សន្និសីទកាសែតស្តីពីការប្រកួតគ្រុឌគុនខ្មែរអន្តរជាតិកម្ពុជា-USA កាលពីថ្ងៃទី១ ខែមេសា។ រូបថត ខូវ ឆាយ
ប្រតិភូកីឡាប្រដាល់គុនខ្មែរ ដែលមានទាំងកីឡាករ កីឡាការិនី គ្រូបង្វឹក ក្រុមភ្លេង និងក្រុមអ្នកបច្ចេកទេសផងនោះ បានធ្វើដំណើរចាកចេញពីមាតុប្រទេស ឆ្ពោះទៅកាន់ទឹកដីមហាអំណាចសហរដ្ឋអាមេរិក កាលពីព្រឹកថ្ងៃពុធនេះ ដើម្បីរៀបចំការប្រកួត និងប្រកួតដណ្តើមខ្សែក្រវាត់ចំនួន៤ប្រភេទទម្ងន់នៅទីនោះ ដែលនឹងធ្វើនៅទីក្រុងឡុងប៊ិច រដ្ឋកាលីហ្វញ៉ា នាល្ងាចម៉ោង៦ ថ្ងៃទី១២ ខែមេសា ត្រូវនឹងព្រឹកម៉ោង៨ ថ្ងៃទី១៣ ខែមេសា នៅកម្ពុជា។
លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ និងជាប្រធានប្រតិភូដឹកនាំក្រុមប្រដាល់គុនខ្មែរ បានចាត់ទុកបេសកកម្មលើកនេះ ជាការចេញទៅផ្សព្វផ្សាយ «គុនខ្មែរ» ក្នុងលក្ខណៈទ្រង់ទ្រាយធំ ជាប្រវត្តិសាស្រ្តលើកដំបូង នៅលើទឹកដីប្រទេសមហាអំណាច ដែលមានប្រជាជនចម្រុះជាតិសាសន៍រស់នៅ ហេតុនេះវាជារឿងចាំបាច់បំផុត ដែលគុនខ្មែរយើងត្រូវធ្វើ ដើម្បីឱ្យប្រជាជនចម្រុះជាតិសាសន៍ជាង៣រយលាននាក់ រស់នៅសហរដ្ឋអាមេរិក បានស្គាល់ពីវប្បធម៌ និងសិល្បៈក្បាច់គុនខ្មែរបុរាណ។
លោក ខូវ ឆាយ បានថ្លែងថា៖ «នេះជាលើកទី១ ក្នុងប្រវត្តិសាស្រ្តគុនខ្មែរយើង ដែលយើងបានដឹកនាំកីឡាករ កីឡាការិនីទៅប្រកួត និងផ្សព្វផ្សាយគុនខ្មែរ នៅលើទឹកដីសហរដ្ឋអាមេរិក ដែលជាប្រទេសមហាអំណាច មានប្រជាជនចម្រុះជាតិសាសន៍ អ៊ីចឹងនេះជាឱកាសដ៏ល្អ ក្នុងការបង្ហាញឱ្យពិភពលោកបានស្គាល់គុនខ្មែរកាន់តែច្រើន ស្របតាមទិសដៅរបស់សហព័ន្ធ ក៏ដូចជារាជរដ្ឋាភិបាល ក្នុងការផ្សព្វផ្សាយសិល្បៈវប្បធម៌ខ្មែរឱ្យបានកាន់តែទូលំទូលាយ ទូទាំងពិភពលោក»។
សហព័ន្ធកីឡាប្រដាល់គុនខ្មែរ បានសម្រិតសម្រាំងយកកីឡាករ កីឡាការិនី៤នាក់ ឱ្យចេញទៅប្រកួត និងផ្សព្វផ្សាយគុនខ្មែរ នៅលើទឹកដីសហរដ្ឋអាមេរិក លើកនេះ ក្នុងនោះមានកីឡាករ ធន់ រិទ្ធី, ពេជ្រ សម្បត្តិ, រឿង សោភ័ណ្ឌ និងកីឡាការិនី អេ យ៉ានុត ហើយនៅក្នុងសន្និសីទកាសែត នៅសង្វៀនបាយ័នស្ទឹងមានជ័យ កាលពីថ្ងៃទី១ ខែមេសា គឺអ្នកទាំងនេះ សុទ្ធតែបង្ហាញការតាំងចិត្តក្នុងការប្រកួតប្រជែងយកលទ្ធផលល្អត្រឡប់មកវិញ។
បើតាមការបញ្ជាក់របស់លោក ខូវ ឆាយ ក្នុងសន្និសីទកាសែតនោះ គឺកីឡាករ កីឡាការិនីរបស់កម្ពុជាទាំង៤នាក់នេះ នឹងត្រូវប្រកួតដណ្តើមខ្សែក្រវាត់ជាមួយកីឡាករ កីឡាការិនីអាមេរិកដូចគ្នា ដោយក្នុងនោះ ធន់ រិទ្ធី និង ពេជ្រ សម្បត្តិ ត្រូវប្រកួតដណ្តើមយកខ្សែក្រវាត់ WCK Kun Khmer ប្រចាំនៅសហរដ្ឋអាមេរិក ក្នុងលក្ខខណ្ឌប្រកួត៥ទឹកដូចគ្នា។
ចំណែកកីឡាករ រឿង សោភ័ណ្ឌ និងកីឡាការិនី អេ យ៉ានុត ត្រូវប្រកួតដណ្តើមខ្សែក្រវាត់ Cambodia-US Championship ដែលខ្សែក្រវាត់ទាំង២នេះ នាំយកពីកម្ពុជាទៅ និងត្រូវប្រកួត៣ទឹក ហើយតាមរយៈការប្រកួតនេះ លោក ខូវ ឆាយ យល់ថា កម្ពុជា នឹងទទួលបានផលចំណាយច្រើន ក្នុងការផ្សព្វផ្សាយគុនខ្មែរ ព្រោះព្រឹត្តិការណ៍នេះ កម្ពុជា ជាអ្នករៀបចំគ្រប់បែបយ៉ាង ក្រោមការឧបត្ថម្ភរបស់ភេសជ្ជៈគ្រុឌ។
លោក ឆាយ បានបញ្ជាក់ថា៖ «យើងចាប់ដៃជាមួយស្ថាប័ន WCK នៅសហរដ្ឋអាមេរិក ដើម្បីរៀបចំកម្មវិធីនេះ ប៉ុន្តែរាល់ការរៀបចំយើងប្រើគុនខ្មែរទាំងអស់ គឺឈ្មោះគុនខ្មែរ វ៉ៃតាមបទបញ្ជាគុនខ្មែរ ហើយការតុបតែង ការដាក់ផ្លាកយីហោជារបស់យើងទាំងអស់ គឺកម្មវិធីទាំងមូល សម្រាប់គុនខ្មែររបស់យើងតែម្តង»។លោកបន្ថែមថា៖ «អ៊ីចឹងរូបភាព និងការផ្សាយបន្តផ្ទាល់ពីការប្រកួតនេះ ចេញទៅកាន់ប្រទេសផ្សេងៗ ជារូបភាពគុនខ្មែររបស់យើង ដើម្បីឱ្យមានការទទួលយកគុនខ្មែរ ព្រោះគុនខ្មែរមានលទ្ធភាពទៅដល់គ្រប់ទិសទី»៕
