កីឡាករកូនខ្មែរ-អាមេរិក សំ សុវណ្ណកេសា បានបង្ហាញឆន្ទៈកាន់តែខ្ពស់ ក្នុងការឡើងប្រកួត តំណាងឱ្យកម្ពុជា។ រូបថត សុវណ្ណកេសា
ភ្នំពេញ៖ កីឡាករកូនខ្មែរ-អាមេរិក សំ សុវណ្ណកេសា (Sovankesa Som) ដែលកំពុងសាងបានភាពល្បីល្បាញ សម្រាប់ការប្រកួតប្រដាល់នៅក្រៅប្រទេស ជាពិសេសនៅអាមេរិក ដោយដណ្តើមបានខ្សែក្រវាត់ចំនួន ២នោះ បានបង្ហាញឆន្ទៈកាន់តែខ្ពស់ក្នុងការប្រកួតតំណាងឱ្យកម្ពុជា ហើយរូបគេក៏មានបំណងធ្វើដំណើរមកបង្ហាញខ្លួនដោយផ្ទាល់នៅចំពោះមុខអ្នកគាំទ្រកម្ពុជា នាពេលឆាប់ៗខាងមុខនេះដែរ។
បើទោះបីជា សំ សុវណ្ណកេសា មិនធ្លាប់បានប្រកួតតំណាងឱ្យកម្ពុជាជាផ្លូវការ ក្នុងនាមជាកីឡាករជម្រើសជាតិកម្ពុជា ក្រោមការទទួលស្គាល់ដោយក្រសួងអប់រំ យុវជន និងកីឡា និងសហព័ន្ធកីឡាប្រដាល់គុនខ្មែរ ប៉ុន្តែកីឡាករមានឈាមជ័រជាខ្មែរ កើតនៅរដ្ឋកាលីហ្វ័រនីញ៉ា សហរដ្ឋអាមេរិក ដែលមានជំនាញទាំងប្រដាល់គុនខ្មែរ, ឃីកបុកស៊ីងនិងគុនចម្រុះ MMA រូបនេះ តែងតែបានបង្ហាញទង់ជាតិកម្ពុជា នៅរាល់ការប្រកួតរបស់គេ ហើយគេក៏បានសាក់ពាក្យ «គុនខ្មែរ» នៅជាប់ដើមទ្រូងរបស់ខ្លួនឯងទៀតផង។
ជាមួយការលះបង់ប្រកបដោយភាពប្រាកដប្រជារបស់ សំ សុវណ្ណកេសា បានធ្វើឱ្យអ្នកគាំទ្រកម្ពុជា មានការកោតសរសើរខ្លាំង ហើយបានចាត់ទុកកីឡាករខ្មែរ-អាមេរិករូបនេះ ទៅនឹងកីឡាករប្រដាល់គុនខ្មែរល្បីៗរបស់កម្ពុជានាពេលបច្ចុប្បន្ន ដូចជា ធឿន ធារ៉ា និង ព្រំ សំណាង ជាដើម ព្រោះ សុវណ្ណកេសា ក៏មានប្រជាប្រិយភាពខ្លាំងនៅអាមេរិក និងមានសមត្ថភាពប្រកួតខ្លាំង ដោយធ្លាប់ឈ្នះបានខ្សែក្រវាត់ចំនួន២ទៀតផង។
ឆ្លើយតបនឹងក្តីស្រឡាញ់ និងទឹកចិត្តរបស់អ្នកគាំទ្រកម្ពុជា ដែលមានចំពោះខ្លួននេះ កីឡាករ សំ សុវណ្ណកេសា បានបង្ហោះសារបែបនេះថា៖ «ខ្ញុំចង់អរគុណអ្នកទាំងអស់គ្នា ដែលតែងតែគាំទ្រខ្ញុំពេញមួយអាជីពរបស់ខ្ញុំ។ ខ្ញុំសន្យាថាខ្ញុំនឹងមកលេង(កម្ពុជា)ឆាប់ៗនេះហើយបង្ហាញមុខ និងណែនាំខ្លួន។ខ្ញុំមានមោទនភាពយ៉ាងខ្លាំងចំពោះប្រទេសយើងវប្បធម៌របស់ព្រះរាជាណាចក្រយើង»។
ទន្ទឹមនឹងនេះ សំ សុវណ្ណកេសា បានបង្ហាញឆន្ទៈកាន់តែខ្ពស់ ក្នុងការប្រកួតតំណាងឱ្យកម្ពុជា ដោយរូបគេបានបញ្ជាក់ថា៖ «ក្នុងនាមជាកូនខ្មែរ ដែលកើតនៅអាមេរិកខ្ញុំនឹងតំណាងប្រទេសកម្ពុជារបស់យើងឱ្យបានពេញលេញជានិច្ច។ ឈ្នះឬចាញ់ អរគុណអ្នកទាំងអស់គ្នាសម្រាប់ការគាំទ្រ»។
ជាមួយគ្នានេះ សុវណ្ណកេសា ក៏បានបង្ហើបពីគម្រោងប្រកួតជាបន្តទៀតតំណាងឱ្យកម្ពុជាផងដែរ ដោយរូបគេបានបង្ហោះសារ កាលពីថ្ងៃទី២៤ ខែកុម្ភៈ ថា៖ «ការប្រកួត MMA លើកក្រោយរបស់ខ្ញុំនឹងត្រូវធ្វើឡើងនៅថ្ងៃទី៦ ខែមេសា ជាខែចូលឆ្នាំខ្មែរហើយខ្ញុំចង់ឱ្យមានអ្នកគាំទ្រកម្ពុជានៅទីនោះច្រើន ដើម្បីយើងទៅមុខជាមួយគ្នា។ ខ្ញុំជាអ្នកតំណាងគុនខ្មែរម្នាក់របស់កម្ពុជា សម្រាប់ដូនតា និងវប្បធម៌របស់យើង»៕
