ការប្រកួតកីឡាហាប់គីដូជើងឯកថ្នាក់ជាតិ ឆ្នាំ២០២៤ ដែលត្រូវបានរៀបចំឡើង ក្រោមការឧបត្ថម្ភរបស់វិស័យឯកជន និងការរៃអង្គាសថវិកាផ្ទាល់នៅក្នុងសហព័ន្ធខ្មែរកីឡាហាប់គីដូ។ រូបថត សហការី
មន្រ្តីបច្ចេកទេសរបស់សហព័ន្ធខ្មែរកីឡាហាប់គីដូ លោក គង់ ចាន់ធីណា បានអះអាងថា ការឧបត្ថម្ភពីក្រុមហ៊ុនជាវិស័យឯកជនបានរួមចំណែកយ៉ាងសំខាន់ ដែលធ្វើឱ្យសហព័ន្ធ អាចមានលទ្ធភាពរៀបចំការប្រកួតជ្រើសរើសជើងឯកថ្នាក់ជាតិ បានចំនួន២លើក និងទទួលបានឱកាស ចេញទៅប្រកួតនៅលើឆាកអន្តរជាតិ ជាលើកដំបូង ដើម្បីដណ្តើមបានមេដាយជូនជាតិមាតុភូមិដ៏គួរជាទីមោទនៈ។
លោក គង់ ចាន់ធីណា ដែលបានចូលហាត់កីឡាហាប់គីដូ ក្នុងឆ្នាំ១៩៨៨ ហើយបានកាន់តួនាទីជាអគ្គលេខាធិការសហព័ន្ធខ្មែរកីឡាហាប់គីដូ តាំងពីឆ្នាំ២០០៤មកនោះ បានទម្លាយថា នៅក្នុងដំណើរការអភិវឌ្ឍវិស័យកីឡាហាប់គីដូដ៏វែងឆ្ងាយ នៅក្នុងប្រទេសកម្ពុជានេះ គឺមានការពិបាកណាស់ ទម្រាំប្រភេទកីឡានេះ ទទួលបានការអនុញ្ញាតពីក្រសួងអប់រំ យុវជន និងកីឡា ឱ្យរៀបចំការប្រកួតជើងឯកថ្នាក់ជាតិ ជាលើកដំបូង កាលពីថ្ងៃទី២៣-២៤ ខែធ្នូ ឆ្នាំ២០២៣ និងបន្តរៀបចំម្តងទៀត កាលពីថ្ងៃទី២១-២២ ខែធ្នូ ឆ្នាំ២០២៤។
យ៉ាងណាក៏ដោយ ដោយសារសហព័ន្ធខ្មែរកីឡាហាប់គីដូ មិនទាន់ទទួលបានកញ្ចប់ថវិកាអភិវឌ្ឍប្រចាំឆ្នាំពីក្រសួងអប់រំនោះ អ៊ីចឹងការចំណាយគ្រប់បែបយ៉ាង សម្រាប់រៀបចំការប្រកួតជើងឯកថ្នាក់ជាតិ ចំនួន២លើកនេះ គឺជាបន្ទុករបស់សហព័ន្ធផ្ទាល់ ដែលត្រូវរៃអង្គាសថវិកាគ្នា នៅក្នុងសហព័ន្ធ បូករួមទាំងថវិកា ទទួលបានពីការឧបត្ថម្ភរបស់វិស័យឯកជន ដើម្បីរៀបចំការប្រកួតថ្នាក់ជាតិបាន។
ជុំវិញការងារនេះ លោក គង់ ចាន់ធីណា បានឱ្យដឹងថា ក្រុមហ៊ុនឡានឡារីតា ជាអ្នកឧបត្ថម្ភធំរបស់សហព័ន្ធខ្មែរកីឡាហាប់គីដូ តាំងពីឆ្នាំ២០២០មក ដើម្បីឱ្យសហព័ន្ធ មានលទ្ធភាពរៀបចំការប្រកួតជើងឯកថ្នាក់ជាតិ ឆ្នាំ២០២៣ ព្រមទាំងអាចបញ្ជូនក្រុមអត្តពលិកទៅចូលរួមការប្រកួត World I.H.F Hapkido Championship 2024 នៅប្រទេសថៃ ជាលើកដំបូង កាលពីខែសីហា ដោយដណ្តើមបានជោគជ័យយ៉ាងត្រចះត្រចង់ គឺឈ្នះបានមេដាយមាស១២ ប្រាក់១៣ និងសំរឹទ្ធ១៥។
ចំណែកការប្រកួតកីឡាហាប់គីដូជើងឯកថ្នាក់ជាតិ ឆ្នាំ២០២៤ ដែលទើបបានបញ្ចប់ដោយជោគជ័យ កាលពីថ្ងៃទី២២ ខែធ្នូកន្លងមកនេះ ក៏ទទួលបានការឧបត្ថម្ភធំពីក្រុមហ៊ុនឡានឡារីតា រួមជាមួយដៃគូឧបត្ថម្ភពីវិស័យឯកជនមួយចំនួនទៀត ក្នុងនោះក៏មានក្រុមហ៊ុន ISI ផងដែរ ដែលទើបបានចូលរួមឧបត្ថម្ភជាលើកដំបូង។
