កីឡាករកម្ពុជា ពុធ សំបូរ និងអ្នកប្រដាល់ចាស់វស្សារបស់ថៃ Wanchaloem Chanajan នឹងប្រកួតដណ្តើមខ្សែក្រវាត់ WBC នៅលើទឹកដីអូស្រ្តាលី នាថ្ងៃសៅរ៍នេះ។ រូបថត សហការី
ការប្រកួតដណ្តើមខ្សែក្រវាត់ពិភពលោក WBC រវាងកីឡាករកម្ពុជា ពុធ សំបូរ និងអ្នកប្រដាល់ចាស់វស្សារបស់ថៃ វ៉ាន់ឆាលើម (Wanchaloem Chanajan) នឹងធ្វើនៅទីក្រុងស៊ីដនី ប្រទេសអូស្រ្តាលី នាល្ងាចថ្ងៃទី២២ ខែកុម្ភៈនេះ (ត្រូវនឹងម៉ោង៣រសៀលនៅកម្ពុជា) ហើយកីឡាការិនីគុនចម្រុះ សំ ថារ័ត្ន ក៏ត្រូវប្រកួតមិត្តភាពអន្តរជាតិជាមួយកីឡាការិនីម្ចាស់ផ្ទះ ក្នុងថ្ងៃជាមួយគ្នានោះផងដែរ។
លោក ស្រ៊ឺ ស្រេង ហៅ សំណព្វ ប្រធាន ISKA Kun Khmer និងជាប្រធានប្រតិភូកីឡាប្រដាល់គុនខ្មែរ ចេញទៅប្រកួតនៅប្រទេសអូស្រ្តាលីលើកនេះ បានដាក់ក្តីសង្ឃឹមខ្ពស់ទៅលើ ពុធ សំបូរ ថានឹងអាចដណ្តើមបានខ្សែក្រវាត់ពិភពលោក WBC នេះត្រឡប់មកកម្ពុជាវិញ បន្ទាប់ពីលោកបានជួបការខកចិត្ត ចំពោះការដឹកនាំកីឡាករ បឺត សង្ឃឹម ទៅប្រកួតដណ្តើមខ្សែក្រវាត់ WBCនេះ ជាលើកដំបូង កាលពីឆ្នាំ២០២៤។
លោក សំណព្វ បានចាត់ទុកការចាញ់របស់ បឺត សង្ឃឹម ក្នុងការប្រកួតដណ្តើមខ្សែក្រវាត់ WBC ទម្ងន់៥៧គីឡូក្រាម នៅប្រទេសអូស្រ្តាលី កាលពីថ្ងៃទី១៧ ខែកុម្ភៈ ឆ្នាំ២០២៤នោះ វាជាករណីស៊យ និងភ្លាត់ស្នៀត បណ្តាលឱ្យកីឡាករថៃ យោធិន (Yothin FA Group) វាយបែកធំ ហើយត្រូវបានគ្រូពេទ្យបញ្ឈប់នៅទឹកទី១ទាំងមិនអស់ចិត្ត ប៉ុន្តែលោកមិនជឿថា ហេតុការណ៍នេះ នឹងកើតមានចំពោះ ពុធ សំបូរ ទៀតនោះទេ។
លោកសំណព្វ បញ្ជាក់ថា៖ «ថ្ងៃដែល បឺត សង្ឃឹម ប្រកួតជាមួយ យោធិន ខ្ញុំសង្ឃឹមលើគាត់១០០ភាគរយ ប៉ុន្តែដោយសារគាត់ភ្លាត់ស្នៀតបណ្តាលឱ្យបែកធំ ត្រូវបានគេបញ្ឈប់ ចំណែកការដឹកនាំ ពុធ សំបូរ ទៅប្រកួតលើកនេះ ខ្ញុំមានសង្ឃឹមដូចគ្នា ព្រោះខ្ញុំក៏បានសិក្សាមើលពីការប្រកួតរបស់កីឡាករ វ៉ាន់ឆាលើម ដែរគឺពេលនេះគាត់មានវ័យរាងច្រើនដែរហើយ»។
គួររំឭកថា Wanchaloem Chanajan ធ្លាប់ជាកីឡាករជើងខ្លាំងមួយរូប នៅសង្វៀនប៉ុស្តិ៍លេខ៧របស់ថៃ ប៉ុន្តែពេលនេះ គាត់បានរស់នៅប្រទេសអូស្រ្តាលី ដោយបង្ហាត់សិស្សផង និងឡើងប្រកួតខ្លួនឯងផង ខណៈការប្រកួត៣លើកចុងក្រោយ នៅលើទឹកដីប្រទេសអូស្រ្តាលី កន្លងមកនេះ គេបានឈ្នះទាំង៣។
