពថមថយគុណភាពលេង ពេលប្រកួតដណ្តើមយកលេខ៣ជាមួយក្រុមស្នងការដ្ឋាននគរបាលរាជធានីភ្នំពេញ កាលពីថ្ងៃអាទិត្យផងដែរ ដោយក្រុមនេះ បានចាញ់ដោយលទ្ធផល ៣-២ ជាមួយគ្រាប់បាល់ ២៦-២៨, ២៤-២៦, ២៥-២០, ២៥-១៦ និង ១៧-១៥ ហេតុនេះក្រុមស្នងការដ្ឋាននគរបាលជាតិ ទទួលបានចំណាត់ថ្នាក់លេខ៣ ប្រចាំការប្រកួតតេជោលីគ រដូវកាលទី១នេះ។
លោក អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជា បាននិយាយថា៖ «តេជោលីគ ជាព្រឹត្តិការណ៍ប្រវត្តិសាស្រ្តមួយ ដែលកម្ពុជាយើងបានធ្វើលីគអាជីពជាផ្លូវការ ដែលទទួលស្គាល់ដោយសហព័ន្ធកីឡាបាល់ទះពិភពលោក, អាស៊ី និងសហព័ន្ធកីឡាបាល់ទះអាស៊ាន អ៊ីចឹងនេះជាការបោះជំហានថ្មីរបស់សហព័ន្ធកីឡាបាល់ទះកម្ពុជា ដែលត្រូវបាននាំយកកិត្យានុភាពជាតិផ្នែកបាល់ទះទៅឱ្យពិភពលោកបានស្គាល់ ខណៈការប្រកួតនេះយើងទទួលបានការគាំទ្រច្រើនទាំងក្នុងស្រុក និងក្រៅស្រុក ហេតុនេះវាជាព្រឹត្តិការណ៍ដ៏អស្ចារ្យមួយ»៕
