សកម្មភាពរត់របស់ក្រុមអត្តពលិកជាតិ និងអន្តរជាតិ នៅក្នុងទិវារត់ប្រណាំងចម្ងាយឆ្ងាយអន្ដរជាតិអង្គរ លើកទី៧ ឆ្នាំ២០២៤។ រូបថត សហការី
លោកទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានអះអាងថា ទិវារត់ប្រណាំងចម្ងាយឆ្ងាយអន្ដរជាតិអង្គរ លើកទី៨ ឆ្នាំ២០២៥ (The 8th Angkor Ultra Trail 2025) ដែលនឹងធ្វើនៅតំបន់អង្គរ ខេត្តសៀមរាប នាថ្ងៃទី១៨ ខែមករាខាងមុខនេះ នឹងក្លាយជាព្រឹត្តិការណ៍កីឡាទេសចរណ៍ដ៏សំខាន់មួយទៀត ក្នុងការជួយផ្សព្វផ្សាយតំបន់អង្គរ និងប្រទេសកម្ពុជា ទៅកាន់ពិភពលោក តាមរយៈក្រុមអត្តពលិកអន្តរជាតិ ដែលបានចុះឈ្មោះចូលរួមយ៉ាងច្រើន។
នៅក្នុងសន្និសីទកាសែត កាលពីថ្ងៃទី៦ ខែមករា លោក ថោង ខុន បានឱ្យដឹងថា ទិវា Angkor Ultra Trail ត្រូវបានរាជរដ្ឋាភិបាលកម្ពុជា អនុញ្ញាតឱ្យ NOCC និងក្រុមហ៊ុន Phoenix Voyages រៀបចំ នៅតំបន់អង្គរ ជារៀងរាល់ឆ្នាំ ចាប់តាំងពីឆ្នាំ២០១៦មក ដោយកាលនោះមានអ្នកចូលរួមត្រឹម២៣២នាក់ មកពី២៦ប្រទេស ប៉ុន្តែចំនួនអ្នកចូលរួមបានកើនឡើងជាបន្តបន្ទាប់ ខណៈ Angkor Ultra Trail លើកទី៧ ឆ្នាំ២០២៤ មានអ្នកចូលរួម១៥០០នាក់ មកពី៥១ប្រទេស គឺកើនឡើង២៥ភាគរយ ធៀបនឹងឆ្នាំ២០២៣។
ចំណែកអ្នកចុះឈ្មោះចូលរួមទិវារត់ប្រណាំង Angkor Ultra Trail លើកទី៨ ឆ្នាំ២០២៥ គិតត្រឹមថ្ងៃទី៥ ខែមករា គឺមានចំនួន១៣៦៨នាក់ មកពី៤៤ប្រទេស ហើយអត្តពលិកចូលរួមភាគច្រើនមានមកពីបារាំង កម្ពុជា វៀតណាម ថៃ និងអាមេរិក ប៉ុន្ដែទម្រាំដល់ថ្ងៃប្រកួត គណៈកម្មការរៀបចំរំពឹងថា នឹងអាចទាក់ទាញអ្នកចូលរួមកើនដល់ ១៧០០នាក់ ឬអាចនឹងកើនឡើងប្រមាណ ២០ភាគរយ បើធៀបនឹងឆ្នាំមុន។
ជាមួយចំនួនអ្នកចូលរួមនេះ លោក ថោង ខុន ថ្លែងថា៖ «Ultra Trail ជាព្រឹត្តិការណ៍កីឡាពិភពលោក អ៊ីចឹងអ្វីដែលយើងបានធ្វើនៅអង្គរនេះ ក៏ជាផ្នែកមួយនៃព្រឹត្តិការណ៍ Ultra Trail នៅលើពិភពលោក ដែលវានឹងជួយផ្សព្វផ្សាយអង្គរ និងកម្ពុជាទៅកាន់ពិភពលោក ព្រោះអ្នកមករត់ មិនមែនគ្រាន់តែរត់ដើម្បីសុខភាពទេ តែមកដល់ស្រុកយើង ពួកគាត់ អាចនឹងមានការចាប់អារម្មណ៍ល្អ ហើយជួយផ្សព្វផ្សាយពីយើង»។
ជាមួយគ្នានេះអតីតរដ្ឋមន្រ្តីក្រសួងទេសចរណ៍ លោក ថោង ខុន បានចាប់អារម្មណ៍ខ្លាំងទៅលើអត្តពលិកចំណូលថ្មី ដែលបានចុះឈ្មោះចូលរួម សម្រាប់ទិវារត់ប្រណាំង Angkor Ultra Trail 2025នេះ ដែលមានចំនួនច្រើន ហើយពួកគេ នឹងក្លាយជាអ្នកនាំសារ ក្នុងការជួយផ្សព្វផ្សាយពីកម្ពុជាកាន់តែខ្លាំង ទៅកាន់ពិភពលោក។
