ការប្រកួតដណ្តើមខ្សែក្រវាតរវាងកីឡាករ ម៉ឺន មេឃា និង ចាន់ ប៊ុនហឿន នៅលើសង្វៀន PNN កាលពីថ្ងៃអាទិត្យ កន្លងមកនេះ។ រូបថត សហការី
ការឈ្លោះគ្នាដោយការប្រើពាក្យជេរប្រទេចរវាងក្រុមគ្រួសារលោក អេ ភូថង និងលោកអាជ្ញាកណ្តល ជ្រា សុភាព ជុំវិញការមិនពេញចិត្តទៅលើកាត់សេចក្តីក្នុងការប្រកួតដណ្តើមខ្សែក្រវាតរវាងកីឡាករ ម៉ឺន មេឃា និង ចាន់ ប៊ុនហឿន នៅលើសង្វៀន PNN បានក្លាយជារូបភាពដ៏អាក្រក់ ដែលបានជះឥទ្ធិពលមិនល្អទាល់តែសោះដល់វិស័យកីឡាគុនខ្មែរ ប៉ុន្តែរឿងរ៉ាវទាំងអស់នេះ បានបញ្ចប់ត្រឹមពាក្យ«សូមទោស»។
តាមរយៈការប្រកួតដណ្តើមខ្សែក្រវាត់ កាលពីថ្ងៃអាទិត្យ កន្លងមកនេះ កីឡាករជាកូនបង្កើតរបស់លោកគ្រូ អេ ភូថង ឈ្មោះ ម៉ឺន មេឃា បានដាក់ខ្សែក្រវាត់ប្រភេទទម្ងន់ ៦៣,៥គីឡូក្រាមរបស់ខ្លួនឱ្យអ្នកប្រដាល់ ចាន់ ប៊ុនហឿន ឡើងវ៉ៃដណ្តើម ហើយជំនួបនេះ បានឡើងកម្តៅតាំងពីមុនការប្រកួតចាប់ផ្តើម ខណៈអ្នកគាំទ្រភាគច្រើន បានប្រើសារស័ព្ទបែបមិនឱ្យតម្លៃដល់ ចាន់ ប៊ុនហឿន ថា មានសមត្ថភាពមិនអាចប្រកួតជាមួយ ម៉ឺន មេឃា បាននោះ។
ចំពោះស្ថានប្រកួតជាក់ស្តែងវិញ ចាន់ ប៊ុនហឿន ត្រូវបាន ម៉ឺន មេឃា ម៉ាត់ និងទាត់ឱ្យមានរបួសជើងក្រោម ហើយត្រូវបានអាជ្ញាកណ្តាលលោក ជ្រា សុភាព រាប់ចំនួន២លើក នៅក្នុងទឹកទី២ ហើយសឹងតែបោះបង់ការប្រកួត ក្រោមការវាយសង្រ្គប់កាន់តែខ្លាំងរបស់ ម៉ឺន មេឃា នៅចុងទឹកទៅហើយ។
ប៉ុន្តែស្ថានភាពត្រដាបត្រដួសរបស់ ចាន់ ប៊ុនហឿន បានប្រែប្រួល នៅពេលរូបគេអាចគ្រប់គ្រងស្ថានភាពប្រកួតបានល្អវិញ នៅក្នុងទឹកទី៣ ហើយអ្វីដែលគ្មានអ្នកណាគិតដល់នោះ គឺ ប៊ុនហឿន បានទាត់ឆ្វេងចូលថ្គាម ម៉ឺន មេឃា ពេញទំហឹង បណ្តាលឱ្យ មេឃា ដួលទាំងជំហរ ហើយត្រូវបានលោកអាជ្ញាកណ្តាលរាប់ភ្លាមៗ។
នៅក្នុងអំឡុងលោកអាជ្ញាកណ្តាល ជ្រា សុភាព កំពុងរាប់នោះ ម៉ឺន មេឃា ដែលកំពុង បានខំប្រឹងស្រវេស្រវ៉ាក្រោកឡើងទាំងស្ថានភាពវង្វេងវង្វាន់ ហើយនៅពេលលោកអាជ្ញាកណ្តាលរាប់ដល់៨នោះ មេឃា បានងក់ក្បាល ដើម្បីបញ្ជាក់ថា រូបគេអាចបន្តប្រកួតទៀតបាន ប៉ុន្តែលោក ជ្រា សុភាព បានសម្រេចបញ្ឈប់តែម្តង ដោយសម្អាងថា ម៉ឺន មេឃា នៅបាត់បង់ស្មារតីនៅឡើយ។
