ក្លិបវិសាខា បានរៀបចំទីកន្លែងសម្រាប់ធ្វើការគោរពវិញ្ញាណក្ខន្ធរបស់ ទេស សម្បត្តិ នៅកីឡដ្ឋានព្រីនស៍។ រូបថត វិសាខា
ក្រុមបឹងកេត នឹងត្រូវបើកទ្វារពហុកីឡដ្ឋានជាតិអូឡាំពិក ដើម្បីប្រកួតជើងទី១ វគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន លើកទី១៨ ឆ្នាំ២០២៥ ជាមួយក្រុមការពារតំណែងជើងឯក ព្រះខ័នរាជស្វាយរៀង នៅយប់ម៉ោង៧ ថ្ងៃពុធនេះ ប៉ុន្តែក្រុមវិសាខា បានសុំលើកពេលការជួបក្រុមភ្នំពេញក្រោន ដើម្បីកាន់ទុក្ខការទទួលមរណភាពរបស់ខ្សែការពារ ទេស សម្បត្តិ។
សម្រាប់ការឡើងមកជួបគ្នាជាថ្មី នៅវគ្គពាក់កណ្តាលផ្តាច់ព្រ័ត្រនេះ វាជាពេលវេលាដ៏សំខាន់ ដែលក្រុមបឹងកេត ត្រូវសងសឹកក្រុមព្រះខ័នរាជស្វាយរៀង ចំពោះការបរាជ័យ នៅវគ្គពាក់កណ្តាលផ្តាច់ព្រ័ត្រនេះ កាលពីឆ្នាំ២០២៤ ដោយក្រុមស្វាយរៀង បានទម្លាក់ក្រុមបឹងកេត ជាមួយការយកឈ្នះទាំង២ជើង ៤-៣ គឺជើងទី១ បឹងកេត ចាញ់ ៣-១ ក្នុងទឹកដី តែជើងទី២ បានឈ្នះ ២-១ វិញ នៅក្រៅទឹកដី។
រំឭកទៅដល់ការប្រកួតនោះ លោក Conor Nestor ដែលទើបត្រូវបានតែងតាំងជាគ្រូបង្គោលក្រុមបឹងកេត កាលពីថ្ងៃទី៧ ខែតុលា ឆ្នាំ២០២៤ បានអះអាងថា លោកនឹងប្រឹងប្រែងរៀបចំក្រុមឱ្យបានល្អ ដោយមិនបង្កើតឱ្យមានចន្លោះប្រហោង ឬទីតាំងទូលាយ ធ្វើឱ្យក្រុមស្វាយរៀង អាចរកបានគ្រាប់បាល់ទៀតនោះទេ។
«យើងនឹងត្រៀមលក្ខណៈឱ្យបានរួចរាល់ សម្រាប់ការជួបក្រុមស្វាយរៀង ជាថ្មី»។ លោក Conor បានបញ្ជាក់បែបនេះ បន្ទាប់ពីក្រុមបឹងកេត បានទម្លាក់ក្រុម ISI ដង្កោសែនជ័យ នៅវគ្គ៨ក្រុមចុងក្រោយ ជាមួយការយកឈ្នះទាំង២ជើង ២-០ និង ១-០។
ជាមួយគ្នានេះ គ្រូបង្វឹកអៀរឡង់ លោក Conor បានជំរុញកូនក្រុមរបស់លោក ត្រូវផ្តោតយកចិត្តទុកដាក់ឱ្យបានខ្លាំង ដើម្បីឈានទៅទទួលបានជ័យជម្នះលើក្រុមស្វាយរៀង ព្រោះលោកចង់កែប្រែប្រវត្តិសាស្រ្ត ក្នុងការដឹកនាំក្រុមបឹងកេត ឱ្យឡើងរហូតដល់វគ្គផ្តាច់ព្រ័ត្រនៃការប្រកួតពានរង្វាន់សម្តេច ហ៊ុន សែន ឆ្នាំ២០២៥នេះ។
អតីតគ្រូបង្គោលក្រុមព្រះខ័នរាជស្វាយរៀង លោក Conor បានបញ្ជាក់ថា៖ «នៅក្នុងរាជកាលឆ្នាំ២០២៥នេះ មនុស្សភាគច្រើន យល់ថា ក្រុមខ្លាំង តែងតែឈ្នះក្រុមដែលខ្សោយ ប៉ុន្តែជាក់ស្តែង វាមិនដូចអ្វីដែលយើងគិតទាំងស្រុងទេ ព្រោះនៅក្នុងបាល់ទាត់លើពិភពលោកនេះ ក្រុមដែលខ្លាំង ក៏អាចចាញ់ក្រុមនៅក្នុងចំណាត់ថ្នាក់ខ្សោយដូចគ្នា»។
