ក្រុម FC Arkadag ពេលឈ្នះពានការប្រកួត Turkmenistan Football Federation Cup។ រូបថត FC Arkadag
ក្រុមម្ចាស់ជើងឯករបស់តួកមេគីស្ថាន FC Arkadag បានធ្វើដំណើរមកដល់ប្រទេសកម្ពុជាហើយ ដើម្បីត្រៀមការប្រកួតផ្តាច់ព្រ័ត្រពានរង្វាន់ AFC Challenge League ជាមួយក្រុមព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ នាថ្ងៃទី១០ ខែឧសភានេះ ខណៈសំបុត្រសម្រាប់ចូលទស្សនារវាងក្រុមទាំង២នេះជាង៥ម៉ឺនសន្លឹក ត្រូវបានលក់អស់គ្មានសល់ទេ។
ក្រុម FC Arkadag ក្រោមការដឹកនាំរបស់គ្រូបង្គោល លោក Dovletmyrat Annayev បានធ្វើដំណើរមកដល់ព្រលានយន្តហោះអន្តរជាតិភ្នំពេញ នាអំឡុងម៉ោងជិត១២ ថ្ងៃពុធនេះ ហើយវាក៏ជាលើកដំបូងដែរ ដែលក្លិបនៅអាស៊ីកណ្តាលមួយនេះ បានធ្វើដំណើរមកដល់ទឹកដីកម្ពុជា ខណៈ FC Arkadag គឺជាក្រុមខ្លាំងបំផុត របស់តួកមេគីស្ថាន ក្នុងរយៈពេល២ឆ្នាំចុងក្រោយនេះ។
ដោយត្រូវបង្កើតឡើង នៅថ្ងៃទី១ ខែមេសា ឆ្នាំ២០២៣ FC Arkadag មានកីឡដ្ឋានឈ្មោះ Arkadag និងមានមូលដ្ឋាននៅទីក្រុង Arkadag ផ្ទាល់តែម្តង ហើយលោក Gurbanguly Berdimuhamedow អតីតប្រធានាធិបតីរបស់តួកមេនីស្ថាន (២០០៦-២០២២) គឺជាស្ថាបនិកបង្កើតក្លិបមួយនេះ។
ដោយសារលោក Gurbanguly Berdimuhamedow ជាបុគ្គលមានអំណាចខ្លាំងមួយរូបនៅក្នុងប្រទេស ព្រោះលោកធ្លាប់ជាអតីតប្រធានាធិបតីទី២របស់តួកមេនីស្ថាន ហើយកូនប្រុសរបស់លោក ឈ្មោះ Serdar Berdimuhamedow ក៏កំពុងកាន់តំណែងជាប្រធានាធិបតីទី៣បន្តរបស់តួកមេគីស្ថានផងដែរ បានធ្វើឱ្យ FC Arkadag ក្លាយជាក្លិបមានមូលដ្ឋានរឹងមាំ និងមានអឥទ្ធិពលជាងគេ។
កីឡាករឆ្នើមៗ នៅតួកមេគីស្ថាន បាននាំគ្នាមករួមរស់ជាមួយ FC Arkadag ធ្វើឱ្យក្រុមមួយនេះ មានធនធានកីឡាករល្អៗ ប្រៀបដូចជាក្រុមជម្រើសជាតិតួកមេគីស្ថានទៅហើយ ហេតុនេះសម្រាប់ការប្រកួតប្រជែង២រដូវកាលមកនេះ ក្រុម Arkadag បានឈ្នះជើងឯកលីគ Yokary Liga ទាំង២រដូវកាល និងបានឈ្នះគ្រប់ការប្រកួតទាំងអស់។
ក្រុម FC Arkadag របស់តួកមេគីស្ថាន ពេលធ្វើដំណើរមកដល់ព្រលានយន្តហោះអន្តរជាតិភ្នំពេញ កាលពីព្រឹកថ្ងៃពុធនេះ។ រូបថត BTV
