ក្រុមបញ្ជាការដ្ឋានអង្គរក្ស ពេលថតជុំគ្នាជាមួយថ្នាក់ដឹកនាំសហព័ន្ធ គ្រូបង្វឹក និងម្ចាស់ឧបត្ថម្ភ នៅក្នុងពិធីចាប់ឆ្នោត កាលពីថ្ងៃទី៦ ខែមករា ឆ្នាំ២០២៥។ រូបថត សហព័ន្ធ
ក្លិបបាល់ទះបញ្ជាការដ្ឋានអង្គរក្ស បាននាំយកកីឡាករឥណ្ឌូនេស៊ី រហូតដល់៤នាក់ ដើម្បីប្រកួតការពារពាន ក្នុងព្រឹត្តិការណ៍បាល់ទះ «តេជោលីគ» រដូវកាលទី២ ឆ្នាំ២០២៥ (TECHO Volleyball Cambodia League) ដែលនឹងចាប់ផ្តើមដំណើរការ នៅថ្ងៃទី១០ ខែមករានេះ និងគ្រោងបញ្ចប់នៅថ្ងៃទី២៣ ខែមករា។
សម្រាប់ការនាំយកកីឡាករឥណ្ឌូនេស៊ី៤នាក់ មកជួយដល់ក្រុមរបស់បញ្ជាការដ្ឋានអង្គរក្សនេះ ក៏ព្រោះតែសហព័ន្ធកីឡាបាល់ទះកម្ពុជា បានកែប្រែលក្ខខណ្ឌប្រកួត តេជោលីគ លើកនេះ ដោយអនុញ្ញាតឱ្យក្លិបទាំង៨ អាចចុះឈ្មោះកីឡាករបរទេសរហូតដល់៧នាក់ និងអាចលេងនៅលើទីលានបាន៣នាក់ ចំណែករូបមន្តប្រកួត ក៏មានការកែប្រែផងដែរ ដើម្បីធ្វើឱ្យការប្រកួតដ៏ធំនេះ កាន់តែមានភាពទាក់ទាញ និងស្វិតស្វាញខ្លាំង។
បន្ថែមលើនេះ ក្លិបបញ្ជាការដ្ឋានអង្គរក្ស ក៏ធ្លាប់ទទួលបានជោគជ័យ សម្រាប់ការនាំយកកីឡាករឥណ្ឌូនេស៊ី ចំនួន៣នាក់ មកជួយដល់ក្រុម សម្រាប់ការប្រកួត តេជោលីគ លើកទី១ ឆ្នាំ២០២៤ ដោយពួកគេដណ្តើមបានតំណែងជើងឯកយ៉ាងរំភើប ហើយជ័យជម្នះនោះ បានកើតមានឡើង ដោយសារកីឡាករឆ្នើមរបស់ឥណ្ឌូនេស៊ី Luvi Febrian Nugraha, Doni Haryono និងប្រធានក្រុម Dio Zulfikri ធ្វើបានល្អ និងរកគ្រាប់បាល់បានយ៉ាងច្រើន សម្រាប់ការប្រកួតនោះ ក្រោមការដឹកនាំដោយផ្ទាល់របស់គ្រូបង្វឹកឥណ្ឌូនេស៊ី លោក Indra Wahyudi Harahap។
យ៉ាងណាក៏ដោយ សម្រាប់ការប្រកួត តេជោលីគ ឆ្នាំ២០២៥នេះ ស្មាត់ធំ Doni Haryono និងអ្នកលើកបាល់ដៃទី១ Dio Zulfikri មិនបានមកប្រកួតទេ ដោយពួកគេ ជាប់លេងឱ្យក្រុមជម្រើសជាតិឥណ្ឌូនេស៊ី ហេតុនេះលោក Indra Wahyudi Harahap បានជ្រើសរើសយកកីឡាករវាយប្រយុទ្ធស្តាំ Yanto Febri វាយប្រយុទ្ធឆ្វេង Saputra Okky Damar និងអ្នកលើកបាល់ Aditya Viko Zulfan មកជំនួសវិញ ដើម្បីជួយដល់ក្រុមបញ្ជាការដ្ឋានអង្គរក្ស។
