ការប្រកួតរវាងក្រុមព្រះខ័នរាជស្វាយរៀង (ខៀវ) និងក្រុមអង្គរថាយហ្គឺរ កាលពីយប់ថ្ងៃសៅរ៍។ រូបថត CPL
ភ្នំពេញ៖ ក្រុមព្រះខ័នរាជស្វាយរៀង នៅតែបន្តដណ្តើមបាន ៣ ពិន្ទុ តាមរយៈការយកឈ្នះក្រុមអង្គរថាយហ្គឺរ ៣-០ សម្រាប់ការប្រកួត កាលពីយប់ថ្ងៃសៅរ៍ ដើម្បីរក្សាភាគរយខ្ពស់ ក្នុងការឈានទៅរកការឈ្នះពានលីគកំពូលកម្ពុជា ប៉ុន្តែក្រុមខេត្តព្រៃវែង បានចាញ់ក្រុមកងយោធពលខេមរភូមិន្ទ ៣-១។
តាមរយៈការដណ្តើមបាន ៣ ពិន្ទុបន្ថែមពីក្រុមអង្គរថាយហ្គឺរនេះ បានជួយឱ្យក្រុមស្វាយរៀង នៅពេលនេះ មាន ៥៩ ពិន្ទុ ដាច់ឆ្ងាយពីក្រុមលេខ២ ភ្នំពេញក្រោន ដែលមាន ៤៩ ពិន្ទុ ខណៈក្រុមវិសាខា ដែលឈរនៅចំណាត់ថ្នាក់លេខ៣ មាន ៣៨ពិន្ទុ ហើយក្រុមទាំង ២ នេះ ក៏ប្រកួតគ្នា នៅកីឡដ្ឋានព្រីនស៍ នៅល្ងាចម៉ោង ៦ ថ្ងៃអាទិត្យនេះ ដើម្បីដណ្តើមគ្នាយក ៣ ពិន្ទុ តែការជួបគ្នា ២ លើកកន្លងមក ភ្នំពេញក្រោន ឈ្នះទាំង ២ លើក។
យ៉ាងណាក៏ដោយ លោក មាស ចាន់ណា ដែលទើបត្រូវបានតែងតាំងជាគ្រូបង្គោលរបស់ក្រុមវិសាខា បានបង្ហាញការជឿជាក់ថា ការផ្លាស់ប្តូរយុទ្ធសាស្រ្ត និងកលល្បិចលេង នឹងអាចជួយឱ្យក្រុមវិសាខា ធ្វើបានល្អ សម្រាប់ការជួបក្រុមភ្នំពេញក្រោនលើកនេះជាមិនខាន ខណៈដែលកីឡាកររបស់ក្រុមនេះ ក៏កំពុងមានឆន្ទៈ និងទឹកចិត្តក្នុងការប្រយុទ្ធផងដែរ។
លោកបាននិយាយ ក្នុងសន្និសីទកាសែត កាលពីថ្ងៃសៅរ៍ថា៖ «យើងបានត្រៀមខ្លួនរួចរាល់ហើយ ហើយជំនួបនេះ នឹងក្លាយជាការប្រកួតដ៏ទាក់ទាញ ដោយក្រុមទាំង ២ នឹងធ្វើបានល្អ ជាពិសេស វិសាខា ព្រោះយើងបានកែតម្រូវពី ១ ប្រកួតទៅ ១ ប្រកួត។ យើងតែងរកចំណុចដែលយើងខ្វះខាត និងព្យាយាមកែចំណុចនោះឱ្យកាន់តែល្អ ហើយខ្ញុំជឿជាក់ថា ក្រុមវិសាខា នឹងធ្វើបានល្អ ដោយរំពឹងលើការកែប្រែ និងសតិអារម្មណ៍របស់កីឡាករ ដោយពួកគាត់មានទំនុកចិត្តក្នុងការលេងលើកនេះ»។
លោក មាស ចាន់ណា បានបន្ថែមថា៖ «យើងបានចាញ់ក្រុមភ្នំពេញក្រោន ទាំងការប្រកួតជើងទី១ និងទី២ អ៊ីចឹងនៅជើងទី៣ នេះ យើងនឹងធ្វើបានល្អ ជាមួយការផ្លាស់ប្តូរយុទ្ធសាស្រ្ត កលល្បិចក្រុម ដោយសង្ឃឹមថា យើងនឹងធ្វើបានល្អ ហើយកីឡាករ នឹងយល់ពីយុទ្ធសាស្រ្តក្រុម និងយល់ពីយុទ្ធសាស្រ្តនៃការលេងច្បាស់លាស់ ដែលយើងបានរៀបចំ និងត្រៀមសម្រាប់ការប្រកួតដ៏សំខាន់មួយនេះ»។
