ប្រធានបទ «យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត» បានក្លាយជាយុទ្ធនាការដ៏មានអត្ថន័យនៃការប្រកួតបាល់ទាត់មនុស្សធម៌រវាងក្រុមបាល់ទាត់គុនខ្មែរ និងក្រុមបាល់ទាត់ពិធីករកីឡាកម្ពុជា ដើម្បីស្វែងរកការបរិច្ចាគឈាមក្នុងទ្រង់ទ្រាយធំមួយ សម្រាប់រួមចំណែកជួយដល់មជ្ឈមណ្ឌលជាតិផ្តល់ឈាម ដែលត្រូវការឈាមជាប្រចាំថ្ងៃ ដើម្បីជួយសង្រ្គោះជីវិតដល់អ្នកជំងឺ និងអ្នកត្រូវការឈាម។
ព្រឹត្តិការណ៍ប្រកួតបាល់ទាត់មនុស្សធម៌នេះ ត្រូវបានរៀបចំឱ្យមានឡើងជាលើកដំបូង ដើម្បីជាប្រយោជន៍ជួយដល់សង្គមជាតិ ហើយកម្មវិធីបរិច្ចាគឈាមនេះ នឹងត្រូវធ្វើនៅថ្ងៃទី១៨ ខែកុម្ភៈនេះ ចាប់ផ្តើមពីព្រឹកម៉ោង ៧:៣០ រហូតដល់ម៉ោងរសៀលម៉ោង៥ នៅកីឡដ្ឋានស្តាតចាស់ គឺមុនពេលការប្រកួតបាល់ទាត់មិត្តភាពរវាងក្រុមបាល់ទាត់ពិធីករកីឡាកម្ពុជា និងក្រុមបាល់ទាត់គុនខ្មែរ ដែលធ្វើចាប់ពីម៉ោង៦ល្ងាចតទៅ។
នៅក្នុងសន្និសីទកាសែត នៅភោជនីដ្ឋានទន្លេបាសាក់ កាលពីរសៀលថ្ងៃពុធ តំណាងក្រុមបាល់ទាត់ពិធីករកីឡាកម្ពុជា ក្រុមបាល់ទាត់គុនខ្មែរ និងខាងមជ្ឈមណ្ឌលជាតិផ្តល់ឈាម បានទទូចសុំឱ្យប្រជាពលរដ្ឋកម្ពុជា ជាពិសេសអ្នករស់នៅភ្នំពេញ សូមទៅចូលរួមបរិច្ចាគឈាមឱ្យបានច្រើន ដើម្បីជួយសង្រ្គោះជីវិតអ្នកដែលត្រូវការឈាមជាចាំបាច់។
លោក គុជ ឆៃយ៉ា ប្រធានចាត់ការទូទៅក្រុមបាល់ទាត់ពិធីករកីឡាកម្ពុជា បានលើកឡើងក្នុងសន្និសីទកាសែតនោះថា បន្ទាប់ពីបានឃើញព័ត៌មានពីតម្រូវការឈាមរបស់អ្នកជំងឺ ជំរុញឱ្យសមាជិកក្រុមរបស់លោក រៀបចំនូវយុទ្ធនាការ «យើងរួមគ្នាបរិច្ចាគឈាម ១០០០សាក់ ដើម្បីជួយសង្គ្រោះជីវិត»នេះឡើយ។
លោកបន្តថា នេះជាទិសដៅដ៏វែងឆ្ងាយមួយ ដែលក្រុមរបស់លោក ត្រូវបន្ដធ្វើសកម្មភាព ក៏ដូចជាផ្សព្វផ្សាយ និងបញ្ជ្រាបចំណេះដឹងនៃការផ្ដល់ឈាមដល់ប្រជាពលរដ្ឋនៅទូទាំងប្រទេស ឱ្យបានដឹងពីគុណប្រយោជន៍នៃការបរិច្ចាគឈាម ហើយលោកពិតជាមានមោទនភាព ដែលព្រឹត្តិការណ៍នេះ ទទួលបានការគាំទ្រដ៏ខ្ពង់ខ្ពស់ពីលោក ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា។
លោក គុជ ឆៃយ៉ា បានបញ្ជាក់ថា៖ «ការប្រកួតបាល់ទាត់មិត្តភាព នាថ្ងៃទី១៨ ខែកុម្ភៈនេះ ផ្ដោតសំខាន់លើការផ្ដល់ឈាម។ សម្រាប់លទ្ធផលឈ្នះ ឬចាញ់ក្នុងការប្រកួត ពួកយើងមិនផ្ដោតប៉ុន្មានទេ តែអ្វីដែលពួកយើងចង់ផ្ដោតខ្លាំង និងចង់ឈ្នះបំផុតនោះ គឺចង់ឈ្នះទឹកចិត្ត និងកម្លាំងចិត្តរបស់បងប្អូនប្រជាពលរដ្ឋ ក្នុងការចូលរួមផ្ដល់ឈាម»។
