កីឡាករថ្នាលរបស់កម្ពុជា រិទ្ធី គីងកុង ត្រូវប្រកួតជាមួយម្ចាស់ខ្សែក្រវាត់ និងម្ចាស់ពានមកពីប្រទេសថៃ Nanoa Tuyutarakyoung។ រូបថត ទទក
អ្នកដឹកនាំកីឡាករថៃមកប្រកួតក្នុងកម្មវិធី គ្រុឌគុនខ្មែរ របស់ស្ថានីយទូរទស្សន៍ជាតិកម្ពុជា (ទទក) បានសម្រេចផ្លាស់ប្តូរបេក្ខភាពកីឡាករវ័យថ្នាលរបស់ខ្លួន ដើម្បីធ្វើការប្រកួតមិត្តភាពអន្តរជាតិជាមួយអ្នកប្រដាល់វ័យក្មេងរបស់កម្ពុជា រិទ្ធី គីងកុង និង រិទ្ធី ហុងបញ្ញា ដែលកំពុងមានឈ្មោះបោះសំឡេងខ្លាំង។
ដំបូងឡើយ ការប្រកួតមិត្តភាពអន្តរជាតិកម្រិតថ្នាល នៅដីឡូត៍ ខាងត្បូងស្តុបទួលពង្រ ទល់មុខវត្តធម្មត្រ័យ សង្កាត់ព្រៃស ខណ្ឌដង្កោ រាជធានីភ្នំពេញ នាថ្ងៃទី២៦ ខែមេសានេះ គឺ រិទ្ធី គីងកុង ត្រូវប្រកួតជាមួយកីឡាករថៃ មង្គុនផេត ឆ ឆេមពាន (Mongkolphet Chor Champion) រីឯ រិទ្ធី ហុងបញ្ញា ត្រូវជួបកីឡាករថៃ រ៉ុង រ៉ាវី (Rong Ravy)។
ប៉ុន្តែក្រោយមកភាគីថៃ បានស្នើសុំផ្លាស់ប្តូរបេក្ខភាពទាំង២នាក់នេះចេញ ហើយដាក់ជំនួសមកវិញ ដោយបេក្ខភាព២នាក់ផ្សេងទៀត គឺកីឡាករវ័យក្មេង ណាណៅ តូយ៉ូតារ:យ៉ង (Nanoa Tuyutarakyoung និង ឃុនសឹក អ.ឈូកឆៃ (Khunserk R.Chukchai) ដែលអ្នកទាំង២នេះ សុទ្ធតែជាម្ចាស់ខ្សែក្រវាត់។
ជាមួយការផ្លាស់ប្តូរបេក្ខភាពនេះ កីឡាករថ្នាលកំពុងមានឈ្មោះបោះសំឡេងខ្លាំង រិទ្ធី គីងកុង ត្រូវប្រកួតជាមួយម្ចាស់ខ្សែក្រវាត់ទម្ងន់២៥គីឡូក្រាមរបស់ថៃ Nanoa Tuyutarakyoung វិញ ចំណែកមិត្តរួមក្លិបរបស់គេ រិទ្ធី ហុងបញ្ញា ត្រូវជួបម្ចាស់ខ្សែក្រវាត់ទម្ងន់៣៦គីឡូក្រាមរបស់ថៃ Khunserk R.Chukchai។
ជុំវិញការដោះដូរបេក្ខភាពនេះ លោក ម៉ុល នី ប្រធានផ្គូផ្គងប្រចាំសង្វៀនប្រដាល់ទទក បានបង្ហោះសារបែបនេះថា៖ «លើកនេះមិនដឹងម៉េចម៉ាទេ រិទ្ធី គីងកុង របស់យើង ដោយសារតែមានបញ្ហាខ្លះៗភាគីថៃ សូមធ្វើការដោះដូរបេក្ខភាព ដោយស្នើសុំយកម្ចាស់ខ្សែក្រវាត់កម្រិតថ្នាលរបស់គេ ណាណៅ តូយ៉ូតារ:យ៉ង មកជំនួសវិញ។ ចំណែក រិទ្ធី ហុងបញ្ញា ក៏ត្រូវធ្វើការធ្ងន់ដែរ ដោយគេនឹងប៉ះម្ចាស់ខ្សែក្រវាត់ ឃុនសឹក អ.ឈូកឆៃ វិញ»។