ចំណែកខ្សែប្រយុទ្ធ ដែលតែងតែរកបានគ្រាប់បាល់ឱ្យក្រុមវិសាខា Youssef Ezzejjari បាននិយាយថា៖ «ការប្រកួតជាមួយភ្នំពេញក្រោន នឹងក្លាយជាជំនួបដ៏លំបាកមួយ ដោយសារពួកយើងត្រូវជួបក្រុមខ្លាំង ប៉ុន្ដែខ្ញុំនៅតែជឿជាក់លើមិត្តរួមក្រុមទាំងអស់គ្នា ដោយសារពួកយើងបានខិតខំប្រឹងប្រែងហ្វឹកហាត់ខ្លាំង ទាំងតាក់ទិក និងលំហាត់កម្លាំងបានល្អ អ៊ីចឹងខ្ញុំជឿជាក់ថា ការប្រកួតនេះ នឹងក្លាយជាការប្រកួតមួយដ៏ល្អសម្រាប់ពួកយើង»។
កីឡាករដដែលនេះ បានបន្ថែមថា៖ «ខ្ញុំសង្ឃឹមថា នឹងអាចស៊ុតបញ្ចប់ទីបាន ប៉ុន្ដែអ្វីដែលខ្ញុំផ្ដោតជាងគេនោះ គឺការខំប្រឹងលេង ដើម្បីជួយក្រុមឱ្យទទួលបានជ័យជម្នះ។ ដូច្នេះខ្ញុំមានតែការខំប្រឹងធ្វើការខ្លាំងលើទីលាន ដើម្បីជួយក្រុមធ្វើយ៉ាងម៉េចឱ្យទទួលបាន ៣ពិន្ទុពីការប្រកួតនេះ»។
លោក Oleg និងលោក មាស ចាន់ណា បានចាប់ដៃស្វាគមន៍គ្នា នៅក្នុងសន្និសីទកាសែត កាលពីថ្ងៃសៅរ៍។ រូប វិសាខា
យ៉ាងណាមិញ លោក Oleg Starynskyi គ្រូបង្គោលក្រុមភ្នំពេញក្រោន បានទទួលស្គាល់ថា ក្រុមវិសាខា នៅពេលនេះ មានភាពល្អប្រសើរឡើងវិញ បន្ទាប់ពីមានការចាប់ផ្តើមពិបាក និងបានបាត់ពិន្ទុមួយចំនួនកន្លងមក ដោយសារក្រុមនេះ បានប្តូរលោក មាស ចាន់ណា ឱ្យចូលមកដឹកនាំវិញ។
លោកបាននិយាយថា៖ «យើងអាចមើលឃើញបានពីក្រុមវិសាខា នៅពេលនេះថា ពួកគេតែងតែប្រយុទ្ធដល់ទីបញ្ចប់ និងព្យាយាម ដើម្បីទទួលបានលទ្ធផលល្អ។ ពួកគេមានខ្សែប្រយុទ្ធល្អៗច្រើន បើទោះបីជាកីឡាករបម្រុង ដែលប្តូរចូលមក ក៏អាចជះឥទ្ធិពលលើការប្រកួតផងដែរ ហេតុនេះយើងនឹងប្រុងប្រយ័ត្នគ្រប់កីឡាករទាំងអស់របស់វិសាខា»។
គ្រូបង្វឹកជនជាតិអ៊ុយក្រែន លោក Oleg បានបន្ថែមថា៖ «សម្រាប់ Yudai គេនឹងអវត្តមានការប្រកួតនេះ ហើយគេជាអ្នកនាំលេង ១រូប ក្នុងក្រុម ដូច្នេះការបង្ហាញខ្លួនរបស់គេពិតជាសំខាន់។ ទោះយ៉ាងណា យើងក៏មានកីឡាករល្អលេងក្នុងតួនាទីរបស់គេផងដែរ ដូច្នេះវាជាផ្នែកមួយនៃបាល់ទាត់ដែរ នៅពេលកីឡាករជាប់បម្រាម ឬមានបញ្ហារបួស ដោយរឿងរ៉ាវទាំងនេះតែងតែកើតឡើង។ មួយវិញទៀតយើងមានក្រុមដែលល្អ ហើយគ្រប់គ្នាគឺស្រេកឃ្លានក្នុងការបង្ហាញគុណភាពរបស់ខ្លួនក្នុងការប្រកួតលើកនេះ»៕