ឆ្លើយតបទៅនឹងការចូលរួមជួយឧបត្ថម្ភពីវិស័យឯកជននេះ លោក គង់ ចាន់ធីណា បានបញ្ជាក់ថា៖ «នេះជាទឹកចិត្តដ៏ល្អរបស់ក្រុមហ៊ុន ដែលបានចូលរួមជួយឧបត្ថម្ភជាថវិកាដល់សហព័ន្ធយើង ហើយនេះជាចំណែកមួយដ៏ធំដែរ ធ្វើឱ្យសហព័ន្ធខ្មែរកីឡាហាប់គីដូ ប្រមែប្រមូលផ្សំផ្គុំគ្នាបានថវិកាគ្រប់ចំនួន សម្រាប់រៀបចំការប្រកួតកីឡាហាប់គីដូជើងឯកថ្នាក់ជាតិ ប្រកបដោយជោគជ័យ»។
លោក គង់ ចាន់ធីណា និងក្រុមកីឡាហាប់គីដូកម្ពុជា ពេលយកលិខិតថ្លែងអំណរគុណជូនដល់តំណាងក្រុមហ៊ុន ISI កាលពីថ្ងៃទី៣០ ខែធ្នូ ឆ្នាំ២០២៤។ រូបថត សហការី
យ៉ាងណាមិញ សម្រាប់ការយកលិខិតថ្លែងអំណរគុណ ទៅប្រគល់ជូនដល់ម្ចាស់ឧបត្ថម្ភ កាលពីថ្ងៃទី៣០ ខែធ្នូ ឆ្នាំ២០២៤ លោក ឡាំ គុយ អ្នកសម្របសម្រួលគម្រោងអង្គការមូលនិធិ ខេ អឹម អេច នៃក្រុមហ៊ុន ISI បានបង្ហាញភាពរីករាយ ដែលបានចូលរួមជួយដល់វិស័យកីឡាហាប់គីដូ ដើម្បីឱ្យប្រភេទកីឡានេះ កាន់តែមានលទ្ធភាព អភិវឌ្ឍសមត្ថភាពឱ្យបានកាន់តែរីកចម្រើនថែមទៀត។
លោក គង់ ចាន់ធីណា បញ្ជាក់ថា៖ «នេះជាការសម្រាលទុក្ខដ៏ធ្ងន់មួយរបស់សហព័ន្ធ ដែលខាងក្រុមហ៊ុន ISI បានចូលរួមជួយឧបត្ថម្ភ ហើយសម្រាប់ការប្រាស្រ័យទាក់ទងគ្នា នៅក្នុងការយកលិខិតថ្លៃអំណរគុណនេះ គឺក្រុមហ៊ុនសប្បាយចិត្ត ព្រោះ ISI តែងតែបានជួយឧបត្ថម្ភដល់វិស័យកីឡានៅកម្ពុជា ហេតុនេះយើងសង្ឃឹមថា ក្រុមហ៊ុន នឹងបន្តចូលរួមជួយឧបត្ថម្ភដល់ការប្រកួតរបស់សហព័ន្ធយើង ជាបន្តទៀត»។
នៅពេលសួរថា តើសហព័ន្ធ នឹងមានការស្នើសុំទៅក្រុមហ៊ុន ដើម្បីអាចរៀបចំការប្រកួតកីឡាហាប់គីដូដណ្តើមពានរង្វាន់ ISI នៅពេលខាងមុខ ឬយ៉ាងណានោះ? លោក ចាន់ធីណា បានឆ្លើយថា៖ «បើសិនជាខាងក្រុមហ៊ុនមានទឹកចិត្ត ចង់ចូលរួមជួយរៀបចំពានរង្វាន់ យើងនឹងពិភាក្សាគ្នាបន្តទៀត ទៅតាមស្ថានភាពជាក់ស្តែង»។
ចំណែកលោក គួច ហុកជៀក អនុប្រធានសហព័ន្ធខ្មែរកីឡាហាប់គីដូ ក៏ជឿថា ISI នឹងបន្តជួយដល់ការប្រកួតកីឡាហាប់គីដូកាន់តែច្រើន។
លោកបានបញ្ជាក់ក្នុងពិធីបិទការប្រកួតថ្នាក់ជាតិ ឆ្នាំ២០២៤ថា៖ «យើងខ្ញុំជឿថា នឹងមានក្រុមហ៊ុនផ្សេងៗទៀត ចូលរួមឧបត្ថម្ភដល់យើង ចំណែកលើកនេះក្រុមហ៊ុន ISI បានចាប់អារម្មណ៍ជួយជាលើកដំបូង អ៊ីចឹងសង្ឃឹមថា ការប្រកួតលើកក្រោយ គាត់នឹងជួយធំជាងនេះ ព្រោះ ISI តែងតែមានភាពសកម្មក្នុងការជួយដល់វិស័យកីឡាផ្សេងៗទៀតនៅកម្ពុជា»៕