ដោយឡែក ការដណ្តើមខ្សែក្រវាត់ WBC ជាមួយ ពុធ សំបូរ នៅថ្ងៃសៅរ៍នេះ Wanchaloem បានដាក់គោលដៅដណ្តើមខ្សែក្រវាត់នេះឱ្យបាន ដើម្បីលើកប្រជាប្រិយភាពកីឡា Muaythai របស់ថៃ ខណៈស្ថានភាពការត្រៀមខ្លួនរបស់កីឡាករចាស់វស្សារបស់ថៃម្នាក់នេះ ត្រូវបានគេដឹងថា មានភាពល្អប្រសើរជាង ពុធ សំបូរ ដោយសាររូបគេរស់នៅប្រទេសអូស្រ្តាលីស្រាប់។
ជុំវិញបញ្ហានេះ លោក សំណព្វ បានទទួលស្គាល់ថា ពុធ សំបូរ អាចចាញ់តែមកីឡាករ Wanchaloem នៅលើចំណុចនេះបន្តិចមែន ហេតុនេះហើយទើបក្រុមការងាររបស់លោក និងម្ចាស់ឧបត្ថម្ភ បានសម្រេចទៅស្នាក់នៅប្រទេសអូស្រ្តាលីឱ្យបានច្រើនថ្ងៃ មុនការប្រកួតមកដល់ គឺចេញទៅតាំងនៅថ្ងៃទី១៧ និងប្រកួតនៅថ្ងៃទី២២ ខែកុម្ភៈ។
លោកបញ្ជាក់ថា៖ «បើយើងចង់សន្សំសំច័យលុយ យើងមិនចាំបាច់ទៅច្រើនថ្ងៃបែបហ្នឹងទេ ប៉ុន្តែជាក់ស្តែងយើងចង់ឈ្នះ ទើបយើងទៅនៅឱ្យយូរ ហើយលើកនេះ យើងអត់ស្នាក់នៅសណ្ឋាគារទេ គឺយើងបានជួលផ្ទះមួយ សម្រាប់ស្នាក់នៅ និងធ្វើម្ហូបអាហារដោយខ្លួនឯង ដើម្បីងាយស្រួលដល់កីឡាករ កីឡាការិនីយើង សម្រាប់ត្រៀមការប្រកួតនេះ»។
ចំណែកលោកគ្រូ ម៉ាក សុខន ជាគ្រូបង្វឹក ក៏មានទំនុកចិត្តខ្ពស់លោក ពុធ សំបូរ ដោយលោកបាននិយាយថា៖ «មុននឹងបញ្ជូន ពុទ្ធ សំបូរ ទៅប្រកួតដណ្តើមខ្សែក្រវាត់នេះ ខាងប្រតិភូដឹកនាំរបស់យើង គាត់បានមើលឃើញពីក្រឡាឈ្នះដែរ ហើយក្នុងនាមខ្ញុំជាគ្រូបង្វឹកក៏មានសង្ឃឹម៧០ភាគរយថា ពុទ្ធ សំបូរ នឹងអាចនាំយកខ្សែក្រវាត់មកជូនជាតិ និងគុនខ្មែររបស់យើង»។
ជាមួយគ្នានេះទាំងកីឡាការិនី សំ ថារ័ត្ន ដែលត្រូវប្រកួតជាមួយកីឡាការិនីម្ចាស់ផ្ទះអូស្រ្តាលី Jane Koo និងកីឡាករ ពុធ សំបូរ សុទ្ធតែបានបង្ហាញការតាំងចិត្ត ខំប្រឹងប្រែងដណ្តើមយកជ័យជម្នះត្រឡប់មកវិញ។
សំ ថារ័ត្ន បាននិយាយ ក្នុងសន្និសីទកាសែត កាលពីថ្ងៃទី១៣ ខែកុម្ភៈថា៖ «ពួកខ្ញុំបានខំប្រឹងអភិវឌ្ឍខ្លួនហើយ ហើយក្រោមការលើកទឹកចិត្ត និងផ្តល់អនុសាសន៍បន្ថែមពីថ្នាក់ដឹកនាំ បានជំរុញទឹកចិត្តពួកខ្ញុំកាន់តែខ្លាំង ព្រោះការទទួលបានឱកាសចេញទៅប្រកួតនៅក្រៅប្រទេសបែបនេះ មិនមែនចេះតែមាននោះទេ អ៊ីចឹងខ្ញុំ និងបង សំបូរ ព្យាយាមចាប់យកឱកាសហ្នឹង និងខំប្រឹងធ្វើឱ្យបានល្អ ដើម្បីតំណាងឱ្យប្រទេសជាតិ និងគុនខ្មែររបស់យើង»៕