លោកបញ្ជាក់ថា៖ «អ្នកដែលធ្លាប់មករួចហើយ មានតែ ១២ភាគរយទេ ប៉ុន្ដែ ៧៨ភាគរយទៀត ជាអ្នកចូលរួមថ្មី ហើយនេះជាចំណុចសំខាន់ ដែលជួយដល់ការផ្សព្វផ្សាយខ្លាំងណាស់។ អ៊ីចឹងព្រឹត្តិការណ៍នេះ ជួយដល់ការផ្សព្វផ្សាយទេសចរណ៍ពីកម្ពុជា ពិសេសនៅតំបន់អង្គរ ហើយរួមចំណែកជួយដល់ការអភិវឌ្ឍន៍វិស័យកីឡាជាតិ និងគម្រោងមនុស្សធម៌ ក៏ដូចជាផ្សព្វផ្សាយពីតំបន់បេតិកភណ្ឌពិភពលោកទៅខាងក្រៅ រួមចំណែកសំខាន់ដល់ការអភិវឌ្ឍសេដ្ឋកិច្ចក្រៅប្រព័ន្ធ»។
លោក ថោង ខុន ពេលថ្លែង ក្នុងសន្និសីទកាសែតស្តីពីទិវារត់ប្រណាំងចម្ងាយឆ្ងាយអន្ដរជាតិអង្គរ លើកទី៨ ឆ្នាំ២០២៥ នៅទីស្នាក់ការ NOCC កាលពីថ្ងៃទី៦ ខែមករា ឆ្នាំ២០២៥។ រូបថត សហការី
ទន្ទឹមនឹងនេះ លោក ថោង ខុន បានវាយតម្លៃខ្ពស់ទៅលើអត្តពលិករត់ចម្ងាយឆ្ងាយរបស់កម្ពុជា ដែលបានចុះឈ្មោះចូលរួមរត់ចម្ងាយ១០០គីឡូម៉ែត្រ រហូតដល់២៥ភាគរយ ក្នុងចំណោមអ្នកចុះឈ្មោះជាបណ្ដោះអាសន្ន ១២១នាក់ ហើយក្នុងនោះ ក៏មានស្ដ្រីកម្ពុជា៥រូបផងដែរ។ ចំណែកក្រុមអត្តពលិកជាច្រើនទៀត បានចុះឈ្មោះរត់វិញ្ញាសាផ្សេងៗ ជាមួយអ្នកនិយមរត់បែបផ្សងព្រេង ដែលភាគច្រើនមកពីអឺរ៉ុប ដូចជាវិញ្ញាសារត់ចម្ងាយ ៦៤គីឡូម៉ែត្រ, ៤២គីឡូម៉ែត្រ, ៣២គីឡូម៉ែត្រ, ១៨គីឡូម៉ែត្រ និង ៨គីឡូម៉ែត្រ។
លោក Edouard George ប្រធានក្រុមហ៊ុន Phoenix Voyages ដែលជាអ្នកជំនាញរៀបចំព្រឹត្តិការណ៍ Ultra Trail បានថ្លែងថា ព្រឹត្តិការណ៍ Ultra Trail នេះ ជាការរត់ប្រណាំងអន្តរជាតិ មានការទទួលស្គាល់ពីសហព័ន្ធ Ultra Trail ហើយសហព័ន្ធនេះ និង NOCC បានខិតខំប្រឹងប្រែងធ្វើឱ្យទិវារត់ប្រណាំង Angkor Ultra-Trail នេះ ក្លាយទៅជាព្រឹត្តិការណ៍កីឡាមួយ ដែលមានការពេញនិយម នៅលើពិភពលោក ដើម្បីរួមចំណែកជួយផ្សព្វផ្សាយពីទេសចរណ៍ និងវប្បធម៌ ប្រពៃណីខ្មែរ ទៅកាន់ពិភពលោក។
លោកបញ្ជាក់ថា៖ «ការចូលរួមយ៉ាងច្រើនពីអត្តពលិកអន្តរជាតិ ក្នុងព្រឹត្តិការណ៍នេះ វាជាកត្តាដ៏សំខាន់មួយ ដើម្បីបង្ហាញឱ្យពួកគាត់ បានមើលឃើញពីស្ថានភាពជាក់ស្តែងនៃតំបន់ទេសចរណ៍នៅអង្គរ ហើយយើងក៏មានកម្មវិធីវប្បធម៌ ប្រពៃណីខ្មែរ ដូចជារបាំជូនពរ និងគុនល្បុក្កតោ ជាដើម បង្ហាញទៅដល់អ្នករត់ជាជនបរទេសទាំងអស់ ដើម្បីធ្វើឱ្យពួកគាត់ មានភាពរីករាយទាំងការរត់ប្រណាំង និងការកម្សាន្ត ក៏ដូចជាការយល់ដឹងពីវប្បធម៌ និងអរិច្ឆយធម៌របស់ខ្មែរផង»៕
