សហព័ន្ធកីឡាប្រដាល់គុនខ្មែរ ក្រោមការដឹកនាំរបស់លោក ខូវ ឆាយ បានចេញសេចក្តីសម្រេចជាថ្មី ក្នុងការបន្ធូរបន្ថយចំពោះការដាក់ពិន័យទៅលើលោកគ្រូ អេ ភូថង រួមទាំងភរិយាអ្នកស្រី សាំង សុម៉ាលី និងកីឡាការិនី អេ យ៉ានុត ដែលជាកូនស្រី ហើយសេចក្តីប្រកាសនេះ ត្រូវបានធ្វើឡើងនៅថ្ងៃពុធនេះតែម្តង។
កាលពីថ្ងៃទី២៣ ខែកក្កដា កន្លងមកនេះ លោក អេ ភូថង រួមទាំងអ្នកស្រី សាំង សុម៉ាលី និងកីឡាការិនី អេ យ៉ានុត ត្រូវបានសហព័ន្ធកីឡាប្រដាល់គុនខ្មែរដាក់វិន័យ (ពិន័យ) មិនឱ្យចូលរួមក្នុងព្រឹត្តិការណ៍ប្រកួតកីឡាប្រដាល់គុនខ្មែររយៈពេល ៦ខែដូចគ្នា បន្ទាប់ពីអ្នកទាំង ៣ នេះ បានប្រតិកម្មដោយកំហឹងទៅលើអាជ្ញាកណ្តាល ជ្រា សុភាព ដែលបានបញ្ឈប់កីឡាករ ម៉ឺន មេឃា ក្នុងទឹកទី៤ សម្រាប់ការប្រកួតការពារខ្សែក្រវាត់ពីការដណ្តើមរបស់កីឡាករ ចាន់ ប៊ុនហឿន នៅលើសង្វៀនប្រដាល់ PNN កាលពីថ្ងៃទី២២ ខែកក្កដា។
តែទោះបីជាយ៉ាងណា យោងតាមសេចក្តីសម្រេចជាថ្មី នៅថ្ងៃពុធនេះ ក្រុមគ្រួសារលោក អេ ភូថង ត្រូវបានសហព័ន្ធកីឡាប្រដាល់គុនខ្មែរ បន្ធូរបន្ថយការដាក់ពិន័យនេះ ទៅតាមស្ថានកំហុសជាក់ស្តែងខុសៗពីគ្នា។
យោងតាមសេចក្តីសម្រេចជាថ្មីនេះ បានបញ្ជាក់ថា លោក អេ ភូថង ត្រូវបានបន្ធូរបន្ថយការពិន័យពីរយៈពេល ៦ខែ មកនៅត្រឹមរយៈពេល ៣ខែ ដោយត្រូវអនុវត្តវិន័យចំនួន ៤សប្តាហ៍ ចំណែកវិន័យដែលនៅសល់ត្រូវបានព្យួរ។
តាមការសម្រេចនេះ បានន័យថា លោក អេ ភូថង ដែលជាគ្រូបង្វឹក ត្រូវបានជាប់ពិន័យមិនឱ្យចូលរួមក្នុងព្រឹត្តិការណ៍ប្រកួតកីឡាប្រដាល់គុនខ្មែរត្រឹមរយៈពេល១ខែទេ (៤សប្តាហ៍) ដោយចាប់គិតពីថ្ងៃទី ៣០ ខែកក្កដានេះទៅ ចំណែកការវិន័យនៅសល់ចំនួន២ខែទៀត ត្រូវបានព្យួរ។
ចំណែកអ្នកស្រី សាំង សុម៉ាលី ដែលជាភរិយា ត្រូវបានសហព័ន្ធកីឡាប្រដាល់គុនខ្មែរ បន្ធូរបន្ថយការវិន័យពីរយៈពេល៦ខែ មកដល់ត្រឹម៣ខែ ហើយកំណត់ឱ្យអនុវត្តការពិន័យនេះត្រឹមរយៈពេល ៦សប្តាហ៍ ចំណែកវិន័យដែលនៅសល់ត្រូវព្យួរ។
