ក្រុមជម្រើសជាតិចំបាប់កម្ពុជា បាននាំយកជោគជ័យ គឺការឈ្នះបានមេដាយមាស១ ប្រាក់៣ និងសំរឹទ្ធ៤ ពីការប្រកួតជើងអាស៊ីអាគ្នេយ៍ (Southeast Asian & Invitation Championship 2025) នៅប្រទេសសិង្ហបុរី មកដល់មាតុប្រទេសវិញ កាលពីថ្ងៃល្ងាចថ្ងៃអង្គារ ហើយពួកគេ បានចាត់ទុកសមិទ្ធផលនេះ ជាសញ្ញាណល្អ និងជាបទពិសោធន៍ថ្មី សម្រាប់ការត្រៀមឆ្ពោះទៅប្រជែងយកមេដាយ ស៊ីហ្គេម លើកទី៣៣ នៅប្រទេសថៃ ចុងឆ្នាំ២០២៥នេះ។
កីឡាករ ហេង វុទ្ធី ដែលជាអ្នកដណ្តើមបានមេដាយមាស លើវិញ្ញាសា Freestyle ទម្ងន់៩២គីឡូក្រាម ពីការប្រកួត Southeast Asian & Invitation Championship 2025នេះ បានអះអាងថា ការប្រកួតនេះ ពិតជាមានការពិបាកខ្លាំង ទម្រាំដណ្តើមបានមេដាយ ព្រោះប្រទេសនៅក្រៅតំបន់អាស៊ាន ក៏បានចូលរួមប្រកួតផងដែរ ហើយវាជាការប្រកួតបើកទូលាយ ដែលប្រទេសនីមួយៗ អាចដាក់កីឡាករចូលប្រកួត២ទៅ៣នាក់ នៅក្នុងវិញ្ញាសាតែមួយ។
ម្ចាស់មេដាយមាសស៊ីហ្គេម ឆ្នាំ២០២៣ ហេង វុទ្ធី បានប្រាប់ប្រព័ន្ធផ្សព្វផ្សាយ ពេលនាំយកមេដាយមាស មកដល់ព្រលានយន្តហោះអន្តរជាតិភ្នំពេញ កាលពីល្ងាចថ្ងៃអង្គារថា៖ «ការប្រកួតនេះ ខ្ញុំធ្វើបានល្អ ប៉ុន្តែការប្រកួតជើងឯកអាស៊ាននេះ មានការបូកបញ្ជូនទាំងប្រទេសអូស្រ្តាលី នូវែលហ្សេឡង់ និងឆាយនីសតៃប៉ិ អ៊ីចឹងការប្រកួត មានការពិបាកមែនទែន ក្នុងការយកមេដាយ ព្រោះគីឡូខ្លះ ត្រូវវ៉ៃតាំងពីព្រឹកដល់ល្ងាចទើបដឹងលទ្ធផល»។
យ៉ាងណាក៏ដោយ ម្ចាស់មេដាយថ្មីថ្មោងរូបនេះ បានយកបទពិសោធន៍ និងការពិបាក ដែលដណ្តើមបានមេដាយមាស នៅសិង្ហបុរី ធ្វើជាត្រីមុខ ដើម្បីសម្រួចគោលដៅ ឆ្ពោះទៅប្រជែងរកមេដាយ សម្រាប់ការប្រកួតស៊ីហ្គេម នៅប្រទេសថៃ ដែលនឹងធ្វើពីថ្ងៃទី៩ ដល់ទី២០ ខែធ្នូ ឆ្នាំ២០២៥។
វុទ្ធី បញ្ជាក់ថា៖ «ការពិបាក ដែលយើងបានជួបប្រទះនេះ វាជាបទពិសោធន៍ និងការវាស់ស្ទង់សម្រាប់យើង ដែលអាចនឹងជួយឱ្យយើង ទទួលបានលទ្ធផលល្អ នៅស៊ីហ្គេម ព្រោះយើងឃើញថា អត្តពលិករបស់អូស្រ្តាលី និងឆាយនីសតៃប៉ិ មានសមត្ថភាពខ្លាំងជាងវៀតណាមទៅទៀត អ៊ីចឹងយើងបានដកស្រង់យកបទពិសោធន៍ពីពួកគាត់ សម្រាប់ការប្រកួតស៊ីហ្គេម នៅខែធ្នូ ឆ្នាំនេះតែម្តង»។
