![](https://pppkhmer.sgp1.digitaloceanspaces.com/image/main/20247/18_7_2024_img_1338.jpg)
ប្រតិភូកីឡាជាគ្រូបង្វឹក និងកីឡាករ កីឡាការិនី នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃទី១៧ ខែកក្កដា។ រូបថត សហការី
ថ្នាក់ដឹកនាំកីឡា គ្រូបង្វឹក និងកីឡាករ កីឡាការិនីសរុប ១៥នាក់ នឹងត្រូវធ្វើដំណើរទៅចូលរួមការប្រកួតកីឡាអូឡាំពិកហ្គេម នៅទីក្រុងប៉ារីស ប្រទេសបារាំង (Olympic Games Paris 2024) ដែលនឹងចាប់ដំណើរការពីថ្ងៃទី២៦ ខែកក្កដា ដល់ថ្ងៃទី១១ ខែសីហា ហើយសម្រាប់ការចូលរួមលើកនេះ ក្រុមប្រតិភូកីឡាកម្ពុជា បានតាំងចិត្ត និងផ្តោតខ្លាំងទៅលើការបង្កើតកំណត់ត្រាថ្មី ដើម្បីបំបែកឯតទគ្គកម្មចាស់ សម្រាប់ការចូលរួមព្រឹត្តិការណ៍ពិភពលោកមួយនេះកន្លងមក។
នៅក្នុងពិធីសំណេះសំណាលជាមួយប្រតិភូកីឡាជាគ្រូបង្វឹក និងកីឡាករ កីឡាការិនី នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃទី១៧ ខែកក្កដា លោក ថោន ខុន ទេសរដ្ឋមន្រ្តីទទួលបន្ទុកជំរុញការអភិវឌ្ឍចលនាកីឡា និងជាប្រធាន NOCC បានឱ្យដឹងថា គណៈកម្មាធិការអូឡាំពិកអន្តរជាតិ (IOC) បានធ្វើកំណែទម្រង់ជាច្រើនលើការរៀបចំការប្រកួតកីឡាអូឡាំពិក ក្នុងគោលបំណងពង្រឹងលក្ខណៈពិសេស សកលភាព និងជំរុញការប្រកួតប្រកបដោយនិរន្តភាព។
ជាមួយគ្នានេះលោកបានជំរុញឱ្យប្រតិភូ គ្រូបង្វឹក និងអត្តពលិកត្រូវពិនិត្យលើលក្ខខណ្ឌតម្រូវថ្មីៗរបស់ IOC ក្នុងការចូលរួមប្រកួតកីឡាអូឡាំពិក ដូចជាលក្ខខណ្ឌតម្រូវឱ្យគ្រូបង្វឹក និងអត្តពលិកប្រឡងយកវិញ្ញាបនបត្រ WADA’s Anti-Doping Education and Learning Platform (ADEL) ទើបអាចចូលរួមប្រកួតកីឡាអូឡាំពិកបាន។ ពិសេសលោកបានហាមប្រតិភូកីឡាកម្ពុជា មិនត្រូវបំពានបម្រាមផ្សេងៗនៅក្នុងការប្រកួតនោះទេ ព្រោះនាំឱ្យប៉ះពាល់ដល់កិត្តិយសរបស់ប្រទេសជាតិ នៅលើឆាកអន្តរជាតិ។
បន្ថែមលើនេះ លោក ថោន ខុន បានលើកយកទស្សនវិជ្ជា និងគុណតម្លៃស្នូលនៃចលនាអូឡាំពិក ព្រមទាំងប្រសាសន៍របស់លោក Thomas Bach ប្រធាន IOC ដែលតែងតែបានបញ្ជាក់ជារឿយៗ ជុំវិញខ្លឹមសារសំខាន់នៃការប្រកួតកីឡាអូឡាំពិកនេះ ដើម្បីធ្វើឱ្យកីឡាករ កីឡាការិនីកម្ពុជា មានការយល់កាន់តែច្បាស់ និងកាន់តែមានទឹកចិត្តឆ្ពោះទៅរកការបំបែកកំណត់ត្រាខ្លួនឯង ក្នុងការប្រកួតនេះ បើទោះបីជាឱកាសដណ្តើមមេដាយ ហាក់មិនទាន់អាចទៅរួច។