ភ្លាមៗបន្ទាប់ពីការបញ្ឈប់នោះ ម៉ឺន មេឃា និង អេ អាំម៉ារីន ដែលជាប្អូនប្រុស និងជាអ្នកឱ្យទឹក បានស្រែកតវ៉ាទាំងច្រឡោតទៅកាន់លោកអាជ្ញាកណ្តាល ចំណែកអ្នកស្រី សាំង សុម៉ាលី ដែលជាម្តាយ រួមទាំងលោក អេ ភូថង ជាឪពុក និងអ្នកគាំទ្រ ម៉ឺន មេឃា មួយចំនួនទៀត ក៏បានស្រែកតវ៉ាដោយកំហឹងចំពោះការកាត់សេចក្តីនេះ ដែលបង្កឱ្យមានភាពចលាចលពេញសង្វៀនប្រដាល់តែម្តង។
ជាមួយការស្រែកតវ៉ាដោយគ្មានសណ្តាប់ធ្នាប់នេះ លោក ម៉ិល កាដូ អនុប្រធានសហព័ន្ធកីឡាប្រដាល់គុនខ្មែរ ដែលជាគណៈអធិបតីក្នុងការប្រកួតនោះ បានចេញមកប្រកាសអន្តរាគមន៍ ចំណែកលោក ម៉ា ស៊ីថេត អ្នកគ្រប់គ្រងសង្វៀនប្រដាល់ PNN ក៏បានមកសម្រុះសម្រួលជាមួយក្រុមគ្រួសារលោក អេ ភូថង ផងដែរ ប៉ុន្តែនៅមិនអាចបញ្ឈប់សកម្មភាពតវ៉ានេះបាន ដោយអូសបន្លាយពេលជាងកន្លះម៉ោង។
យ៉ាងណាក៏ដោយ ក្រោយការប្រជុំពិភាក្សាម្តងហើយម្តងទៀតរបស់គណៈកម្មការបច្ចេកទេសគឺ គណៈកម្មការវិនិច្ឆ័យរបស់សហព័ន្ធកីឡាប្រដាល់គុនខ្មែរ នៅតែសម្រេចរក្សាលទ្ធផលដើម ដោយប្រកាសឱ្យកីឡាករ ចាន់ ប៊ុនហឿន ជាអ្នកឈ្នះ ដើម្បីក្លាយជាម្ចាស់ខ្សែក្រវាត់ អមដោយប្រាក់រង្វាន់ចំនួន១២លានរៀល។
ជាមួយគ្នានេះ គណៈកម្មការបច្ចេកទេសរបស់សហព័ន្ធកីឡាប្រដាល់គុនខ្មែរ ក៏បានស្នើសុំទៅកាន់ភាគីកីឡាករ ម៉ឺន មេឃា ឱ្យសរសេរលិខិតប្តឹងតវ៉ាជាផ្លូវការចំពោះការមិនឯកភាពលើការកាត់សេចក្តីនេះផងដែរ ប៉ុន្តែទាំងលោក អេ ភូថង និងភរិយា មិនប្តឹងនោះទេ ព្រោះអ្នកទាំង២យល់ថា ប្តឹងក៏អត់ប្រយោជន៍ ព្រោះមិនអាចកែប្រែអ្វីបាន ហើយត្រូវអស់លុយប្តឹងចំនួន១លានរៀលទៀត។
លោក អេ ភូថង បានប្រាប់ប្រព័ន្ធផ្សព្វផ្សាយក្រោយការប្រកួតថា៖ «ខ្ញុំមានការអន់ចិត្តណាស់ (ចំពោះការកាត់សេចក្តីនេះ) ប៉ុន្តែសួរថា បើដាក់ពាក្យប្តឹងខ្ញុំបានអ្វីមកវិញ។ ប្តឹងលុះត្រាតែមានអ្នករកភាពយុត្តិធម៌ឱ្យខ្ញុំ ប៉ុន្តែខ្ញុំដូចជាមិនជឿ»។