ម្ចាស់មេដាយមាសស៊ីហ្គេម ឆ្នាំ២០២៣ ហេង វុទ្ធី ជាបេក្ខភាពតែម្នាក់គត់ ដែលឈ្នះបានមេដាយមាស ពីការប្រកួត Southeast Asian & Invitation Championship 2025 នៅប្រទេសសិង្ហបុរី។ រូបថត សហព័ន្ធ/ Broad Sports
ចំណែកអ្នកស្រី ចូវ សុទ្ធារ៉ា គ្រូបង្វឹកក្រុមជម្រើសជាតិចំបាប់កម្ពុជា បានចាត់ទុកការឈ្នះមេដាយមាស១ ប្រាក់៣ និងសំរឹទ្ធ៤ ពីការប្រកួត Southeast Asian & Invitation Championship 2025 នៅប្រទេសសិង្ហបុរីនេះ ថា ជាសញ្ញាណល្អ សម្រាប់ការឆ្ពោះទៅកាន់ការប្រកួតស៊ីហ្គេម លើកទី៣៣ ចុងឆ្នាំ២០២៥នេះ។
ចូវ សុទ្ធារ៉ា បាននិយាយពេលដឹកនាំក្រុមចំបាប់កម្ពុជា មកដល់ព្រលានយន្តហោះអន្តរជាតិភ្នំពេញ កាលពីថ្ងៃអង្គារនោះថា៖ «លទ្ធផលដែលយើងដណ្តើមបាននេះ វាជាសញ្ញាណល្អ សម្រាប់ក្រុមចំបាប់កម្ពុជា ត្រៀមទៅស៊ីហ្គេម គឺត្រៀមទាំងអ្នកបានមេដាយ និងអ្នកមិនបានមេដាយលើកនេះ។ យើងត្រូវយកបទពិសោធន៍ថ្មីៗ ទទួលបានពីការប្រកួតនៅសិង្ហបុរី ដើម្បីត្រៀមទាំងកម្លាំង និងបច្ចេកទេស ឱ្យបានល្អជាងនេះ សម្រាប់ស៊ីហ្គេម នៅចុងឆ្នាំ២០២៥នេះ»។
ក្រុមចំបាប់កម្ពុជា ពេលនាំយកមេដាយមាស១ ប្រាក់៣ និងសំរឹទ្ធ៤ ពីការប្រកួត Southeast Asian & Invitation Championship 2025 នៅសិង្ហបុរី មកដល់ព្រលានយន្តហោះអន្តរជាតិភ្នំពេញ កាលពីល្ងាចថ្ងៃទី១៣ ខែឧសភា។ រូបថត Broad Sports
គួរបញ្ជាក់ថា ការប្រកួតចំបាប់ Southeast Asian & Invitation Championship 2025 ដែលធ្វើពីថ្ងៃទី១០ ដល់ថ្ងៃទី១២ ខែឧសភា នៅសិង្ហបុរីនេះ គឺកម្ពុជា បានបញ្ជូនកីឡាករ កីឡាការិនីចំនួន១២នាក់ ទៅចូលរួម ក្រោមការឧបត្ថម្ភគាំទ្ររបស់លោក Casey Barnett អនុប្រធានសហព័ន្ធ ក្នុងគោលបំណងសាកល្បង និងវាស់ស្ទង់ ក៏ដូចជាដុសខាត និងពង្រឹងសមត្ថភាពក្រុមអត្តពលិកចំបាប់កម្ពុជា ឱ្យបានកាន់តែល្អប្រសើរ ដើម្បីត្រៀមការប្រកួតស៊ីហ្គេម នៅប្រទេសថៃ ចុងឆ្នាំ២០២៥នេះ។
ជាមួយគ្នានេះ លោក Casey Barnett ក៏បានបង្ហាញមោទនភាព ចំពោះការទទួលបានជោគជ័យរបស់ក្រុមចំបាប់កម្ពុជា ពីការប្រកួតនៅសិង្ហបុរីនេះដែរ។
លោកបានបង្ហោះសារ នៅលើផេចហ្វេសប៊ុកផ្ទាល់ខ្លួន កាលពីថ្ងៃអង្គារថា៖ «កម្លាំង ជំនាញ និងភាពក្លាហាន។ កីឡាករ និងកីឡាការិនីចំបាប់ខ្មែរ ដណ្តើមបានមេដាយមាស១ ប្រាក់៣ សំរឹទ្ធ៤ និងមោទនភាពជាតិ ក្នុងការប្រកួតជើងឯកអាស៊ីអាគ្នេយ៍ឆ្នាំ២០២៥ នៅប្រទេសសិង្ហបុរី»៕