រិទ្ធី ហុងបញ្ញា ត្រូវប្រឈមមុខជាមួយខ្សែក្រវាត់ទម្ងន់៣៦គីឡូក្រាមមកពីប្រទេសថៃ Khunserk R.Chukchai នៅថ្ងៃសៅរ៍។ រូប ទទក
ចំពោះការសម្រេចផ្លាស់ប្តូរបេក្ខភាពកីឡាករ ដោយនាំយកកីឡាករថ្នាលធ្លាប់ឈ្នះខ្សែក្រវាត់នៅប្រទេសថៃ មកប្រកួតជាមួយកីឡាករថ្នាលកម្ពុជា រិទ្ធី គីងកុង និង រិទ្ធី ហុងបញ្ញា នៅថ្ងៃសៅរ៍នេះ គឺដោយសារភាគីថៃ បានដឹងថា គីងកុង និង ហុងបញ្ញា មានសមត្ថភាពល្អ និងជាកីឡាករកំពុងទទួលបានការគាំទ្រខ្លាំងនៅកម្ពុជា។
ភាគីថៃ ចង់បំបាក់អំនួតអ្នកទាំង២នេះ ជាពិសេសកីឡាករមិនធ្លាប់ចាញ់ រិទ្ធី គីងកុង ដែលធ្លាប់ផ្តួលកីឡាករថ្នាលរបស់ថៃឱ្យសន្លប់២នាក់មកហើយ ហើយអ្វីដែលភាគីថៃចង់ចាំមិនភ្លេចនោះ គឺ គីងកុង បានវ៉ៃកីឡាករថៃ Beth Senlake ឱ្យសន្លប់ក្នុងទឹកទី២ សម្រាប់ការប្រកួតដណ្តើមពានអន្តរជាតិ ក្នុងកម្មវិធី Krud Kun Khmer នៅលើទឹកដីខេត្តតាកែវ កាលពីថ្ងៃទី២៣ ខែមីនា ឆ្នាំ២០២៤។
ហេតុផលនេះហើយទើបភាគីថៃ សម្រេចនាំយកកីឡាករថ្នាល់របស់គេ ដែលធ្លាប់ឈ្នះទាំងខ្សែក្រវាត់ និងពាន នៅប្រទេសថៃ Nanoa Tuyutarakyoung មកជម្រះបញ្ជីចាស់ជាមួយ រិទ្ធី គីងកុង ជំនួសមិត្តរួមជាតិរបស់គេ ហើយអ្នកប្រដាល់មានដើមកំណើតនៅខេត្តតាកែវ គីងកុង ផ្ទាល់ ក៏បានដឹងពីបំណងនេះដែរ ប៉ុន្តែរូបគេ មិនបានបង្ហាញការខ្លាចរអាអ្វីឡើយ។
រិទ្ធី គីងកុង បាននិយាយថា៖ «ខ្ញុំដឹងថា អ្នកដែលមកប្រកួតនេះ គឺចង់សងសឹកខ្ញុំ ឱ្យមិត្តរួមជាតិរបស់គេ ប៉ុន្តែខ្ញុំអត់ខ្លាចនោះទេ ហើយក៏មិនមានការព្រួយបារម្ភអ្វីនោះទេ ព្រោះខ្ញុំបានហ្វឹកហាត់ត្រៀមខ្លាំង តែលទ្ធផលជាក់ស្តែងយ៉ាងណានោះ ដល់ពេលប្រកួតទើបដឹងច្បាស់»៕
