ចំរើន គុនខ្មែរ បានក្លាយជាម្ចាស់ខ្សែក្រវាត់ទម្ងន់៦១គីឡូក្រាម ក្រោយយកឈ្នះជើងខ្លាំងរបស់ជប៉ុន តៃម៉ូ ហ៊ីសៃ កាលពីយប់មិញ។ រូបថត Ganzberg
កីឡាករ កីឡាការិនីជាអ្នកលេងសាម៉ូរៃរបស់ជប៉ុន បានចាញ់អ្នកលេងគុនខ្មែរទាំង៥នាក់ នៅក្នុងការប្រកួតអន្តរជាតិ Kun Khmer Knock Out កាលពីយប់មិញ រីឯកីឡាករមានឈ្មោះបោះសំឡេងខ្លាំងរបស់ជប៉ុន តៃម៉ូ ហ៊ីសៃ (Daimu Hishi) បានទួញយំក្រោមស្នាដៃ ចំរើន គុនខ្មែរ ដោយលទ្ធផលប្រកួតដណ្តើមខ្សែក្រវាត់របស់អ្នកទាំង២នេះ បានធ្វើឱ្យគ្រប់គ្នាមានការភ្ញាក់ផ្អើលខ្លាំង និងនឹកស្មានមិនដល់។
នៅមុនការប្រកួត ដែលរៀបចំដោយសង្វៀនថោន នៅក្បែរដីឡូតិ៍វត្តស្ងូនពេជ្រ ខណ្ឌកំពូល កាលពីយប់ថ្ងៃព្រហស្បតិ៍ ម្សិលមិញ អ្នកគាំទ្រភាគច្រើន មិនរំពឹងថា ចំរើន គុនខ្មែរ អាចយកឈ្នះ តៃម៉ូ ហ៊ីសៃ ដើម្បីសងសឹកឱ្យមិត្តរួមជាតិ ពេជ្រ សម្បត្តិ និង ឈុត សេរីវ៉ាន់ថង ដែលធ្លាប់សន្លប់ក្រោមដៃកីឡាករជើងខ្លាំងរបស់ជប៉ុនម្នាក់នេះទេ។
ការវាយតម្លៃបែបនេះ ព្រោះពួកគេមើលឃើញថា តៃម៉ូ ពិតជាមានសមត្ថភាពខ្លាំង ហើយគេបានបង្ហាញការជឿជាក់ដល់១០០ភាគរយ ក្នុងការដណ្តើមយកខ្សែក្រវាត់ទម្ងន់៦១គីឡូក្រាមនេះ ត្រឡប់ទៅជប៉ុនវិញ ស្របពេលដែល ចំរើន គុនខ្មែរ នៅមិនទាន់ជាពីមុខរបួស កាលប្រកួតនៅអូស្រ្តាលី កាលពីថ្ងៃទី២២ ខែមីនានោះទេ ធ្វើឱ្យរូបគេហ្វឹកហាត់ត្រៀម មិនសូវបានពេញល្អ។
ប៉ុន្តែតាមការប្រកួតជាក់ស្តែង ចំរើន គុនខ្មែរ ពិតជាធ្វើបានយ៉ាងល្អបំផុត ដោយរូបគេបានបើកការវាយលុក តាមរយៈការទាត់សន្ធាប់ធ្ងន់ៗ និងបន្ថែមដោយការស្ទុះចូលវាយកែង ធ្វើឱ្យ តៃម៉ូ ហ៊ីសៃ ស្ទើរមានបញ្ហានៅទឹកទី១ទៅហើយ ប៉ុន្តែភាពស្ទាក់ស្ទើរ ក្នុងការចូលលុករបស់ ចំរើន នៅទឹកទី២ ធ្វើឱ្យ តៃម៉ូ តៃម៉ូ មានឱកាសប្រើបច្ចេកទេសវាយចូលគោលដៅបានច្រើនជាងវិញ។
ជាមួយលទ្ធផលបែបប្រទាញប្រទង់នេះ ចំរើន បានសម្រេចវាយសម្រុកជាថ្មី នៅទឹកទី៣ចុងក្រោយ ហើយការវាយចូលធ្ងន់ៗរបស់គេ បានធ្វើឱ្យ តៃម៉ូ រាងស្រុតបន្តិចបន្តួចផងដែរ។
ចំរើន គុនខ្មែរ បានទាត់ទៅលើ តៃម៉ូ ហ៊ីសៃ មុនពេលប្រកាសឱ្យឈ្នះពិន្ទុគួរឱ្យភ្ញាក់ផ្អើលបំផុត។ រូបថត Ganzberg
តៃម៉ូ បានព្យាយាមប្រើក្បាច់ពិសេសដែលធ្លាប់ផ្តួល ឈុត សេរីវ៉ាន់ថង ឱ្យសន្លប់នៅទឹកទី១ ទៅលើ ចំរើន គុនខ្មែរ ប៉ុន្តែមិនទទួលបានផលទេ ហើយថែមទាំងត្រូវ ចំរើន វាយកែងស្កាត់ចូលធ្ងន់ៗផងដែរ។
នៅទីបំផុត ចំរើន គុនខ្មែរ ត្រូវបានប្រកាសឱ្យឈ្នះពិន្ទុជើងខ្លាំង តៃម៉ូ យ៉ាងស័ក្តិសមបំផុត ដើម្បីក្លាយជាម្ចាស់ខ្សែក្រវាត់។ ជ័យជម្នះរបស់ ចំរើន បានធ្វើឱ្យអ្នកគាំទ្រគុនខ្មែរ ស្ទើរពេញមួយប្រទេស មានការភ្ញាក់ផ្អើលខ្លាំង និងសម្តែងការកោតសរសើរពីឆន្ទៈប្រកួតដ៏មោះមុតរបស់គេ ដើម្បីបំបាក់អំនួតរបស់ តៃម៉ូ ដែលបានទួញយំ បង្ហាញការសោកស្តាយចំពោះការចាញ់លើកនេះ។
