កីឡាករ ឃីម បូរ៉ា បានរត់កាន់ទង់ជាតិកម្ពុជា បង្ហាញដល់អ្នកគាំទ្រ ក្នុងអំឡុងពេលរូបគេដណ្តើមបានមេដាយមាសស៊ីហ្គេម ឆ្នាំ២០២៣ ប៉ុន្តែការប្រមូលផ្តុំឆ្នាំនេះរូបគេ និងម្ចាស់មេដាយមាសស៊ីហ្គេម ៩នាក់ទៀត មិនបានជាប់ជាកីឡាករជម្រើសជាតិគុនខ្មែរ ទៀតទេ។ រូបថត សហការី
កីឡាករធ្លាប់ដណ្តើមបានមេដាយមាស ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ នៅកម្ពុជា ចំនួន១០នាក់ មិនត្រូវបានកោះហៅឱ្យចូលរួមជាមួយក្រុមជម្រើសជាតិប្រដាល់គុនខ្មែរ សម្រាប់ត្រៀមការប្រកួតស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥នេះទេ។ នេះបើតាមលិខិតឧទ្ទេសនាមរបស់ក្រសួងអប់រំ យុវជន និងកីឡា សម្រាប់ការប្រមូលផ្តុំក្រុមជម្រើសជាតិ នៅឆ្នាំ២០២៥នេះ។
តាមលិខិតឧទ្ទេសនាម ដែលចុះហត្ថលេខាទទួលស្គាល់ដោយលោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡានោះ បានបង្ហាញថា កីឡាករ និងកីឡាការិនីចំនួន១២នាក់ ត្រូវបានជ្រើសរើសឱ្យចូលរួមប្រមូលផ្តុំជាមួយក្រុមជម្រើសជាតិប្រដាល់គុនខ្មែរ សម្រាប់ត្រៀមស៊ីហ្គេម ឆ្នាំ២០២៥នេះ។
ប៉ុន្តែនៅក្នុងចំណោមអ្នកទាំង១២នោះ គ្មានវត្តមានកីឡាករ ឈុត សេរីវ៉ាន់ថង, ឃីម បូរ៉ា, ព្រំ សំណាង, ខាំ ខ្លានាង, កាន់ ម៉េងហុង, ឡៅ ចន្ទ្រា, រឿង សោភ័ណ្ឌ, ម៉ាប់ ធារ៉ា, ហ៊ឹម គឹមរៀងនិង ឃួន ឡាំងកូស៊ីន ដែលធ្លាប់ដណ្តើមបានមេដាយមាស សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជានោះទេ បើទោះបីជាកីឡាករមួយចំនួន នៅមានសមត្ថភាពល្អក៏ដោយ ហើយបេក្ខភាពធ្លាប់ឈ្នះបានមេដាយប្រាក់ និងមេដាយសំរឹទ្ធ មួយចំនួនទៀត ក៏មិនបានជាប់ជម្រើសជាតិលើកនេះនោះដែរ។
តាមលិខិតឧទ្ទេសនាមនោះ បានឱ្យបង្ហាញថា មានតែកីឡាករ ឡៅ ចិត្ត្រា កីឡាករ ផុន ពិសិដ្ឋ និងកីឡាការិនី មឿយ ស៊ឹង ទេ ដែលត្រូវបានជ្រើសរើសឱ្យចូលរួមជាមួយក្រុមជម្រើសជាតិប្រដាល់គុនខ្មែរ ក្នុងនាមជាអ្នកធ្លាប់ដណ្តើមបានមេដាយមាស កាលស៊ីហ្គេម ឆ្នាំ២០២៣ ខណៈកីឡាការិនីម្ចាស់មេដាយមាស ទូច ចាន់វត្តី បានជាប់ជម្រើសជាតិប្រដាល់ឃីកប៊ុកស៊ីងវិញ។
ព្រំ សំណាង (ក្រហម) ពេលប្រកួតផ្តាច់ព្រ័ត្រដណ្តើមយកមេដាយមាសស៊ីហ្គេម លើកទី៣២ ឆ្នាំ២០២៣ នៅកម្ពុជា។ រូបថត សហការី
ចំណែកបេក្ខភាពចំនួន៩នាក់ទៀត ដែលត្រូវបានជ្រើសរើសជាអត្តពលិកជម្រើសជាតិគុនខ្មែរ លើកនេះ រួមមានកីឡាការិនី ធឿន ដាសុផាន្នី, អេ ព្រីយ៉ានុតភូថង កីឡាករ ជា ចំរើន, ទិន ឌិន, ស៊ីម ស៊ីហុង, ហុង សុវណ្ណច័ន្ទសុធី, អេ វិរៈខាំឈិតភូថង, អេ អាំម៉ារិនភូថង និងកីឡាករជើងខ្លាំងកំពុងទទួលរងរិះគន់លើការបង្ហោះការជក់បារីអេឡិចត្រូនិក (វេប) ធឿន ធារ៉ា ចំណែកលោក អេ ភូថង ត្រូវបានជ្រើសតាំងជាគ្រូបង្គោល និងលោក ឡៅ ស៊ីណាត ជាគ្រូជំនួយ។
