សកម្មភាពការប្រកួតលីគនារី កាលពីឆ្នាំ២០២១ រវាងសមាគមខេត្តកំពង់ឆ្នាំង (ខៀវ) និងក្លិបបាល់ទាត់ខេត្តសៀមរាប។ រីបថត សហការី
សហព័ន្ធកីឡាបាល់ទាត់កម្ពុជា (FFC) បានសម្រេចរៀបចំឱ្យមានការប្រកួតខេមបូឌានលីគនារី ឡើងវិញ បន្ទាប់ពីព្រឹត្តិការណ៍នេះត្រូវបានផ្អាកអស់រយៈពេល២ឆ្នាំ ដោយសារតែមិនមានកញ្ចប់ថវិកាចំណាយគ្រប់គ្រាន់។
ដោយមានលោក សៅ សុខា ជាប្រធានសហព័ន្ធ គឺ FFC កាលពីព្រឹកថ្ងៃពុធនេះ បានជម្រាបជូនដល់សាធារណជន ជាពិសេស អ្នកគាំទ្រវិស័យកីឡាបាល់ទាត់ជាតិទាំងអស់ ពីការរៀបចំឱ្យមានការប្រកួតខេមបូឌានលីគនារី ឡើងវិញ នាឆ្នាំ២០២៤នេះ ដោយព្រឹត្តិការណ៍នេះ នឹងប្រព្រឹត្តទៅចាប់ពីថ្ងៃទី១៧ ខែសីហា ដល់ថ្ងៃទី៨ ខែកុម្ភៈ ឆ្នាំ២០២៥។
តាមការជូនដំណឹងនេះ សហព័ន្ធកីឡាបាល់ទាត់កម្ពុជា បានឱ្យដឹងថា ការប្រកួតខេមបូឌានលីគនារី ឆ្នាំ២០២៤នេះ មានក្លិបបាល់ទាត់ សមាគម មន្ទីរ និងអង្គការសរុបចំនួន ១០ក្រុម នឹងចូលរួមប្រកួតប្រជែង ក្នុងនោះមានភ្នំពេញក្រោន ព្រះខ័នរាជស្វាយរៀង បឹងកេត ណាហ្គាវើលដ៍កំពង់ស្ពឺ វិសាខា សមាគមខេត្តកំពង់ឆ្នាំង មន្ទីរអយកខេត្តកំពង់ធំ សមាគមក្លិបបាល់ទាត់មីស្ទើរលេង ក្លិបបាល់ទាត់ខេត្តសៀមរាប និងក្រុមសលត៍ (SALT)។
ការប្រកួតលីគនារីនេះ ត្រូវបែងចែកចេញជាពីរដំណាក់កាល ដោយដំណាក់កាលទី១ ត្រូវធ្វើការប្រកួត តាមរូបមន្ត លីគ២ជុំ (ម្ចាស់ផ្ទះ និងភ្ញៀវ) និងដំណាក់កាលទី២ បន្ទាប់ពីបញ្ចប់ការប្រកួតលីគ២ជុំ គឺក្រុមដែលមានចំណាត់ថ្នាក់ពីលេខ១ ដល់លេខ៤ នឹងត្រូវប្រកួតចំនួន ៣ប្រកួតបន្ថែមទៀត ហើយក្រុមដែលមានពិន្ទុខ្ពស់ជាងគេ នឹងក្លាយជាក្រុមជើងឯកតែម្តង។
តាមរយៈរូបមន្តនេះ គឺការប្រកួតខេមបូឌានលីគនារី ឆ្នាំ២០២៤ មានការប្រកួតចំនួនសរុប ៩៣ប្រកួត ដែលមានរយៈពេល ៧ខែ ដោយសារឆ្នាំនេះមានចំនួនក្រុមចូលរួមច្រើនជាងការប្រកួតលីគនារីកន្លងមក ព្រោះការប្រកួតលីគនារី លើកចុងក្រោយប្រចាំឆ្នាំ២០២១ មានតែ ៨ក្រុមចូលរួមទេ ហើយជាលទ្ធផលក្រុមនារីភ្នំពេញក្រោន បានក្លាយជាម្ចាស់ជើងឯក រីឯក្រុមជើងឯករងបានទៅលើក្រុមណាហ្គាវើលដ៍កំពង់ស្ពឺ និងក្រុមបាល់ទាត់នារីសៀមរាប បានចំណាត់ថ្នាក់លេខ៣។