ចំរើន គុនខ្មែរ បានចាត់ទុកការយកឈ្នះ តៃម៉ូ លើកនេះ ជាការស្តាប្រជាប្រិយភាពគុនខ្មែរ ឡើងវិញ ក៏ដូចជាសងសឹកឱ្យជនរួមជាតិ ដែលធ្លាប់ចាញ់ តៃម៉ូ។ ចំរើន និយាយថា៖ «យើងបានស្តាកិត្តិយសរបស់យើងមកវិញ ដោយសារខ្ញុំធ្វើបានល្អ ហើយឈ្នះកីឡាករ តៃម៉ូ ដែលធ្លាប់ឈ្នះ ពេជ្រ សម្បត្តិ, ឈុត សេរីវ៉ាន់ថង និង ឯម សុធី អ៊ីចឹងយើងត្រូវខំប្រឹងហ្វឹកហាត់ទាំងអស់គ្នាថែមដើម្បីត្រៀមជួបកីឡាករបរទេស មកពីបណ្តាប្រទេសផ្សេងៗទៀត»។
យ៉ាងណាក៏ដោយ ចំរើន បានសារភាពថា រូបគេក៏ចង់អស់ខ្យល់ នៅទឹកទី៣ និងមានការបារម្ភផងដែរ ចំពោះការប្រើក្បាច់ពិសេសរបស់ តៃម៉ូ ប៉ុន្តែការចូលកៀក ធ្វើឱ្យការប្រើក្បាច់ពិសេសរបស់ តៃម៉ូ មិនទទួលបានផលល្អ និងបានចាញ់ដោយទឹកភ្នែក។
ចំរើន បញ្ជាក់ថា៖ «តៃម៉ូ ក៏ចង់ឈ្នះយើង ហើយយើងក៏ចង់ឈ្នះគាត់ តែដោយសារខ្ញុំឈ្នះគាត់ ឃើញគាត់សម្រក់ទឹកភ្នែក នៅលើសង្វៀនជាមួយលោកឪពុករបស់គាត់។ ខ្ញុំពិតជាសប្បាយចិត្ត ដែលទទួលបានជ័យជម្នះ និងសងសឹកឱ្យជនរួមជាតិបានសម្រេច ហើយខ្ញុំសូមអរគុណដល់ពុកម៉ែបងប្អូន ដែលបានមកចូលរួមគាំទ្រគុនខ្មែរយើងច្រើនមែនទែន»។
ចំណែកលោក ឃឹម សុជាតិ គ្រូបង្វឹក ចំរើន គុនខ្មែរ បានទម្លាយថា ការប្រកួតរបស់ តៃម៉ូ បានចូលប្លង់នៃការរៀបចំរបស់គាត់។ លោកនិយាយថា៖ «ខ្ញុំបានប្រាប់ឱ្យ ចំរើន ឱ្យដើរបុកវ៉ៃតែម្តង ព្រោះគាត់មានឱកាសទាត់បានច្រើន និងធ្ងន់ តែបើថយវ៉ៃ គាត់ទាត់ស្រាល ចំណែក តៃម៉ូ បើឃើញយើងថយ គាត់ចូលវ៉ៃតែម្តង ហើយគាត់ចេញចូលលឿន យើងធាក់គាត់អត់ត្រូវទេ អ៊ីចឹងយើងតាមវ៉ៃគាត់មុន»។
កីឡាករជប៉ុន តៃម៉ូ ហ៊ីសៃ បានព្យាយាមប្រើក្បាច់ពិសេសទៅលើ ចំរើន គុនខ្មែរ តែមិនបានផល។ រូបថត Ganzberg
លោកបានបន្ថែមថា៖ «នេះជាបច្ចេកទេសរបស់ខ្ញុំ ហើយការចូលទាត់របស់ ចំរើន បានធ្វើឱ្យដៃរបស់ តៃម៉ូ មានបញ្ហាតាំងពីទឹកទី១ ហេតុនេះទើបគាត់បានប្តូរយុទ្ធសាស្រ្តវាយដកថយវិញ ព្រោះបើនៅតែចូលវាយប្តូរទៀត ដៃរបស់ តៃម៉ូ អាចនឹងបាក់»។
ចំណែកការប្រកួតមិត្តភាពអន្តរជាតិកម្ពុជា-ជប៉ុន ចំនួន៤គូទៀត គឺអ្នកលេងគុនខ្មែរ បានឈ្នះទាំង៤នាក់ ហើយក្នុងនោះ សូត្រ វាសនា ធ្វើបានល្អជាងគេ ដោយវាយកែងបណ្តាលឱ្យកីឡាករជប៉ុន Masa Sato បែកក្បាលឈាមហូរស្រោចពេញផ្ទៃមុខ នាំឱ្យអាជ្ញាកណ្តាល សម្រេចបញ្ឈប់ នៅក្រោយការប្រកួតទឹកទី១បានបញ្ចប់។ រីឯកីឡាករ ម៉ឺន មេឃា, គោរមៈ ច័ន្ទរាជ្យ និងកីឡាការិនី ទូច ចាន់វត្តី សុទ្ធតែបានយកឈ្នះអ្នកលេងសាម៉ូរៃរបស់ជប៉ុន ដោយពិន្ទុដូចគ្នា៕
