ព្រំ សំណាង និង Tun TunMin ត្រូវប្រកួតដណ្តើមខ្សែក្រវាត់កម្រិតពិភពលោក នៅយប់ថ្ងៃទី២៩ ខែកុម្ភៈនេះ។ រូបថត ថោន
ភ្នំពេញ៖ កីឡាករជើងខ្លាំងទម្ងន់ធ្ងន់របស់កម្ពុជា ព្រំ សំណាង បានអះអាងថា ការកើតទុក្ខមិនសុខចិត្តរបស់អ្នកប្រដាល់មីយ៉ាន់ម៉ា Tun Tun Min ដែលធ្លាប់ចាញ់រូបគេក្នុងការប្រកួតនៅស៊ីហ្គេម លើកទី៣២ ឆ្នាំ ២០២៣ នោះ អាចនឹងដាច់ស្រឡះ ហើយក៏អាចនឹងមានអ្នកសន្លប់ទៀតផង ខណៈអ្នកទាំង ២ នេះ ត្រូវបានដាក់ឱ្យប្រកួតដណ្តើមខ្សែក្រវាត់ Ultimate ASIAN Kun Khmer World Championship នៅលើសង្វៀនថោន នាយប់ម៉ោង ៨ ថ្ងៃព្រហស្បតិ៍នេះ។
សម្រាប់ការធ្វើដំណើរមកកាន់ទឹកដីកម្ពុជាជាថ្មីរបស់ Tun Tun Min លើកនេះ ត្រូវបានគេរំពឹងថា នឹងក្លាយជាការប្រកួតដ៏ស្វិតស្វាញមួយ ព្រោះកីឡាករលំដាប់ខ្លាំងរបស់មីយ៉ាន់ម៉ារូបនេះ បានទន្ទឹងរង់ចាំជំនួបមួយនេះជិត ១ ឆ្នាំមកហើយ ពោលគឺចាប់តាំងពីថ្ងៃទី ១១ ខែឧសភា ឆ្នាំ ២០២៣ ជាពេលដែលរូបគេបានចាញ់ពិន្ទុ ព្រំ សំណាង ទាំងមិនអស់ចិត្ត ក្នុងការប្រកួតផ្តាច់ព្រ័ត្រដណ្តើមមេដាយមាស ក្នុងទម្ងន់ ៨១ គីឡូក្រាម នៅស៊ីហ្គេម លើកទី៣២ ឆ្នាំ ២០២៣។
រំឭកទៅដល់ការប្រកួត នៅស៊ីហ្គេម ឆ្នាំ ២០២៣ ដែលខ្លួនបានឈ្នះមេដាយមាសជូនជាតិ ជាលើកដំបូងនោះ ព្រំ សំណាង បាននិយាយថា៖ «ខ្ញុំធ្លាប់ជួបកីឡាករ Tun TunMin នៅស៊ីហ្គេម ឆ្នាំ ២០២៣ ហើយលទ្ធផលយើងធ្វើបានល្អ ដោយបានមេដាយមាស ប៉ុន្តែគាត់ថា គាត់មិនអស់ចិត្ត តែក្រោយពេលគាត់បានមើលវីដេអូនៃការប្រកួតនោះឡើងវិញហើយ គាត់ក៏បានលុបការបង្ហោះសារគាត់ចេញវិញ»។
ព្រំ សំណាង បានទាត់ទៅលើកីឡាករ Tun TunMin ពេលប្រកួតដណ្តើមយកមេដាយមាស នៅស៊ីហ្គេម ឆ្នាំ២០២៣។រូប សហការី
កីឡាករមានរហស្សនាម «ជើងកាត់សក់ដៃឯក» ព្រំ សំណាង បានបន្ថែមថា៖ «សមត្ថភាពគាត់នៅតែល្អ ស្ទុះគាត់ខ្លាំង ហើយគាត់ដឹងតែវ៉ៃ ដោយល្អទៅលើការប្រើកណ្តាប់ដៃ និងទាត់ ដែលខ្ញុំគិតថា ជំនួបលើកនេះប្រហែលជាតឹង ព្រោះគាត់សុំមកសងសឹកជាមួយយើង អ៊ីចឹងគាត់ពិតជាត្រៀមខ្លួនបានល្អហើយ ដ្បិតអីខាងគាត់ បានដឹងពីការប្រកួតនេះមុនយើង»។
ជាមួយជំនួបសងសឹក ដោយមានការដាក់ខ្សែក្រវាត់ឱ្យវ៉ៃដណ្តើមគ្នាទៀតបែបនេះ ព្រំ សំណាង បានគិតទុកជាមុនថា រវាងរូបគេ និង Tun Tun Min អាចនឹងមានម្នាក់សន្លប់ ព្រោះនេះជាការលក្ខណៈគុនខ្មែរ៣ទឹក ពាក់ត្រឹមហ្គង់ដៃ គឺមិនមែនជាការប្រកួត ដែលមានពាក់ប្រដាប់ការពារស្នង ការពារដងខ្លួន និងពាក់មួកការពារដូចការប្រកួតនៅស៊ីហ្គេមឡើយ អ៊ីចឹងការប្រកួតអាចលះខ្លាំងៗរៀងៗខ្លួន។
ព្រំ សំណាង បានបញ្ជាក់ថា៖ «ការជួបគ្នាលើកនេះ អាចបុកទៅបុកមក ហើយអាចសន្លប់រៀងៗខ្លួន ព្រោះជាការប្រកួតវ៉ៃលាតពាក់ត្រឹមហ្គង់ដៃ មិនដូចការប្រកួតនៅស៊ីហ្គេមទេ។ តែទោះបីជាយ៉ាងណា ខ្ញុំប្តេជ្ញាខំធ្វើឱ្យបានល្អបំផុត និងអស់ពីលទ្ធផល ដើម្បីយកខ្សែក្រវាត់ទី៥នេះ មកពាក់នៅចង្កេះឱ្យបាន ព្រោះពេលនេះ ខ្ញុំមានខ្សែក្រវាត់ចំនួន ៤ ខ្សែហើយ»៕
