ការហាត់សមរបស់កងកម្លាំងកងរាជអាវុធហត្ថរាជធានីភ្នំពេញ នៅពហុកីឡដ្ឋានជាតិមរតកតេជោ ដើម្បីត្រៀមស្វ័យប្រតិកម្ម ការពារសន្និសុខ និងសណ្តាប់ធ្នាប់ ក្នុងការប្រកួតផ្តាច់ព្រ័ត្ររវាងក្រុមស្វាយរៀង និងក្រុម FK Arkadag។ រូបថត រ័ត្ន ស្រ៊ាង
នាយកគ្រប់គ្រងទូទៅនៃក្រុមហ៊ុនខេមបូឌានព្រីមៀរលីគ (CPL) លោក Peter Koo បានបង្ហាញពីចេតនា ចង់ឃើញក្រុមព្រះខ័នរាជស្វាយរៀង របស់កម្ពុជា ទទួលបានជ័យជម្នះលើក្រុម FK Arkadag របស់តួកមេគីស្ថាន ក្នុងការប្រកួតផ្តាច់ព្រ័ត្រពានរង្វាន់ AFC Challenge League នៅពហុកីឡដ្ឋានជាតិមរតកតេជោ នាព្រលប់ថ្ងៃទី១០ ខែឧសភានេះ។ ជាមួយគ្នានេះ កងរាជអាវុធហត្ថរាជធានីភ្នំពេញ ក៏បានត្រៀមកម្លាំង ដើម្បីការពារសន្តិសុខនាជំនួបជាប្រវត្តិសាស្រ្តរវាងក្រុមទាំង២នេះដែរ។
លោក Peter Koo បានចាត់ទុកការប្រកួតផ្តាច់ព្រ័ត្ររវាងក្រុមស្វាយរៀង និងក្រុម Arkadag នេះ ជាការប្រកួតដ៏កម្រ និងជាប្រវត្តិសាស្រ្តសម្រាប់វិស័យបាល់ទាត់នៅកម្ពុជា ហេតុនេះលោកបានទទួចសុំឱ្យទស្សនិកជន ទៅចូលរួមគាំទ្រដល់ក្រុមស្វាយរៀង ឱ្យបានច្រើន ដើម្បីឱ្យក្រុមនេះ អាចដណ្តើមបានជ័យជម្នះ ហើយអាចយឹតយោងក្រុមតំណាងឱ្យកម្ពុជា បានទៅលេង ពានរង្វាន់លំដាប់ទី២ ប្រចាំទ្វីបអាស៊ី។
លោកបានបញ្ជាក់ថា៖ «ការជួបគ្នារវាងក្លិបព្រះខ័នរាជស្វាយរៀង ជាមួយក្លិបបាល់ទាត់ Arkadag នៅវគ្គផ្តាច់ព្រ័ត្រ ថ្ងៃទី១០ ខែឧសភានេះ ជាឱកាសដ៏កម្រលើកទី១នៃប្រវត្តិសាស្រ្តបាល់ទាត់យើង សម្រាប់បាល់ទាត់អាជីពនៃក្របខ័ណ្ឌខេមបូឌានព្រីមៀរលីគ»។
លោក Peter Koo បានបន្ថែមថា៖ «បើសិនជាលើកនេះ យើង (ក្រុមស្វាយរៀង) អាចទទួលបានលទ្ធផលល្អ ក្នុងពាន AFC Challenge League យើងនឹងមានឱកាសឡើងទៅលេងនៅពានរង្វាន់លំដាប់ទី២ ប្រចាំទ្វីបអាស៊ី នៅរដូវកាលក្រោយ ដូច្នេះយើងត្រូវការបងប្អូនទាំងអស់គ្នា ទៅចូលរួមគាំទ្រលើកទឹកចិត្ត នៅពហុកីឡដ្ឋាន និងផ្សាយផ្ទាល់តាមរយៈ BTV អ៊ីចឹងកុំភ្លេចចូលរួមជាមួយគ្នា»។
លោក Peter Koo ពេលចែករំលែកបទពិសោធន៍ផ្នែកបាល់ទាត់ ទៅដល់តំណាងក្លិបក្នុងលីគកំពូល កន្លងមក ខណៈថ្ងៃទី១០ ខែឧសភានេះ លោកបានទទួចសុំឱ្យមានការគាំទ្រឱ្យបានខ្លាំងដល់ក្រុមស្វាយរៀង ដើម្បីអាចយកឈ្នះក្រុម Arkadag។ រូបថត CPL
ជាមួយគ្នានេះ កងរាជអាវុធហត្ថរាជធានីភ្នំពេញ បាននាំយកកម្លាំងជាច្រើននាក់ ទៅហាត់សម នៅពហុកីឡដ្ឋានជាតិមរតកតេជោ ដើម្បីត្រៀមស្វ័យប្រតិកម្ម ចំពោះហេតុការណ៍អាសន្ន ដើម្បីធានាសន្តិសុខសណ្តាប់ធ្នាប់ និងសង្គ្រោះបន្ទាន់ នៅក្នុងការប្រកួតផ្តាច់ព្រ័ត្ររវាងក្រុមព្រះខ័នរាជស្វាយរៀង និងក្រុម FK Arkadag នេះដូចគ្នា។
សកម្មភាពហាត់សមនេះ ត្រូវបានលោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បង្ហាញនៅលើផេចហ្វេសប៊ុករបស់លោក កាលពីរសៀលម៉ោង២ ថ្ងៃសុក្រនេះ។
ការបង្ហាញការហាត់សមរបស់កងកម្លាំងនេះ បានធ្វើឱ្យមហាជន ជាពិសេសអ្នកគាំទ្រមានការភ្ញាក់ផ្អើលច្រើន ប៉ុន្តែលោក រ័ត្ន ស្រ៊ាង បានបញ្ជាក់តាមការបង្ហោះសារនោះថា «ការពារប្រសើរជាងព្យាបាល!»។ ការធ្វើបែបនេះ ដោយសារជំនួបផ្តាច់ព្រ័ត្រពាន AFC Challenge League មានអ្នកគាំទ្រច្រើន គឺគ្រាន់តែអ្នកបានទិញសំបុត្រទៅទស្សនាផ្ទាល់ មានចំនួន៥៣០០០នាក់ទៅហើយ ដោយមិនទាន់គិតពីអ្នកពាក់ព័ន្ធផ្សេងៗទៀតផង។
លោក រ័ត្ន ស្រ៊ាង បានបន្ថែមថា៖ «គ្រាន់តែជាការហាត់សម ត្រៀមស្វ័យប្រតិកម្ម ចំពោះហេតុការណ៍អាសន្ន ដើម្បីធានាសន្តិសុខសណ្តាប់ធ្នាប់ និងសង្គ្រោះបន្ទាន់ ក្នុងព្រឹត្តិការណ៍ប្រកួតបាល់ទាត់ពានរង្វាន់ AFC Challenge League 2024/2025 វគ្គផ្តាច់ព្រ័ត្រ ដែលប្រព្រឹត្តទៅនៅថ្ងៃទី ១០ ខែឧសភា ឆ្នាំ២០២៥ នាថ្ងៃស្អែក វេលាម៉ោង ៧:០០ នាទីយប់ ក្នុងពហុកីឡដ្ឋានជាតិមរតកតេជោ រវាងក្រុមព្រះខ័នរាជស្វាយរៀង (កម្ពុជា) និង ក្រុម FK Arkadag (តួកមេគីស្ថាន)»៕