ចំពោះសមត្ថភាពលេងរបស់កីឡាករឥណ្ឌូនេស៊ី ចំណូលថ្មីទាំង៣នាក់នេះ ត្រូវបានកីឡាករវាយប្រយុទ្ធស្តាំ Luvi Febrian Nugraha ឱ្យដឹងថា នៅទាបជាងកីឡាករ Doni Haryono និង Dio Zulfikri ស្របពេលតេជោលីគ លើកនេះ គឺក្រុមនីមួយៗសុទ្ធតែត្រៀមខ្លួនបានល្អ ជាពិសេសក្រុមវិសាខា ដែលបានដាក់ទាំងកីឡាករបារាំង និងគុយបា ខណៈ តេជោលីគ ឆ្នាំ២០២៤ វិសាខា បានយកឈ្នះក្រុមបញ្ជាការដ្ឋានអង្គរក្ស ៣-០ នៅជុំទី១ និងបន្តឈ្នះ ៣-២ នៅជុំទី២ ប៉ុន្តែពួកគេ មកចាញ់ បញ្ជាការដ្ឋានអង្គរក្ស ៣-១ នៅវគ្គផ្តាច់ព្រ័ត្រ ទាំងឈឺចាប់បំផុត។
ការប្រកួតរវាងក្រុមបញ្ជាការដ្ឋានអង្គរក្ស (ពណ៌ខៀវ) ជាមួយក្រុមក្រសួងមហាផ្ទៃ នៅក្នុងពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥។ រូបថត សហព័ន្ធ
Luvi បាននិយាយថា៖ «សម្រាប់ការប្រកួតលើកនេះ យើងត្រូវធ្វើការងារធ្ងន់ដែរ ព្រោះក្លិបវិសាខា បាននាំយកកីឡាករបារាំង និងគុយបា មកជួយដល់ក្រុម ចំណែកក្លិបផ្សេងៗទៀត ក៏បាននាំយកកីឡាករបរទេសមកជួយដល់ក្រុមដូចគ្នា អ៊ីចឹងសុទ្ធសឹងជាក្រុមខ្លាំង ដែលនឹងមានការប្រកួតយ៉ាងស្វិតស្វាញ»។
ជាមួយគ្នានេះ សម្រាប់ការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥ ដែលទើបបានបញ្ចប់ កាលពីថ្ងៃអាទិត្យ គឺក្រុមបញ្ជាការដ្ឋានអង្គរក្ស បានចាញ់ក្រុមក្រសួងមហាផ្ទៃ ៣-០ នៅវគ្គជម្រុះ និងបន្តចាញ់ក្រុមស្នងការនគរបាលជាតិរាជធានីភ្នំពេញ ៣-១ ក្នុងការប្រកួតដណ្តើមយកលេខ៣។ ប៉ុន្តែ Luvi បានអះអាងថា ការចាញ់នោះ ដោយសារមិត្តរួមជាតិរបស់គេ បានហ្វឹកហាត់ជុំគ្នាជាមួយក្រុមបញ្ជាការដ្ឋានអង្គរក្ស ក្នុងរយៈពេលខ្លីពេក។
តំណាងក្រុមទាំង៨ ដែលត្រូវប្រកួត តេជោលីគ ឆ្នាំ២០២៥ បានថតជុំគ្នា ក្រោយពិធីចាប់ឆ្នោត នៅមជ្ឈមណ្ឌលជាតិហ្វឹកហ្វឺនកីឡា កាលពីថ្ងៃចន្ទ។ រូបថត សហព័ន្ធ