លោក ឆៃយ៉ា បានអំពាវនាវឱ្យប្រជាពលរដ្ឋ ចូលរួមបរិច្ចាគឈាមឱ្យបានច្រើនកុះករ នៅកីឡដ្ឋានស្ដាតចាស់ នាថ្ងៃទី១៨ ខែកុម្ភៈនេះ ហើយក្នុងសន្និសីទកាសែតនោះដែរ លោក ស៊ីថូ ណាថាន់ បានប្រាប់ថា លោកឧបនាយករដ្ឋមន្រ្តី ហ៊ុន ម៉ានី ជាប្រធានកិត្តិយសក្រុមបាល់ទាត់ពិធីករកីឡាកម្ពុជា នឹងចូលរួមបរិច្ចាគឈាមជាលើកទី១៥របស់លោកនៅថ្ងៃនោះដែរ។ វត្តមានថ្នាក់ដឹកនាំរូបនេះ ត្រូវបានគេរំពឹងថា នឹងធ្វើឱ្យចំនួនអ្នកចូលរួមបរិច្ចាគឈាម មានការកើនឡើង និងបានឈាមច្រើនជាង១០០០សាក់។
ចំណែកលោកវេជ្ជបណ្ឌិត សុខ ប៉ូ នាយកមជ្ឈមណ្ឌលជាតិផ្ដល់ឈាម បានថ្លែងអំណរគុណ ចំពោះក្រុមកីឡាករ និងគ្រប់ភាគីពាក់ព័ន្ធទាំងអស់ ជាពិសេសថ្នាក់ដឹកនាំ ដែលបានយកចិត្តទុកដាក់ និងជំរុញឱ្យមានយុទ្ធនាការបរិច្ចាមនេះឡើង ស្របតាមអ្វីដែលមជ្ឈមណ្ឌលជាតិផ្ដល់ឈាម បាននឹងកំពុងជំរុញ និងលើកកម្ពស់ការបរិច្ចាគឈាមដោយស្ម័គ្រចិត្តឱ្យបានផុសផុល និងគ្រប់រូបភាព។
លោកបានថ្លែងថា៖ «ព្រឹត្តិការណ៍បាល់ទាត់មនុស្សធម៌នេះ ជាយុទ្ធនាការដ៏មានអត្ថន័យ សម្រាប់យើងទាំងអស់គ្នា ដើម្បីបង្កើតទម្លាប់ល្អ និងជំរុញការលើកកម្ពស់ឱ្យកីឡាករ ប្រជាជន និងយុវជន ចូលរួមបរិច្ចាគឈាមជាមួយមជ្ឈមណ្ឌលជាតិផ្ដល់ឈាម នៅទូទាំងប្រទេស ដើម្បីធានាឱ្យការផ្គត់ផ្គង់ឈាមគ្រប់គ្រាន់សម្រាប់អ្នកជំងឺ ដែលត្រូវការឈម នៅគ្រប់មន្ទីរពេទ្យទាំងអស់ ដោយគ្មានការរើសអើង ការប្រកាន់ពូជសាសន៍ សាសនា ឬនិន្នាការនយោបាយ»។
នាយកមជ្ឈមណ្ឌលជាតិផ្ដល់ឈាមដដែលនេះ បានឱ្យដឹងទៀតថា ការបរិច្ចាគឈាម មិនមានផលប៉ះពាល់ដល់សុខភាពនោះទេ ផ្ទុយទៅវិញការបរិច្ចាគឈាមបានទៀងទាត់ នឹងធ្វើឱ្យយើងមានសុខភាពល្អថែមទៀតផង ដោយក្នុងនោះបុរសអាចបរិច្ចាគឈាមរាល់៣ខែម្តង និងស្រ្តីអាចបរិច្ចាគឈាមបានរាល់៤ខែម្តង។
លោក សុខ ប៉ូ បានបញ្ជាក់ថា គ្រាប់ឈាមក្រហម នឹងស្លាប់ទៅវិញក្នុងរយៈពេល១២០ថ្ងៃ (៣ខែ) ហេតុនេះលោកបានទទូចសុំឱ្យប្រជាពលរដ្ឋកម្ពជា មកបរិច្ចាគឈាមឱ្យបានទៀតទាត់ដើម្បីសុខភាពផង និងជួយសង្រ្គោះជីវិតអ្នក ដែលត្រូវការឈាមជាចាំបាច់ផង ដោយក្នុង១ថ្ងៃៗ ត្រូវការឈាមចន្លោះពី៣០០ទៅ៤០០ប្លោក ចំណែកតួលេខការប្រើប្រាស់ឈាមនៅទូទាំងប្រទេសកម្ពុជា កាលពីឆ្នាំ២០២៤ គឺមានចំនួន១៧៩៣៣២ប្លោក ក្នុងនោះរាជធានភ្នំពេញ ត្រូវការឈាមច្រើនជាងគេ ចូល៧៥ភាគរយ៕
