ប្រតិភូកីឡាប្រដាល់គុនខ្មែរ ដឹកនាំដោយលោក ខូវ ឆាយ បានទទួលវិញ្ញាបនបត្រថ្លែងអំណរគុណពីក្រុមក្រុមប្រឹក្សាក្រុងឡុងប៊ិច ដែលបាននាំយក គុនខ្មែរ ទៅផ្សព្វផ្សាយ និងប្រកួតដណ្តើមខ្សែក្រវាត់ នៅទីនោះ ជាលើកដំបូង។ រូបថត ខូវ ឆាយ
ក្រុមប្រឹក្សាក្រុងឡុងប៊ិច របស់លោក Rex Richardson និងប្រធានក្រុមប្រឹក្សាស្រុកទី៦នៃទីក្រុងឡុងប៊ិច លោកស្រី Suely Saro បានបង្ហាញការគាំទ្រដល់ «គុនខ្មែរ» តាមរយៈការប្រគល់ជូននូវវិញ្ញាបនបត្រថ្លែងអំណរគុណ ដល់សហព័ន្ធកីឡាប្រដាល់គុនខ្មែរ ដែលបាននាំយកកីឡាករ កីឡាការិនីរបស់ខ្លួន ទៅផ្សព្វផ្សាយ និងប្រកួតដណ្តើមខ្សែក្រវាត់ នៅទីនោះ។
ការប្រគល់វិញ្ញាបនបត្រថ្លែងអំណរគុណនេះ ត្រូវបានធ្វើឡើង កាលពីថ្ងៃពុធ គឺនៅពេលលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានដឹកនាំប្រតិភូគ្រូបង្វឹក និងកីឡាករ កីឡាការិនីគ្រុឌគុនខ្មែរ ទៅជួបសំណេះសំណាលជាមួយក្រុមប្រឹក្សាក្រុងឡុងប៊ិច រដ្ឋកាលីហ្វរញ៉ា សហរដ្ឋអាមេរិក។
បន្ទាប់ពីការជួបសំណេះសំណាលនោះ លោកស្រី Suely Saro ប្រធានក្រុមប្រឹក្សាស្រុកទី៦នៃទីក្រុងឡុងប៊ិច បានបង្ហោះសារបែបនេះថា៖ «ខ្ញុំ និងការិយាល័យអភិបាលក្រុង លោក Rex Richardson មានកិត្តិយសក្នុងការស្វាគមន៍ និងទទួលស្គាល់សហព័ន្ធកីឡាប្រដាល់គុនខ្មែរ មកពីប្រទេសកម្ពុជា ដោយបានប្រគល់វិញ្ញាបនបត្រជូនលោកខូវ ឆាយ ជាប្រធានសហព័ន្ធ លើកិច្ចខិតខំប្រឹងប្រែងជាប្រវត្តិសាស្ត្រ ក្នុងការលើកស្ទួយសិល្បៈគុនខ្មែរបុរាណ លើឆាកអន្តរជាតិ តាមរយៈការប្រកួតដណ្តើមខ្សែក្រវាត់លើកដំបូង មិនធ្លាប់មាននៅទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក»។
ចំណែកលោក ខូវ ឆាយ បានចាត់ទុកការបានទទួលវិញ្ញាបនបត្រថ្លែងអំណរគុណ ពីក្រុមប្រឹក្សាក្រុងឡុងប៊ិចនេះ ថា ជាជំហាន ជំហានដ៏សំខាន់មួយ ក្នុងការផ្សព្វផ្សាយក្បាច់គុនបុរាណ នៅលើទឹកដីមហាអំណាចដ៏ធំនេះ។
លោក ខូវ ឆាយ បានបញ្ជាក់តាមការបង្ហោះសាររបស់ខ្លួន នៅថ្ងៃព្រហស្បតិ៍នេះថា៖ «វាជាកិត្តិយសណាស់ សហព័ន្ធកីឡាប្រដាល់គុនខ្មែរ បានទទួលវិញ្ញាបនបត្រថ្លែងអំណរគុណ ក្នុងការចូលរួមផ្សព្វផ្សាយគុនខ្មែរ នៅទីក្រុងឡុងប៊ិច និងប្រកួតកីឡាប្រដាល់គុនខ្មែរមិត្តភាពអន្តរជាតិ និងដណ្តើមខ្សែក្រវាត់នៅលើទឹកដីសហរដ្ឋអាមេរិក។ នេះជាជំហានដ៏សំខាន់មួយ ក្នុងការផ្សព្វផ្សាយក្បាច់គុនបុរាណរបស់យើង នៅលើទឹកដីដ៏ឆ្ងាយមួយនេះ»។
បន្ថែមលើកនេះ លោកស្រី Suely Saro បានឱ្យដឹងទៀតថា ប្រតិភូកីឡាគុនខ្មែរ បានធ្វើដំណើរមកបំពេញបេសកកម្មរបស់ខ្លួន តាមការអញ្ជើញរបស់លោក Richer San ប្រធានទីក្រុងភ្ជាប់សម្ព័ន្ធភាព (Sister Cities) នៅទីក្រុងឡុងប៊ិច ដើម្បីចូលរួមក្នុងព្រឹត្តិការណ៍សង្ក្រាន្តក្រុងឡុងប៊ិច ឆ្នាំ២០២៥ និងពិធីបុណ្យដង្ហែក្បួន និងវប្បធម៌ក្រុងកម្ពុជា លើកទី១៧ ដើម្បីលើកកម្ពស់ទំនាក់ទំនងការទូតកីឡា និងការផ្លាស់ប្តូរវប្បធម៌រវាងសហរដ្ឋអាមេរិក និងកម្ពុជា។
លោកស្រីបានបញ្ជាក់ថា៖ «ខ្ញុំគាំទ្រយ៉ាងខ្លាំង ចំពោះ Sister Cities។ គោលដៅចម្បងរបស់ Sister Cities គឺដើម្បីលើកកម្ពស់សន្តិភាព និងការយល់ដឹងតាមរយៈអន្តរកម្មរវាងប្រជាជន ការផ្លាស់ប្តូរវប្បធម៌ និងកិច្ចសហប្រតិបត្តិការក្នុងវិស័យដូចជា សិល្បៈ អប់រំ កីឡា ធុរកិច្ច និងការអភិវឌ្ឍសហគមន៍»។
ជាមួយគ្នានេះ ការមកដល់នៃព្រឹត្តិការណ៍កីឡាអូឡាំពិកឆ្នាំ ២០២៨ ដែលនឹងធ្វើឡើងនៅទីក្រុង Los Angeles និង Long Beach ត្រូវបានលោកស្រី Suely Saro ចាត់ទុកថា វាជាពេលវេលាដ៏សមស្រប ក្នុងការលើកកម្ពស់កីឡាអន្តរជាតិដូចជា គុនខ្មែរ (ប្រដាល់សេរីកម្ពុជា) ជាពិសេសជាមួយប្រទេសកម្ពុជា ព្រោះ Long Beach មានប្រជាជនកម្ពុជាច្រើនជាងគេនៅសហរដ្ឋអាមេរិក។
លោកស្រី Suely Saro បានបញ្ជាក់ថា៖ «គុនខ្មែរជាសិល្បៈប្រដាល់ប្រពៃណីខ្មែរ ដែលអមដោយតន្ត្រីបុរាណផ្ទាល់ ដែលយើងបានទស្សនានៅសាលប្រជុំនៃសាលាក្រុង Long Beach ហើយ Long Beach ទន្ទឹងរង់ចាំបន្តគាំទ្រគុនខ្មែរ!»៕
