លោក ស្រី ចាន់ថន បានបង្ហាញរូបរាងខ្សែក្រវាត់ WBC Kun Khmer ដែលទើបត្រូវបានបង្កើតឡើងជាប្រវត្តិសាស្រ្តលើកដំបូង សម្រាប់ប្រទេសកម្ពុជា។ រូបថត ស្រី ចាន់ថន
ប្រធានក្លិបគុនខ្មែរអន្តរជាតិ (KKIF) លោក ស្រី ចាន់ថន បានទទួលជោគជ័យយ៉ាងត្រចះត្រចង់ក្នុងការដាក់ពាក្យ «គុនខ្មែរ ឬ Kun Khmer» ព្រមទាំងទង់ជាតិកម្ពុជា និងរូបប្រាសាទអង្គរវត្ត ជាផ្លូវការទៅក្នុងខ្សែក្រវ៉ាត់របស់ស្ថាប័នប្រដាល់ពិភពលោក World Boxing Council (WBC)។
ខ្សែក្រវាត់ WBC Kun Khmer នេះ នឹងត្រូវនាំយកមកដល់ប្រទេសកម្ពុជា នៅរសៀលម៉ោង៤ ថ្ងៃចន្ទនេះ ដោយមានការដង្ហែពីព្រលានយន្តហោះអន្តរជាតិភ្នំពេញ ទៅកាន់ក្លិប KKIF នៅម្តុំជ្រោយចង្វារផងដែរ ហើយនេះជាមោទនភាពដ៏ធំធេងសម្រាប់គុនខ្មែរ ព្រោះ WBC ជាប្រភេទខ្សែក្រវ៉ាត់កម្រិតពិភពលោកដ៏ល្បីល្បាញ ហើយកីឡាករប្រដាល់លំដាប់ពិភពលោកជាច្រើន បានសាងកេរ្តិ៍ឈ្មោះល្បីល្បាញ តាមរយៈការឈ្នះបានខ្សែក្រវាត់ WBC នេះ។
ដោយឡែក សម្រាប់វិស័យកីឡាប្រដាល់គុនខ្មែរ ទើបតែបានទទួលស្គាល់ផ្លូវការពីស្ថាប័ន WBC ហើយនេះជាមូលហេតុចម្បងដែលកម្ពុជាតាមរយៈលោក ស្រី ចាន់ថន អាចបង្កើតខ្សែក្រវាត់ WBC Kun Khmer ជាប្រវត្តិសាស្រ្តលើកដំបូង ដើម្បីបើកផ្លូវឱ្យកម្ពុជា មានសិទ្ធិរៀបចំការប្រកួតដណ្តើមខ្សែក្រវាត់នេះជាផ្លូវការ ក្នុងការផ្សព្វផ្សាយ «គុនខ្មែរ» ទៅកាន់ពិភពលោកដ៏ពិតប្រាកដ។
លោក ស្រី ចាន់ថន ដែលជាអនុប្រធានសហព័ន្ធគុនខ្មែរអន្តរជាតិផងនោះ បានបង្ហាញក្តីរំភើបខ្លាំង ហើយលោកបានអះអាងថា វាជារឿងដែលមិននឹកស្មានដល់ ដែលស្ថាប័ន WBC ទទួលស្គាល់ គុនខ្មែរ ហើយថែមអនុញ្ញាតឱ្យកម្ពុជា បង្កើតខ្សែក្រវាត់ WBC Kun Khmer ជាលើកដំបូងទៀត។
លោក ស្រី ចាន់ថន បាននិយាយតាមរយៈវីដេអូខ្លីចេញពីប្រទេសហ្វីលីពីន កាលពីថ្ងៃអាទិត្យថា៖ «ខ្ញុំចង់ស្រក់ទឹកភ្នែក ព្រោះយើងមិនគិតស្មានដល់ថា យើងអាចធ្វើវាបាន ហើយនេះជាក្តីសង្ឃឹមរបស់បងប្អូន ជាតិសាសន៍ខ្មែរទាំងមូល ដែលចង់បានពាក្យគុនខ្មែរ នៅលើខ្សែក្រវាត់ WBC ព្រមទាំងមានទង់ជាតិកម្ពុជា ជាពិសេសគឺរូបប្រាសាទអង្គរវត្ត ដែលជាអត្តសញ្ញាណជាតិរបស់ខ្មែរយើង»។
ជាមួយគ្នានេះលោក ស្រី ចាន់ថន បានឱ្យដឹងថា ខ្សែក្រវាត់ WBC Kun Khmer នេះ ជាការឌីហ្សាញដោយផ្ទាល់ពីសំណាក់ប្រធានស្ថាប័ន WBC លោក Mauricio Sulaiman ហើយលោកក៏ចេញវីដេអូខ្លីមួយ បញ្ជាក់ពីការចុះហត្ថលេខាទទួលស្គាល់ជាផ្លូវការ ក្នុងការបង្កើតឱ្យមានខ្សែក្រវាត់ WBC Kun Khmer ជាលើកដំបូងនេះ សម្រាប់ប្រទេសកម្ពុជាផងដែរ។
បន្ថែមលើភាពអស្ចារ្យទាំងនេះ គឺនៅរង្វង់ជុំវិញខ្សែក្រវាត់ WBC Kun Khmer ក៏ដូចជាខ្សែរបស់វា គឺមានពណ៌ខៀវ និងក្រហមតំណាងឱ្យទង់ជាតិកម្ពុជា។ លោក ចាន់ថន បញ្ជាក់ថា៖«ពណ៌នេះតំណាងឱ្យប្រទេសកម្ពុជាយើង ព្រោះនេះជាខ្សែក្រវាត់គំរូទី១ តំណាងឱ្យប្រទេសកម្ពុជាតែម្តង»។
ប្រធានក្លិប KKIF លោក ស្រី ចាន់ថន បានបន្ថែមថា៖ «ចំណែកខ្សែក្រវាត់ក្រោយៗទៀត យើងអាចប្រើពណ៌ផ្សេងពីនេះ ហើយនេះក៏ជាប្រវត្តិសាស្រ្ត ដែលខ្សែក្រវាត់ WBC មានពាក្យគុនខ្មែរ ហើយយើងនឹងរៀបចំឱ្យមានការប្រកួតដណ្តើមខ្សែក្រវាត់នេះ នៅលើទឹកដីខេត្តព្រះសីហនុ នាពិធីបុណ្យចូលឆ្នាំប្រពៃណីជាតិខ្មែរ ខាងមុខនេះ»។
បើតាមលោក ចាន់ថន បានឱ្យដឹងថា ខ្សែក្រវាត់ WBC Kun Khmer ដោយមានទាំងពាក្យ គុនខ្មែរ ទង់ជាតិកម្ពុជា និងរូបប្រាសាទអង្គរវត្តនេះ នឹងត្រូវនាំយកមកពីប្រទេសហ្វីលីពីន មកដល់ព្រលានយន្តហោះអន្តរជាតិភ្នំពេញ នៅរសៀលម៉ោង៤ថ្ងៃចន្ទនេះ។ លោកបញ្ជាក់ថា៖ «ខ្ញុំបាទនឹងទៅដល់ជាតិមាតុភូមិ នាំយកខ្សែក្រវាត់ WBC KUN KHMER ជូនបងប្អូនជាទីគោរពស្រឡាញ់ ហើយក៏សូមអរគុណដល់ប្អូនប្រុស ស្រី រាជបុត្រ ដែលបានជួយសម្របសម្រួលរហូតទទួលបានជោគជ័យ»៕