ចំណែកអ្នកស្រី សាំង សុម៉ាលី ដែលជាភរិយា ក៏បានប្រកាន់ជំហរមិនប្តឹងតវ៉ា ព្រោះវាអត់ប្រយោជន៍ ដោយអះអាងថា អ្នកស្រី និងស្វាមីធ្លាប់បានប្តឹងតវ៉ាជុំវិញភាពមិនប្រក្រតីក្នុងការប្រកួតបែបនេះច្រើនលើកដែរហើយ ប៉ុន្តែចុងក្រោយមិនមានការដោះស្រាយតាមតម្លាភាពអ្វីទេ ផ្ទុយទៅវិញត្រូវបានគេគាប់សង្កត់ ស្តីបន្ទោស និងអស់លុយដាក់ពាក្យប្តឹងចំនួន១លានរៀលទៀត។
យ៉ាងណាក៏ដោយ ចំពោះការស្រែកតវ៉ាលើករណីប្រកួតរបស់កីឡាករ ម៉ឺន មេឃា និង ចាន់ ប៊ុនហឿន នេះអ្នកស្រី សាំង សុម៉ាលី បានបញ្ជាក់ថា អ្នកស្រី និងក្រុមគ្រួសារ ត្រូវតែធ្វើបែបនេះ ព្រោះជារឿងមិនអាចទទួលយកបាន។ «ខ្ញុំជាប្រជារាស្រ្តខ្មែរធម្មតា អ៊ីចឹងខ្ញុំត្រូវតែតវ៉ាហើយ ហើយបើសិនគាត់ (ថ្នាក់ដឹកនាំសហព័ន្ធ)មិនពេញចិត្តពួកខ្ញុំ បញ្ឈប់ក្លិបគុនខ្មែររបស់ខ្ញុំទាំងអស់ទៅ!»។
ជាមួយគ្នានេះ អ្នកស្រី សាំង សុម៉ាលី ក៏បានប្រកាសមិនឱ្យកីឡាកររបស់ខ្លួនឡើងប្រកួតនៅលើសង្វៀន PNN ទៀត ហើយក៏មិនទទួលឱ្យមានការរៀបចំប្រកួតដណ្តើមខ្សែក្រវាត់ឡើងវិញរវាង ម៉ឺន មេឃា និង ចាន់ ប៊ុនហឿន ផងដែរ។
អ្នកស្រីបញ្ជាក់ថា៖ «ចង់ដាក់ឱ្យប្រកួតខ្សែក្រវាត់១០ម៉ឺនដុល្លារក៏អត់ប្រកួតដែរ! ប្រកួតធ្វើអី បើគង់ចាញ់គេដដែលហ្នឹង ព្រោះគេចាំតែចាប់កំហុសយើងហ្នឹង»។
ជុំវិញជម្លោះ ដែលកើតចេញពីការមិនពេញចិត្តលើការកាត់សេចក្តីរបស់លោកអាជ្ញាកណ្តាល ជ្រា សុភាព នេះដែរ ភាគីកីឡាករ ម៉ឺន មេឃា មិនបានទទួលយកប្រាក់រង្វាន់ ចំពោះការបានត្រឹមជើងឯករងនេះទេ ចំណែកលោក អេ ភូថង ក៏មិនបានយកប្រាក់រង្វាន់ជាគ្រូឆ្នើម និងលុយថ្លៃក្លិបផងដែរ គឺគ្រួសារមួយនេះ សូមវេលុយទាំងអស់ហ្នឹងចូលទៅមន្ទីពេទ្យគុន្ធបុប្ផា។ ប៉ុន្តែបានពឹងពាក់ដល់ស្ថានីយ PNN យកថវិកានេះប្រគល់ជូនមន្ទីគុន្ធប្ផា និងសូមថតបង្ហោះឱ្យមហាជនបានឃើញផង ដើម្បីចូលរួមទាំងអស់គ្នា។
