លោក ខូវ ឆាយ បានថ្លែងបន្ទាប់ពីលោកត្រូវបានគាំទ្រឱ្យបន្តធ្វើជាប្រធានសហព័ន្ធកីឡាប្រដាល់គុនខ្មែរ ក្នុងអាណត្តិទី៨ នៅក្នុងមហាសន្និបាត កាលពីថ្ងៃទី២២ ខែមករា ឆ្នាំ២០២៥។ រូបថត ឈន ណន
បញ្ហារសើបទាក់ទងទៅនឹងការទិញកីឡាករចងជើងទុក ឬគ្រប់គ្រងផ្តាច់មុខ សម្រាប់ឱ្យប្រកួតតែនៅលើសង្វៀនមួយ ជាថ្នូរនឹងការផ្តល់ប្រាក់ខែ និងលាភសក្ការៈផ្សេងៗនោះ អាចនឹងមិនត្រូវបានថ្នាក់ដឹកនាំសហព័ន្ធកីឡាប្រដាល់គុនខ្មែរ យកមកដោះស្រាយ ដើម្បីបង្កើតឱ្យមានតម្លាភាពក្នុងការប្រកួតប្រជែងរៀបចំព្រឹត្តិការណ៍ប្រដាល់គុនខ្មែររបស់ស្ថានីយទូរទស្សន៍ក្នុងស្រុកនោះទេ។
លោក ខូវ ឆាយ ដែលទើបត្រូវបានគាំទ្រឱ្យបន្តធ្វើជាប្រធានសហព័ន្ធកីឡាប្រដាល់គុនខ្មែរ នៅក្នុងមហាសន្និបាត កាលពីថ្ងៃទី២២ ខែមករា បានអះអាងថា សហព័ន្ធធ្លាប់បានគិតគូរពីបញ្ហានេះដែរ ហើយក៏កំពុងសិក្សាបន្ថែមទៀត ប៉ុន្តែលោកហាក់គ្មានជំហរយកគោលការណ៍ច្បាប់របស់សហព័ន្ធ មកលុបបំបាត់វប្បធម៌នេះទេ ព្រោះខ្លាចប៉ះពាល់ដល់ម្ចាស់សង្វៀន និងម្ចាស់ស្ពនស័រ ដែលជាដៃគូអភិវឌ្ឍន៍វិស័យប្រដាល់គុនខ្មែរមួយចំនួន។
លោក ឆាយ បានថ្លែងថា៖ «យើងកំពុងសិក្សាពីរឿងហ្នឹង ព្រោះធម្មតាទីផ្សារសេរី យើងមិនអាចទៅហាមឃាត់កីឡាករមិនឱ្យទៅចុះកិច្ចសន្យាជាមួយក្រុមហ៊ុន ឬស្ថានីយទូរទស្សន៍ណាមួយនោះទេ ព្រោះសហព័ន្ធ មិនមែនជាម្ចាស់របស់កីឡាករទេ! សហព័ន្ធគ្រាន់តែជាអ្នកទទួលខុសត្រូវលើការអភិរក្ស និងអភិវឌ្ឍន៍គុនខ្មែរ ហើយសាមីក្លិបទៅវិញទេ ទើបជាអាណាព្យាបាលរបស់កីឡាករផ្ទាល់»។
លោកបន្ថែមថា៖ «បើសិនជាក្លិបគាត់អនុញ្ញាត សហព័ន្ធ មិនអាចទៅហាមឃាត់បាននោះទេ ព្រោះកត្តាជីវភាពរបស់គាត់ គឺគាត់ជាអ្នកកំណត់ខ្លួនឯងថាតើក្រុមហ៊ុន ឬស្ថានីយ ដែលផ្តល់កិច្ចសន្យាឱ្យគាត់នោះ តើល្អសម្រាប់គាត់អត់? ហើយករណីមួយចំនួនទៀត បើយើងអនុវត្ត ឬហាមឃាត់ទៅ វានាំឱ្យប៉ះពាល់ដល់ដៃគូអភិវឌ្ឍ ដែលជាស្ថានីយទាំងអស់ហ្នឹង»។
គួរបញ្ជាក់ថា គ្រប់ស្ថានីយទូរទស្សន៍ក្នុងស្រុក ដែលមានបង្កើតជាសង្វៀនប្រដាល់នោះ សុទ្ធតែត្រូវការកីឡាករមានសមត្ថភាពខ្លាំង ជាពិសេសអ្នកមានឈ្មោះល្បីល្បាញឱ្យឡើងប្រកួតនៅលើសង្វៀនរបស់ខ្លួន ដើម្បីបង្កើតឱ្យមានភាពទាក់ទាញចំពោះអ្នកគាំទ្រ និងទាញបានការឧបត្ថម្ភពីក្រុមហ៊ុនឯកជន។