ជុំវិញការគ្មានឈ្មោះម្ចាស់មេដាយមាសស៊ីហ្គេម រហូតដល់១០នាក់ នៅការប្រមូលផ្តុំក្រុមជម្រើសជាតិគុនខ្មែរ លើកនេះ បានបង្កើតឱ្យមានការមន្ទិលសង្ស័យថា អាចជាការជ្រើសរើសទៅតាមខ្សែបក្ខពួក គឺបំភ្លេចអ្នកមានស្នាដៃជូនជាតិ ហើយទៅដាក់កីឡាករផ្សេងជំនួសវិញ ដើម្បីតែផលប្រយោជន៍។
យ៉ាងណាក៏ដោយ ជុំវិញបញ្ហានេះ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានអះអាងថា ការជ្រើសរើសបេក្ខភាពក្រុមជម្រើសជាតិឆ្នាំនេះ គឺផ្តោតខ្លាំងទៅលើសមត្ថភាព និងសមិទ្ធផលជាក់ស្តែងនាពេលបច្ចុប្បន្នរបស់កីឡាករ ហើយអាយុក៏ជាផ្នែកមួយ ត្រូវគិតគូរឡើងវិញផងដែរ។
លោកបានប្រាប់ប្រព័ន្ធផ្សព្វផ្សាយ កាលពីពេលថ្មីៗនេះថា៖ «យើងជ្រើសរើសកីឡាករជម្រើសជាតិ តំណែងឱ្យជាតិនេះ គឺផ្នែកទៅលើសមិទ្ធផល ទម្រង់ប្រកួត និងកម្រិតសមត្ថភាពរបស់គាត់ នាពេលបច្ចុប្បន្ន ព្រោះកីឡាករខ្លះពីមុនគាត់ល្អមែន តែឥឡូវគាត់ធ្លាក់ទម្រង់ អ៊ីចឹងក៏យើងអត់ជ្រើសរើសដែរ គឺយើងជ្រើសរើសយកតែកីឡាករមានទម្រង់ល្អ ក្នុងពេលបច្ចុប្បន្ន»។
លោកបានបន្ថែមថា៖ «មួយវិញទៀត យើងមើលទៅលើវ័យដែរ ដោយយើងផ្តោតទៅលើយុវជនឱ្យបានច្រើន ព្រោះគាត់អាចទៅប្រកួតដកស្រង់បច្ចេកទេស នៅស៊ីហ្គេម លើកនេះហើយ គាត់នឹងអាចទៅប្រកួតលើកក្រោយ កាន់តែកើនសមត្ថភាពខ្ពស់ជាងហ្នឹងទៀត»។
ធឿន ធារ៉ា (ក្រហម) ពេលប្រកួតជាមួយកីឡាករបរទេសកន្លងមក ខណៈពេលនេះរូបគេ កំពុងទទួលរងការរិះគន់លើការបង្ហាញវីដេអូជក់បារីអេឡិចត្រូនិក ស្របពេលជើងខ្លាំងរូបនេះ បានជាប់ជាកីឡាករជម្រើសជាតិគុនខ្មែរ ជាលើកដំបូង។ រូបថត Wurkz
បន្ថែមលើនេះ ការជ្រើសរើសកីឡាករជម្រើសជាតិប្រដាល់គុនខ្មែរ លើកនេះ ក៏ផ្តោតសំខាន់ទៅលើប្រភេទកីឡាករ ដែលចេះប្រកួត ក្នុងទម្រង់ពាក់ឧបករណ៍ការពារខ្លួន ជាពិសេសជាកីឡាករ ដែលដឹងពីរបៀបរបប និងច្បាប់នៃការប្រកួតស៊ីហ្គេម លើកទី៣៣នេះ ដែលកំណត់ដោយម្ចាស់ផ្ទះថៃ គឺគេប្រើលក្ខន្តិកប្រកួតបែប Muay Thai មិនមែនបែបគុនខ្មែរ ដូចស៊ីហ្គេម ឆ្នាំ២០២៣នោះទេ។
នៅត្រង់ចំណុចនេះ លោក ខូវ ឆាយ បញ្ជាក់ថា៖ «យើងដឹងហើយថា ការប្រកួតស៊ីហ្គេម មានពាក់ឧបករណ៍ការពារ អ៊ីចឹងកីឡាករមួយចំនួនគាត់ល្អមែន តែល្អបានតែការប្រកួតអាជីព ប៉ុន្តែពេលទៅប្រកួតបែបស្ម័គ្រចិត្ត វាយយកពិន្ទុ មានពាក់ឧបករណ៍ការពារ គាត់វាយអត់បានពិន្ទុទេ។ គាត់អត់មានក្បាច់ មានក្បួន និងមានទម្រង់ក្នុងការប្រកួតបែបហ្នឹងឡើយ ជាពិសេសយើងដឹងថា ការប្រកួតនៅប្រទេសថៃ ច្បាប់គេប្រើបែបណា ហើយកីឡាករណា ដែលសមស្របទៅនឹងការអនុវត្តច្បាប់ប្រកួតបែបនោះ អ៊ីចឹងយើងត្រូវតែជ្រើសរើសឱ្យបានត្រឹមត្រូវ»៕