តែទោះយ៉ាងណា លោក ម៉ា ស៊ីថេត អ្នកគ្រប់គ្រងសង្វៀនប្រដាល់នៅ PNN បានបដិសេធលើសំណើនេះ។
លោកបានបង្ហោះសាតបទៅវិញបែបនេះថា៖ «ថវិកាទាំងអស់របស់ មេឃា (៨លានរៀល+ថវិកាក្លិប២០ម៉ឺនរៀល) និងថវិការឧបត្ថម្ភលោក អេ ភូថង (១លានរៀល) គឺនៅរក្សាដដែល ដូចនេះបើសិនជា ម៉ឺន មេឃា ចង់ឧបត្ថម្ភទៅមន្ទីរពេទ្យគន្ធបុប្ផា អាចអញ្ជើញមកបើកថវិកាដោយផ្ទាល់នៅស្ថានីយ PNN និងយកទៅមន្ទីរពេទ្យគន្ធបុប្ផាដោយខ្លួនឯង ដោយហេតុថាពេលចប់កម្មវិធីភ្លាមៗខាងប្អូនបានបដិសេធមិនទទួល»។
យ៉ាងណាក៏ដោយ ជម្លោះពាក្យសំដី ដែលបានកើតមាន នៅក្នុងការប្រកួតដណ្តើមខ្សែក្រវាត់រវាងកីឡាករ ម៉ឺន មេឃា និង ចាន់ ប៊ុនហឿន កាលពីថ្ងៃអាទិត្យ ជាពិសេសការវាយប្រហារយ៉ាងចាស់ដៃពីសំណាក់គ្រួសាររបស់លោក អេ ភូថង ទៅលើអាជ្ញាកណ្តាលលោក ជ្រា សុភាព និងអ្នកពាក់ព័ន្ធនេះ វាបានវិលមករកភាពស្ងប់វិញ បន្ទាប់ពីអ្នកស្រី សាំង សុម៉ាលី និងកូនស្រីរបស់ខ្លួន បានបង្ហោះសារសូមទោសជាសាធារណៈ នៅថ្ងៃចន្ទនេះ។
អ្នកស្រី សាំង សុម៉ាលី បានសរសេរបែបនេះថា៖ «រឿងអ្វីៗដែលកើតឡើងម្សិលមិញ នាងខ្ញុំសូមទោសបងប្អូនជនរួមជាតិទាំងអស់ផង ដែលខ្ញុំនិងក្រុមគ្រួសារបានប្រើពាក្យខ្លះមិនល្អដោយកំហឹង ហើយរឿងម្សិលមិញខ្ញុំ និងក្រុមគ្រួសារចិត្តត្រជាក់នឹងលែងខឹងអស់ហើយ។ ខ្ញុំសូមចប់ត្រឹមហ្នឹង ហើយបងប្អូនមួយចំនួនបានណែនាំក្រុមគ្រួសារខ្ញុំឱ្យទៅបើកប្រាក់ឧបត្ថម នឹងយកមកទិញសម្ភារជូនដល់ក្លិបគុនខ្មែរតូច ហើយអត់ៗ ចឹងហើយខ្ញុំនឹងធ្វើតាមបងប្អូន»។
ចំណែក អេ យ៉ានុត ជាកូនស្រី ដែលបានបង្ហោះសារជេរប្រមាថដល់ម្តាយរបស់លោកអាជ្ញាកណ្តាល ជ្រា សុភាព នោះបានបង្ហោះសារសូមទោសវិញបែបនេះថា៖«ខ្ញុំអន់ចិត្តចំពោះលោកអាជ្ញាកណ្តាល ហើយដោយសារតែពិបាកទប់អារម្មណ៍ទើបខ្ញុំប្រើពាក្យមិនសមរម្យទៅលោកគ្រូអាជ្ញាកណ្ដាល។ ខ្ញុំសុំទោសលោកគ្រូ ហើយក៏សុំទោសហ្វេនៗដែលខ្ញុំប្រើពាក្យមិនបានល្អ តែខ្ញុំពិតជាអន់ចិត្តខ្លាំង ចំពោះការកាត់សេចក្តីរបស់លោកអាជ្ញាកណ្តាល»៕
