សកម្មភាពហ្វឹកហាត់របស់ក្រុមជម្រើសជាតិកម្ពុជា ត្រៀមការប្រកួតពានរង្វាន់ ASEAN Championship Mitsubishi Electric Cup 2024 កន្លងមក។ រូបថត FFC
កីឡាករបរទេសទទួលបានសញ្ជាតិខ្មែរ៥នាក់ក្នុងចំណោម៨នាក់ ត្រូវបានកោះហៅឱ្យចូលជំរំហ្វឹកហាត់ជាមួយក្រុមជម្រើសជាតិកម្ពុជាជាថ្មី ជាមួយកីឡាករក្នុងស្រុក១៨នាក់ទៀត ដើម្បីត្រៀមការប្រកួតមិត្តភាពអន្តរជាតិចំនួន២ នៅក្នុងខែមីនានេះ។
ការប្រកួតអន្តរជាតិទាំងពីរ នឹងធ្វើជាមួយក្រុមជម្រើសជាតិវៀតណាម នៅកីឡដ្ឋាន Go Dau Stadium នាថ្ងៃទី១៩ ខែមីនា និងការប្រកួតជាមួយក្រុមជម្រើសជាតិអារូបា (Aruba) មកពីទ្វីបអាមេរិកខាងត្បូង នៅពហុកីឡដ្ឋានជាតិអូឡាំពិក នាថ្ងៃទី២៥ ខែមីនា។
តាមបញ្ជីរាយនាមកីឡាករទាំង២៣នាក់ ចេញដោយសហព័ន្ធកីឡាបាល់ទាត់កម្ពុជា (FFC) នៅព្រឹកថ្ងៃអង្គារនេះ បានបញ្ជាក់ថា កីឡាករបរទេស ទទួលបានសញ្ជាតិខ្មែរទាំង៥នាក់ រួមមានខ្សែប្រយុទ្ធកូឡុំប៊ី Nieto Rondon ខ្សែការពាររបស់ជប៉ុន Takaki Ose និង Yudai Ogawa ខ្សែប្រយុទ្ធកូតឌីវ័រ Coulibaly Abdel Kader និងខ្សែការពារអាហ្រិកខាងត្បូង កាន់ ម៉ូ សុទ្ធតែត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា ជាថ្មី។
ការកោះហៅនេះ ដោយសារអ្នកទាំង៥នាក់ សុទ្ធតែបានបង្ហាញគុណភាពលេងបានល្អ ក្នុងពានរង្វាន់ ASEAN Championship Mitsubishi Electric Cup 2024 ប៉ុន្តែកីឡាករជប៉ុនមានសញ្ជាតិខ្មែរ Hikaru Mizuno ដែលបានចូលលេងក្នុងពាននោះដែរ រួមទាំងកីឡាករបរទេសមានសញ្ជាតិខ្មែរ២នាក់ទៀត គឺខ្សែប្រយុទ្ធ Privat Mbarga ដែលកំពុងលេងនៅលីគកំពូលឥណ្ឌូនេស៊ី និងខ្សែការពារ Zogbe Vireak ដែលលេងនៅលីគទី២របស់ថៃ មិនត្រូវបានកោះហៅឱ្យចូលជម្រើសជាតិ នោះទេ។
ចំណែកសមាសភាពកីឡាករក្នុងស្រុកចំនួន១៨នាក់ទៀត គឺភាគច្រើនជាកីឡាករ ដែលធ្លាប់ជាប់ជម្រើសជាតិ ក្នុងការប្រកួតពានរង្វាន់ ASEAN Championship Mitsubishi Electric Cup 2024 គឺលើកលែងតែអ្នកចាំទី ហ៊ុល គឹមហ៊ុយ រួមទាំងកីឡាករ មិន រតនៈ , សារ ទី, អ៊ន ចាន់ប៉ូលីន, អ៊ិន សូដេវីត, យ៉ើ ម៉ូស្លីម, សឿត បារាំង, ឡេង ណូរ៉ា និង គឹម សុខយុទ្ធ ដែលគ្មានឈ្មោះលើកនេះ ហើយជំនួសវិញដោយអ្នកចាំទី កែវ សុខសិលា កីឡាករ អ៊ុក សុវណ្ណ, ផាត សុខា, ជូ ស៊ីនទី, ស៊ិន សុវណ្ណមករា និងកីឡាករវ័យក្មេង បុង សាំយូអ៊េល។
តាមសមាសភាពកីឡាករទាំង២៣នាក់ ដែលត្រូវបានកោះហៅឱ្យចូលជំរំហ្វឹកហាត់លើកនេះ ត្រូវបានគេមើលឃើញថា ក្រុមជម្រើសជាតិកម្ពុជា មានភាពរឹងមាំទាំងតំបន់ការពារ បម្រើ និងប្រយុទ្ធ ហើយនេះជាពេលវេលាដ៏ល្អមួយ ដែលលោក Koji Gyotoku និងក្រុមការងារបច្ចេកទេសរបស់លោក ត្រូវបញ្ចេញស្នាដៃជាថ្មី ក្នុងការដឹកនាំក្រុមជម្រើសជាតិកម្ពុជា បន្ទាប់ពីលោក ទើបត្រូវបាន FFC តែងតាំងជាគ្រូបង្គោលក្រុមគោព្រៃកម្ពុជា ជាផ្លូវការ ជំនួសតួនាទីជាគ្រូបង្វឹកជាបណ្តុះអាសន្ន កាលពីថ្ងៃចន្ទ។
ចំពោះការសម្រេចជ្រើសរើសតាំង លោក Koji Gyotoku ឱ្យក្លាយជាគ្រូបង្គោលផ្លូវការរបស់ក្រុមជម្រើសជាតិកម្ពុជា ជាមួយកិច្ចសន្យារយៈពេល១ឆ្នាំនេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានឱ្យដឹងថា ដោយសារគណៈកម្មាធិការប្រតិបត្តិរបស់សហព័ន្ធ មានការជឿជាក់ទៅលើសមត្ថភាពរបស់លោក Koji ថានឹងអាចជួយឱ្យក្រុមជម្រើសជាតិកម្ពុជា ទទួលបានបទពិសោធន៍ និងបច្ចេកទេសថ្មីៗបន្ថែម ក្នុងការអភិវឌ្ឍក្រុមនេះឱ្យកាន់តែប្រសើរឡើង។
លោក កែវ សារ៉េត បានបញ្ជាក់ថា៖ «យើងបានមើលឃើញពីស្នាដៃរបស់គាត់ ក្នុងការបង្ហាត់ និងដឹកនាំការប្រកួតកន្លងមក គឺគាត់ប្រឹងប្រែង និងព្យាយាម ធ្វើឱ្យយើងមានការជឿជាក់ទៅលើគាត់ថា នឹងអាចអភិវឌ្ឍគុណភាពលេងរបស់ក្រុមជម្រើសជាតិកម្ពុជា ឱ្យមានការកើនឡើង ព្រោះសមត្ថភាព និងបទពិសោធន៍របស់លោកគ្រូ Koji គឺស័ក្តិសម សម្រាប់ការដឹកនាំក្រុមកម្ពុជា ក្នុងបរិបទនេះ»៕