លោក ថោង ខុន ដែលជាអនុប្រធានប្រតិភូកីឡាកម្ពុជា សម្រាប់ការប្រកួតកីឡាអូឡាំពិកលើកនេះ បានបញ្ជាក់នៅចំពោះមុខប្រតិភូ គ្រូបង្វឹក និងក្រុមអត្តពលិក ក្នុងពិធីសំណេះសំណាល កាលពីថ្ងៃអង្គារនោះថា៖ «ការប្រកួតអូឡាំពិក មិនផ្តោតសំខាន់តែលើជ័យជម្នះមួយមុខនោះទេ ប៉ុន្តែក៏ផ្តោតលើការចូលរួមការប្រកួតឱ្យអស់ពីសមត្ថភាព ឈ្នះលើខ្លួនឯង និងមានការកើនឡើងនូវសិទ្ធិផល និងកំណត់ត្រាផងដែរ»។
សម្រាប់ប្រតិភូកីឡាកម្ពុជាទាំង១៥នាក់ ដែលត្រូវបានឧទ្ទេសនាមឱ្យទៅចូលរួមការប្រកួតកីឡាអូឡាំពិក នៅប្រទេសបារាំងខាងមុខនេះ រួមមានថ្នាក់ដឹកនាំ៥នាក់ នាយបេសកកម្ម និងមន្រ្តីជំនាញ៥នាក់ គ្រូបង្វឹក២នាក់ គឺមានអត្តពលិកតែ៣នាក់ទេ លើប្រភេទកីឡាអត្តពលិក និងហែលទឹក ក្នុងនោះមានម្ចាស់មេដាយមាសស៊ីហ្គេម ឆ្នាំ២០២៣ លើវិញ្ញាសារត់ចម្ងាយ៨០០ម៉ែត្រ ឈុន ប៊ុនថន ព្រមទាំងកីឡាករហែលទឹកកូនខ្មែរ-បារាំង កូសុង ដឺ ឡាប៉ារង អង់ត្វ័ន ម៉ាតាំង ក្លូឌ និងកីឡាការិនីកូនកាត់ខ្មែរ-អាមេរិកកាំង សាក់ប៊ុន អប្សរា កាតារីណា។
លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការ NOCC ផងនោះ បានឱ្យដឹងថា កីឡាករ កីឡាការិនីតំណាងឱ្យកម្ពុជាទាំង៣នាក់ខាងលើនេះ សុទ្ធតែទទួលបានសិទ្ធិអនុគ្រោះ សម្រាប់ការចូលរួមប្រកួតអូឡាំពិកលើកនេះ បន្ទាប់ពីក្រុមអត្តពលិកកម្ពុជា ទាំងប្រភេទកីឡាចំបាប់ តេក្វាន់ដូ (WT) អត្តពលិកកម្ម និងហែលទឹក សុទ្ធតែបានធ្លាក់នៅក្នុងការប្រកួតជម្រុះអូឡាំពិកដូចគ្នានោះ គឺខុសពីការប្រកួតអូឡាំពិក ឆ្នាំ២០១៦ ដែលវីរកីឡាការិនីតេក្វាន់ដូ ស៊ន សៀវម៉ី បានចូលរួមដោយពេញសិទ្ធិ ជាប្រវត្តិសាស្រ្តលើកដំបូង។
យ៉ាងណាក៏ដោយ លោក វ៉ាត់ ចំរើន បានអះអាងថា ការផ្តល់សិទ្ធិអនុគ្រោះរបស់ IOC និងគណៈកម្មាធិការរៀបចំការប្រកួតកីឡាអូឡាំពិកលើកនេះ គឺផ្អែកទៅលើការជ្រើសរើសរបស់សហព័ន្ធកីឡាអន្តរជាតិនៃប្រភេទកីឡានីមួយៗ រួចទើបប្រគល់លទ្ធផលនៃការជ្រើសរើសអត្តពលិកទាំងនោះទៅឱ្យម្ចាស់ផ្ទះ ហើយចុងក្រោយ កម្ពុជាបានក្លាយជាចលនាអូឡាំពិកមួយ ក្នុងចំណោមចលនាអូឡាំពិកទាំង២០៦ប្រទេស នៅលើពិភពលោក ដែលត្រូវបានអញ្ជើញឱ្យចូលរួមការប្រកួតអូឡាំពិករៀងរាល់៤ឆ្នាំម្តងនេះ។
លោកបានបញ្ជាក់ថា៖ «ការជ្រើសរើស (អត្តពលិកសម្រាប់ការផ្តល់សិទ្ធិអនុគ្រោះ)នេះខុសពីអូឡាំពិកមុនៗ។ អូឡាំពិកលើកមុនឱ្យតែសហព័ន្ធកីឡាជាតិរបស់យើងដាក់បេក្ខភាព ដើម្បីសុំសិទ្ធិពិសេសនេះ គេតែងគោរពទៅតាមម្ចាស់ផ្ទះ ប៉ុន្តែឆ្នាំនេះអត់ធ្វើបែបហ្នឹងទេ គឺគេ (សហព័ន្ធកីឡាអន្តរជាតិ) ជាអ្នកសម្រិតសម្រាំង ពិនិត្យទៅលើលក្ខណៈសម្បត្តិផង និងមើលទៅលើគុណផលរបស់អត្តពលិកផង»។