ជុំវិញការផ្អាកការប្រកួតបាល់ទាត់ «លីគនារី» រយៈពេល២ឆ្នាំមកនេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា ធ្លាប់បានប្រាប់ថា វាពាក់ព័ន្ធទៅនឹងកញ្ចប់ថវិកាចំណាយ ព្រោះថវិកាទទួលបានពី FIFA ក៏មានចំនួនតិច ដែលទាមទារឱ្យមានការពន្យារពេលការប្រកួត ដើម្បីស្វែងរកការឧបត្ថម្ភបន្ថែមពីវិស័យឯកជន។
ទន្ទឹមនឹងនេះ លោក កែវ សារ៉េត បានទទួលស្គាល់ថា ការមិនសូវមានការប្រកួតបាល់ទាត់ផ្នែកនារី ពិសេស«លីគនារី» ពិតជាបានប៉ះពាល់ដល់ការអភិវឌ្ឍបាល់ទាត់នារីនៅកម្ពុជា ប៉ុន្តែបញ្ហាសំខាន់គឺកញ្ចប់ថវិកាចំណាយ។ ចំណែកការដណ្តើមបានកៅអីឡើងទៅដល់វគ្គពាក់កណ្តាលព្រ័ត្រ ជាលើកដំបូងរបស់ក្រុមជម្រើសជាតិនារីកម្ពុជា នៅស៊ីហ្គេម ឆ្នាំ២០២៣ ត្រូវបានលោក សារ៉េត ទម្លាយថា ដោយសារមានការជួយជ្រោមជ្រែងពីប្រទេសចិន។
អ្នកចាំទីជម្រើសជាតិកម្ពុជា លោតទះបាល់ចេញពីសំណាញ់ទី កាលពីប្រកួតស៊ីហ្គេម ប្រភេទបាល់ទាត់នារី។ រូបថត សហការី
លោកបញ្ជាក់ថា៖ «កាលពីស៊ីហ្គេម ក្រុមនារីរបស់យើង ពិតជាធ្វើបានលទ្ធផលល្អ ដោយសារមានការជួយពីភាគីចិន សម្រាប់ការហ្វឹកហាត់នៅទីនោះ តែបើសង្ឃឹមលើខ្លួនយើង ដើម្បីរៀបចំឱ្យមានការហ្វឹកហាត់នោះ គឺប្រឈមបញ្ហាច្រើនណាស់ ព្រោះយើងត្រូវស្វែងរកថវិកាមករៀបចំ អ៊ីចឹងហើយបានជាបាល់ទាត់នារីយើងបានតែមួយប្រាវ រួចក៏មានភាពអសកម្មមកវិញ»។
តែទោះយ៉ាងណា លោក កែវ សារ៉េត បន្ថែមថា៖ «នៅក្នុងយុទ្ធអភិវឌ្ឍបាល់ទាត់ទាំង១១ចំណុចរបស់សហព័ន្ធ ក៏យើងបានរាប់បញ្ចូលផ្នែកបាល់ទាត់នារីទៅក្នុងនោះដែរ ហើយយើងនៅតែខ្នេះខ្នែង ព្រោះបើយើងមិនរៀបចំធ្វើទេ យើងមានការខាតច្រើន គឺក្មេងហាត់ចោលៗអត់បានលេង ធ្វើឱ្យកម្រិតបច្ចេកទេសរបស់ពួកគេមិនរីកចម្រើនដូចគ្នា ហេតុនេះទើបយើងប្រឹងប្រែងធ្វើម៉េចរៀបចំឱ្យមានការប្រកួតលីគនារីវិញ»៕
