គង់ ហូវ បានទាត់សំដៅទៅលើកញ្ចឹងករបស់កីឡាករថៃ Sen Sakneun សម្រាប់ការប្រកួតនៅលើសង្វៀនប៉ុស្តិ៍លេខ៥។ រូប សហការី
ភ្នំពេញ៖ កីឡាករមានជំនាញទាំងប្រដាល់សកល និងគុនខ្មែរ ហ៊ុនកង គុនខ្មែរ មិនអាចប្រើកណ្តាប់ដៃដ៏ធ្ងន់របស់ខ្លួន វាយបន្ទន់ភាពរឹងមាំអ្នកប្រដាល់របស់ថៃ Phat Seayfa បាននោះទេ សម្រាប់ការជួបគ្នា នៅលើសង្វៀនប៉ុស្តិ៍លេខ៥ ចំណែក គង់ ហូវ ប៊ិះនឹងសន្លប់ក្រោមការទាត់ល្មើសច្បាប់ប្រកួតរបស់ Sen Sakneun ទៅហើយ មុនពេលត្រូវបានប្រកាសឱ្យឈ្នះ ចំណែក ខុន បូឡា ក៏បានយកឈ្នះកីឡាករថៃ ក្នុងជំនួបនេះដូចគ្នា។
តាមរយៈការប្រកួត កាលពីយប់ថ្ងៃសៅរ៍ កន្លងមកនេះ ម្ចាស់មេដាយសំរឹទ្ធស៊ីហ្គេម ផ្នែកកីឡាប្រដាល់សកល ហ៊ុនកង ត្រូវបានដាក់ឱ្យប្រកួតគូឯកជាមួយ Phat Seayfa។
នៅក្នុងជំនួបនេះ ហ៊ុនកង បានប្រើកណ្តាប់ដៃរបស់ខ្លួន ចូលវាយប្តូរយ៉ាងរន្ថើន ហើយរូបគេក៏មានជំនាញទាត់ និងបុកជង្គង់បានល្អផងដែរ ប៉ុន្តែកីឡាករថៃម្នាក់នេះ ពិតជាមានភាពរឹងមាំ ដោយរូបគេ មិនបានបង្ហាញភាពថមថយ ឬទន់ជ្រាយ ក្រោមទម្ងន់វាយចូលធ្ងន់ៗរបស់ ហ៊ុនកង នោះទេ។
ស្ទើរតែ ៥ ទឹកពេញ ហ៊ុនកង បានតាមវាយលុកទៅលើ Phat Seayfa ហើយការតាមម៉ាត់មិនឈប់ឈររបស់គេ ជាពិសេសការម៉ាត់ចូលផ្ទៃមុខ និងពោះទឹកធ្ងន់ៗ វាសមណាស់តែកីឡាករថៃម្នាក់នេះដួលសន្លប់ ពិសេសក្នុងទឹកទី៤ ប៉ុន្តែវាមិនដូច្នោះនោះទេ ព្រោះ Phat Seayfa នៅតែអាចមានចលនាបំផ្លាស់ទីវាយបកមកវិញ ប្រកបដោយភាពអំណត់ ជាមួយការទាត់ បុកជង្គង់ និងម៉ាត់ចូលគោលដៅពេញៗដូចគ្នា ធ្វើឱ្យអ្នកទាំង២នេះ បានបញ្ចប់ការប្រកួត ដោយលទ្ធផលស្មើគ្នា។
ចំណែក គង់ ហូវ ដែលជំនាញក្នុងការប្រើស្នៀតជើង ជាពិសេសក្បាច់ទាត់ផ្កាប់ចានចូលកញ្ចឹងក បណ្តាលឱ្យដៃគូសន្លប់ជាច្រើនលើកនោះ បានជួបដៃគូដ៏ស្វិតម្នាក់គឺ Sen Sakneun ដោយកីឡាករថៃម្នាក់នេះល្អជើងដូចគ្នា ហើយអ្វីដែលគួរឱ្យកត់សម្គាល់នោះ គឺអ្នកទាំង២ បានទាត់ចូលកញ្ចឹងក និងផ្ទៃមុខគ្នាទៅវិញទៅមក ដែលបង្កឱ្យមានការចាប់អារម្មណ៍យ៉ាងខ្លាំង។
យ៉ាងណាក៏ដោយ តាមរយៈការប្រកួត៤ទឹកដំបូង គង់ ហូវ មានប្រៀបជាង Sen Sakneun ទាំងចលនានៃការចូលវាយលុក ជាពិសេសកម្លាំងទាត់ចូលធ្ងន់ៗរបស់ គង់ ហូវ ហើយបន្ថែមពីលើនេះ ក្បាច់បកកែងរបស់គេ ក៏បានដាក់សម្ពាធខ្លាំងចំពោះ Sen Sakneun ផងដែរ។
តែទោះបីជាយ៉ាងណា នៅពាក់កណ្តាលទឹកទី៥ គង់ ហូវ ត្រូវបានលោកអាជ្ញាកណ្តាលរាប់បន្ទាប់ពី Sen Sakneun ទាត់ឆ្វេងចូលផ្ទៃមុខ បណ្តាលឱ្យវង្វេងបាត់ស្មារតីមួយភាំងនោះ ប៉ុន្តែក្រោយការរាប់នេះ លោកអាជ្ញាកណ្តាល បានចាប់ដៃ Sen Sakneun បង្ហាញទៅចៅក្រមដាក់ពិន្ទុទាំង ៥នាក់ ដោយចង់បញ្ជាក់ថា ការទាត់បន្ថែមរបស់កីឡាករថៃរូបនេះ គឺល្មើសទៅនឹងច្បាប់ប្រកួត ព្រោះក្នុងអំឡុងការទាត់ឆ្វេងនោះ គង់ ហូវ បានដួលដល់កម្រាលសង្វៀនទៅហើយ មិនអាចវាយថែមបានទៀតទេ។
យ៉ាងណាក៏ដោយ បន្ទាប់ពីការព្រមានដកពិន្ទុនេះ Sen Sakneun បានព្យាយាមយកពេលវេលានៅសល់ជាង១នាទី វាយសម្រុកទៅលើ គង់ ហូវ ក្នុងបំណងផ្តួល គង់ ហូវ ឱ្យសន្លប់ជាផ្លូវការវិញ ប៉ុន្តែកីឡាករថៃម្នាក់នេះ មិនអាចធ្វើបានទេ ព្រោះ គង់ ហូវ មានស្មារតីរឹងមាំទាន់ពេល ហើយបានព្យាយាមវាយទប់ និងរំដោះខ្លួនរហូតចប់ទឹកទី៥ ហើយទទួលបានជ័យជម្នះដោយពិន្ទុ។
ចំណែក ជំនួបរវាង ខុន បូឡា និងកីឡាករថៃ Chhuok Namseap មិនបានបង្កឱ្យមានភាពស្មុគស្មាញក្នុងការដាក់ពិន្ទុនោះទេ ព្រោះតាមរយៈការប្រកួត ៥ទឹកពេញ ខុន បូឡា ជាអ្នកដើរចូលវាយ ហើយការទាត់ បុកជង្គង់ ជាពិសេសកណ្តាប់ដៃរបស់គេ វាយចំគោលដៅបានធ្ងន់ និងមានចំនួនច្រើនជាងការវាយចំគោលដៅរបស់ Chhuok Namseap ទៀតផង ជាហេតុនាំឱ្យរូបគេ ទទួលបានជ័យជម្នះ ដោយពិន្ទុយ៉ាងស័ក្តិសមបំផុត៕