អ្នកជំនាញកីឡា លោក វ៉ាត់ ចំរើន បានបន្ថែមថា៖ «គេពិនិត្យទៅលើបច្ចេកទេស ដែលអាចប្រកួតប្រជែងទៅល្អមើល ហើយក៏មើលទៅលើលក្ខណៈសម្បត្តិ ឬរូបសម្បត្តិរបស់អត្តពលិក។ បើកីឡាករ កីឡាការិនីមានរូបសម្បត្តិមិនសូវទាក់ទាញ គេនឹងជម្រុះ ព្រោះកីឡាអូឡាំពិក គេផ្តោតទៅលើទីផ្សារដែរ អ៊ីចឹងគេជ្រើសរើសយករូបសម្បត្តិ កម្ពស់កម្ពរណាឱ្យត្រូវនឹងការទាក់ទាញហ្នឹង ទើបគេយក ហើយគួបផ្សំនិងបច្ចេកទេសផងដែរ»។
សម្រាប់ការជ្រើសរើសអត្តពលិក ដើម្បីផ្តល់ជាសិទ្ធិអនុគ្រោះ នៅលើប្រភេទកីឡាអត្តពលិក និងហែលទឹកនេះ លោក វ៉ាត់ ចំរើន បានឱ្យដឹងដែរថា ក៏មានភាពយឺតយ៉ាវ ក្នុងការផ្តល់ដំណឹងត្រឡប់មកវិញផងដែរ។ ជាក់ស្តែងកីឡាករ កីឡាការិនីកម្ពុជាទាំង៣នាក់នេះ ទើបទទួលដំណឹង ចំពោះការទទួលបានសិទ្ធិពិសេសនេះ មិនដល់១ខែផង។
លោក វ៉ាត់ ចំរើន បញ្ជាក់ថា៖ «សម្រាប់អូឡាំពិកមុនៗ គេឱ្យយើងដឹង៥ខែមុន ប៉ុន្តែលើកនេះ នៅសល់ពេលមិនដល់១ខែផង ទើបគេប្រាប់យើងមកវិញ»។ យ៉ាងណាក៏ដោយ លោក ចំរើន ថា កីឡាករ កីឡាការិនី ដែលត្រូវបានជ្រើសរើសនេះ ពិតជាស័ក្តិសមតំណាងឱ្យជាតិ ដោយមានទាំងកីឡាករនៅក្នុងស្រុក និងកីឡាករ កីឡាការិនីជាកូនខ្មែរនៅក្រៅប្រទេស ដែលបានរួមគ្នាក្នុងការលើកទឹកជាតិកម្ពុជា ក្នុងពេលអូឡាំពិកលើកនេះ។
ជាមួយគ្នានេះ NOCC បានជ្រើសរើសយកកីឡាករ ឈុន ប៊ុនថន ជាអ្នកកាន់ទង់ជាតិ កម្ពុជា ក្នុងពេលដង្ហែក្បួននាការប្រកួតអូឡាំពិកឆ្នាំនេះ។ លោក វ៉ាត់ ចំរើន បន្ថែមថា៖ «អ្វីដែលជាបច្ចេកទេស គឺឃើញថា មានភាពហ្មត់ចត់ និងច្បាស់លាស់ ដោយគេមានការសម្រិតសម្រាំងល្អ អ៊ីចឹងយើងសង្ឃឹមថា កីឡាករ កីឡាការិនីរបស់យើង ធ្វើបានល្អ ហើយនឹងបង្កើតបាននូវកំណត់ត្រាថ្មី បទពិសោធន៍ថ្មី ក៏ដូចជាកម្រិតបច្ចេកទេសថ្មី ព្រមទាំងបានដកស្រង់បទពិសោធន៍ជាមួយអត្តពលិកកម្រិតអូឡាំពិកខ្ពស់បំផុតនេះ»។
អតីតកីឡាចំបាប់ ដែលទទួលបានសិទ្ធិអនុគ្រោះឱ្យចូលរួមការប្រកួតអូឡាំពិកតំណាងឱ្យកម្ពុជាមុនគេ លោក ចំរើន បន្ថែមទៀតថា៖ «អ្វីដែលសង្ឃឹមគឺពួកគាត់នឹងធ្វើបានល្អ ហើយយើងចង់ឱ្យគាត់មានការប្រកួតប្រជែងអស់ពីលទ្ធភាព និងទទួលបាននូវលទ្ធផលបច្ចេកទេសខ្ពស់ជាងមុន ដើម្បីគាត់អាចបំបែកឯតទគ្គកម្មចាស់របស់ខ្លួន ព្រោះយើងនៅមិនទាន់មានមហិច្ឆតាស្វែងទៅរកមេដាយនៅឡើយទេ។ យើងនៅក្នុងកម្រិត ដែលកំពុងតែស្វែងរកនូវឧត្តមភាពទៅតាមកម្រិតរបស់យើងនៅឡើយ»៕