បន្ថែមលើនេះ ក្រុម Arkadag ក៏បានឈ្នះគ្រប់ការប្រកួតដណ្តើមពាន ដែលរៀបចំដោយសហព័ន្ធកីឡាបាល់ទាត់តួកមេគីស្ថានផងដែរ ដូចជា Turkmenistan Cup ឆ្នាំ២០២៣ និងឆ្នាំ២០២៤ , Turkmenistan Super Cup 2024 និង Turkmenistan Football Federation Cup 2025 ខណៈការប្រកួតលីគ Yokary Liga រដូវកាលឆ្នាំ២០២៥នេះ ក្រុម Arkadag បានឈ្នះទាំង៥ប្រកួតជាប់ៗគ្នា និងកំពុងឈរនៅលេខ៣ ជាបណ្តោះអាសន្ន ដោយសារក្រុមកំពុងឈរនៅលេខ១ Ahal ប្រកួតបាន៧ដងហើយ និងក្រុមឈរលេខ២ Altyn Asyr ប្រកួតបាន៨ដង។
យ៉ាងណាក៏ដោយ ការទាញយកកីឡាករល្អៗ មកចូលរួមជាមួយក្រុមតែមួយនេះ បានធ្វើឱ្យក្លិបនៅក្នុងស្រុកផ្សេងទៀត ក៏ដូចជាទស្សនា មិនសូវពេញចិត្ត និងគាំទ្រក្លិប FC Arkadag នោះទេ ព្រោះការធ្វើបែបនេះ បានធ្វើឱ្យការប្រកួតប្រជែងលីគ Yokary Liga របស់តួកមេគីស្ថានរយៈពេល២រដូវកាលមកនេះ លែងសូវមានភាពទាក់ទាញ ដោយសារក្រុម Arkadag មានគម្លាតដាច់ពីក្រុមផ្សេងៗពេក។
ជាមួយហេតុផលនេះ ក្រុម FC Arkadag ពិតជាចង់ដណ្តើមយកជ័យជម្នះលើក្រុមព្រះខ័នរាជស្វាយរៀង ដើម្បីយកពាន AFC Challenge League នេះត្រឡប់ទៅកាន់ប្រទេសតួកមេគីស្ថានវិញ ដើម្បីជាការលួងចិត្ត ក៏ដូចជាទាញយកការចាប់អារម្មណ៍ពីអ្នកគាំទ្រនៅក្នុងប្រទេសខ្លួន សម្រាប់ការចេញមកប្រកួតប្រជែងក្នុងពានរង្វាន់ AFC Challenge League ជាលើកដំបូងនេះ។
យ៉ាងណាក៏ដោយគ្រូបង្គោលក្រុមព្រះខ័នរាជស្វាយរៀង លោក Pep Munoz ក៏ចង់យកការប្រកួតផ្តាច់ព្រ័ត្រពាន AFC Challenge League នៅថ្ងៃទី១០ ខែឧសភានេះ ជាថ្ងៃជប់លៀងបាល់ទាត់ សម្រាប់ប្រជាជនកម្ពុជាដូចគ្នា ហើយការបង្ហាញពីមហិច្ឆតានេះ បានធ្វើឱ្យអ្នកគាំទ្រកម្ពុជា កាន់តែអន្ទះសារចង់ឃើញ និងបាននាំគ្នាទៅទិញសំបុត្រឡើងអស់ទៅហើយ ដើម្បីបានទៅគាំទ្រដល់ក្រុមស្វាយរៀង ផ្ទាល់តែម្តង។
ជុំវិញការលក់សំបុត្រនេះ ក្លិបព្រះខ័នរាជស្វាយរៀង បានប្រកាសនៅព្រឹកថ្ងៃពុធនេះថា៖ «យើងមានក្តីសោមនស្សរីករាយជម្រាបជូនថា សំបុត្រចំនួន ៥៣០០០សំបុត្រ ត្រូវបានលក់អស់ហើយ! យើងខ្ញុំសូមថ្លែងអំណរគុណយ៉ាងជ្រាលជ្រៅ សម្រាប់ការគាំទ្រព្រឹត្តិការណ៍ជាប្រវត្តិសាស្រ្តមួយនេះ»។
តាមរយៈការបញ្ជាក់នេះ គឺមានន័យថា ការប្រកួតវគ្គផ្តាច់ព្រ័ត្ររបស់ក្រុមព្រះខ័នរាជស្វាយរៀង និងក្រុម FC Arkadag នៅពហុកីឡដ្ឋានជាតិមរតកតេជោ នាយប់ថ្ងៃទី១០ ខែឧសភានេះ គឺមានអ្នកគាំទ្រទៅទស្សនាផ្ទាល់ច្រើនបំផុត មិនធ្លាប់មាននោះទេ ហើយកម្លាំងគាំទ្រនេះ នឹងធ្វើឱ្យក្រុមស្វាយរៀង កាន់តែមានកម្លាំងចិត្ត ក្នុងការប្រជែងយកពាន AFC Challenge League ជាលើកដំបូងនេះ៕