ដោយឡែក កីឡាការិនី អេ យ៉ានុត ដែលជាកូនស្រី គឺសហព័ន្ធកីឡាប្រដាល់គុនខ្មែរ នៅរក្សាការដាក់វិន័យរយៈពេល៦ខែដដែល ប៉ុន្តែកំណត់ឱ្យ យ៉ានុត អនុវត្តការវិន័យនេះត្រឹម៨សប្តាហ៍ទេ ចំណែកការវិន័យដែលនៅសល់ត្រូវព្យួរ។
ចំពោះការបន្ធូរបន្ថយការដាក់ពិន័យទៅលើក្រុមគ្រួសារលោក អេ ភូថង នេះ ត្រូវបានលោក ខូវ ឆាយ បានបញ្ជាក់នៅក្នុងសេចក្តីសម្រេចរបស់សហព័ន្ធកីឡាប្រដាល់គុនខ្មែរថា គឺដោយសារតែមានការសម្របសម្រួលសូមទោសជាសាធារណៈ (របស់លោក អេ ភូថង អ្នកស្រី សាំង សុម៉ាលី និងកីឡាការិនី អេ យ៉ានុត) កាលពីថ្ងៃទី២៣ ខែកក្កដា និងយោងតាមស្មារតីអង្គប្រជុំគណៈកម្មាធិការអចិន្ត្រៃយ៍របស់សហព័ន្ធកីឡាប្រដាល់គុនខ្មែរ កាលពីថ្ងៃទី២៤ ខែកក្កដា ឆ្នាំ២០២៤។
ជាមួយការចេញសេចក្តីសម្រេច ស្តីពីការបន្ធូរបន្ថយការដាក់ពិន័យទៅលើក្រុមគ្រួសារលោក អេ ភូថង នេះ គឺមានអ្នកគាំទ្រភាគច្រើន បានអបអរសាទរនូវចំណាត់ការនេះ ប៉ុន្តែក៏មានការរិះគន់ទៅលើការសម្រេចដាក់វិន័យយ៉ាងទាន់ហន់ (រយៈពេលត្រឹម២ថ្ងៃ) រួចបានកែប្រែភ្លាមៗឡើងវិញនេះផងដែរ ព្រោះបញ្ហានេះបានបង្ហាញពីការមិនទាន់មានជំហរច្បាស់លាស់របស់សហព័ន្ធកីឡាប្រដាល់គុនខ្មែរ។
ជាមួយការបង្ហោះសេចក្តីសម្រេចជាថ្មី ស្តីពីការបន្ធូរបន្ថយការដាក់ពិន័យទៅលើក្រុមគ្រួសារលោក អេ ភូថង នេះ គណនីឈ្មោះ Siem Than បានបញ្ចេញមតិយោបល់រិះគន់បែបនេះថា៖ «បទពិសោធន៌ថ្ងៃក្រោយ មេ (លោក ខូវ ឆាយ) កុំសូវសម្រេចចិត្តលឿនពេក ម៉ាភ្លេត ស៊ីញ៉ែ២ដង មិនសូវល្អមើលទេ»។
យ៉ាងណាក៏ដោយប្រធានសហព័ន្ធកីឡាប្រដាល់គុនខ្មែរ លោក ខូវ ឆាយ បានប្រកាន់ជំហរច្បាស់លាស់ ក្នុងការអនុវត្តច្បាប់ ទៅលើជនណា ឬក្រុមណា ដែលបានប្រព្រឹត្តផ្ទុយពីច្បាប់ និងបទបញ្ជាផ្ទៃក្នុងរបស់សហព័ន្ធ។
លោកធ្លាប់បានបញ្ជាក់ថា៖ «យើងទទួលស្គាល់ថា គ្រួសារលោកគ្រូ អេ ភូថង មានគុណសម្បត្តិច្រើន ប៉ុន្តែការអនុវត្តច្បាប់ ត្រូវតែធ្វើឱ្យបានខ្ចប់ខ្ជួន ព្រោះគុនខ្មែរអភិវឌ្ឍទៅមុខ មិនអាចគ្មានការអនុវត្តច្បាប់បានទេ»៕
