កីឡាករ ស៊ិន កក្កដា រកបាន៣គ្រាប់តែម្នាក់ឯង ដើម្បីជួយឱ្យក្រុមវិសាខា យកឈ្នះក្រុមទ័ព ៤-០ កាលពីថ្ងៃពុធ។ រូបថត វិសាខា
ក្រុមវិសាខា និងព្រះខ័នរាជស្វាយរៀង សុទ្ធតែដណ្តើមបានជ័យជម្នះលើក្រុមកងយោធពលខេមរភូមិន្ទ(ទ័ព) និងគិរីវង់សុខសែនជ័យ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន លើកទី១៨ ឆ្នាំ២០២៥ ចំណែកក្រុមបឹងកេត ចង់ទម្លាក់ក្រុម ISI ដង្កោសែនជ័យ នៅថ្ងៃនេះ ដើម្បីឈានទៅសម្រេចគោលដៅ ឡើងរហូតដល់វគ្គផ្តាច់ព្រ័ត្រ។
សម្រាប់ការប្រកួតជើងទី២ កាត់សេចក្តី កាលពីថ្ងៃពុធម្សិលមិញ លោក ភា សុភ័ត្ត្រា គ្រូបង្គោលក្រុមទ័ព បានដាក់ផែនការលេងបិទ ក្រុមម្ចាស់ផ្ទះវិសាខា ១២០ភាគរយតែម្តង ព្រោះលោកចង់ឱ្យការប្រកួតនេះ បានបញ្ចប់ដោយគ្មានគ្រាប់បាល់ ដើម្បីអាចឈានដល់ការទាត់បាល់ប៉េណាល់ទីកាត់សេចក្តី ខណៈការប្រកួតជើងទី១ ក្រុមទាំង២ បានស្មើគ្នា ២-២ ដែរនោះ។
ប៉ុន្តែរនាំងការពាររបស់ក្រុមទ័ព អាចទប់ស្កាត់ការវាយសម្រុករបស់វិសាខា បានត្រឹមតង់ទី១ទេ ព្រោះនៅក្នុងតង់ទី២ វិសាខា បានទម្លុះសំណាញ់ទីក្រុមទ័ព ដល់៤គ្រាប់ ដោយក្នុងនោះ ស៊ិន កក្កដា រកបាន៣គ្រាប់តែម្នាក់ឯង ហើយ កក្កដា ដដែលជាអ្នកបញ្ជូនបាល់ឱ្យខ្សែប្រយុទ្ធប្រេស៊ីល Ramon De Andrade Souza ស៊ុតបញ្ចូលទី១គ្រាប់ទៀត។
តាមរយៈការយកឈ្នះលើក្រុមទ័ព បានជួយឱ្យក្រុមការពារតំណែងជើងឯក វិសាខា អាចបន្តដំណើរឡើងទៅកាន់វគ្គពាក់កណ្តាលផ្តាច់ព្រ័ត្រ ដោយពួកគេ ត្រូវជួបក្រុមភ្នំពេញក្រោន ដែលបានទម្លាក់ក្រុមណាហ្គាវើលដ៍ នៅវគ្គ៨ក្រុមចុងក្រោយនេះមុនគេ តាមរយៈការយកឈ្នះ ៤-០ នៅជើងទី១ និងចាញ់ណាហ្គាវើលដ៍ ១-០ វិញនៅជើងទី២។
ចំណែកក្រុមគិរីវង់សុខសែនជ័យ ដែលបានចាញ់ ២-០ សម្រាប់ការប្រកួតជើងទី១ ក្នុងទឹកដីខ្លួនឯងនោះ បែរជាអ្នករកគ្រាប់បាល់បានមុន ក្រុមម្ចាស់ផ្ទះព្រះខ័នរាជស្វាយរៀង ដែលជាការស៊ុតបញ្ចូលទីរបស់ ឃាន់ សុបិន នៅនាទីទី៣១ ប៉ុន្តែខ្សែប្រយុទ្ធប្រេស៊ីល ដែលទើបជាពីរបួស Pablo Augusto រកបាន៣គ្រាប់តែម្នាក់ឯងឱ្យក្រុមស្វាយរៀង វិញ មុនពេល កីឡាករ Tenege Neville Mbanwei ស៊ុតបាល់ពិន័យ១១ម៉ែត្រ បានសម្រេចនៅនាទីទី ៩០+៤ ឱ្យក្រុមគិរីវង់។