ការប្រកួតរវាងក្រុមបឹងកេត (ស) និងក្រុមព្រះខ័នរាជស្វាយរៀង នៅពហុកីឡដ្ឋានជាតិអូឡាំពិក កាលពីថ្ងៃទី២០ ខែមេសា។ រូបថត ស្វាយរៀង
យ៉ាងណាក៏ដោយ នៅក្នុងការប្រកួតលីគកំពូលកម្ពុជា កាលពីថ្ងៃទី២០ ខែមេសាថ្មីៗនេះ ក្រុមបឹងកេត បានបន្តចាញ់ក្រុមព្រះខ័នរាជស្វាយរៀង ១-០ ទាំងសោកស្តាយ ខណៈពេលនេះ ស្វាយរៀង ក៏បានផ្តោតខ្លាំង ក្នុងការបន្តយកឈ្នះលើក្រុមបឹងកេត ម្តងទៀត ព្រោះស្វាយរៀង មានបំណងចង់ក្រសោបយកពានផ្តាច់មុខ ដូចកាលឆ្នាំ២០២៤ ដោយពួកគេបានឈ្នះតំណែងជើងឯក ទាំងការប្រកួតលីគកំពូលកម្ពុជា និងពានរង្វាន់សម្តេច ហ៊ុន សែន នេះ។
ដោយឡែកការប្រកួតជើងទី១ វគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន ឆ្នាំ២០២៥ រវាងក្រុមម្ចាស់ផ្ទះ ភ្នំពេញក្រោន និងក្រុមវិសាខា ដែលត្រូវធ្វើនៅថ្ងៃពុធ ទី២៣ ខែមេសា នេះដែរ គឺត្រូវលើកពេល យកទៅធ្វើនៅថ្ងៃទី៣០ ខែមេសាវិញ ទៅតាមការស្នើសុំរបស់ក្លិបវិសាខា ដែលកំពុងកាន់ទុក្ខការទទួលមរណភាពរបស់ខ្សែការពារឆ្នើម ទេស សម្បត្តិ។ នេះបើតាមសេចក្តីជូនដំណឹងរបស់ក្លិបវិសាខា កាលពីថ្ងៃអង្គារ។
ក្លិបវិសាខា បានបញ្ជាក់ថា៖ «ដោយមានសេចក្ដីក្តុកក្ដួលរន្ធត់តត់ស្លុតជាខ្លាំង ចំពោះដំណឹងមរណភាពរបស់កីឡាករ ទេស សម្បត្តិ សមាជិកក្លិបកីឡាបាល់ទាត់ វិសាខា កាលពីថ្ងៃទី២០ ខែមេសា ឆ្នាំ២០២៥ ថ្នាក់ដឹកនាំ គណៈគ្រប់គ្រង បុគ្គលិក ក្រុមការងារគ្រូ និងកីឡាករ-កីឡាការិនីរបស់យើងទាំងអស់ នឹងចូលរួមកាន់ទុក្ខចំពោះមរណភាពរបស់ សម្បត្តិ ហេតុនេះ ក្លិបរបស់យើង បានស្នើសុំលើកកាលបរិច្ឆេទការប្រកួតរវាង ភ្នំពេញក្រោន និង វិសាខា ពីថ្ងៃទី២៣ ខែមេសា ទៅថ្ងៃទី៣០ ខែមេសាវិញ»។
ជាមួយគ្នានេះ ក្លិបវិសាខា ក៏បានរៀបចំទីកន្លែងសម្រាប់ធ្វើការគោរពវិញ្ញាណក្ខន្ធរបស់ ទេស សម្បត្តិ នៅកីឡដ្ឋានព្រីនស៍ផងដែរ ដើម្បីឱ្យបងប្អូនអាចអញ្ជើញដាក់កម្រងផ្កា និងគោរពដល់វិញ្ញាណក្ខន្ធអតីតកីឡាករជម្រើសជាតិកម្ពុជារូបនេះ ដោយមានក្រុមការងារក្លិបវិសាខា រង់ចាំសម្របសម្រួលជាប្រចាំ៕
