រដ្ឋមន្ត្រីក្រសួងទេសចរណ៍ លោក ហួត ហាក់ ជួបជាមួយក្រុុមផ្ការីកគ្រប់រដូវរបស់លោក ពាក់មី កាលពីថ្ងៃទី២០ ខែកុម្ភៈ។ ក្រសួងទេសចរណ៍
ក្រុមបាល់ទាត់ «ផ្ការីកគ្រប់រដូវ» ដឹកនាំដោយតារាកំប្លែង ចែម ចាន់រ៉ា ហៅ ពាក់មី បានជួបជាមួយរដ្ឋមន្ត្រីក្រសួងទេសចរណ៍លោក ហួត ហាក់ បង្ហាញពីផែនការបង្កើតកម្មវិធីទេសចរណ៍ផ្សេងៗក្នុងគោលដៅផ្សព្វផ្សាយសក្ដានុពលទេសចរណ៍កម្ពុជា ដែលជាអ្វីលោក ហួត ហាក់ គាំទ្រ។
ក្នុងជំនួបនៅថ្ងៃទី២០ ខែកុម្ភៈកន្លងទៅ លោក ហួត ហាក់ និងក្រុមរបស់លោក ចេម ចាន់រ៉ា បានពិភាក្សាអំពីគម្រោង និងផែនការរបស់ក្រុម «ផ្ការីកគ្រប់រដូវ» ក្នុងការរៀបចំព្រឹត្តិការណ៍ធំៗនៅកម្ពុជា ដើម្បីលើកស្ទួយ ជំរុញ និងផ្សព្វផ្សាយនូវសក្តានុពលទេសចរណ៍ កសិទេសចរណ៍ និងផលិតផលកម្ពុជាទៅកាន់ភ្ញៀវទេសចរជាតិ និងអន្តរជាតិ។
ក្នុងជំនួបនោះ លោក ចេម ចាន់រ៉ា បានស្នើសុំការសហការ និងគាំទ្រពីក្រសួងទេសចរណ៍ដល់គម្រោង និងផែនការរបស់លោកដែលធ្វើឡើងដើម្បីកម្ពុជា និងទេសចរណ៍កម្ពុជា។ នេះបើតាមសេចក្ដីប្រកាសព័ត៌មានរបស់ក្រសួងទេសចរណ៍។
ផ្ការីកគ្រប់រដូវ គឺជាក្រុមបាល់ទាត់មិនអាជីព ប៉ុន្តែ ជាក្រុមល្បីដោយសារតែក្រុមនេះមានកម្មវិធីផ្សេងដើម្បីទាក់ទាញយុវជន។ ក្រុមនេះមានសមាជិកចំនួន ៤០នាក់។ លោក ហួត ហាក់ មើលឃើញថា ក្រុមនេះអាចជួយផ្សព្វផ្សាយវិស័យទេសចរណ៍របស់កម្ពុជា។
លោក ពាក់មី បង្ហាញពីការចងកណ្ដាប់ដល់អ្នកចូលរួមកម្មវិធីស្នាមញញឹមភូមិខ្ញុំ នៅខេត្តសៀមរាប កាលពីខែធ្នូ ឆ្នាំ២០២៤។ Bakong My Village
លោក ហួត ហាក់ ថ្លែងថា៖ «គាត់ល្អណាស់ចង់ចូលរួមចំណែកបន្ថែមដើម្បីលើកកម្ពស់វិស័យទេសចរណ៍កម្ពុជា។ ក្នុងនាមថ្នាក់ដឹកនាំក្រសួងទេសចរណ៍ ខ្ញុំសូមយកឱកាសនេះថ្លែងអំណរគុណដល់លោក ពាក់ មី និងក្រុមការងារដែលបានយកចិត្តទុកដាក់ជួយរួមចំណែក និង ជាតម្លៃបន្ថែមសម្រាប់វិស័យទេសចរណ៍របស់យើង»។
លោក ចេម ចាន់រ៉ា បានថ្លែងថា លោកបានចូលរួមចំណែកក្នុងការផ្សព្វផ្សាយពីតំបន់ទេសចរណ៍ផ្សេងៗនៅកម្ពុជា ក្នុងនាមជាខ្មែរម្នាក់។
លោកថ្លែងថា៖ «ឥឡូវនេះ ការលើកទឹកចិត្តពីក្រសួងទេសចរណ៍ ធ្វើឲ្យក្រុមផ្ការីកគ្រប់រដូវរបស់ខ្ញុំ បន្តផ្សព្វផ្សាយទេសចរណ៍បន្តទៀត។ ខាងក្រសួងប្រឹងប្រែងហើយ យើងជាប្រជាពលរដ្ឋក៏ជួយផ្សព្វផ្សាយបន្ថែមទៀត។ ដូច្នេះ ក្រុមខ្ញុំនឹងចូលរួមលើសមុនទៀតក្នុងការផ្សព្វផ្សាយតំបន់ទេសចរណ៍ផ្សេងៗ រួមទាំងទេសចរណ៍ធម្មជាតិដើម្បីបងប្អូនខ្មែរ និងភ្ញៀវបរទេសបានឃើញថា ប្រទេសយើងមានកន្លែងកម្សាន្តច្រើនណាស់ មិនមែនតែតំបន់អង្គរ ឬ កំពង់សោមទេ»។
លោក ពាក់ មី ក៏បានអំពាវនាវដល់ប្រជាពលរដ្ឋកម្ពុជាចូលរួមផ្សព្វផ្សាយសក្ដានុពល និងតំបន់ទេសចរណ៍របស់កម្ពុជា។
កាលពីខែធ្នូ ឆ្នាំ២០២៤ លោក ក៏បានរៀបចំកម្មវិធី «ស្នាមញញឹមភូមិខ្ញុំ» នៅខេត្តសៀមរាប ដោយមានការច្រូតស្រូវប្រើឧបករណ៍បូរាណ និង កម្មវិធីវប្បធម៌មួយចំនួនទៀត ដែលទទួលការចែករំលែកបន្តពីលោកនាយករដ្ឋមន្ត្រី ហ៊ុន ម៉ាណែត។
លោក ឈត ប៊ុនថង អ្នកស្រាវជ្រាវផ្នែកវប្បធម៌ អប់រំ និងទេសចរណ៍ បានប្រាប់ភ្នំពេញប៉ុស្តិ៍កាលពីកន្លងទៅថា ការចូលរួមរបស់អ្នកមានឥទ្ធិពលក្នុងសង្គមក្នុងការផ្សព្វផ្សាយពីតំបន់ទេសចរណ៍ផ្ដល់ប្រយោជន៍ផ្ទាល់ខ្លួនផង និងផ្ដល់ប្រយោជន៍ដល់សង្គម និងជាតិផង៕