ម្ចាស់អាវលេខ២១ Luvi Febrian Nugraha បានបញ្ជាក់ថា៖ «ការធ្វើមិនសូវបានល្អ ក្នុងប្រកួតពានរង្វាន់ថ្ងៃមុននេះ ដោយសារយើងទើបបានហ្វឹកហាត់ជុំគ្នា មិនដល់១សប្តាហ៍ទេ ប៉ុន្តែសម្រាប់ការប្រកួតតេជោលីគ យើងនឹងធ្វើបានកាន់តែល្អ ហើយយើងរំពឹងខ្ពស់ថា នឹងដណ្តើមបានពានឱ្យក្រុមបញ្ជាការដ្ឋានអង្គរក្ស ម្តងទៀត»។
គួរបញ្ជាក់ថា សម្រាប់ក្រុមទាំង៨ ដែលត្រូវប្រកួតគ្នា ក្នុងព្រឹត្តិការណ៍បាល់ទះ តេជោលីគ ឆ្នាំ២០២៥នេះ រួមមានក្រុមបញ្ជាការដ្ឋានអង្គរក្ស វិសាខា ក្រសួងមហាផ្ទៃ ស្នងការនគរបាលរាជធានីភ្នំពេញ ស្នងការនគរបាលខេត្តពោធិ៍សាត់ កងពលធំអន្តរាគមន៍លេខ៣ ស្នងការនគរបាលស្វាយរៀង និងក្រុមស្នងការនគរបាលខេត្តតាកែវ។
ចំពោះរូបមន្តប្រកួតលើកនេះ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានប្រាប់ក្នុងពិធីចាប់ឆ្នោត នៅមជ្ឈមណ្ឌលជាតិហ្វឹកហ្វឺនកីឡា កាលពីថ្ងៃទី៦ ខែមករាថា សហព័ន្ធសម្រេចប្រើប្រព័ន្ធប្រកួតសន្សំពិន្ទុ២ជុំ គឺជុំទី១ ជាការប្រកួតសន្សំពិន្ទុ ដោយក្រុមឈរ៧ និងលេខ៨ នឹងត្រូវកាត់ចោល ហើយក្រុមលេខ១ ដល់លេខ៦ ត្រូវឡើងទៅប្រកួតជុំទី២ ដែលត្រូវប្រកួតសន្សំពិន្ទុឡើងវិញ ដើម្បីស្វែងរកក្រុមខ្លាំង ដែលឈរលេខ១ ដល់លេខ៤ ឡើងប្រកួតវគ្គខ្វែង បន្ទាប់មកក្រុមឈ្នះ ត្រូវជួបក្រុមឈ្នះ ដើម្បីដណ្ដើមជើងឯក នៅវគ្គផ្ដាច់ព្រ័ត្រតែម្ដង ។
ចំពោះការកែប្រែទាំងរូបមន្តប្រកួត និងការអនុញ្ញាតឱ្យក្លិបនីមួយៗ អាចចុះឈ្មោះកីឡាករបរទេសបាន៧នាក់ ហើយអាចប្រកួតបាន៣នាក់នៅលើទីនេះ លោក សិរីពិសិដ្ឋ បញ្ជាក់ថា ជាយុទ្ធសាស្ដ្រថ្មីរបស់សហព័ន្ធ ក្នុងការជំរុញឱ្យមានការប្រកួតប្រជែងកាន់តែខ្លាំង ដើម្បីចម្រាញ់បានធនធានកីឡាករមានគុណភាពខ្ពស់ សម្រាប់ប្រមូលផ្ដុំហ្វឹកហាត់ក្នុងក្រុមជម្រើសជាតិ ត្រៀមការប្រកួតអន្ដរជាតិនានា ពិសេសព្រឹត្តិការណ៍ធំៗ ២ ក្នុងឆ្នាំនេះ គឺការប្រកួត SEA V.League 2025 និងស៊ីហ្គេម លើកទី៣៣ ឆ្នាំ២០២៥ នៅថៃ៕