ប៉ុន្តែការប្រកួតប្រជែងនេះ វានៅតែគ្មានតម្លាភាព ព្រោះកីឡាករដែលមានឈ្មោះល្បី និងមានប្រជាប្រិយភាពខ្លាំង ត្រូវបានម្ចាស់ង្វៀន មានធនធានច្រើន និងមានស្ពនស័រធំៗ ទិញយកមកគ្រប់គ្រង សម្រាប់ឱ្យឡើងប្រកួតផ្តាច់មុខតែក្នុងកម្មវិធីរបស់ខ្លួនប៉ុណ្ណោះ គឺការចងជើងទុក តាមរយៈការចុះកិច្ចសន្យា ឬឱ្យកីឡាករនោះ ធ្វើជាទូតសុច្ឆន្ទៈ (BA) តំណាងឱ្យកម្មវិធី ឬផលិតផលរបស់ខ្លួនតែម្តង។
កីឡាករជើងខ្លាំងរបស់កម្ពុជា ធឿន ធារ៉ា ពេលប្រកួតដណ្តើមពានជាមួយកីឡាករបរទេស នៅលើសង្វៀនថោន នាពេលកន្លងមក។ រូបថត សហការី
វប្បធម៌មិនល្អនេះ បានកើតមានឡើងតាំងពីជំនាន់កីឡាករ កែវ រំចង់ នៅមានឈ្មោះបោះសំឡេងខ្លាំង ដោយកាលនោះសង្វៀនបាយ័ន បានផ្តល់ជាប្រាក់ខែឱ្យ កែវ រំចង់ សម្រាប់ឡើងប្រកួតតែក្នុងកម្មវិធីប្រដាល់ ដែលរៀបចំដោយសង្វៀនបាយ័នមួយទេ ហើយបច្ចុប្បន្ននេះ ជើងខ្លាំង ធឿន ធារ៉ា ក៏បែបនេះដែរ គឺរូបគេឡើងប្រកួតតែនៅក្នុងកម្មវិធី ដែលរៀបចំឡើងដោយសង្វៀនថោន មួយប៉ុណ្ណោះ ខណៈកីឡាករកម្រិតAមួយចំនួនទៀត ក៏កំពុងដើរនៅលើគន្លងនេះដូចគ្នា។
ចំពោះការប្រកួតប្រជែងដណ្តើមយកកីឡាករទៅប្រកួត ដោយគ្មានតម្លាភាពនេះ បានធ្វើឱ្យម្ចាស់សង្វៀនប្រដាល់មួយចំនួន ជួបការពិបាកខ្លាំង។ ពួកគេ បានចាត់ទុក ករណីទិញកីឡាករទៅគ្រប់គ្រងឱ្យប្រកួតផ្តាច់មុខនេះ គឺជាវប្បធម៌មិនល្អទាល់តែសោះ ដែលអាចនឹងឈានទៅដល់ការប្រកាន់បក្ខពួកនិយម នៅក្នុងចំណោមដៃគូអភិវឌ្ឍន៍វិស័យគុនខ្មែរ ហើយនៅពេលដែលអស់លទ្ធភាព សង្វៀនប្រដាល់មួយចំនួនក៏អាចបិទ ដែលនឹងប៉ះពាល់ដល់ការអភិវឌ្ឍ និងអភិរក្សគុនខ្មែរដូចគ្នា។
តែទោះបីជាយ៉ាងណា លោក ខូវ ឆាយ ហាក់មិនយល់ឃើញថា ករណីទិញកីឡាករទៅគ្រប់គ្រងឱ្យប្រកួតផ្តាច់មុខរបស់សង្វៀនធំៗនេះ ជារឿងខុសនោះទេ ព្រោះជាទីផ្សារសេរី ដោយលោកមើលឃើញថា សកម្មភាពប្រកួតនៅតាមបណ្តាប្រទេសផ្សេងៗនៅក្នុងតំបន់ ក៏ដូចជានៅលើពិភពលោក ក៏គេមានចុះកិច្ចសន្យាដល់កីឡាករល្បីៗ សម្រាប់ប្រកួតនៅលើសង្វៀន ឬកម្មវិធីរបស់គេដូចគ្នា។
លោក ឆាយ បញ្ជាក់ថា៖ «ចំណុចនេះយើងធ្លាប់បានពិភាក្សាគ្នាច្រើនដងមកហើយ តើយើងគួរអនុវត្តរបៀបម៉េច! ប៉ុន្តែយើងគិតថា បើអនុវត្តទៅ ដឹងតែប៉ះទង្គិចជាមួយស្ថានីយ ដែលគាត់ត្រូវការមានកីឡាករសម្រាប់ត្រៀមប្រកួតឱ្យស្ថានីយ៍របស់គាត់ អ៊ីចឹងគេមានជា BA ជាមួយកីឡាករ ដោយមានកិច្ចសន្យារយៈពេលវែង ហើយខ្ញុំគិតថា ករណីនេះនៅប្រទេសណាក៏មានដែរ មិនមែនមានតែនៅកម្ពុជាទេ»៕
