លឹម ពិសុទ្ធ បានព្យាយាមអូសបាល់រំលងខ្សែការពាររបស់ក្រុមគិរីវង់ សម្រាប់ការប្រកួត កាលពីថ្ងៃពុធ។ រូប ភ្នំពេញក្រោន
ភ្នំពេញ៖ គ្រូបង្វឹកក្រុមភ្នំពេញក្រោន លោក Oleg Starynskyi បានសរសើរពីទម្រង់លេងរបស់ក្រុមគិរីវង់សុខសែនជ័យថា លេងបានខ្លាំងស្ទើរពេញ ៩០ នាទី ដែលធ្វើឱ្យក្រុមរបស់លោករកបានត្រឹម ១ គ្រាប់ទាំងលំបាក ដើម្បីក្លាយជាក្រុមចុងក្រោយគេ ដែលដណ្តើមបានកៅអីឡើងទៅវគ្គពាក់កណ្តាលផ្តាច់ព្រ័ត្រនៃការប្រកួតថ្នាក់ជាតិពានរង្វាន់សម្តេច ហ៊ុន សែន ឆ្នាំ ២០២៤។
បើទោះបីជាក្រុមភ្នំពេញក្រោន បានយកឈ្នះក្រុមគិរីវង់សុខសែនជ័យ ២-០ សម្រាប់ការប្រកួតនៅក្រៅទឹកដី ប៉ុន្តែការប្រកួតកាត់សេចក្តីជើងទី២ វគ្គ ៨ ក្រុមចុងក្រោយ នៅកីឡដ្ឋានស្មាតអអេសអិនរបស់ខ្លួន កាលពីយប់ថ្ងៃទី ២៨ កុម្ភៈ ភ្នំពេញក្រោន អាចរកបានត្រឹម ១ គ្រាប់គត់ ដែលស៊ុតបញ្ចូលទីដោយខ្សែប្រយុទ្ធ លឹម ពិសុទ្ធ នៅនាទីទី៤២ បន្ទាប់ពីរូបគេបានទទួលបាល់ពីការបញ្ជូនយ៉ាងស្អាតរបស់ លឹម វិសាល ត្រូវជាប្អូនប្រុសបង្កើត។
តាមរយៈការដណ្តើមបានជ័យជម្នះ ១-០ ទាំងលំបាកនេះបានជួយឱ្យក្រុមភ្នំពេញ បានយកឈ្នះក្រុមគិរីវង់ សម្រាប់ការប្រកួតទាំង២ជើង ដោយលទ្ធផល ៣-០ ដើម្បីក្លាយជាបេក្ខភាពទី៤ ចុងក្រោយ ត្រូវឡើងទៅប្រកួតវគ្គពាក់កណ្តាលផ្តាច់ព្រ័ត្រជាមួយក្រុមចំនួន ៣ ទៀត រួមមានព្រះខ័នរាជស្វាយរៀង បឹងកេត និងវិសាខា ដែលបានទម្លាក់ក្រុមណាហ្គាវើលដ៍ ក្រុមISIដង្កោសែនជ័យ និងក្រុមខេត្តព្រៃវែង នៅវគ្គ ៨ ក្រុមចុងក្រោយនេះដូចគ្នា។
យ៉ាងណាក៏ដោយ សម្រាប់ការយកឈ្នះក្រុមគិរីវង់ ១-០ នេះ លោក Oleg Starynskyi គ្រូបង្វឹកក្រុមភ្នំពេញក្រោន បានអះអាងថា មានការលំបាក ដោយលោកបានសរសើរពីរបៀបលេងរបស់ក្រុមគិរីវង់ បែបនេះថា៖ «វាមិនមែនជាការប្រកួតងាយស្រួលនោះទេ ដូចដែលយើងបានឃើញហើយ ពួកគេពិតជាលេងខ្លាំងទាំង ២ វគ្គ ដូច្នេះវាពិបាកសម្រាប់យើងក្នុងការលេងបាល់ពីខាងក្រោម»។
តែទោះបីជាយ៉ាងណា លោក Oleg Starynskyi នៅតែបានសម្តែងការអបអរទៅលើការខិតខំប្រឹងប្រែងលេងរបស់កូនក្រុមលោក ដែលបានព្យាយាមធ្វើបានល្អ ដើម្បីបន្តទទួលបានជ័យជម្នះលើក្រុមគិរីវង់ បើទោះបីជា ការប្រកួតនេះ ភ្នំពេញក្រោន បានដាក់កីឡាករក្មេងៗមួយចំនួនឱ្យលេងនៅក្នុងជម្រើសទី១ ដោយទុកកីឡាករសំខាន់ៗ ឱ្យសម្រាក និងចូលលេងត្រឹមចុងម៉ោងក៏ដោយ។
គ្រូបង្វឹកសញ្ជាតិអ៊ុយក្រែន លោក Oleg បានបញ្ជាក់ថា៖ «បើទោះបីជាកីឡាករយើងមានកំហុសខ្លះក្នុងការប្រកួតនេះ ក៏ខ្ញុំរីករាយចំពោះពួកគេ ដែលយើងបញ្ចប់ទៅដោយលទ្ធផលល្អនេះ គឺយើងបានបង្កើតឱកាស និងរកគ្រាប់បាល់បាន។ យើងបានដាក់កីឡាករក្មេងៗលេងច្រើន និងលាយគ្នាជាមួយកីឡាករមានបទពិសោធន៍មួយចំនួន ហើយពួកគេបានបង្ហាញការលេងល្អ តែក៏នៅមានចំណុចមួយចំនួនដែលតម្រូវឱ្យពួកគេត្រូវកែប្រែផងដែរ»។
ដោយឡែក សម្រាប់ការប្រកួតវគ្គ ៨ ក្រុមចុងក្រោយរបស់ក្រុមចំនួន ៦ ទៀត ដែលបានបញ្ចប់ការប្រកួតទាំង ២ ជើង តាំងពីសប្តាហ៍មុននោះ គឺក្រុមព្រះខ័នរាជស្វាយរៀង បានយកឈ្នះក្រុមណាហ្គាវើលដ៍ ៤-១ ក្នុងជើងទី១ រួចបន្តឈ្នះ ៦-០ ក្នុងជើងទី២ សរុបឈ្នះ ១០-១ រីឯបឹងកេត បានឈ្នះក្រុម ISI ដោយលទ្ធផល ៤-២ ទាំង២ជើង សរុបឈ្នះ ៨-៤ ចំណែកក្រុមណាហ្គាវើលដ៍ បានយកឈ្នះក្រុមខេត្តព្រៃវែង ត្រឹម ១-០ ទាំងលំបាក សម្រាប់ការប្រកួតទាំង ២ ជើង។
តាមរយៈលទ្ធផលនៃការប្រកួតនៅវគ្គ ៨ ក្រុមចុងក្រោយនេះ ក្រុមភ្នំពេញក្រោន ឡើងទៅជួបក្រុមម្ចាស់ជើងឯក៣សម័យកាល វិសាខា នៅវគ្គពាក់កណ្តាលផ្តាច់ព្រ័ត្រ ហើយក្រុមព្រះខ័នរាជស្វាយរៀង ត្រូវប្រកួតជាមួយក្រុមបឹងកេត ដែលជំនួបទាំង ២ នេះ គ្រោងធ្វើនៅថ្ងៃទី ៦ ខែមីនា ខាងមុខនេះ៕