តាមរយៈការបន្តយកឈ្នះក្រុមគិរីវង់សុខសែនជ័យ ៣-២ នៅជើងទី២នេះ បានជួយឱ្យក្រុមព្រះខ័នរាជស្វាយរៀង បានឡើងទៅវគ្គពាក់កណ្តាលផ្តាច់ព្រ័ត្រ ដោយពួកគេត្រូវជួបក្រុមបឹងកេត ឬ ក្រុម ISI ដង្កោសែនជ័យ ដែលត្រូវប្រកួតកាត់សេចក្តីជើងទី២ នៅពហុកីឡដ្ឋានជាតិ នាល្ងាចម៉ោង៦ថ្ងៃព្រហស្បតិ៍នេះ។
យ៉ាងណាក៏ដោយ ការយកឈ្នះក្រុម ISI ដង្កោសែនជ័យ ២-០ កាលជើងទី១ បានជួយឱ្យក្រុមបឹងកេត មានភាគរយខ្ពស់រួចទៅហើយ ហើយពួកគេ ក៏បានដាក់ចិត្តខ្លាំង ចំពោះការប្រកួតកាត់សេចក្តីនៅជើងទី២ ថ្ងៃនេះផងដែរ ព្រោះគ្រូបង្គោលលោក Conor Nestor បានអះអាងថា លោកចង់កែប្រែប្រវត្តិសាស្រ្ត ក្នុងការដឹកនាំក្រុមបឹងកេត ឡើងរហូតដល់វគ្គផ្តាច់ព្រ័ត្រ។
លោក Conor បាននិយាយក្នុងសន្និសីទកាសែត កាលពីថ្ងៃពុធថា៖ «យើងអស់ឱកាសប្រកួតយកពាននៅលីគកំពូលហើយ ប៉ុន្តែយើងមានពានសម្តេច ហ៊ុន សែន ដែលយើងកំពុងដំណើរការបានល្អ ដោយកំពុងសម្លឹងឃើញវគ្គពាក់កណ្តាលផ្តាច់ព្រ័ត្រ ហើយជាផ្នត់គំនិតរបស់ខ្ញុំ គឺខ្ញុំអាចនឹងព្យាយាមកែប្រែនូវប្រវត្តិសាស្រ្ត ដើម្បីដឹកនាំក្រុមឱ្យទៅដល់វគ្គផ្តាច់ព្រ័ត្រ»។
គ្រូបង្វឹកក្រុមបឹងកេត លោក Conor Nestor បានបន្ថែមថា៖ «យើងបានត្រៀមរួចរាល់ហើយ ក្នុងការទទួលបានភាពរីករាយ ចំពោះការនាំក្រុមបឹងកេត ទៅវគ្គផ្តាច់ព្រ័ត្រ ហើយយើងក៏ត្រៀមចិត្ត ក្នុងការទទួលយកភាពឈឺចាប់ដូចគ្នា»។
ចំណែកកីឡាករ សៀង ចន្ធា បាននិយាយថា៖ «យើងលែងមានឱកាសប្រជែងយកពាន នៅលីគកំពូលហើយ តែយើងនៅពានសម្តេចហ៊ុនសែន ដែលជាពានដ៏សំខាន់សម្រាប់ពួកយើង។ ចំពោះខ្ញុំ តែងតែមានចិត្តរកគ្រាប់បាល់ឱ្យបានច្រើន ដើម្បីជួយដល់ក្រុមឱ្យទទួលបានលទ្ធផលល្អ។ ទោះពេលនេះ ខ្ញុំមិនបានឈរនៅ Top Scorer ក៏ដោយ ក៏ខ្ញុំត្រូវតែរកគ្រាប់បាល់ជួយដល់ក្រុម»។
តែទោះបីជាយ៉ាងណា លោក ទុំ សារ៉ាយ គ្រូបង្វឹកក្រុម ISI ដង្កោសែនជ័យ ក៏បានបង្ហាញឆន្ទៈក្នុងការវាយបកយកឈ្នះលើក្រុមបឹងកេត វិញដូចគ្នា។ លោកនិយាយថា៖ «យើងបានចាញ់ក្រុមបឹងកេត ២-០ នៅជើងទី១ អ៊ីចឹងយើងត្រូវដណ្តើមឱ្យបានជ័យជម្នះ នៅជើងទី២នេះ ដែលវាមិនងាយស្រួលនោះទេ ព្រោះការរៀបចំរបស់បឹងកេត គឺគាត់លេងសហការគ្នាបានល្អមែនទែន»។
លោកបន្ថែមថា៖ «ប៉ុន្តែខ្ញុំសង្ឃឹមថា ការប្រកួតនេះ យើងនឹងធ្វើបានល្អជាងការប្រកួតមុនដោយយើងត្រៀមខ្លួនបានល្អ។ ខ្ញុំសង្ឃឹមថា កីឡាករបរទេសរបស់យើង នឹងជាសះស្បើយវិញ អ៊ីចឹងការប្រកួតនេះ ប្រហែលយើងមានកីឡាករបរទេសគ្រប់គ្រាន់ ក្នុងការវាយបកយកឈ្នះលើក្រុមបឹងកេត វិញ»៕
